96
Nguluwi ndo mndewa na mtagusa
(1 Mihela 16:23-33)
1 Mumwimbile Mkulu Nguluwi lwimbo lunyale.
Mumwimbile Mkulu Nguluwi, isi yeng'ha.
2 Mumwimbile Mkulu Nguluwi na kulitogola itagwa lya heye.
Mdamle chila zuwa madito ga heye ga ulohozi.
3 Muuwikule ukulu wa heye hali wanhu wa isi zeng'ha,
muwalonjele wanhu weng'ha madito ga heye ga vinduzanduza.
4 Kwa vila Mkulu Nguluwi ndo mkulu, kangutogoligwa ng'hatu,
kanguganigwa kudumbigwa kusinda milungu jeng'ha.
5 Kwa vila milungu jeng'ha ja wanhu ndo jimalukolo hela,
ila Mkulu Nguluwi nakalumba ulanga.
6 Ukulu na lutogo vya hali heye,
mong'ho na kunoga vyangumemeza ng'handa ya heye.
7 Mumhe Mkulu Nguluwi lutogo, hemwe ivyazi za isi yeng'ha,
ena, mumtogole kwa ukulu na mong'ho wa heye.
8 Mumfugamile Mkulu Nguluwi kwa ukulu wa itagwa lya heye,
migale nhambiko na muye hali lugagala lwa heye.
9 Mumfugamile Mkulu Nguluwi kuli welile ng'hatu wa heye,
Ukakame hali heye, hegwe isi yeng'ha.
10 Muwalonjele wanhu wa isi zeng'ha,
“Mkulu Nguluwi kangulongoza!
Ena, isi yeng'ha nayima nzinzili, haitigasika hebu.
Kowatagusa wanhu kwa hachi.”
11 Usangalale hegwe ulanga,
utowe luchenze hegwe isi,
bahali ibogome na vyeng'ha viwele mumo.
12 Msangalale hemwe migunda na vyeng'ha viwele mumo.
Hamba migodi jeng'ha ja kisolo,
jokwimba kwa usangalalo,
13 hali Mkulu Nguluwi, kwa vila kanguya,
ena, kanguya kuitagusa isi yeng'ha.
Koitagusa isi kwa hachi,
na wanhu wa isi kwa kukundigwa kwa heye.