18
Hesekiya kangulongoza Yuda
1 Kuli mwaka wa kadatu wa ulongozi wa Hosheya, mwana wa Ela, mndewa wa Isilaeli, Hesekiya, mwana wa Ahasi, mndewa wa Yuda, nakaluka kulongoza.
2 Nayali na miyaka makumi meli na jihano loyaluche kulongoza. Nakalongoza ako Yelusalemu kwa miyaka makumi meli na tisa. Mayake nayali yochemigwa Abiya, mhinza wa Sekaliya.
3 Nakadita ganojile hali Mkulu Nguluwi, kota vyoyaditile Daudi, sekulu wa heye.
4 Nakahawifya honhu ha kufugamila milungu na kubenanga jimalukolo na kutemanga mizengo ja Ashela. Nakatulanga lila limalukolo lya izoka lya shaba ligongomanyigwe na Musa, liwele nalyali lichemigwa Nahushitani, kwa vila mbaka mhela awo wanhu wa Isilaeli nawali wolifunyizila ubani.
5 Hesekiya nayali yochitumbila kwa Mkulu Nguluwi, Nguluwi wa Isilaeli. Nakwali haduhu mndewa yunji wa kiwhana na heye hali wandewa wa Yuda, wamlongole ama woyile hamba.
6 Nakelumba na Mkulu Nguluwi, halechile kumuwinza ne kubatilila mizilo ja Mkulu Nguluwi joyampele Musa.
7 Mkulu Nguluwi nayali hamwe na Hesekiya na chila mbuli yaiditile nailutilila goya. Nakambelenhuka mndewa wa Ashulu, hamkolele mijito.
8 Nakawatowa Wafilisti mbaka kufika kuli muji wa Gasa na honhu hake heng'ha. Nakavitowa vijiji mbaka kuli miji jiwele na ngome.
9 Kuli mwaka wa kane wa ulongozi wa mndewa Hesekiya, uwele nawali mwaka wa saba wa Hosheya, mwana wa Ela, mndewa wa Isilaeli, Shalimanesa, mndewa wa Ashulu, nakaluta kuutowa muji wa Samaliya na kuuzunguluta kwa wamizi.
10 Kuli kuduma kwa mwaka wa kadatu, Waashulu nawauhola muji wa Samaliya. Ahyo muji wa Samaliya nauholigwa kuli mwaka wa sita wa ulongozi wa mndewa Hesekiya, uwele nawali ndo mwaka wa tisa wa ulongozi wa Hosheya, mndewa wa Isilaeli.
11 Mndewa wa Ashulu nakawahola wanhu wa Isilaeli kulawa Ashulu na kuwawika Hala habehi na lwanda lwa Haboli kuli mkowa wa Gosani na kuli miji ja Wamedi.
12 Mbuli ayi nailawila kwa vila hawamhulichize Mkulu Nguluwi, Nguluwi wa hewo, ila nawali wabenile ilagano lya heye, gala geng'ha gawele Musa, chitumagwa wa Mkulu Nguluwi nayali yawalajize. Hawagahulichize ne kugebatilila.
Waashulu wanguitowa Yelusalemu
(2 Mihela 32:1-19; Isaya 36:1-22)
13 Kuli mwaka wa kumi na jine wa ulongozi wa mndewa Hesekiya, Senakelibu, mndewa wa Ashulu, nakajitowa na kujihola miji jeng'ha ja Yuda jiwele na ngome.
14 Lelo Hesekiya, mndewa wa Yuda, nakalajiza usenga kwa Senakelibu, mndewa wa Ashulu, ako Lakishi, yolonga, “Nandita wihe. Wuche kuli isi ya heni, nani ndokulipa choneche choulingugana kwa heni.” Mndewa wa Ashulu nakamlonjela Hesekiya, mndewa wa Yuda yalavye kilo elufu tisa (9,000) za sendi na kilo miya tisa (900) za zahabu.
15 Lelo Hesekiya nakamha sendi zeng'ha ziwele kuli ng'handa ya Mkulu Nguluwi na kuli ng'hano ya ng'handa ya mndewa.
16 Mhela awo Hesekiya, mndewa wa Yuda, nakabadula zahabu yeng'ha iwele naigubika lwizi na fulemu za ng'handa ya Mkulu Nguluwi, nakamha mndewa wa Ashulu.
17 Hamba mndewa wa Ashulu nakawalajiza wakulu wadatu hamwe na wamizi wenji kulawa Lakishi na kuluta kwa mndewa Hesekiya ako Yelusalemu. Nawaluta Yelusalemu na kwima habehi na chikolola cha ilamba lya Kuchanya, liwele nalizenjigwa kuli nzila ng'hulu ilinguluta kuli chalanza cha dobi.
18 Nawalajiza mndewa yachemigwe. Eliyakimu, mwana wa Hilikiya, yawele nayali yoilolela ng'handa ya mndewa na Shebuna, yawele nayali yalingwandika na Yowa, mwana wa Asafu, yalingwandika kukumbuchila, nawaluta kumbochela.
19 Yula chilongozi mkulu wa wamizi nakawalonjela, “Mumlonjele Hesekiya, ahi ndo vyoyalingulonga mndewa mkulu, mndewa wa Ashulu, ‘Kwangitumbila choni?
20 Kwangulonga kuna majesa na mong'ho wa wamizi, ila kwangulonga hela. Kwangitumbila kwa whaani mbaka nakumbelenhuka?
21 Ulole lelo, kwangitumbila ako Misili, ng'weku yila ya idenje lituliche, liwele lyanguuhomaga na kuulumiza moko wa munhu wone kolyegamila. Ahyo ndo vyoyawele Falao, mndewa wa Misili, kwa weng'ha walingitumbila kwa heye.’
22 “Ila wone mndonjele, ‘Twangitumbila kwa Mkulu Nguluwi, Nguluwi wa hetwe.’ Mvizele kota ndo yuyo Nguluwi yawele Hesekiya nakahawifya honhu hake ha kufugamila milungu na honhu hake ha kufunyizila ubani na kuwalonjela wanhu wa Yuda na wanhu wa Yelusalemu wafugame hali honhu ha kulavila nhambiko hawele ako Yelusalemu.
23 Lelo, muye mikundize na mkulu wa heni, mndewa wa Ashulu, nani ndowapa hemwe falasi elufu mbili, ila ndanguvizela kota mwahela wakwina falasi wa kuhega.
24 Moweza ndaze kumsumya chilongozi ne yumwe yawele mdodo hali vilongozi wa mkulu wa heni, kuno mwangitumbila kuli isi ya Misili kwa mituka ja ngondo na wakwina falasi?
25 Mzidi wa ago, ndaze, mwangijesa kota nambuya kuitowa na kuhadumya honhu hano ne kulajizwa na Mkulu Nguluwi? Mkulu Nguluwi yuye ndo yandajize kuitowa na kuidumya isi ayi.”
26 Hamba Eliyakimu, mwana wa Hilikiya na Shebuna na Yowa, nawamlonjela ayo chilongozi wa wamizi, “Dedede, ulongase na hetwe vitumagwa wa hegwe kwa ndonga ya Chialamu, kwa vila twanguizela. Uleche kulongasa na hetwe kwa Chiebulaniya, kwa vila wanhu wawele kuli lukanzi wanguhulichiza.”
27 Ila yula chilongozi wa wamizi nakawalonjela, “Ndaze, mkulu wa heni nakandajiza kulavya usenga awu kwa mkulu wa hemwe na kwa hemwe hela? Nakandajiza kahi kwa wanhu walingikalisa kuli lukanzi, wawele woganigwa kulya midohe ja hewo wawo na kunwa mitunzi ja hewo wawo.”
28 Hamba ayo chilongozi wa wamizi nakema na kulonga kwa Chiebulaniya, “Mhulichize ulonzi wa mndewa mkulu, mndewa wa Ashulu!
29 Kangulonga kota mleche kukunda Hesekiya yawahade hemwe, kwa vila howeza kuwalohola kulawa mmoko mwa heye.
30 Mleche kukunda Hesekiya yawahade hemwe leka mitumbile kwa Mkulu Nguluwi kwa kuwalonjela, ‘Mkulu Nguluwi kotulohola na muji awu hauwichigwa mmoko mwa mndewa wa Ashulu.’
31 Mleche kumhulichiza Hesekiya, kwa vila mndewa wa Ashulu kangulonga kota mihanyise na heye na miwiche hali ulongozi wa heye. Hamba chila yumwe kolya kulawa kuli mzabibu wa heye na mtini wa heye yuye na kunwa mazi kulawa kuli ideho lya heye yuye,
32 mbaka aho hamba hoyokuya kuwahilika kutali kuli isi kota ayi ya hemwe, isi iwele na nyhule na divai na mibumunda na migunda ja zabibu na mizeituni na hanombwa, leka mikale mleche kubagama. Mleche kumhulichiza Hesekiya hoyowahada hoyolonga kota Mkulu Nguluwi kowalohola hemwe.
33 Ndaze, kabaho mlungu wa wanhu wa isi yoneche yawele nakawalohola kulawa mmoko mwa mndewa wa Ashulu?
34 Jakohi milungu ja Hamati na Alipadi? Jakohi milungu ja Sefalivaimu na Hena na Iva? Ndaze, najiulohola muji wa Samaliya kulawa mmoko mwa heye?
35 Mlungu wachi hali milungu jeng'ha ja isi azi yawele nakailohola isi ya heye mmoko mwa mndewa wa Ashulu? Ahyo Mkulu Nguluwi howeza kuulohola muji wa Yelusalemu kulawa mmoko mwa heni.”
36 Ila wala wanhu nawenyamalila, hawedichile chinhu choneche, kwa vila mndewa Hesekiya nayali yawalajize, “Mleche kumwidichila.”
37 Hamba Eliyakimu, mwana wa Hilikiya, yawele nayali yoilolela ng'handa na Shebuna yalingwandika kukumbuchila na Yowa, mwana wa Asafu, yalingwandika, nawaluta kwa Hesekiya kuno mivalo ja hewo jidaduligwe kwa masinzo na kumlonjela ulonzi uwele chilongozi mkulu wa wamizi woyaulonjile.