2
Nguluwi kowatagusa wanhu wawele nawasukula honhu ha isi ya wanhu
1 Wochona hewo walingugana kudita wihe,
walinguwasa nechilo kuno wonuwila kudita wihe!
Hokubwemwenzuka,
wangudita kwa vila wana ludali.
2 Wangugana migunda na kujihola,
kahi ng'handa na kuzihola.
Wangumhada mlume na kuhola ng'handa ya heye,
wanguwasukula uhalizi wa hewo, uwele ndo isi.
3 Ahyo, Mkulu Nguluwi kangulonga ahi,
“Ndangugana kuwegalila hemwe kudumya,
kuwele hamuweza kiwika kutali nako.
Wowa mhela wihile kwa nhanzi ya hemwe,
hamuweza kujenda kwa kidaya.
4 Zuwa alyo wanhu wowalonga hemwe kwa nzimbo,
wolila na kulombocheza kwa usungu na kulonga,
‘Natudumigwa ng'hatu,
Mkulu Nguluwi nakahola isi ya hetwe,
ena, nakayusa mmoko mwa hetwe.
Migunda ja hetwe nakawapa wala wawele nawatusumya.’ ”
5 Ahyo hampegwa honhu honeche ha mgunda kwa simbi,
hali wanhu wa heye Mkulu Nguluwi.
Walingitwanza na mloli
6 Wanhu wa hewo wangulongaga,
“Uleche kulavya uloli, uleche kulavya uloli kuwala hetwe.
Mbuli kota azo haziweza kutufika.
Hatufichigwa na soni.”
7 Ndaze, hemwe walelwa wa Yakobo, yanguwa goya kulonga,
“Mkulu Nguluwi nakaleka kwimilila kwa heye?
Ndaze, heye kangudita mbuli kota azi?”
Ulonzi wa heni wowa unojile kwa wala walingudita hachi.
8 Ila Mkulu Nguluwi kanguwalonjela hino,
“Hemwe, wanhu wa heni mwangwinuka kota wang'honyo.
Mwanguboka mivalo ja wanhu wasindamale na walingikala goya,
wanhu walingukola nzila ne lunhwinhwi
na walihela majesa goneche ga kitowa ngondo.
9 Mwanguwawinga wadala wafililwe na walume wa hewo wa wanhu wa heni
kulawa kuli ng'handa za hewo zinojile,
wana wa hewo namuwosela uhalizi wa heni mazuwa gose.
10 Mwinuche mlute!
Hano haduhu kahi honhu ha kwesela!
Kwa chiwalo cha wavu wa hemwe, modumigwa,
ena, kudumya kukulu ng'hatu!
11 Wone munhu yalonje,
‘Ndangulavya uloli kwa hemwe kota mowa na divai na ujimbi kwa winji,’
munhu ayo kowa mloli yalingukundigwa na wanhu awo!
12 Ila ndangukomya ndowakungajiza weng'ha hemwe wanhu wa Yakobo,
ena, ndowakungajiza hemwe Waisilaeli msigale,
ndiwegale hamwe kota ming'holo,
kota chilundo chikulu cha ming'holo kuli ibani,
kota chilundo hali honhu ha kudimila,
namwe mowa chilundo cha wanhu wenji.
13 Yula yawele kochumula nzila kowalongola,
nawo wobena lwizi lwa muji na kulawa mgati mwa muji.
Mndewa wa hewo kowalongola,
Mkulu Nguluwi yuye kowalongola.”