83
Kulanda kuwasumya wang'honyo wa Isilaeli
(Lwimbo. Zabuli ya Asafu.)
1 Gwa Nguluwi, uleche kuwa tulu,
uleche kunyamalila gwa Nguluwi, ne kusindamala.
2 Lole wang'honyo wa hegwe wangudita ivuche,
walingukuzudila wangwinula vitwi ne kudumba.
3 Wangiwika goya kwa wihe kuwaditila vibi wanhu wa hegwe,
wangilongasa kwa chiwalo cha hewo ulinguwamila.
4 Wangulonga, “Muye tuwadumye wanhu wa isi,
itagwa lya Isilaeli lileche kukumbuchilwa kahi.”
5 Ena, wangikundiza kwa nhumbula imwe,
wangilaha kilumba hamwe leka kukulema.
6 Wanhu wa Edomu na Waishimaeli,
Wamoabu na wanhu wa Hagali,
7 wanhu wa Gebali na Amoni na Amaleki,
wanhu wa Filistiya na wenyeng'haye wa Tilo wangilumba,
8 mbaka Ashulu nailumba na hewo,
nawekundiza kuwatanza walelwa wa Loti.
9 Uwadite kota vyouwaditile wanhu wa Midiani,
vyouwaditile Sisela na Yabini kuli lwanda lwa Kishoni.
10 Wanhu wouwadumile kula Eni-doli,
nawali midohe mchanya mwa isi.
11 Uwadite wakulu wa hewo kota Olebu na Seebu,
vilongozi wa hewo weng'ha kota Seba na Salimuna,
12 wawele nawalonga, “Tochiholela honhu ha Nguluwi ha kudimila.”
13 Gwa Nguluwi wa heni, uwadite kota nhimbwisi,
kota mhumba zikalile zilinguholigwa na mbeho.
14 Kota vila chiluli chilingulakaza chihulo,
na milapi ja chiluli vyojilingulakaza vidunda,
15 uwabilimise hewo kwa chivuluvumbi cha hegwe,
na kuwakabusa kwa mbeho ya hegwe ng'hulu.
16 Uwadite wawe na soni,
leka wakupale, gwa Mkulu Nguluwi.
17 Wabasigwe soni na kusanzalima mazuwa gose,
wadumigwe kwa soni ng'hatu.
18 Wavizele kota hegwe, uwele itagwa lya hegwe ndo Mkulu Nguluwi,
hegwe uliyeka ndo Nguluwi Yawele Kuchanya yalingulongoza isi yeng'ha.