33
Lwimbo lwa kumtogola Nguluwi
1 Mtowe luchenze kwa chiwalo cha Mkulu Nguluwi hemwe watanganiche.
Kumtogola Nguluwi kwanguwawala wanhu wawele na nhumbula zigoloche.
2 Mumtogole Mkulu Nguluwi kwa igombogombo,
mumtogole kwa ching'weleng'wele cha ng'weso kumi.
3 Mmwimbile lwimbo lunyale,
mtowe goya ching'weleng'wele na luchenze,
4 kwa vila ulonzi wa Mkulu Nguluwi ugoloka,
na madito ga heye ndo ga kukundigwa.
5 Mkulu Nguluwi kangugana kutanganika na hachi,
isi naimema igano lya kwimilila lya heye.
6 Kwa ulonzi wa Mkulu Nguluwi ulanga naulumbigwa,
na vyeng'ha viwele mumo kwa lweselo lwa mlomo wa heye.
7 Nakakungajiza mazi ga bahali kota kuli ibuli,
mazi menji nakagahindila kung'hano.
8 Isi yeng'ha imdumbe Mkulu Nguluwi.
Wenyeng'haye weng'ha muisi, wamhulichize.
9 Kwa vila nakalonga na isi naiwa,
nakalajiza nayo nayima nzinzili.
10 Mkulu Nguluwi kangutengulaga kunuwila kwa wanhu wa isi,
kangutengulaga majesa ga hewo.
11 Choyogana kudita Mkulu Nguluwi changikala mazuwa gose,
kunuwila kwa heye kwangikala kuli lulelo lweng'ha.
12 Nawatambichizwa wanhu wa isi wawele Nguluwi wa hewo ndo Mkulu Nguluwi,
nawatambichizwa wanhu woyawahagule wawe wa heye yuye.
13 Mkulu Nguluwi kangulolaga hasi kulawa kilanga,
na kuwona wanhu weng'ha.
14 Kulawa kuli chigoda cha heye cha undewa,
kangulolaga weng'ha walingikala muisi.
15 Heye kangulumbaga nhumbula za wanhu weng'ha,
heye kanguvizela chila chinhu chowalingudita.
16 Mndewa halinguloholigwa kwa chilundo chikulu cha wamizi,
ne mwamizi muwanzi hawaga na kusumya kwa mong'ho wa heye ukulu.
17 Falasi wa ngondo hawele chinhu kwa kusumya,
mong'ho wa heye winji hauweza hebu kumlohola munhu.
18 Mkulu Nguluwi kanguwalola wala walingumdumba,
wanhu wawele wangitumbila igano lya heye lya kwimilila.
19 Heye kanguwaloholaga kulawa kuli kubagama,
kanguwaditaga wawe wakomu mhela wa lufemba.
20 Nhumbula za hetwe zangitumbila kwa Mkulu Nguluwi.
Heye ndo utanzi wa hetwe na ngawo ya hetwe.
21 Ena twangusangalala kwa chiwalo cha heye,
twangitumbila kuli itagwa lya heye lyelile.
22 Igano lya hegwe lya kwimilila likale na hetwe, gwa Mkulu Nguluwi,
kwa vila hetwe natukuwichila kitumbila kwa hetwe.