35
Kulanda utanzi
(Zabuli ya Daudi.)
1 Gwa Mkulu Nguluwi, witwanze na walingitwanza na heni,
uwatowe hewo walingunhowa.
2 Uhole ngawo ya hegwe,
winuche uye unhanze.
3 Uwiche goya igoha na ipanga lya hegwe kwa chiwalo cha walingumbilimisa.
Undonjele kota kondohola.
4 Wabasigwe soni na kudeula,
hewo walingugana kung'hopola.
Wahiluse kumbele kwa soni,
hewo walingijesa kundumya.
5 Wawe kota mhumba hali mbeho,
lowobilimiswa na mhilisi wa Mkulu Nguluwi.
6 Nzila ya hewo iwe ya jiza na kutelela,
lowowinjigwa na mhilisi wa Mkulu Nguluwi.
7 Kwa vila ne chiwalo choneche nawambichila midiwa,
wambawila ikulubila ne nongwa yoneche.
8 Kudumigwa kuwafiche hewo himahima,
wagwilizwe kuli idiwa hewo wawo,
wagwe mgati na kudumigwa.
9 Aho ndosangalala kwa chiwalo cha Mkulu Nguluwi,
ndotowa luchenze kwa vila heye nakandohola.
10 Ndomlonjela Mkulu Nguluwi kwa nhumbula ya heni yeng'ha,
“Gwa Mkulu Nguluwi, haduhu yawele kota hegwe.
Hegwe kwanguwalohola ng'hochele kuli ndole za wawele na mong'ho,
wazunwa na walihela chinhu mmoko mwa wabokaji.”
11 Walolezi wajuvi wangilajila,
wangumbuza mbuli zohambe ndizizele.
12 Wangunyhilusila gehile honhu ha ganojile,
mbaka heni ndanguwa kuli uchiwa.
13 Ila hewo nalowawele watamwa,
heni navala migunila kulajila masinzo,
nandingaza kwa kuleka kulya.
Ndilanda kwa kinamiza mutwi,
14 kota ndangumlilila goloko wa heni ama mng'holozangu.
Nanduta nandinamiza mutwi kwa masinzo,
kota munhu yalingulombocheza kubagama kwa mayake.
15 Ila vyondikwang'hwale nawekungajiza na kusangalala.
Nawekungajiza hamwe kwa chiwalo cha heni.
Wanhu wohambe ndiwazele nawanhowa ne kuleka.
16 Wanhu wawele wanguwabezaga mbaka vyete,
nawang'hanuchila kwa kuzudila.
17 Gwa Mkulu Nguluwi, kolola hela mbaka hanili?
Undohole kulawa kuli kudumigwa na hewo,
ulohole ukomu wa heni kulawa kuli misimba ajo.
18 Ndolonga malumbo hali nhing'hano ng'hulu ya wanhu,
ndokutogola hali wanhu wenji.
19 Uleche kuwaleka wang'honyo awo wandonje vibi,
hewo walingunzudila hela wasangalale kwa chiwalo cha magazo ga heni.
20 Hambe walonje kwa kikala goya,
ila wangulonga ulonjelezi wa udesi,
kwa kitwanza na wenyeng'haye wasindamale.
21 Wangundonjeleza kwa lizi,
“Goya! Goya! Natona gouditile.”
22 Ila, gwa Mkulu Nguluwi, kwanguyona mbuli ayo,
gwa Mkulu Nguluwi, uleche kunyamalila,
uleche kuwa kutali na heni.
23 Winuche, gwa Mkulu Nguluwi unhowanile,
unyamile gwa Nguluwi na Mkulu wa heni.
24 Gwa Mkulu Nguluwi, Nguluwi wa heni, unhowanile,
udite kwa kiwhana na kutanganika kwa hegwe,
uleche kuwaleka wang'honyo wa heni wandonje vibi.
25 Uleche kuwaleka wejese, “Mbuli za hetwe nazitulutila goya kota vyotuganile.”
Ama walonje, “Natumdumya ayu.”
26 Waleche hewo walingusangalalila kudumigwa kwa heni,
walemwele weng'ha na kudeula.
Hewo weng'ha walingiwona wanojile kusinda heni,
wadeule na kona soni.
27 Ila walingugana kona kota heni nda yatanganiche,
wakwinize lizi kwa kusangalala walonje mazuwa gose,
“Mkulu Nguluwi ndo mkulu ng'hatu.
Kangunojezwa na kunoga kwa chitumagwa wa heye.”
28 Aho nani ndowikula kutanganika kwa hegwe,
ndolonga lutogo lwa hegwe nemisi yeng'ha.