55
Kulanda kwa munhu yalingubunzwa
(Kwa yalingwaluchiza kwimba. Na vinhu vya ng'weso vya muziki. Ilanguso lya Daudi.)
1 Gwa Nguluwi, uwiche goya ikutu lya hegwe uhulichize kulanda kwa heni,
uleche kulola hafungo hondikulanda.
2 Uhulichize na kunyhidichila,
majesa ga heni gangunhunya na ngozola,
3 kwa lizi lya wang'honyo wa heni,
kwa kubunzwa na wehile,
kwa vila wangingalila magazo,
na kundiga kwa ng'halazi za hewo.
4 Nhumbula ya heni imema lunhwinhwi,
kukabusa kwa kubagama nakunzunguluta.
5 Ndangukakama kwa lunhwinhwi lukulu,
kukabusa kukulu nakwinjila kwa heni.
6 Wone ndahawele na mabawa kota ng'hunda,
ndahaguluche kutali na kwesela,
7 ena, ndahajendile kutali ng'hatu,
ndahawele na haluga kuchiwala.
8 Ndahabilimile kutali hawele na kikala goya,
kutali na mbeho ng'hulu na chivuluvumbi.
9 Gwa Mkulu, udumye majesa ga wehile na kuwifya ndonga ya hewo, leka walemwele kulongosa,
kwa vila ndangona nhumbula zihile na kilewa kuli muji.
10 Nemisi na nechilo wanguzunguluta kuli ng'hanzi zake,
na kuumemeza magazo na wihe.
11 Kuwifya kwangwenela kweng'ha kuli muji,
ung'honyo na udesi chila honhu.
12 Wone mng'honyo wa heni yahawele nakandiga,
ndahawezile kwimilila ago,
wone yalingitwanza na heni yahawele yambezile,
ndahawezile kivisa kutali na heye.
13 Ila hambi ndo hegwe myangu,
ndo hegwe goloko wa heni na ulinguzizela mbuli za heni zeng'ha!
14 Hetwe natuzowela kulongasa kwa kikala goya,
natujenda hamwe kuli ng'handa ya Nguluwi, hali walingufugamila wanji.
15 Leka kubagama kuwafiche wang'honyo wa heni,
waduliche kuli isi ya wabagame wawele wang'hali wakomu,
kwa vila wihe naumema mnhumbula za hewo.
16 Ila heni ndangumlilila Nguluwi,
naye Mkulu Nguluwi kondohola.
17 Mitondo na nemisi na matinazo, ndangung'ung'uta na kulila,
naye kohulika lizi lya heni.
18 Kongombola kulawa kuli ngondo yombele nayo,
hanga wang'honyo wa heni ndo wenji.
19 Nguluwi yalingulongoza kulawa mazuwa gose,
konyhulika na kuwabasa soni wang'honyo wa heni,
kwa vila hawalingugana kidita wawe wanojile,
ne kumdumba Nguluwi.
20 Myangu nakawatowa goloko wa heye,
nakabena kulagana kwa heye.
21 Ulonzi wa heye ndo udeche kusinda siagi,
ila majesa ga heye ndo kudita ngondo.
Ulonzi wa heye ndo udeche kota mafuta,
ila wangutema kota ipanga likali.
22 Mlechele Mkulu Nguluwi itunyo lya hegwe,
naye kokutanza,
homleka hebu yatanganiche yalemwele.
23 Gwa Nguluwi, kowadulisa kuli ikulubila hasi ng'hatu,
wanhu awo ndo walingukopola na wahadi,
hewo hawofika hebu ne nusu ya ukomu wa hewo.
Ila heni ndochitumbila kwa hegwe gwa Nguluwi.