65
Lwimbo lwa kuta malumbo
(Kwa yalingwaluchiza kwimba. Zabuli ya Daudi.)
1 Kwanguganigwa kutogoligwa, gwa Nguluwi, ako Siyoni,
wanhu wokwenezela hegwe kulagana kwa hewo,
2 kwa vila hegwe kwanguhulika kulanda kwa hetwe.
Wanhu weng'ha wokuyila.
3 Vyotuwele tugubikwe ng'hatu na gehile,
gwegwe baho nakugubika nongwa za hetwe.
4 Wotambichizwa wala ulinguwahagula na kigaligwa habehi,
wekale haluga ha hegwe.
Tugutizwe ganojile ga ng'handa ya hegwe,
ganojile ga ng'handa ya hegwe yelile.
5 Kwangutwidichila kwa hachi na kudita madito makulu,
gwa Nguluwi wa ulohozi wa hetwe,
hegwe ndo kitumbila kwa wanhu weng'ha,
muisi yeng'ha na kutali mbahali.
6 Kwa mong'ho wa hegwe nakuvimiza vidunda honhu hake.
Hegwe kuna mong'ho lukami,
7 ulinguvidita bahali na nhigu visindamale,
kahi ivuche lya wanhu lisindamale.
8 Weng'ha walingikala kutali wangububuwazwa kwa madito ga hegwe.
Kwangwambuza usangalalo chila honhu,
kulawa kolilawilaga isanya mbaka kolizinjilaga isanya.
9 Hegwe kwanguilolela isi kwa kuitowela nhonya,
kwanguitambichiza mboto na kujidita mizuchila jidedemche.
Lwanda lwa hegwe Nguluwi nalumema mazi heko,
kwanguidita isi iwe na vilyo vinji.
Ahi ndo vyoulinguigongomanya isi.
10 Migunda kwangujitowela nhonya nyinji,
na kujidodeza kwa mazi,
isi kwanguidita idode kwa upesi,
na kujitambichiza mizuchila jizuche.
11 Kwanguutambichiza mwaka weng'ha kwa ganojile ga hegwe,
chila houkolile nahamema ganojile.
12 Kisolo nakumema migongolo,
vidunda navyo navigubikwa usangalalo.
13 Honhu ha kudimila migongolo nakugubikwa ming'holo,
mibindi najigubikwa na ngano.
Chila chinhu changutowa luchenze na kwimba.