2
Kugwa kwa Ninawi
1 Wamizi wa Ninawi wangulila,
“Yalingudumya kanguya kututowa.
Twamile ngome za hetwe!
Tuwiche wamizi mbalabala!
Tiwiche goya!
Tukungajize mong'ho wa hetwe weng'ha.”
2 Mkulu Nguluwi komhilusila Yakobo ludali lwake,
ena, kowapa kahi Waisilaeli ludali lwa hewo,
hanga walinguvaba hawawalechele chinhu,
mbaka nhagala za hewo za mizabibu nawazitema.
3 Ngawo za wamizi wa heye ndo ndung'hu,
wazidahe kitowa ngondo wa heye nawavala mivalo midung'hu.
Mituka ja hewo ja falasi jangupulika kota lumuli lwa chiluli,
kuli zuwa lyoyajiwichile goya,
migoha ja mibeloshi ja hewo jangupulika.
4 Mituka ja falasi jangubilima kuli nzila,
jangubilima aku na kula hagati ha muji.
Jangoneka kota milapi ja chiluli.
Jangubilima kota lumwemwesa.
5 Lelo mkulu kanguwachema vilongozi wa heye,
nawo wangikwang'wala vyowalinguluta kwa heye,
wangubilimila kuli lukanzi lwa miji,
leka kuwika goya ngawo ya hewo.
6 Lwizi ja lwanda najidoholigwa,
ng'handa ya mndewa naigwa.
7 Muji wa mwanzi lukami,
wanhu wanguholigwa na kuhilikwa kuli isi ya chijenzi.
Wapogozi wake wadala wangulombocheza kota ng'hunda,
na kitowa kuli mhambaga za hewo kwa masinzo.
8 Ninawi ndo kota ilamba libomoche,
wanhu wake wanguubilima.
Lizi lyanguchemeleza, “Mwime! Mwime!”
Ila haduhu yalingulola kumbele.
9 Walinguivaba Ninawi wangulonga,
“Mhole vinhu vya sendi,
mhole vinhu vya zahabu.
Ng'hano yake yahela kuduma.
Hana winji wa chila chinhu cha sendi nyinji.”
10 Muji wa Ninawi nauholigwa na kuwifigwa na kulechigwa uchiwa!
Wanhu wake nawatweguka nhumbula,
mafugamilo gawo gangukakama,
mong'ho wa hewo naumala, kumeho kwa hewo nakugaluka kwa chiwalo cha lunhwinhwi.
11 Wa kohi muji wula uwele kota mhalika ya misimba,
hawele ndo honhu hawo ha kivisa?
Ha ndaze aho honhu ha misimba,
hawele haduhu yawezile kujitinhusa?
12 Isimba ilume nalidadula miwunde ja kuhega kwa chiwalo cha myana jake,
naliwabatila misimba midala upelembi wawo,
mhalika yake naimema upelembi,
haluga hake hana vihande vinji vya miwunde.
13 Mkulu Nguluwi Yawele na Mong'ho kanguwikula,
“Lelo ndangitwanza na hemwe.
Mituka ja hemwe ja ngondo ndojidumya kwa chiluli
na kujikopola kwa ipanga myana isimba ja hemwe.
Siwalechela upelembi kuli isi.
Lizi lya wasenga wa hegwe haluhulikwa kahi.”