106
Kunoga kwa Nguluwi kwa wanhu wa heye
1 Yatogoligwe Mkulu Nguluwi.
Mlonje malumbo kwa Mkulu Nguluwi kwa vila ka yanojile,
kwa vila igano lya kwimilila lya heye lyangikala mazuwa gose.
2 Whaani yoweza kulonga madito ga Mkulu Nguluwi?
Whaani yoweza kumtogola kota vyoyalinguganigwa?
3 Nawatambichizwa wala walingudita hachi,
walingudita mazuwa gose mbuli zitanganiche.
4 Ung'humbuche gwa Mkulu Nguluwi mhela houlajila vyoulingunojezwa na wanhu wa hegwe,
unhanze mhela houwalohola,
5 leka nhambichizwe hamwe na wahaguligwe wa hegwe,
sangalale hamwe na wanhu wa isi ya hegwe
na kivuna hamwe na wahalizi wa hegwe.
6 Natudita gehile, hetwe na wasekulu wa hetwe,
natudita wihe, natudita mbuli zihile.
7 Wasekulu wa hetwe lowawele Misili,
hawajesile madito ga heye ga kububuwaza,
hawakumbuchile winji wa igano lya kwimilila lya heye,
nawambelenhuka hafungo ha bahali ya Shamu.
8 Ila Nguluwi nakawalohola kwa lutogo lwa itagwa lya heye,
leka yalajile mong'ho wa heye ukulu.
9 Nakaing'hanuchila bahali ya Shamu, naikala,
nakawakoleza amo kota kuli isi ng'havu.
10 Nakawalohola kuli moko ga wawazudile,
nakawagombola kulawa kuli moko ga wang'honyo wa hewo.
11 Mazi ga bahali nagawagubika wang'honyo wa hewo,
haponile ne yumwe wa hewo.
12 Hamba wanhu wa heye nawaukunda ulonzi wa heye,
nawamwimbila nzimbo za lutogo lwa heye.
13 Ila mhela uchefu hela nawasemwa madito ga Nguluwi,
nawaleka kitumbila kuli ulonzi wa heye.
14 Nawali wamemile maya ng'hatu ya iwunde kula kuchiwala,
nawamjeza Nguluwi kula kugunuche.
15 Naye Nguluwi nakawapa chila chowaganile,
ila nakegala utamwa ulingwambuza kuganda hali hewo.
16 Kuli kambi walume nawamonela fihi Musa
kahi nawamonela fihi Aluni, chitumagwa yelile wa Mkulu Nguluwi.
17 Aho ndo misanga najigubuka na kummela Datani,
Abilamu na chilundo cha heye cheng'ha nawatiligwa,
18 chiluli nachiwalawila walinguwawinza hewo,
nachiwalakaza wanhu wehile.
19 Nawagongomanya ilogota kula Holebu,
nawalifugamila limalukolo alyo lya zahabu ya kulubuswa,
20 nawauleka ukulu wa Nguluwi,
kwa chiwalo cha limalukolo lya igongolo liwele lyangulyaga misolo.
21 Nawamsemwa Nguluwi yawalohole,
yaditile mbuli ng'hulu kuli isi ya Misili,
22 vinduzanduza kuli isi ayo ya Hamu,
na mbuli za mong'ho kuli bahali ya Shamu.
23 Nguluwi nakalonga kowadumya wanhu wa heye,
ila Musa hela yahaguligwe wa heye nakema hagati,
nakalemeza ng'halazi ya heye ileche kuwadumya.
24 Hamba nawaibeza yila isi ya kunojeza,
kwa vila hawawele na makundo na kulagana kwa Nguluwi.
25 Nawang'ung'uta kuli mihema ja hewo,
hawamhulichize Mkulu Nguluwi.
26 Ahyo Nguluwi nakenula moko, nakelaha,
“Ndowadumya kuchiwala,
27 ndowasambalula walelwa wa hemwe hali wanhu wanji,
na ndowasambalula kuli isi yeng'ha.”
28 Hamba nawelumba kumfugamila Baali wa kula Peoli,
Nawalya nhambiko zilavigwe kwa chiwalo cha milungu jilihela ukomu.
29 Nawamdita Nguluwi yazudile kwa madito ga hewo,
utamwa nawuya hali hewo.
30 Ila Finehasi nakema hagati kuwatanza,
na wula utamwa naulemezwa.
31 Mbuli ayo yangukumbuchilwa kwa kutanganika kwa heye,
kwa lulelo lulinguya lulihela kuduma.
32 Nawamzudiza Nguluwi kuli mazi ga Meliba,
Musa nakagazigwa kwa chiwalo cha hewo.
33 Kwa vila nawambelenhuka muhe wa Nguluwi,
mbaka nakalonga ulonzi ne kijesa.
34 Hawawakopole wanhu wa isi zinji,
kota Mkulu Nguluwi vyoyawalajize,
35 ila nawehanza na wanhu wanji,
nawelangusa kudita mbuli za hewo.
36 Nawajifugamila jimalukolo ja milungu ja hewo,
najo najiwa idiwa lya kuwadumya.
37 Nawawakopola wana wa hewo walume na wadala,
nawawalavya nhambiko kwa vijeni.
38 Nawabohola danda ya walihela nongwa,
danda ya wana wa hewo walume na wadala,
wawele nawawalavya nhambiko kwa jimalukolo ja Kanaani,
isi naiwa ikokomoche kwa danda ya hewo.
39 Ahyo nawaditigwa wakokomoche kwa madito ga hewo,
nawali walihela kukundigwa kwa Nguluwi kota wang'hondwa.
40 Lelo ng'halazi ya Mkulu Nguluwi naiwafika wanhu wa heye,
nakazudizwa ng'hatu na wahalizi wa heye.
41 Nakawawika kuli ndole za wanhu wa isi zinji,
walinguwazudila nawawalongoza.
42 Wang'honyo wa hewo nawawabunza,
na kuwawika hali ludali lwa hewo.
43 Mala nyinji Nguluwi nakawalohola wanhu wa heye,
ila hewo nawahagula kumbelenhuka,
nawalutilila kudita wihe.
44 Ila Nguluwi nakahulichiza magazo ga hewo,
mhela loyahuliche chililo cha hewo.
45 Kwa chiwalo cha hewo nakalikumbuchila ilagano lya heye,
nakawonela isungu kwa winji wa igano lya kwimilila lya heye.
46 Nakawadita wonelwe isungu,
na weng'ha wawaholile.
47 Gwa Mkulu Nguluwi, Nguluwi wa hetwe, utulohole,
utukungajize hamwe kulawa hali wanhu wa isi,
leka tulonje malumbo kwa itagwa lya hegwe lyelile,
na kivuna kwa chiwalo cha lutogo lwa hegwe.
48 Yatogoligwe Mkulu Nguluwi, Nguluwi wa Isilaeli,
kulawa mazuwa gose mbaka mazuwa gose.
Wanhu weng'ha walonje, “Ena.”
Yatogoligwe Mkulu Nguluwi.