Chitabu cha Kadatu
73
(Zabuli 73-89)
Hachi yolongoza
(Zabuli ya Asafu.)
1 Ndangukomya, Nguluwi ndo yanojile kwa wanhu wa Isilaeli,
ndo yanojile kwa wanhu welile mnhumbula.
2 Behi ng'hatu ndahakwang'wale,
hado hela ndahatelele,
3 kwa vila nandiwonela fihi walingidaya,
londiwene mbuli za wehile zangulutilila goya.
4 Kwa vila hewo hambe wafichigwe na magazo,
ng'huli za hewo za goya na nazineneha.
5 Magazo ga wanhu hagawafichile hewo,
hawasumbuligwe kota wanhu wanji.
6 Kidaya kuwa ugasi wa hewo misingo,
kitowa ndo kota nguwo za hewo.
7 Meho ga hewo gangumemaga wihe,
nhumbula za hewo zangulavya majesa gehile.
8 Wanguwalonjeleza wanji na kulonga gehile,
wangidaya na kiwika goya kubunza.
9 Kwa milomo ja hewo wangulonga kota wangulongoza kilanga,
na kwa umyango wa hewo kota wangulongoza isi.
10 Mbaka wanhu wa heye wanguwawinza,
hambe wone choneche chihile kwa hewo
na kukunda chila chowalingulonga.
11 Wangulonga, “Nguluwi howeza kuvizela?
Ndaze, Nguluwi Yawele Kuchanya howeza kuvizela choneche?”
12 Ulole, wanhu wehile vyowawele!
Wana chila chinhu na wangupata lufufu mzidi.
13 Ndaze, ndilolela hihi hela welile mnhumbula,
na kiyamila ndeche kudita gehile?
14 Nemisi yeng'ha nhowigwa,
chila mitondo nafichigwa na magazo.
15 Wone ndahalonjile ago hazelu kota hewo,
ndahawele mwihe hali walelwa wa hegwe.
16 Lelo, nanjeza kijesa kwa chiwalo cha mbuli ayi,
ila nayali mbuli inamane kwa heni kutang'hula,
17 mbaka lonyinjile honhu ha hegwe helile,
aho ndo ndivizela chowowafika wehile.
18 Ndangukomya hegwe kwanguwawika honhu kuli halingutelela,
kwanguwadita wagwe na kudumigwa.
19 Wangudumigwa baho du,
na kusigwa kwa kukabusa.
20 Gwa Mkulu, houkwinuka, hewo wangwajilila baho du,
kota kulota mhela wa munhu kulilimka mitondo.
21 Lombone usungu mnhumbula,
na kuhomwa kuli muhe,
22 nandali yasowile nyhala na mpoka,
nandali kota igongolo hali hegwe.
23 Ila, gwa Nguluwi, nda hamwe na hegwe mazuwa gose,
kwangimbata moko na kunyimiza.
24 Hegwe kwangundongoza kwa ulanguso wa hegwe,
hamba kombochela kuli ukulu.
25 Whaani yoweza kunhanza kilanga, wone hauwele hegwe?
Na muisi haduhuli chondilingugana ila hegwe.
26 Hanga ndiwe ndilihela mong'ho kuli lukuli na kuli muhe,
gwa Nguluwi, hegwe ndo italawe lya heni,
hegwe ndo honhu ha heni mazuwa gose.
27 Ulole! Yalingibagula na hegwe, ndangukomya kodumigwa,
yalingukulema kota mng'hondwa, komdumya.
28 Ila kwa heni, chondilingugana ndo kuwa habehi na Nguluwi hela.
Mkulu Nguluwi, hegwe ndo honhu ha heni ha kubilimila.
Ndowikula madito geng'ha gouditile.