6
Mkulu Nguluwi kangung'ung'uta
1 Mhulichize choyalingulonga Mkulu Nguluwi,
kanguving'ung'utila vidunda,
navyo vidunda vidodo vihuliche lizi lya heye.
2 Mhulichize kung'ung'uta kwa Mkulu Nguluwi hemwe vidunda,
mhulichize hemwe misisi ja isi ja mazuwa gose!
Mkulu Nguluwi kanguwang'ung'utila wanhu wa heye.
Kowang'ung'utila wanhu wa heye Waisilaeli.
3 Mkulu Nguluwi kangulonga hino,
“Hemwe wanhu wa heni, nandita choni kwa hemwe?
Nandiwatunya kwa chinhu chachi?
Mnyhidichile!
4 Nandiwalavya hemwe kulawa kuli isi ya Misili na kuwagombola
kulawa kuli isi ya upogozi.
Nandiwalajiza Musa na Aluni na Miliamu wawalongoze hemwe.
5 Hemwe wanhu wa heni, muukumbuchile wihe wa Balaki, mndewa wa Moabu,
na ndaze Balaamu, mwana wa Beoli vyoyamwidichile.
Mgakumbuchile majendo ga hemwe ga kulawa Shitimu mbaka Giligali,
leka mgazele madito ga hachi ga Mkulu Nguluwi.”
Choyalingugana Nguluwi
6 Ndute kwa Mkulu Nguluwi na chinhu chachi,
leka ndimfugamile Nguluwi yawele kuchanya?
Ndaze, ndute na nhambiko za kulakazwa
ama ndimlavile milogota milume ja mwaka umwe?
7 Ndaze, Mkulu Nguluwi konojezwa,
wone ndimlavile maelufu ga ming'holo milume,
ama nzanda maelufu menji za mafuta?
Ndaze, ndimlavile mlelwa wa heni wa mwaluko,
kwa chiwalo cha nongwa ya heni,
kwa chiwalo cha gehile ga heni?
8 Nguluwi nakakulajila gawele ganojile, gwa munhu.
Choyalingugana Mkulu Nguluwi kwa hegwe ndo achi,
kudita mbuli za hachi,
kuwa na igano lya kwimilila
na kikala kwa kunyenyetela na Nguluwi wa hegwe.
9 Mkulu Nguluwi kanguwachema wenyeng'haye wa muji,
na ndo mbuli ya luhala ng'hatu kumdumba heye,
“Uhulichize gwa nhanzi,
na hemwe muwele namikungajiza mujini.
10 Ndaze, ndokwimilila wihe,
uwichigwe kuli chilundo mng'handa mwa hemwe?
Ndaze, ndokwimilila lufufu lompatile kwa uhadi,
na mizani ja uhadi,
mbuli iwele ndo izudizo?
11 Ndaze, ndoweza kuwalechela,
wanhu walingutumiya mizani ja uhadi
na maganga ga kupimila gawele hagalingukundigwa?
12 Hemwe muwele na lufufu kuli muji nammema kubunza,
mwangulongaga udesi,
chila chomlingulonga ndo uhadi.
13 Ahyo, nani nanyaluka kuwagwisa hemwe
na kuwadumya kwa chiwalo cha gehile ga hemwe.
14 Molya ila hamchiguta,
mng'handa mwa hemwe nzala yokonjezeka.
Mowika vinhu kuli ng'hano, ila hamuweza kulohola choneche,
kwa vila ndoviwifya kwa ngondo.
15 Monyala ila hambeta,
Mokama zeituni, ila hamuweza kutumiya mafuta gake.
Mokama zabibu, ila hamnwa ayo divai.
16 Namgabata malajizo ga Omuli,
na madito geng'ha ga ivyazi lya Ahabu
namuwinza kahi vihendo vya hewo.
Ahyo, ndowegalila hemwe kudumya,
na chila munhu kowabeza hemwe.
Wanhu wowazomela hemwe chila honhu.”