4
Nguluwi kanguwalongoza wanhu weng'ha kwa kikala goya
(Isaya 2:2-4)
1 Mhela wokuya uwele,
chidunda cha ng'handa ya Mkulu Nguluwi,
chowa chikulu kusinda vidunda vyeng'ha.
Ena, chokwinizwa mchanya mwa vidunda vyeng'ha.
Wanhu wenji woluta ako.
2 Wanhu wa isi nyinji wokuya na kulonga,
“Tuche, tulute kuchanya kuli chidunda cha Mkulu Nguluwi,
kuli ng'handa ya Nguluwi wa Yakobo,
leka yatulanguse nzila za heye,
natwe tuwinze vyoyodita heye.
Kwa vila malajizo golawa ako Siyoni,
ulonzi wa Mkulu Nguluwi ako Yelusalemu.”
3 Kowadita wanhu wa isi nyinji wehanyise,
na kwamula kitwanza kwa wanhu wa isi zinji,
ziwele na mong'ho na ziwele kutali.
Wogongomanya mipanga ja hewo jiwe mihuka
na migoha ja hewo jiwe sengo za kutemela nhagala.
Wanhu wa isi imwe hawochitowa na wanhu wa isi iyage,
ne kilangusa ngondo kahi.
4 Chila munhu kochikala kwa kikala goya,
hanyi ha mtini na mizabibu ja heye,
haduhu munhu yowadita wadumbe,
kwa vila Mkulu Nguluwi Yawele na Mong'ho nakalonga ahyo.
5 Wanhu wa isi zinji wanguwinza nzila za hewo,
kwa kitumbila milungu ja hewo,
ila hetwe twangumuwinza Mkulu Nguluwi,
Nguluwi wa hetwe, mazuwa gose.
Waisilaeli wohiluka kulawa kuli isi ya chijenzi
6 Mkulu Nguluwi nakalonga,
“Zuwa alyo ndowakungajiza wanhu wa heni,
ena, ndowakungajiza vyete wa wala wawele nawahilikwa kuli isi zinji,
wanhu wala wawele nandiwagaza.
7 Awo vyete na wala wasigale wakomu, wawele nawahilikwa kuli isi ya chijenzi,
ndowadita hewo wawe wanhu wa isi inyale iwele na mong'ho.
Nani Mkulu Nguluwi ndowalongoza kuli chidunda cha Siyoni,
kwaluchila mhela awo mbaka mazuwa gose.”
8 Nagwe Yelusalemu,
hegwe ngome ya Siyoni,
mong'ho wa mwaluko wohiluswa kwa hegwe,
undewa wokuya kwa hegwe Yelusalemu.
9 Lelo, lekachoni mwangulila kwa lizi?
Ndaze, mwahela mndewa kahi?
Yalingukulonjela mbuli zinojile nakabagama?
Mwangulila kwa lizi kwa chiwalo cha usungu,
kota mamo yalinguponda!
10 Hemwe wanhu wa Siyoni,
mlile kota mamo yalinguponda!
Kwa vila lelo mokuka kuli muji awu,
mlute kikala kugunuche,
moluta mbaka Babuloni.
Ila ako moloholigwa.
Ako Mkulu Nguluwi kowagombola hemwe,
kulawa kuli ndole za wang'honyo wa hemwe.
11 Wanhu wa isi nyinji nawekungajiza kuwatowa hemwe.
Wangidaya wolonga, “Muji wa Yelusalemu uwe ukokomoche,
natwe tugone mahame ga Siyoni!”
12 Ila hewo hawachizelele choyachiwichile goya Mkulu Nguluwi,
ne kugazela majesa ga heye.
Kwa vila nakawakungajiza hamwe,
kota nyhule hali honhu ha kupululila.
13 Mkulu Nguluwi nakalonga,
“Hemwe wanhu wa Siyoni,
mwinuche leka muwatowe wang'honyo wa hemwe!
Ndowapa hemwe mong'ho kota ibuguma,
liwele na mbalati za chuma na nzayo za shaba.
Mowabalasa wanhu wa isi nyinji,
gowopata mombichila chiuyeng'ha,
lufufu lwa hewo mondavila heni Mkulu wa isi yeng'ha.”