33
Majendo kulawila Misili mbaka Moabu
1 Azi ndo kambi zowafichile Waisilaeli, nawawika kambi walawile Misili kuno wawele kuli vilundo vya nhanzi za hewo, kuli ulongozi wa Musa na Aluni.
2 Musa nakandika itagwa lya chila honhu howawichile kambi, honhu hamwe mbaka honhu hanji, kwa ilajizo lya Mkulu Nguluwi.
3 Waisilaeli nawoka kuli muji uchemigwe Lamesesi kuli zuwa lya kumi na zihano lya mwezi wa mwaluko, zuwa limwe loimalile Pasaka ya mwaluko. Nawoka kwa nhumbula zikangale hali Wamisili weng'ha,
4 wawele wawatilile walelwa wa hewo wa mwaluko walume nawakopoligwe na Mkulu Nguluwi, Mkulu Nguluwi nayali yajigazile mbaka milungu ja hewo.
5 Lelo Waisilaeli nawoka Lamesesi, nawawika kambi ya hewo ako Sukoti.
6 Kulawila Sukoti, nawawika kambi ya hewo ako Etamu, hafungo ha chiwala.
7 Kulawila Etamu, nawahinduka na kuhiluka mbaka Pi-hahiloti, kolilawilaga isanya ya Baali-sefoni, nawawika kambi ya hewo habehi na Migidoli.
8 Nawoka Pi-hahiloti, nawakola Bahali ya Shamu mbaka kuchiwala ako Etamu, nawali mmajendo ako kuchiwala kwa utali wa kujenda mazuwa gadatu, nawawika kambi ya hewo ako Mala.
9 Kulawila Mala, nawaluka majendo mbaka Elimu, ako Elimu nakwali na nzasa kumi na mbili za mazi na mitende makumi saba, nawawika kambi ya hewo honhu aho.
10 Nawali mmajendo kulawila Elimu, nawawika kambi ya hewo habehi na Bahali ya Shamu.
11 Kulawila Bahali ya Shamu nawawika kambi ya hewo kuli chiwala ako Sini.
12 Kulawila kuli chiwala ako Sini, nawawika kambi ya hewo Dofuka.
13 Kulawila Dofuka nawawika kambi ya hewo ako Alushi.
14 Kulawila Alushi nawawika kambi ya hewo ako Lefidimu, hawele nakwali haduhu mazi ga kunwa.
15 Nawoka Lefidimu nawawika kambi ya hewo kuli chiwala ako Sinai.
16 Kulawila kuli chiwala ako Sinai nawawika kambi ya hewo ako Kibuloti-hataava.
17 Kulawila Kibuloti-hataava, nawawika kambi ya hewo Haseloti.
18 Kulawila Haseloti, nawawika kambi ya hewo ako Litima.
19 Kulawila Litima, nawawika kambi ya hewo ako Limoni-pelesi.
20 Kulawila Limoni-pelesi, nawawika kambi ya hewo ako Libuna.
21 Kulawila Libuna nawawika kambi ya hewo Lisa.
22 Nawoka Lisa, nawawika kambi ya hewo ako Kehelata.
23 Kulawila Kehelata, nawawika kambi ya hewo mchidunda cha Shefeli.
24 Kulawa mchidunda cha Shefeli nawawika kambi ya hewo ako Halada.
25 Kulawila Halada, nawawika kambi ya hewo ako Makeloti.
26 Kulawila Makeloti, nawawika kambi ya hewo ako Tahati.
27 Kulawila Tahati nawawika kambi ya hewo Tela.
28 Kulawila Tela nawawika kambi ya hewo Mitika.
29 Kulawila Mitika, nawawika kambi ya hewo Hashimona.
30 Kulawila Hashimona, nawawika kambi ya hewo Moseloti.
31 Kulawila Moseloti, nawawika kambi ya hewo Bene-yaakani.
32 Kulawila Bene-yaakani, nawawika kambi ya hewo Holi-hagidigadi.
33 Kulawila Holi-hagidigadi, nawawika kambi ya hewo Yotibata.
34 Kulawila Yotibata, nawawika kambi ya hewo Abulona.
35 Kulawila Abulona, nawawika kambi ya hewo Esioni-gebeli.
36 Nawoka Esioni-gebeli, nawaluka majendo na kuwika kambi ya hewo kuli chiwala ako Sini, kuwele ndo Kadeshi.
37 Kulawila Kadeshi, nawawika kambi ya hewo kuchidunda cha Holi, kuli mbaka wa isi ya Edomu.
38 Kwa ilajizo lya Mkulu Nguluwi mtambika Aluni nakakwina mchanya mwa chidunda cha Holi, na nakabagama zuwa lya mwaluko lya mwezi wa kahano, mwaka wa makumi gane kulawa Waisilaeli lowalawile kuli isi ya Misili.
39 Aluni nayali na miyaka miya imwe na makumi meli na gadatu (123) hoyabagame mchanya mwa chidunda cha Holi.
40 Mndewa wa Aladi, Mkanaani, nayawele yochikala Negebu kuli isi ya Kanaani nakahulika kota Waisilaeli nawali wokuya.
41 Kulawila kuchidunda cha Holi, Waisilaeli nawawika kambi ya hewo Salimona.
42 Kulawila Salimona, nawawika kambi ya hewo ako Punoni.
43 Kulawila Punoni, nawawika kambi ya hewo ako Oboti.
44 Kulawila Oboti, nawawika kambi ya hewo ako Iye-Abalimu, kuli honhu ha Moabu.
45 Kulawila Iye-Abalimu, nawawika kambi ya hewo ako Diboni-gadi.
46 Kulawila Diboni-gadi, nawaluka majendo na kuwika kambi ya hewo ako Alimoni-dibulataimu.
47 Kulawila Alimoni-dibulataimu, nawaluka majendo na kuza kuwika kambi ya hewo kuli vidunda vya Abalimu, habehi na chidunda cha Nebo.
48 Kulawa kuli vidunda vya Abalimu, nawaluka majendo na kuza kuwika kambi ya hewo kuli ibalalika lya Moabu kumwambu mwa lwanda lwa Yolodani ilingililola na Yeliko.
49 Nawawika kambi ayo habehi na lwanda lwa Yolodani hali Beti-yeshimoti na ibindi lya Abeli-shitimu kuwele na ibalalika lya Moabu.
Malajizo kung'hali kwinjila Kanaani
50 Kuli ibalalika lya Moabu, kumwambu mwa lwanda lwa Yolodani ilingilola na Yeliko, Mkulu Nguluwi nakamlonjela Musa,
51 “Walonjele Waisilaeli kota homloka lwanda lwa Yolodani na kwinjila kuli isi ya Kanaani,
52 muwawinje wenyeng'haye weng'ha wa isi ayo hali hemwe. Mowifya jimalukolo ja hewo jeng'ha ja maganga na jimalukolo ja chuma na kubomola chila honhu hawo ha kulanda milungu.
53 Moihola isi ayo na kikala amo kwa vila ndiwapani iwe ya hemwe.
54 Moigawanula isi ayo kwa kutowa simbi kwa kuwinza winji wa ivyazi lya hemwe, honhu hakulu ndo ha nhanzi ng'hulu na honhu hadodo ndo kwa nhanzi ndodo.
55 Ila wone hamuwawinjile wenyeng'haye wa isi ayo tandi, lelo awo wawele mowaleka wowa kota vibanzi kumeho henu ama miwa chila ubanzi, na wowagazani.
56 Nani ndowaditani hemwe kota vyonjesile kuwadita hewo.”