11
Sauli kanguwasumya Waamoni
1 Mndewa Nahashi, Mwamoni, nakakwina na wamizi kuuzunguluta muji wa Yabeshi-gileadi. Wanhu weng'ha wa muji awo nawamlonjela Nahashi, “Udite ilagano na hetwe, towa hali ulongozi wa hegwe.”
2 Ila Nahashi Mwamoni, nakedichila, “Ndodita ilagano na hemwe wone mokunda heni kulavya iziho lya kudilo lya chila yumwe wa hemwe, leka ndiwabase soni wanhu weng'ha wa Isilaeli.”
3 Vilongozi wa muji awo nawalonga, “Tuleche kwa mazuwa saba leka tuwalajize wasenga walute kuli isi yeng'ha ya Isilaeli, wone kuwe kuduhu munhu ne yumwe yalinguya kutulohola, tochiwika hali moko ga hegwe.”
4 Wasenga lowafichile Gibeya ya Sauli na kulonga kuwala mbuli azi kwa wanhu, wanhu weng'ha nawalila kwa lizi ng'hulu.
5 Mhela wuwo Sauli nayali yohiluka kulawa kumgunda, yawele kumbele kwa isenga ibuguma lya heye, Sauli nakauza, “Wanhu wana choni? Lekachoni wangulila?” Aho ndo nawamlonjela ndaze wanhu wa Yabeshi vyowalonjile.
6 Sauli loyahuliche ulonzi awo, Muhe wa Nguluwi naumuyila mchanya mwake kwa mong'ho, nakazudila ng'hatu.
7 Nakajihola misenga mili mibuguma na kujidumula vihande vihande, hamba nakavilajiza vihande avyo kukolela wasenga kuli Isilaeli yeng'ha, wowikula, “Munhu yoneche yohambe yawawinze kumbele kwa Sauli na Samweli, misenga ja heye joditigwa hihi!” Kwa kukolela mbuli ayi, Mkulu Nguluwi nakawadita wanhu wa Isilaeli wadumbe, ahyo weng'ha nawalawa hamwe.
8 Sauli loyawakungajize ako Beseki, wanhu wa Isilaeli nawali lachi zidatu (300,000) na wanhu wa Yuda nawali elufu makumi gadatu (30,000).
9 Nawawalonjela wala wasenga woyile kulawa Yabeshi, “Muwalonjele wanhu wa Yabeshi-gileadi, ‘Mitondo mhela wa isanya liwele ling'hali kuwa ling'ang'ale, mowa mloholigwe.’ ” Wanhu wa Yabeshi lowahuliche mbuli ayo, nawasangalala lukami.
10 Wanhu wa Yabeshi nawawalonjela Waamoni, “Mitondo tochiwika mmoko mwa hemwe, namwe motuditila choneche chomkona chinoga.”
11 Mitondo, Sauli nakawawika wanhu wa heye kuli vilundo vidatu, nawenjila lufuku kuli kambi ya wang'honyo, nawawatowa Waamoni. Loifichile nemisi, wang'honyo wenji nawali wakopoligwe. Wala waponile nawabilima, haduhu ne wanhu weli walechigwe hamwe.
Sauli kangutawizwa kuwa mndewa
12 Hamba wanhu nawamlonjela Samweli, “Wakohi wanhu weuzile, ‘Ndaze, Sauli kowa chilongozi wa hetwe?’ Uwegale hano wanhu awo, tuwakopole.”
13 Ila Sauli nakawalonjela, “Kuduhu munhu ne yumwe yokopoligwa lehano, kwa vila kuli zuwa ali Mkulu Nguluwi nakailohola Isilaeli.”
14 Aho ndo Samweli nakawalonjela wanhu, “Muye, tulute Giligali, ako toutawiza undewa wa heye.”
15 Ahyo wanhu weng'ha nawaluta Giligali na kumtawiza Sauli kota ndo mndewa hali Mkulu Nguluwi. Ako nawalavya nhambiko ya kikala goya hali Mkulu Nguluwi. Sauli hamwe na Waisilaeli weng'ha nawasangalala ng'hatu.