102
Kulanda kuli magazo
(Kulanda kwa munhu yawele kuli magazo na yawele kangumhilichila Mkulu Nguluwi kung'ung'uta kwa heye.)
1 Gwa Mkulu Nguluwi, uhulichize kulanda kwa heni,
na chililo cha heni chikufichile.
2 Uleche kivisa kutali na heni mhela wa magazo.
Umbichile goya ikutu lya hegwe,
unyidichile himahima mhela hondikulanda.
3 Mazuwa ga heni gangukola kota iyosi,
mizeje ja heni jangulakala kota kuli itanulu.
4 Namhondigwa mnhumbula kota misolo na kuswinha,
hambe ngane ne chilyo.
5 Kwa chiwalo cha magazo ga heni,
namhona mizeje na ngozi.
6 Ndayeka kota chideje cha kuchiwala,
kota ituwe kuli chihame.
7 Ndanguwasa meho mwanzi,
kota chideje chichiwa mchanya mwa chinduwiko cha ng'handa.
8 Nemisi yeng'ha wang'honyo wa heni wangundonga vibi,
Walingumbeza heni wanguwapanjila wanhu wanji kwa itagwa lya heni.
9 Kwa vila ndangulombocheza,
mivu janguwa chilyo cha heni,
mahozi ndangugahanza na chakunwa cha heni,
10 kwa chiwalo cha kuzudila na ng'halazi ya hegwe,
kwa vila nakundokota na kunhozela kutali.
11 Ukomu wa heni ndo kota isisila lya matinazo,
ndanguswinha kota misolo.
12 Ila gwa Mkulu Nguluwi, hegwe, kwangulongoza mazuwa gose,
itagwa lya hegwe lyangukumbuchilwa lulelo lweng'ha.
13 Hegwe kokwinuka na kuwonela isungu muji wa Siyoni,
kwa vila mhela naufika wa kuuditila ganojile,
mhela wake uwichigwe naufika.
14 Kwa vila vitumagwa wa hegwe wanguuhulichiza lukami,
hanga naulala lukami,
wanguwonela isungu,
hanga nauwifigwa ng'hatu.
15 Wanhu wa isi zeng'ha wolihulichiza itagwa lya Mkulu Nguluwi,
wandewa weng'ha muisi wodumba ukulu wa heye.
16 Kwa vila Mkulu Nguluwi kouzenga kahi muji wa Siyoni,
na koneka vyoyawele mkulu.
17 Kokukunda kulanda kwa yalihela chinhu,
hambe yakuleme kulanda kwa hewo.
18 Wandiche mbuli ayi kwa chiwalo cha lulelo lulinguya,
leka howopondigwa hamba wamtogole Mkulu Nguluwi.
19 “Nakalola hasi kulawa honhu helile ha heye hawele kuchanya,
Mkulu Nguluwi nakailola isi kulawa kilanga.
20 Nakahulika kulila kwa wanweng'hwa,
nakawalechela welejehe wowatagusigwe kukopoligwa.”
21 Ahyo wanhu woliwikula itagwa lya Mkulu Nguluwi ako Siyoni,
lutogo lwa heye lyowikuligwa ako Yelusalemu,
22 mhela wanhu wa isi zeng'ha howoting'hana hamwe,
na wandewa howoting'hana kumfugamila Mkulu Nguluwi.
23 Nguluwi nakamhunguzila mong'ho londiwele nding'hali msongolo,
nakambuza ukomu wa heni uwe udo.
24 Ahyo nandonga, “Gwa Nguluwi wa heni, uleche kukunda mbagame,
mhela londing'hali msongolo.
Gwa Mkulu Nguluwi, hegwe kwangikala mazuwa gose.
25 Hegwe nakuwika msisi wa isi katali ng'hatu,
ulanga ndo mijito ja moko ga hegwe.
26 Isi na ulanga vyokwaga, ila hegwe kopona,
vyolala kota ivalo,
na kota nguwo kovigalula,
navyo vyokwajililila,
27 ila hegwe ndo yuyula,
ukomu wa hegwe wahela kuduma.
28 Wana wa vitumagwa wa hegwe wochikala kwa kwamilwa,
walelwa wa hewo woditigwa wawe nzinzili hali hegwe.”