19
Sauli kangujeza kumkopola Daudi
1 Hamba Sauli nakalonga na mwana wa heye Yonatani na vitumagwa wa heye weng'ha mbuli ya kumkopola Daudi. Ila Yonatani, mwana wa Sauli, nakamgana lukami Daudi.
2 Kwa chiwalo acho, Yonatani nakamlonjela Daudi, “Mhaza wa heni kangugana kukukopola, lelo wiyamile goya, zuwa liyage lufuku wivise honhu ha uviso.
3 Nani ndolawa na kwima kumwando kwa mhaza wa heni ako kumgunda kouwele hegwe. Ndolongasa na mhaza mbuli za hegwe, wone ndiizele mbuli ya hegwe yoneche kulawa kwa heye, ndokulonjela.”
4 Yonatani nakalonga ganojile kuwala Daudi hali Sauli mhaza wa heye, nakamlonjela, “Uleche kudita wihe kwa chitumagwa wa hegwe Daudi, kwa vila heye hakuditile wihe hegwe na madito ga heye geng'ha kwa hegwe nagali ga kukutanza hegwe.
5 Kwa vila nakawika ukomu wa heye kuli moko ga heye kwa kumkopola yula Goliati, Mkulu Nguluwi nakawaditila Waisilaeli weng'ha ulohozi ukulu. Gwegwe baho nakona mbuli ayo nakusangalala. Lekachoni kwangugana kubohola danda haiwele na nongwa kwa kumkopola Daudi ne chiwalo?”
6 Sauli nakamhulichiza Yonatani, naye Sauli kahi nakelaha, “Kota vyoyalingikala Mkulu Nguluwi, simkopola Daudi hebu.”
7 Yonatani nakamchema Daudi na kumlonjela mbuli azo zeng'ha. Hamba Yonatani nakamhilika Daudi koyawele Sauli, Daudi nakakola mijito kota aho mwaluko.
8 Hamba nakwali na ngondo kahi ya Wafilisti na Waisilaeli, Daudi nakalawa kitowa na Wafilisti. Nakawatowa kwa mong'ho ng'hatu mbaka nawabilima.
9 Muhe yehile kulawa kwa Mkulu Nguluwi nawuya kahi kwa Sauli mhela Sauli loyawele haluga ha heye na igoha kuli moko wa heye, Daudi nayali yotowa ching'hweleng'hwele.
10 Sauli nakajeza kumtowa Daudi kuli lukanzi kwa lila igoha lya heye, ila Daudi nakakwepa lila igoha, igoha nalitowa lukanzi. Daudi nakabilima nechilo yiyila.
11 Sauli nakalajiza kahi walume haluga ha Daudi, leka wapale mhumu ya kumkopola lufuku yila. Ila Mikali mche wa Daudi nakamlonjela Daudi, “Wone nakulemwela kusulupuka nechilo ayi, mitondo kokopoligwa.”
12 Mikali nakamdulisa Daudi kwa kukolela kuli itubuli lya ng'handa ya hewo, Daudi nakalawa na kubilima.
13 Mikali nakahola limalukolo, nakaliwika mchinhanda na kumutwi kwake nakawika chinhu cha milaika ja mhene cha kuwichila mutwi na kuchigubika na ivalo.
14 Sauli vyoyawalajize walume wamibate Daudi, Mikali nakawalonjela wala wanhu kota Daudi kangutamika.
15 Sauli nakawalajiza walume leka wamlole Daudi, nakalonga, “Mmigale hano kwa heni mli chinhanda cha heye leka ndimkopole.”
16 Lowenjile kuli ng'handa ya Daudi, wala walume walajizwe na Sauli, nawalifika limalukolo mchinhanda na chinhu cha milaika ja mhene cha kuwichila mutwi kumutwi kwa alyo limalukolo.
17 Sauli nakamlonjela Mikali, “Lekachoni kwangumbada? Nakumleka mng'honyo wa heni yalute?” Mikali nakamwidichila, “Heye nakandonjela, ‘Undechele ndute leka ndeche kukukopola.’ ”
18 Daudi loyabilime, nakaluta kwa Samweli ako Lama. Nakamlonjela mbuli zeng'ha zoyamditile Sauli. Hamba Daudi na Samweli nawaluta kikala ako Nayoti.
19 Sauli nakapegwa mbuli kota Daudi ka kula Nayoti ako Lama.
20 Sauli nakalajiza walume leka wamibate Daudi. Nawo lowawachifichile chilundo cha waloli wangulavya uloli na Samweli kangulongoza chilundo acho, muhe wa Nguluwi nawuya kwa wala walume wa Sauli, nawo nawaluka kulavya uloli.
21 Sauli loyahuliche mbuli azo, nakalajiza walume wanji kahi, nawo nawaluka kulavya uloli. Sauli nakalajiza walume wanji lwa kadatu, nawo nawalavya uloli kahi.
22 Sauli nakaluta Lama. Loyafichile kuli ideho ikulu ako Seku, nakamfika munhu yumwe, nakamuuza, “Wakohi Samweli na Daudi?” Yula munhu nakamwidichila, “Samweli na Daudi wa ako Nayoti, Lama.”
23 Sauli nakaluta kuko Nayoti ako Lama. Muhe wa Nguluwi nawuya kwa heye, nakaluka kulavya uloli kulawa mnzila mbaka loyafichile Nayoti.
24 Kota wamlongole, nakalavya mikanzu ja heye yolavya uloli hali Samweli. Nayali hihyo ne nguwo kwa zuwa limwe nemisi na nechilo. Wanhu nawaluka kiuza hewo kwa hewo, “Ndaze, Sauli kahi ka yumwe wa waloli?”