7
Nongwa ya Akani
1 Ila Waisilaeli hawawele na makundo kuli vila vinhu viwichigwe chiuyeng'ha kwa vila Akani nakahola vinhu vimwe viganigwe kudumigwa. Akani nayali mwana wa Kalimi, mwana wa Sabidi, mwana wa Sela, wa nhanzi ya Yuda. Ahyo, ng'halazi ya Mkulu Nguluwi naiwafika Waisilaeli.
2 Yoshua nakawalajiza wanhu kulawa Yeliko kuluta muji wa Ayi, uwele habehi na Beti-aveni, kolilawilaga isanya mwa Beteli na nakawalonjela, “Mlute mkaipugajize isi.” Nawo nawaluta na kuupugajiza muji wa Ayi.
3 Vyowahiluche, nawamlonjela Yoshua, “Kuduhuli chiwalo cha kuhilika wanhu weng'ha na kuwatunya kwa kuutowa muji wa Ayi, mina wanhu wake ndo wado hela. Wanhu elufu mbili ama elufu zidatu wohega.”
4 Lelo wanhu kota elufu zidatu hino nawaluta kuutowa muji wa Ayi, ila nawabilimiswa na wanhu wa muji awo.
5 Wanhu wa Ayi nawawakopola Waisilaeli makumi gadatu na sita na kuwawinga wayage kulawa kuli lwizi lwa muji mbaka kuli viduliko vya Shebalimu na kuwatowa hala lowaduliche. Waisilaeli nawatweguka ng'hatu.
6 Yoshua nakadega mivalo ja heye kwa chiwalo cha kulombocheza, heye hamwe na wasekulu wa Isilaeli. Nawetoza hanyi ha isanduku lya ilagano lya Mkulu Nguluwi mbaka matinazo na nawewika nhimbwisi kumutwi kwa hewo.
7 Yoshua nakalonga, “Tochona hetwe, gwa Mkulu Nguluwi! Lekachoni nautulosile lwanda lwa Yolodani leka utuwiche mmoko mwa Waamoli watudumye? Natwahakundile kupona kumwambu mwa lwanda lwa Yolodani!
8 Gwa Mkulu, ndonje choni kuno Waisilaeli nawawabilima wang'honyo wa hewo?
9 Lelo Wakanaani hamwe na wanhu wa hewo weng'ha wa isi ayi vyowohulika mbuli ayo, wotuzunguluta na kutudumya ng'hatu. Lelo kodita choni kwa chiwalo cha ung'hangala wa itagwa lya hegwe?”
10 Mkulu Nguluwi nakamlonjela Yoshua, “Wime! Lekachoni kwangitoza hanyi ahyo?
11 Waisilaeli nawadita gehile, mina waleka ilagano lya heni lyondiwalajize webatilile, nawahola vinhu vimwe viwichigwe chiuyeng'ha, wahiza na kuhada. Nawaviwika hamwe na vinhu vya hewo.
12 Ahyo, Waisilaeli hawoweza kuwatowa wang'honyo wa hewo, wanguwabilima wang'honyo wa hewo kwa vila nawedita wawo wawe chinhu cha chiuyeng'ha cha kudumizwa! Siwa hamwe na hewo kahi wone hamdumize vinhu viwele amo hali hemwe viwichigwe chiuyeng'ha.
13 Lelo winuche uwelize wanhu, walonjele kota weyelize kwa kiwika goya kwa zuwa lya mitondo. Mina heni Mkulu Nguluwi, Nguluwi wa Isilaeli, ndangulonga hino, ‘Hali hemwe hana vinhu vilavigwe vidumigwe. Hamuweza kuwasumya wang'honyo wa hemwe mbaka vinhu avyo vyusigwe hali hemwe.
14 Ahyo, mitondo kung'hali lufuku weng'ha mokuya kwa heni Mkulu Nguluwi, nhanzi kwa nhanzi. Nhanzi yondiihagula yoluta kumwando kwa lukolo mbaka lukolo. Lukolo lyondilihagula lyoluta kumwando ivyazi mbaka ivyazi. Na ivyazi lyondilihagula lyoluta kumwando kwa munhu yumwe yumwe.
15 Munhu yoneche yokoneka yawele na vinhu viwichigwe chiuyeng'ha, ayo munhu kolakazwa kwa chiluli, heye hamwe na vinhu vya heye, mina nakabena ilagano lya heni Mkulu Nguluwi, nakadita mbuli ya kubasa soni kuli Isilaeli.’ ”
16 Lelo Yoshua nakenuka kung'hali lufuku, nakawegala Waisilaeli weng'ha habehi, nhanzi kwa nhanzi, nhanzi ya Yuda naihaguligwa.
17 Nakazigala habehi ng'holo za Yuda, lukolo kwa lukolo, na lukolo lwa Sela naluhaguligwa. Nakegala habehi ivyazi lya Sela, ivyazi mbaka ivyazi, na ivyazi lya Sabidi naluhaguligwa.
18 Yoshua nakegala ivyazi lya Sabidi habehi, munhu kwa munhu. Akani mwana wa Kalimi, mwana wa Sabidi, mwana wa Sela wa nhanzi ya Yuda, nakahaguligwa.
19 Yoshua nakamlonjela Akani, “Mwana wa heni, umhe ukulu Mkulu Nguluwi, Nguluwi wa Isilaeli, umtogole. Undonjele gala gouditile, na uleche kuvisa.”
20 Akani nakamlonjela Yoshua, “Ndikomya ndita gehile hali Mkulu Nguluwi, Nguluwi wa Isilaeli, na hino ndo vyonditile.
21 Vyondiliwene ivalo limwe linojile kulawa Shinali hali vinhu viholigwe kuli ngondo na migwala miya mbili ja sendi na chihande cha zahabu chiwele na itunyo lya nusu kilo, nambona maya na kuvihola. Ndizitila hanyi mgati mwa ihema lya heni, sendi kahi za hanyi ha vinhu avyo.”
22 Lelo, Yoshua nakawalajiza wasenga, nawo nawabilima mbaka kuli ihema lya Akani. Vila vinhu navyali vivisigwe kuli ihema na sendi iwele hanyi hake.
23 Nawavihola kuli ihema na kuvihilika kwa Yoshua na wanhu weng'ha wa Isilaeli, nawo nawaviwika hasi hali Mkulu Nguluwi.
24 Yoshua hamwe na Waisilaeli weng'ha, nawamhola Akani, mwana wa Sela, hamwe na sendi na ivalo na zahabu na wanage weng'ha walume na wahinza wa heye na misenga ja heye na midogowi na ming'holo ja heye na ihema lya heye na chila chinhu choyawele nacho na kuwahilika kuli ibindi lya Akoli.
25 Yoshua nakamuuza Akani, “Lekachoni nakutugalila magazo? Mkulu Nguluwi kokugalila magazo gwegwe baho lehano.” Waisilaeli weng'ha nawamtowa Akani kwa maganga mbaka nakabagama. Hamba nawawatowa wanhu wa heye weng'ha kwa maganga mbaka nawabagama, nawawalakaza weng'ha kwa chiluli.
26 Hamba nawakungajiza maganga menji mchanya mwake, gabaho mbaka lehano. Aho ng'halazi ya Mkulu Nguluwi naihola. Honhu aho hanguchemigwa Ibindi lya Akoli mbaka lehano.