6
Iwago lyanguloholigwa
1 Zuwa limwe chilundo cha waloli nachimlonjela Elisha, “Honhu hano hotulingikala na hegwe ndo hadodo ng'hatu.
2 Tulute Yolodani, honhu hawele chila yumwe wa hetwe koweza kutema migodi na kuzenga honhu ha kikala.” Elisha nakawedichila, “Mlute.”
3 Hamba yumwe wa hewo nakamuuza Elisha, “Ndaze, huweza kulutasa na hetwe vitumagwa wa hegwe?” Elisha nakedichila “Ndoluta hamwe na hemwe.”
4 Ahyo nakaluta hamwe na hewo. Lowafichile kuli lwanda lwa Yolodani, nawaluka kutema migodi.
5 Yumwe wa hewo loyawele yotema igodi, iwago nalisomoka na kwinjila mmazi. Nakalila yolonga, “Gwa mkulu wa heni, iwago ali natwali twazichigwe!”
6 Elisha nakamuuza, “Naligwila kohi?” Munhu ayo loyamlajile hala honhu, Elisha nakatema ngoda nakaitoza hali hala honhu na lila iwago nalyelela.
7 Elisha nakamlonjela, “Lihole.” Yula munhu nakagolola moko wa heye nakalihola lila iwago.
Wamizi wa Waalamu wangulemwela
8 Mhela awo mndewa wa Waalamu nayali yochitowa na Isilaeli. Mndewa wa Alamu nakalongasa na wang'hangala wa heye na kuhagula honhu ha kuwika kambi ya heye.
9 Ila Elisha, munhu wa Nguluwi nakalajiza usenga kwa mndewa wa Isilaeli, “Wilolele leka uleche kukola honhu hala, kwa vila Waalamu wanguluta ako.”
10 Ahyo mndewa wa Isilaeli nakalajiza usenga wa kilolela honhu hala hoyalonjelwe na munhu wa Nguluwi. Elisha nakamkanya mndewa mala nyinji kota wanhu welolele hali honhu kota aho.
11 Mbuli ayo naimdeuza ng'hatu mndewa wa Alamu. Nakawachema wang'hangala wa heye, nakawauza, “Whaani hali hemwe yawele ubanzi wa mndewa wa Isilaeli?”
12 Yumwe wa wang'hangala wa heye nakalonga, “Mndewa, mkulu wa heni, haduhu yoneche hali hetwe yalingukubelenhuka. Ila Elisha, yula mloli yawele Isilaeli, kangumlonjelaga mndewa wa Isilaeli mbaka wula ulonzi ulingulonga kuli chihengo cha hegwe cha kuwasa.”
13 Mndewa nakalajiza yolonga, “Mlute mkapugajize leka mvizele honhu hoyawele, leka ndajize wanhu kumibata.” Lelo, nawadita ahyo na kumlonjela mndewa kota Elisha nayali Dotani.
14 Ahyo mndewa nakahilika ako chilundo chikulu cha wamizi hamwe na falasi na mituka ja ngondo. Chilundo acho cha wamizi nachifika ako mhela wa nechilo na kuuzunguluta muji.
15 Hamitondo lufuku, chitumagwa wa munhu wa Nguluwi loyenuche na kulawa mgati mwa ng'handa, wamizi hamwe na falasi na mituka ja ngondo, nawali wauzungulute muji. Chitumagwa wa munhu wa Nguluwi nakalonga, “Tochona, mkulu wa heni. Todita choni?”
16 Elisha nakedichila, “Uleche kudumba, kwa vila wamizi wawele hamwe na hetwe ndo wenji kusinda wamizi wawele hamwe na hewo.”
17 Hamba Elisha nakalanda, “Gwa Mkulu Nguluwi, ugubule meho ga chitumagwa ayo leka yalole.” Mkulu Nguluwi nakagubula meho ga yula chitumagwa, nakona vidunda navimema falasi na mituka ja chiluli, vyeng'ha avyo navimzunguluta Elisha.
18 Mhela Waalamu lowaduliche kuluta kwa heye, Elisha nakamlanda Mkulu Nguluwi yolonga, “Uwadite wanhu awa wawe hambe walole.” Lelo Nguluwi nakawadita wawe hambe walole kota Elisha vyoyalandile.
19 Elisha nakawalonjela, “Ayi haiwele nzila yomlinguigana na awu hauwele awo muji. Mmbinze, nani ndowahilika kwa ayo munhu yomlingumpala.” Naye nakawahilika Samaliya.
20 Lowenjile kuli muji, Elisha nakalanda yolonga, “Gwa Mkulu Nguluwi, ugubule meho ga wanhu awa leka walole.” Mkulu Nguluwi nakagubula meho ga hewo. Nawefika wawele hagati ha muji wa Samaliya.
21 Mndewa wa Isilaeli loyawawene Waalamu, nakamuuza Elisha, “Mkulu wa heni, ndaze ndiwakopole?”
22 Elisha nakedichila, “Hebu, uleche kuwakopola. Wanhu wano nakuwahola kwa ipanga lya hegwe na upinde wa hegwe. Wape chilyo na mazi leka walye na kunwa leka wahiluche kwa mkulu wa hewo.”
23 Lelo mndewa wa Isilaeli nakawaditila mnvina ng'hulu. Lowasindile kulya na kunwa nakawalaga, nawo nawahiluka kwa mkulu wa hewo. Ahyo wamizi kulawa Alamu nawaleka kuivaba isi ya Isilaeli.
Muji wa Samaliya wanguzungulutwa
24 Hamba Beni-hadadi, mndewa wa Alamu, nakawawika goya wamizi wa heye weng'ha na kuluta kuuzunguluta muji wa Samaliya.
25 Muji wa Samaliya nauzungulutwa kwa mhela winji, ahyo nakwali na lufemba kuli muji awo mbaka mutwi wa idogowi nawali uguzigwa kwa migwala makumi gadatu ga sendi na chijemo cha midohe ja ng'hunda najiguzigwa kwa migwala jihano ja sendi.
26 Zuwa limwe mndewa wa Isilaeli loyawele yojenda mchanya mwa lukanzi lwa muji, nakamhulika mdala yumwe yomlilila, “Mkulu wa heni mndewa, unhanze.”
27 Mndewa nakamwidichila, “Wone Mkulu Nguluwi hambe yakutanze, ndokupa utanzi kulawa kohi? Honhu ha kupululila nyhule na honhu ha kukamila divai hahela chinhu.”
28 Hamba nakamuuza, “Hana choni?” Yula mdala nakamlonjela, “Ayu mdala nakandonjela, ‘Mlavye mwana wa hegwe leka tumulye lehano na mitondo tomulya wa heni.’
29 Natumteleka mwana wa heni natumulya. Zuwa liwinzile nandimlonjela, ‘Mlavye mwanago leka tumulye.’ Ila nayali yamvisile.”
30 Mndewa loyahuliche ulonzi wa yula mdala, nakadadula mivalo ja heye. Mndewa loyawele yolutilila kujenda mchanya mwa lukanzi wanhu wawele habehi na lukanzi nawamona mndewa, mgati nayali yavalile mivalo ja igunila kwa masinzo.
31 Mndewa nakalonga, “Nguluwi yanditile kwa kung'hang'hala na mzidi, wone mutwi wa Elisha, mwana wa Shafati wosigala mchanya mwa mayega ga heye lehano!”
32 Ahyo nakalajiza msenga kuluta kumigala Elisha. Mhela awo Elisha nayali yekalise mgati mwa ng'handa ya heye, yawele hamwe na wasekulu. Yula msenga yalajizwe na mndewa loyawele yang'hali kufika, Elisha nakawalonjela wala wasekulu, “Yula yalingukopola nakalajiza munhu yoye yandumule mutwi. Hoyofika hano, mhinde lwizi, mleche kukunda yenjile. Mkulu wa heye kahi kangumuwinza kumbele.”
33 Elisha loyawele yang'hali yolutilila kuwalonjela wala wasekulu, yula msenga nakafika kwa Elisha na kulonga, “Mndewa nakalonga kota kubagama aku kwangulawa kwa Mkulu Nguluwi. Lekachoni ndutilile kuubeteza utanzi wa heye?”