37
Kulutilila goya kwa mbuli za wehile kuleche kukudeuza
(Zabuli ya Daudi.)
1 Uleche kitunya kwa chiwalo cha wehile,
uleche kuwonela fihi walingudita gehile.
2 Kwa vila hewo wokwajilila himahima kota misolo,
woswinha kota mizuchila.
3 Witumbile kwa Mkulu Nguluwi na kudita ganojile,
wikale kuli isi iwele na kikala goya.
4 Upale usangalalo wa hegwe kwa Mkulu Nguluwi,
naye kokuditila kota vyoilingugana nhumbula ya hegwe.
5 Umhe Mkulu Nguluwi ukomu wa hegwe,
witumbile kwa heye,
6 naye kokudita kunoga kwa hegwe kupuliche kota lumuli,
na hachi ya hegwe yuye kota isanya lya nemisi.
7 Usindamale hali Mkulu Nguluwi, umbeteze kwa kwimilila,
uleche kitunya kwa chiwalo cha wala wawele mbuli za hewo zanguwalutila goya,
wala walingudita goya kuli mbuli za hewo za wihe.
8 Wiyuse na ng'halazi na uleche kuzudila,
uleche kusanzalima kwa vila ako ndo kulutiliza wihe.
9 Wanhu walingudita wihe wodumigwa,
ila walingitumbila kwa Mkulu Nguluwi woihalila isi iwele heye nakalagana kuwapa.
10 Ung'hali mhela uchefu, wehile wokwajilila,
kowapala hala howawele, howona hebu.
11 Ila wawele liholile woihalila isi,
wosangalalila winji wa kikala goya na ganojile.
12 Wehile wangiwikaga goya kudita gehile kwa yatanganiche,
na kumjejedela mizino kwa kuzudila.
13 Ila Mkulu Nguluwi kanguwasekaga wehile,
kwa vila kanguvizela kota kuduma kwa hewo kwa habehi.
14 Wehile wangusomolaga mipanga ja hewo na kukwega mipinde jawo,
leka wawakopole wazunwa na walihela chinhu,
wawadumule singo wanhu walingikala kwa kugoloka.
15 Ila mipanga jawo jokwinjila kwa hewo wawo,
na mipinde jawo jobeneka.
16 Fola lufufu ludo lwa munhu yatanganiche,
kusinda lufufu lwinji lwa wehile wenji.
17 Kwa vila mong'ho wa wehile wobenangwa,
ila Mkulu Nguluwi kanguwatanza watanganiche.
18 Mkulu Nguluwi kangulolelaga ukomu wa wanhu walihela nongwa,
na uhalizi wa hewo wochikala mazuwa gose.
19 Hawobasigwa soni hojifika mihela jihile,
mazuwa ga lufemba wowa na chilyo chekwa.
20 Ila wehile wodumigwa,
wang'honyo wa Mkulu Nguluwi woswinha kota uluwa wa kuchiwala,
ena, wokwajilila kota iyosi.
21 Wehile wangwazika ne kuhilusa,
ila yatanganiche kangulavyaga kwa isungu.
22 Walingutambichizwa na Mkulu Nguluwi woihalila isi,
ila walingupanjilwa naye wodumigwa.
23 Mkulu Nguluwi kangulongozaga magulu ga munhu,
kangumwamilaga yula yamganile heye.
24 Hoyochikwang'wala, hogwa na kupona hasi,
kwa vila Mkulu Nguluwi komibata moko.
25 Nandali msongolo na sambi nda sekulu,
ila nasimuwene yatanganiche nakalechigwa,
ama wana wa heye wodedeza chilyo.
26 Mazuwa gose kanguwapaga wanji kwa kusangalala na kuwazika,
na wana wa heye ndo utambichizo.
27 Wiyuse kuli wihe, udite ganojile,
nagwe kochikala muisi mazuwa gose.
28 Kwa vila Mkulu Nguluwi kanguwagana wawele na hachi,
hambe yawaleche wanhu wa heye wa kukundigwa.
Kanguwamilaga mazuwa gose,
ila walelwa wa wehile wodumigwa.
29 Watanganiche woihalila isi,
wochikala amo mazuwa gose.
30 Munhu yatanganiche kangulongaga ulonzi wa luhala,
kwa umyango wa heye kangulongaga gawele na hachi.
31 Kangibatililaga malajizo ga Nguluwi wa heye mnhumbula mwa heye,
naye hambe yajilile kuli kudita mbuli za heye.
32 Wehile wangumpugajizaga munhu yanojile na kujeza kumkopola,
33 ila Mkulu Nguluwi homuwika hebu munhu yanojile kuli ndole za wehile,
homleka yafichigwe na nongwa hoyotagusigwa.
34 Witumbile kwa Mkulu Nguluwi na kibata nzila za heye,
naye kokwinula leka uihalile isi,
na kuwona wehile wodumigwa.
35 Ndiwona wehile wang'ang'ale,
wewichile mchanya mwa weng'ha kota mielezi ja Lebanoni.
36 Hamba nang'hola aho, nawo hawawele hala kahi,
nandiwapala ila hawoneche kahi.
37 Umjese munhu yalihela nongwa, munhu yatanganiche,
munhu yalingugana kikala goya kotambichizwa walelwa.
38 Wawele na nongwa weng'ha wodumigwa,
na walelwa wa hewo wokwajilizwa.
39 Mkulu Nguluwi kanguwaloholaga watanganiche,
na kuwamila mhela wa magazo.
40 Mkulu Nguluwi kanguwatanza na kuwalohola,
kanguwaloholaga kulawa kwa wehile na kuwawika hali kikala goya,
kwa vila wangubilimila kikala goya kwa heye.