8
Isanduku lya ilagano lyangugaligwa kuli ng'handa ya Nguluwi
(2 Mihela 5:2-6:2)
1 Lelo, mndewa Solomoni, nakawachema wasekulu na vilongozi weng'ha wa nhanzi na wa ivyazi lya Isilaeli ako Yelusalemu, leka waligale isanduku lya ilagano lya Mkulu Nguluwi kulawa honhu hamwenga ha muji wa Daudi, hawele ndo chidunda cha Siyoni mbaka kuli ng'handa ya Nguluwi.
2 Walume weng'ha wa Isilaeli nawekungajiza kwa mndewa Solomoni mhela wa mnvina ya vibumuli, kuli mwezi wa Etanimu, uwele ndo mwezi wa saba.
3 Wasekulu weng'ha wa Isilaeli lowafichile, watambika nawalipika isanduku lya ilagano lya Mkulu Nguluwi.
4 Walawi na watambika nawalihola isanduku lya ilagano lya Mkulu Nguluwi na ihema lya Nguluwi na vinhu vyelile vyeng'ha viwele amo mihema, watambika na Walawi nawavipika.
5 Mndewa Solomoni na nhing'hano yeng'ha ya Waisilaeli wawele nawekungajiza hali heye, wawele nawali hali alyo isanduku lya ilagano, nawalavya nhambiko nyinji za ming'holo na misenga jiwele hisabu yake hailinguweza kwandichigwa ne kuwazigwa.
6 Hamba watambika nawalihilika isanduku lya ilagano lya Mkulu Nguluwi mbaka hali honhu hake, mgati mwa honhu helile ha ng'handa ya Nguluwi, hawele ndo honhu helile ng'hatu, nawaliwika hasi ha mabawa ga vilumbigwe viwele na mabawa.
7 Avyo vilumbigwe viwele na mabawa navigonzola mabawa gawo mchanya mwa honhu hawichigwe isanduku lya ilagano, ahyo isanduku alyo na mipichilo jake navyali hasi ha mabawa.
8 Mipichilo jake najali ng'wemang'wema lukami mbaka najoneka kulawa honhu helile hali honhu helile ng'hatu, ila hajilingoneka hanze ha honhu helile. Mipichilo ajo jing'hali kuko.
9 Mgati mwa isanduku lya ilagano nakwali na vibawo vili hela vya maganga, viwele Musa nayali yaviwichile mgati mwake ako Holebu, honhu hawele Mkulu Nguluwi nakadita ilagano na Waisilaeli lowalawile Misili.
10 Watambika lowalawile hali honhu helile, ng'hungugu naimemeza ng'handa ya Mkulu Nguluwi.
11 Ahyo watambika nawalemwela kukola mijito kwa chiwalo cha ng'hungugu ayo, kwa vila ukulu wa Mkulu Nguluwi nauimemeza ng'handa ya Mkulu Nguluwi.
12 Hamba Solomoni nakalanda yolonga, “Mkulu Nguluwi nakulonga kota hegwe kochikala kuli jiza totolo,
13 ena, ndikomya nandikuzenjela ng'handa inojile ng'hatu, honhu ha hegwe ha kikala mazuwa gose.”
Ulonzi wa Solomoni kwa nhing'hano
(2 Mihela 6:3-11)
14 Hamba mndewa Solomoni nakaligaluchila na kulitambichiza ikugusi lya wanhu wa Isilaeli wawele wemile hala,
15 nakalonga, “Yatogoligwe Mkulu Nguluwi, Nguluwi wa Isilaeli, yawele kwa moko wa heye nakeneza lila lyoyalagane na mhaza wa heni Daudi, yolonga,
16 ‘Kulawa zuwa lila londiwalavile wanhu wa heni Isilaeli kulawa Misili, sihagule muji kuli nhanzi yoneche ya Isilaeli leka ng'handa ya heni izenjigwe amo na itagwa lya heni liwe amo, ila nandimhagula Daudi kuwalongoza wanhu wa heni Isilaeli.’
17 “Ahyo, mhaza wa heni Daudi, nakanuwila kuzenga ng'handa kwa chiwalo cha Mkulu Nguluwi, Nguluwi wa Isilaeli.
18 Ila Mkulu Nguluwi nakamlonjela mhaza wa heni Daudi, ‘Nakudita goya kuwa na majesa ga kuzenga ng'handa ya heni kwa chiwalo cha itagwa lya heni.
19 Ila, haiwele hegwe uwele konzenjela ng'handa, ila mwanago ndo konzenjela ayo ng'handa, kwa chiwalo cha itagwa lya heni.’
20 “Lelo, Mkulu Nguluwi nakeneza kulagana kwa heye koyalagane, kwa vila nandiwa mndewa honhu ha mhaza wa heni Daudi na sambi ndangikalisa kuli chigoda cha undewa cha Isilaeli, kota vila Mkulu Nguluwi vyoyalagane, nani nanzenga ng'handa ya Nguluwi kwa chiwalo cha itagwa lya Mkulu Nguluwi, Nguluwi wa Isilaeli.
21 Mzidi wa ago, nambika honhu ha kuwika isanduku lya ilagano, liwele mgati mwa alyo mna lila ilagano lya Mkulu Nguluwi lyoyaliditile na wasekulu wa hetwe, mhela loyawalavile kuli isi ya Misili.”
Kulanda kwa Solomoni
(1 Mihela 6:12-42)
22 Hamba Solomoni nakema hali honhu ha kulavila nhambiko ha Mkulu Nguluwi na hali nhing'hano yeng'ha ya Isilaeli, nakenula moko ga heye kulutila kilanga,
23 nakalonga, “Gwa Mkulu Nguluwi, Nguluwi wa Isilaeli, haduhu Nguluwi yunji kota hegwe, kuchanya kilanga ne hasi muisi! Hegwe ndo wa kukundigwa, ulingubatilila ilagano na kulajila igano lya kwimilila kwa vitumagwa wa hegwe walinguwinza nzila za hegwe kwa nhumbula za hewo zeng'ha.
24 Nakweneza kulagana kwa hegwe kwa chitumagwa wa hegwe Daudi, mhaza wa heni, kwa mlomo wa hegwe nakulagana na kwa moko wa hegwe nakweneza, kota vyoiwele lehano.
25 Ahyo, gwa Mkulu Nguluwi, Nguluwi wa Isilaeli, ndangukulanda kahi mwenezele chitumagwa wa hegwe Daudi, mhaza wa heni, kulagana kwa hegwe koulagane loulonjile, ‘Mazuwa geng'ha kowa na mlelwa wa kikalisa kuli chigoda cha undewa cha Isilaeli, wone walelwa wa hegwe wochilolela goya hali heni kota hegwe vyouditile hali heni.’
26 Lelo, gwa Nguluwi wa Isilaeli, weneze ulonzi wa hegwe woulagane na chitumagwa wa hegwe Daudi, mhaza wa heni.
27 “Ila, gwa Nguluwi, kwangukomya kochikala muisi? Ulole, ukulu uwele kilanga hauweza kuhega kwa hegwe. Yowa ndaze kuli ng'handa ayi izenjigwe?
28 Ila, gwa Mkulu Nguluwi, Nguluwi wa heni, heni chitumagwa wa hegwe ndangukulanda uhulichize kulanda kwa heni lehano.
29 Uyamile ng'handa ayi nechilo na nemisi, honhu hawele nakulonga, ‘Itagwa lya heni lyowa aha,’ leka unyhulichize, heni chitumagwa wa hegwe hondikuya honhu aha kulanda.
30 Uhulichize kulanda kwa heni chitumagwa wa hegwe na kwa wanhu wa hegwe Isilaeli howolanda kuno wahinduchile honhu aha. Kulawa ako kilanga, uhulichize kulanda na louhulika, utulechele.
31 “Wone munhu yalonjelezwe na myage kota nakamditila gehile na koganigwa kilaha na koluta hali honhu ha kulavila nhambiko ha hegwe mgati mwa ng'handa ya hegwe kwa chiwalo cha kilaha,
32 lelo, dedede, uhulichize kulawa kilanga na uwaditile vitumagwa wa hegwe kota vyoulingona inoga. Utaguse hali vitumagwa wa hegwe, kuno umtagusa yula yawele na nongwa na kigala gala goyaditile mchanya mwake. Umuwikulile yula yawele na hachi kota kahela nongwa na utawize kota kana hachi.
33 “Mhela wanhu wa hegwe Isilaeli howolemwela hali wang'honyo wa hewo kwa chiwalo cha gehile gowaditile hali hegwe na wone wokugaluchila na kulikunda itagwa lya hegwe na kukudedeza kuli ng'handa ayi,
34 lelo, uhulichize ako kilanga na ugalechele gehile ga wanhu wa hegwe Isilaeli na kuwahilusa kuli isi youwapele wasekulu wa hewo.
35 “Mhela ulanga houleka kulagaza nhonya kwa vila wanhu wa hegwe nawadita gehile hali hegwe na wone wolanda kulutila honhu aho kulikunda itagwa lya hegwe na kugaleka gehile ga hewo kwa vila nakuwagaza,
36 dedede, uhulichize kulawa ako kilanga na ugalechele gehile ga wanhu wa hegwe Isilaeli. Uwalanguse nzila inojile ya kikala na uwatowele nhonya mchanya mwa isi youwapele, wanhu wa hegwe, leka iwe uhalizi wa hewo.
37 “Wone kuwe na lufemba muisi ama utamwa ulinguchemigwa tauni ama chipalangule ama lungwi ama nzije ama lung'hwawa ama wone wang'honyo wowazunguluta kuli muji wa hewo woneche wula ama utamwa woneche uwele woweza kuwafika,
38 dedede, uhulichize kulanda koneche kwa munhu yoneche ama wanhu wa hegwe Isilaeli, wone chila munhu kogazela magazo ga mnhumbula mwa heye na kokulanda na kugolola moko ga heye kulutila kuli ng'handa ayi,
39 lelo, uhulichize kulawa ako kilanga, haluga ha hegwe. Uwalechele na udite chila choulinguchona chinoga na umhe chila munhu kwa kiwhana na madito ga heye, kwa vila kwanguizela nhumbula ya heye na kwa vila ndo hegwe uliyeka ulinguzizela nhumbula za wanhu weng'ha,
40 leka wakudumbe mhela weng'ha howowa wochikala kuli isi youwapele wasekulu wa hetwe.
41 “Hihyo du, kwa mbuli ya mjenzi yawele hawele yumwe wa wanhu wa hegwe Isilaeli, ila nakoya kulawa isi ya kutali kwa chiwalo cha itagwa lya hegwe,
42 kwa vila wanhu wa isi zinji wohulika kuwala itagwa lya hegwe likulu na moko wa hegwe uwele na mong'ho, hoyokuya kulanda kulutila kuli ng'handa ayi,
43 lelo, uhulichize kulawa kilanga, haluga ha hegwe na udite kota vyoulingona inoga na udite lyoneche liwele mjenzi ayo kangukulanda, leka wanhu wa isi zeng'ha walizele itagwa lya hegwe na wakudumbe kota vyowalingudita wanhu wa hegwe Isilaeli leka nawo wavizele kota ng'handa ayi yondiizenjile naichemigwa kwa itagwa lya hegwe.
44 “Mhela wanhu wa hegwe howoluta kitowa ngondo na mng'honyo wa hewo koneche kula kouwahilika na mhela howolanda kwa Mkulu Nguluwi kulutila kuli muji uwele nauhaguligwa na kuli ng'handa iwele nandiizenga kwa chiwalo cha itagwa lya hegwe,
45 lelo, uhulichize kulanda kwa hewo kulawa ako kilanga, uwadite hewo wawasumye wang'honyo wa hewo.
46 “Wone wanhu wa hegwe wodita gehile hali hegwe, kwa vila haduhu munhu yoneche yawele halingudita gehile na hegwe kozudizwa na hewo na kuwawika kwa wang'honyo wa hewo wawele wowahilika kuli isi ya wang'honyo, kutali ama habehi
47 na wone mhela lowowa ako kuli isi ya chijenzi wogalula nhumbula za hewo na kulonga gehile ga hewo na kukulilila kuli isi ya wala wawele nawawasumya na kulonga, ‘Natudita gehile na kwajilila na natudita wihe,’
48 na wone wokugaluchila kwa nhumbula za hewo zeng'ha kuli isi ya wang'honyo wa hewo wawele nawawahola na wone wokulanda kulutila kuli isi youwapele wasekulu wa hewo na kulutila kuli muji wouuhagule na ng'handa yondiizenjile kwa chiwalo cha itagwa lya hegwe,
49 lelo, kulawa ako kilanga, haluga ha hegwe, uhulichize kulanda kwa hewo na kung'ung'uta kwa hewo na kuilewela hachi ya hewo.
50 Uwalechele wanhu wa hegwe waditile gehile hali hegwe, uwalechele nongwa za hewo zeng'ha waziditile hali hegwe na uwadite wawasumile wawonele isungu,
51 kwa vila ndo wanhu wa hegwe na uhalizi wa hegwe uwalavile Misili kuli lila itanulu lya kusungulumulila chuma.
52 “Ukulole kulanda kwa chitumagwa wa hegwe na kulanda kwa wanhu wa hegwe Isilaeli. Uwahulichize mhela woneche howokulanda,
53 kwa vila gwa Mkulu Nguluwi, nakuwahagula hewo kulawa kuli wanhu wa isi zeng'ha leka wawe uhalizi wa hegwe, kota vyouwikule kukolela chitumagwa wa hegwe Musa, mhela louwalavile wasekulu wa hetwe kulawa Misili.”
Solomoni kanguitambichiza nhing'hano
54 Solomoni loyasindile kumlanda Mkulu Nguluwi, nakenuka kulawa kuli hala honhu ha kulavila nhambiko ha Mkulu Nguluwi, honhu hoyawele yafugame, kuno yawele yagonzole moko ga heye kulutila kilanga.
55 Nakema na kuwatambichiza Waisilaeli weng'ha wawele wekungajize aho, yolonga kwa lizi likulu,
56 “Yatogoligwe Mkulu Nguluwi, yawapele kwesela wanhu wa heye Isilaeli, kota vila vyoyalagane. Haduhu ulonzi woneche upungule kuli kulagana kwa heye kweng'ha kunojile koyalagane na chitumagwa wa heye Musa.
57 Mkulu Nguluwi, Nguluwi wa hetwe, yawe hamwe na hetwe kota vyoyawele na wasekulu wa hetwe, yaleche kutuleka ne kutulema.
58 Yazidite nhumbula za hetwe zilute kwa heye, leka tujende kuli nzila za heye na kibatilila malajizo na mizilo joyawapele wasekulu wa hetwe.
59 Lelo, awu ulonzi wa heni uwele ndo kulanda kwa heni hali Mkulu Nguluwi, uwe habehi na Mkulu Nguluwi, Nguluwi wa hetwe, nemisi na nechilo, leka yamtambichize chitumagwa wa heye na wanhu wa heye Isilaeli, leka mbuli za hewo zilutilile goya chila zuwa,
60 leka wanhu wa isi zeng'ha wavizele kota Mkulu Nguluwi ndo Nguluwi na haduhu yunji.
61 Ila mwanguganigwa muwe wa kukundigwa hali Mkulu Nguluwi, Nguluwi wa hetwe, kwa kikala kwa kuwinza malajizo na kibatilila mizilo jake kota vyomlingudita mhela awu.”
Ng'handa ya Nguluwi yanguwichigwa chiuyeng'ha
(2 Mihela 7:4-10)
62 Hamba mndewa Solomoni na Waisilaeli weng'ha wawele hamwe na heye, nawamlavila nhambiko Mkulu Nguluwi.
63 Naye mndewa Solomoni nakalavya nhambiko za kikala goya kwa Mkulu Nguluwi, misenga elufu makumi meli na mbili (22,000) na ming'holo na mhene lachi imwe na elufu makumi meli (120,000). Ahyo ndo mndewa Solomoni na wanhu weng'ha wa Isilaeli vyowaiwichile chiuyeng'ha ng'handa ya Mkulu Nguluwi.
64 Zuwa lilyo, mndewa Solomoni nakahaheliza honhu ha hagati ha lugagala luwele kumwando mwa ng'handa ya Mkulu Nguluwi na kulavya nhambiko za kulakazwa na nhambiko za nyhule na vihande vya mafuta ga nhambiko ya kikala goya, kwa vila hala honhu ha kulavila nhambiko ha shaba hawele hali Mkulu Nguluwi nahali hado lukami kuweza kuwika nhambiko azo zeng'ha.
65 Ahyo mndewa Solomoni nakadita mnvina mhela wula na Waisilaeli weng'ha wawele hamwe na heye. Nayali nhing'hano ng'hulu lukami, wanhu kulawa Lebo-hamati mbaka kuli kazanda ka Misili. Nawadita mnvina ayo hali Mkulu Nguluwi, Nguluwi wa hetwe kwa mazuwa saba na mazuwa saba ganji, gawele ndo mazuwa kumi na gane.
66 Zuwa liwinzile, Solomoni nakawalaga wanhu na kuwakundiza woche. Nawamtambichiza mndewa, hamba nawaluta chila munhu kaye kwake kuno wosangalala mnhumbula mwa hewo kwa chiwalo cha mbuli zeng'ha ziwele Mkulu Nguluwi nakadita kwa chiwalo cha chitumagwa wa heye Daudi na kwa chiwalo cha wanhu wa heye Isilaeli.