76
Nguluwi kangusumya
(Kwa yalingwaluchiza kwimba. Kwa vinhu vya ng'weso za muziki. Zabuli ya Asafu. Lwimbo.)
1 Nguluwi kanguzeleka ako Yuda
itagwa lyake ndo likulu kuli Isilaeli.
2 Haluga ha heye ndo ako Salemu,
honhu ha heye ha kikala ako Siyoni.
3 Ako nakabena misale ja wang'honyo,
nakabena ngawo na ipanga na vinhu vya kitowela ngondo.
4 Gwa Nguluwi, kuna lutogo ng'hatu,
louhiluche kulawa kuli vidunda, louwasumile wang'honyo wa hegwe.
5 Wawele na mong'ho nawasukulwa vinhu vya hewo navyowaholile kuli ngondo,
lelo nawawasa usinjizi wa kubagama,
wazidahe kitowa ngondo hawawezile kitowa ne hado.
6 Gwa Nguluwi wa Yakobo, louwang'hanuchile,
falasi na wakwina falasi nawawasa usinjizi wa kubagama.
7 Gwa Nguluwi, hegwe uliyeka ndo wa kukabusa ng'hatu.
Whaani yoweza kwima hali hegwe houzudila?
8 Nakuuwikula utaguso wa hegwe kulawa kilanga,
isi naidumba na kunyamalila,
9 hegwe Nguluwi, mhela lowinuche kudita utaguso,
kuwalohola weng'ha walingubunzwa muisi.
10 Kuzudila kwa wanhu kwangwambuza hela lutogo kwa hegwe,
houwika goya ng'halazi ya hegwe isigale.
11 Mumwenezele Mkulu Nguluwi, Nguluwi wa hemwe kulagana kwa hemwe,
hemwe muwele habehi mumhe ndolendole Nguluwi wa kukabusa.
12 Heye kangubenaga muhe wa wakulu,
kanguwakabusaga wandewa wa isi.