80
Kulanda kwa chiwalo cha wanhu wa isi
(Kwa yalingwaluchiza kwimba. Kwa kiwhana na yunjiyunji. Zabuli ya Asafu.)
1 Uhulichize, gwa Mdimi wa Isilaeli,
ulinguwalongoza walelwa wa Yusufu kota ming'holo.
Hegwe ulingulongoza hali vilumbigwe viwele na mabawa,
ulangaze
2 hali Efulaimu na Benjamini na Manase.
Ulajile ludali lwa hegwe, uye kutulohola.
3 Gwa Nguluwi utuhiluse,
utulole kwa kunoga, natwe toloholigwa.
4 Gwa Mkulu Nguluwi, Nguluwi uwele na mong'ho,
mbaka hanili kokuzudila kulanda kwa wanhu wa hegwe?
5 Nakudita masinzo gawe chilyo cha hetwe,
nakutunweza mahozi kwa winji.
6 Nakutudita tubezigwe na wotulingikalasa habehi,
wang'honyo wa hetwe wangutuseka.
7 Gwa Mkulu Nguluwi uwele na Mong'ho, utuhiluse,
utulole kwa kunoga, natwe toloholigwa.
8 Hegwe nakigala mzabibu kulawa Misili,
nakuwawinga wanhu wa isi zinji,
na kuunyala kuli isi ya hewo.
9 Nakuulolela goya leka ukule,
najo mizabi najiluta hanyi ng'hatu na kwenela kweng'ha muisi.
10 Nakuvigubika vidunda kwa isisila lyake,
nhagala zake nazigubika mielezi mikulu.
11 Nhagala zake nazenela mbaka kuli bahali,
mizuchila jake mbaka hafungo mwa lwanda lwa Eyufulate.
12 Lekachoni nakubomola lukanzi lulinguzunguluta,
lelo chila yalingukola mnzila kangukwanyula zabibu zake?
13 Migubi ja kisolo janguuwifya,
na migongolo ja kisolo janguudakula.
14 Utuhinduchile kahi, gwa Mkulu Nguluwi uwele na Mong'ho.
Ulole kulawa kilanga, wone,
ukaulolele mzabibu awo.
15 Ulyamile izuchila lyoulinyalile kwa moko wa hegwe wa kudilo,
alyo izuchila lyoulimize nzinzili gwegwe.
16 Mzabibu wa hegwe naudumuligwa na kulakazwa kwa chiluli,
vyouwang'hanuchila, wanhu wa hegwe wangudumigwa.
17 Moko wa hegwe wa kudilo umwamile ayo youmganile,
ayo youmhagule kwa chiwalo cha hegwe.
18 Hamba hatukuleka na kukubelenhuka kahi,
ututambichize ukomu, natwe tolichema itagwa lya hegwe.
19 Gwa Mkulu Nguluwi uwele na Mong'ho, utuhiluse,
utulole kwa kunoga, natwe toloholigwa.