27
1 Uleche kitogola kwa chiwalo cha mitondo,
kwa vila huvizelele choni cholawila kuli zuwa limwe.
2 Uleche wanhu wanji wakutogole,
haiwele kwa mlomo wa hegwe,
munhu yunji yadite ahyo, haiwele gwegwe.
3 Iganga na sangalaza ndo itunyo,
ila kutunyigwa na mpoka ndo itunyo ng'hatu.
4 Ng'halazi ndo kuwa na nhumbula yihile na kuzudila kung'hang'hale ndo kudumya,
ila whaani yoweza kitwanza na fihi?
5 Fola munhu yalingukukanya hazelu,
kusinda yula yalinguvisa igano.
6 Kung'hanuchila kwa goloko wa hegwe wa habehi kwangulajila kukundigwa,
ila kulamswa na mng'honyo ndo uhadi.
7 Yegute mbaka hanombwa kanguilema,
ila kwa yawele na nzala chila chiwele cha usungu ndo chinona.
8 Munhu yajilile ndo kota chideje,
chajilile kutali na chimvulila chake.
9 Mafuta na unhunyhililo kwa chiwalo cha lukuli vyanguisangalaza nhumbula,
na kunoga kwa goloko,
kwangulawa kuli ulonzi wa utanzi wa heye wa kukundigwa.
10 Uleche kumsemwa goloko wa hegwe ne wa mhaza wa hegwe.
Wone uwe na magazo uleche kubilimila kwa mng'holozo,
fola munhu youlingikalasa habehi kusinda mwenyelukolo yawele kutali.
11 Mwana wa heni, uwe na luhala leka uisangalaze nhumbula ya heni,
nani ndowa na lya kumwidichila yoneche yalingulonga vibi kuwala heni.
12 Yawele na luhala kanguzonaga mbuli zihile na kivisa,
ila mpoka kangiwikaga kumwando na kulumizwa.
13 Wone munhu yelahe hali hegwe kota komuwichila lehani mjenzi,
uhole ivalo lya heye,
leka yalipe sendi kwa vila nakamuwichila lehani ayo mjenzi.
14 Yoneche yalingumtambichiza munhu yowalingikalasa habehi kwa iyowe lufuku,
yozeleka kota kangumganila upanjilo.
15 Mdala yalingugana kilewa,
ndo kota midovu ja mazi zuwa lya nhonya johambe jimale,
16 kumlemeza ndo kota kulemeza mbeho,
ama kibata mafuta ga mzeituni kwa moko.
17 Kota vila chuma vyochilingunola chuma,
ndo hihyo du munhu vyoyalingulanguswa na myage.
18 Yalinguulolela mtini kangulyaga tini,
yalingumlolela mkulu wa heye kohulichizwa.
19 Kota kumeho vyokulingiwona kuli mazi,
ndo munhu vyoyalingizela yuye mnhumbula.
20 Kuli Kubagama na kuli Kuwifya, hambe vigute,
na meho ga wanhu hambe gegute.
21 Zahabu ama sendi zangwelizwa kwa chiluli kuli itanulu,
na munhu kangupimigwa kwa lutogo lwa heye.
22 Umtwanje mpoka kuli ituli hamwe na ngano,
ila huweza kumbagula na upoka wa heye.
23 Ujilolele goya ming'holo ja hegwe vyojiwele,
ujilolele goya misenga ja hegwe,
24 kwa vila lufufu haluweza kikala mazuwa gose,
ne itaji hambe likale lulelo lweng'ha.
25 Mhela misolo jikalile najusigwa,
na misolo minyale najizuka,
najo misolo kulawa kuli chidunda najikungajizwa,
26 ming'holo jokupa sufu kwa chiwalo cha mivalo,
mhene nazo koziguza na kugula migunda,
27 jokupa matombo ga kuhega hegwe na ivyazi lyako,
na kwa chiwalo cha vitumagwa wa hegwe wadala.