13
Mloli kanguhapanjila honhu ha kulavila nhambiko ha Beteli
1 Kwa ulonzi wa Mkulu Nguluwi, mloli nakafika Beteli kulawa Yuda, mhela Yeloboamu loyawele yemile hafungo ha honhu ha kulavila nhambiko leka yalavye nhambiko.
2 Munhu ayo nakahapanjila kwa lizi likulu hala honhu ha kulavila nhambiko yolonga, “Gwa honhu ha kulavila nhambiko, honhu ha kulavila nhambiko! Ulonzi wa Mkulu Nguluwi wangulonga hino, ‘Mwana yalinguchemigwa Yosiya kopondigwa kuli ng'handa ya Daudi. Mchanya mwa hegwe kowalavya watambika wa honhu ha kufugamila, wala wawele wangulavya nhambiko sambi na mizeje ja wanhu jolakazwa mchanya mwako.’ ”
3 Zuwa lilyo, mloli nakalavya ulajilo yolonga, “Awu ndo ulajilo woyalonjile Mkulu Nguluwi, ‘Honhu aha ha kulavila nhambiko hobomoka na mivu jiwele mchanya mwake jobohoka.’ ”
4 Mndewa Yeloboamu loyahuliche ulonzi awo wa mloli kuwala honhu ha kulavila nhambiko ako Beteli, nakagolola moko mchanya mwa honhu ha kulavila nhambiko na kulonga, “Mmibate ayo.” Ila moko woyaugolole kumlutila yula munhu nauswina na kupona bahala, hawezile kuubina.
5 Honhu ha kulavila nhambiko nahabomoka na mivu najibohoka kota wula ulajilo yaulavile ayo mloli kwa ulonzi wa Mkulu Nguluwi.
6 Hamba mndewa Yeloboamu nakamlonjela mloli, “Dedede, mdedeze Mkulu Nguluwi, Nguluwi wa hegwe, leka moko wa heni upone.” Lelo mloli nakalanda kwa Mkulu Nguluwi kwa chiwalo cha mndewa na moko wa heye naupona na nawali kota vyouwele hamwande.
7 Mndewa nakamlonjela yula mloli, “Uye kaye kwa heni ulye chilyo, nani ndokupa ndolendole.”
8 Ila yula mloli nakamwidichila, “Hebu, siweza kuluta hamwe na hegwe ne kulya ibumunda ama kunwa mazi, hanga komha heni nusu ya lufufu lwa hegwe,
9 kwa vila nandajizwa kwa ulonzi wa Mkulu Nguluwi, ‘Uleche kulya ibumunda ne kunwa mazi ne kuhiluka kwa nzila yowuyile.’ ”
10 Lelo, yula munhu nakaluta, hahiluchile kukola nzila yila yoyuyile Beteli.
Mloli sekulu kulawa Beteli
11 Mhela awo, nakwali na mloli yumwenga sekulu, yawele nayali yochikala ako Beteli, yawele wanage nawaluta kwa heye na kumlonjela mbuli zeng'ha zoyaditile yula mloli wa mwaluko zuwa lila ako Beteli na nawamlonjela wula ulonzi woyamlonjele mndewa Yeloboamu.
12 Mhaza wa hewo nakawauza, “Nakalutila nzila yachi?” Nawo nawamlajila nzila yoyalutile ayo mloli kulawa Yuda.
13 Naye nakawalonjela wanage, “Mmbichile goya alyo idogowi.” Wanage nawamuwichila goya idogowi na sekulu nakakwina mchanya mwa alyo idogowi
14 na kumuwinza yula mloli. Nakamfika yekalise hasi ha mwaloni, nakamuuza, “Ndaze, hegwe ndo mloli kulawa Yuda?” Naye nakamwidichila “Ena, ndo heni.”
15 Ayo sekulu nakamlonjela, “Tulute kaye kwa heni, ukalye chilyo.”
16 Ila yula mloli kulawa Yuda nakamlonjela, “Siweza kuhiluka na kuluta na hegwe ne kulya ibumunda ne kunwa mazi hamwe na hegwe honhu aha,
17 kwa vila ulonzi wa Mkulu Nguluwi naundonjela, ‘Uleche kulya ibumunda ne kunwa mazi ako ne kuhiluka kwa nzila yiyo yowuyile.’ ”
18 Ayo mloli sekulu wa Beteli nakamlonjela, “Nani kahi nda mloli kota hegwe. Mhilisi nakalongasa na heni kwa ulonzi wa Mkulu Nguluwi, yolonga, ‘Mhiluse yalute kaye kwa hegwe, leka yalye chilyo na kunwa mazi.’ ” Ila ayo mloli sekulu nayali yomhada.
19 Ahyo, mloli kulawa Yuda nakahiluka hamwe na heye, nakalya chilyo na kunwa mazi kwa ayo mloli sekulu.
20 Lowawele mchisaga, ulonzi wa Mkulu Nguluwi naumuyila ayo mloli sekulu yawele nakamhilusa yula mloli kulawa Yuda,
21 nakamlonjela kwa lizi likulu yula mloli kulawa Yuda, “Mkulu Nguluwi kangulonga hino, ‘Nakuubelenhuka ulonzi wa Mkulu Nguluwi na huwinzile mzilo woyakupele Mkulu Nguluwi, Nguluwi wa hegwe,
22 ila nakuhiluka hano, nakulya chilyo na kunwa mazi honhu hano hawele nakulonjelwa uleche kulya ne kunwa. Ahyo, mtufi wa hegwe hautiligwa kuli vilaga vya wasekulu wa hegwe.’ ”
23 Mhela mloli kulawa Yuda loyasindile kulya na kunwa, yula mloli kulawa Beteli yawele nakamhilula, nakamuwichila goya idogowi lya heye.
24 Loyawele yoluta naketing'hana na isimba mnzila. Alyo isimba nalimkopola na mtufi wa heye nawali utozigwe mnzila, kuno idogowi lya heye na alyo isimba najali jimile habehi na mtufi wa heye.
25 Wanhu wamwenga vyowawele wokola mnzila nawawona mtufi aho mnzila kuno isimba liwele limile hafungo ha mtufi awo, nawaluta kuwalonjela wanhu kuli muji uwele yula mloli sekulu nayali yochikala.
26 Yula mloli kulawa Beteli yawele nakambochela haluga ha heye, loyahuliche mbuli ayi nakalonga, “Ayo ndo yula mloli kulawa Yuda, yawele nakaubelenhuka ulonzi wa Mkulu Nguluwi. Mkulu Nguluwi nakamlavya kwa isimba, liwele nalimdadula na kumkopola kota ulonzi wa Mkulu Nguluwi vyoumlonjele.”
27 Yula mloli nakawalonjela wanage, “Mmbichile goya idogowi.” Nawo nawadita ahyo.
28 Hamba, ayo mloli sekulu nakaluta na kuufika mtufi wa mloli kulawa Yuda uwele mnzila, kuno idogowi na isimba jimile hafungo ha mtufi wa heye. Alyo isimba halidile mtufi wa yula munhu ne kulidadula lila idogowi.
29 Lelo, ayo mloli sekulu nakauhola wula mtufi wa mloli kulawa Yuda, nakauwika mchanya mwa idogowi lya heye na kuuhilusa kuli muji wa Beteli, leka yaulombochezele na kuutila.
30 Hamba nakauwika wula mtufi kuli chilaga cha heye, ayo mloli sekulu. Heye hamwe na wanage nawalombocheza kwa kubagama kwa heye kwa kulonga, “Gwa! Mng'holozangu.”
31 Lowasindile kumtila, mloli ayo nakawalonjela wanage, “Hondibagama, mnhile mumu kuli chilaga choyatiligwe ayu mloli kulawa Yuda, mjiwiche mizeje ja heni hafungo ha mizeje ja heye.
32 Kwa vila mbuli zoyalajizwe kuzidamla kwa ulonzi wa Mkulu Nguluwi kuwala honhu ha kulavila nhambiko ako Beteli na kuwala honhu ha kulavila nhambiko heng'ha kuli honhu ha kufugamila kuli miji ja Samaliya, ndikomya zolawila.”
33 Hanga mbuli azi nazilawila, ila Yeloboamu hagalule nzila za heye zihile. Nakawawika kahi watambika kwa chiwalo cha honhu ha kufugamila, kulawa wanhu wa chila nhanzi. Yoneche yaganile kuwa mtambika, nayali yomuwika yawe mtambika wa honhu ha kufugamila.
34 Mbuli ayi nayali gehile ga ivyazi lya Yeloboamu, gawele nagawambuzila kudumigwa kwa heye mbaka kwajilila muisi.