3
Waisilaeli wanguloka lwanda lwa Yolodani
1 Kung'hali lufuku Yoshua hamwe na wanhu weng'ha wa Isilaeli nawaluka majendo kulawa Shitimu. Lowalufichile lwanda lwa Yolodani, nawawika kambi aho lowawele wang'hali kuloka.
2 Lolifichile zuwa lya kadatu, vilongozi nawakola hagati ha kambi ayo,
3 nawawalajiza wanhu, “Homlyona isanduku lya ilagano lya Mkulu Nguluwi, Nguluwi wa hemwe, lipapigwa na watambika Walawi, mokuka honhu ha hemwe na kuliwinza,
4 leka mvizele nzila ya kukola kwa vila hamkolile aku aho hamwande. Ila mleche kuwa habehi na isanduku lya ilagano, muwe utali wa kota kilomita imwe hino.”
5 Yoshua nakawalonjela wanhu, “Miyelize kwa vila mitondo Mkulu Nguluwi kodita vinduzanduza hali hemwe.”
6 Hamba Yoshua nakawalonjela watambika, “Mhole isanduku lya ilagano, mlongole nalyo hali wanhu.” Nawo nawalihola na kulongola hali wanhu.
7 Mkulu Nguluwi nakamlonjela Yoshua, “Lehano ndokwaluka kukwinula uwe chilongozi hali wanhu weng'ha wa Isilaeli leka wavizele kota vila vyondiwele hamwe na Musa, ndo vyondiwa hamwe na hegwe.
8 Walajize awo watambika walingulipika isanduku lya ilagano kota howofika habehi na hafungo mwa lwanda lwa Yolodani, wenjile mlwanda na weme hali mazi.”
9 Hamba Yoshua nakawalonjela Waisilaeli, “Muye habehi leka mhuliche ulonzi woyalonjile Mkulu Nguluwi, Nguluwi wa hemwe.”
10 Yoshua nakalutilila kulonga, “Lelo kwa mbuli ayi movizela kota Nguluwi yawele mkomu ka hali hemwe na kowawinga hali hemwe wanhu walingikala ubanzi uyage wa lwanda lwa Yolodani, wawele ndo Wakanaani na Wahiti na Wahivi na Wapelisi na Wagiligashi na Waamoli na Wayebusi.
11 Mlole isanduku lya ilagano lya Mkulu wa isi yeng'ha, lya habehi kukola hali hemwe kuluta kuli lwanda lwa Yolodani.
12 Lelo mhagule walume kumi na weli kulawa kuli nhanzi za Isilaeli, chila nhanzi munhu yumwe.
13 Mhela wa magulu ga watambika walingulipika isanduku lya ilagano lya Mkulu Nguluwi, Mkulu wa isi yeng'ha, logokwinjila mli mazi ga lwanda lwa Yolodani, mazi ga lwanda alo goleka kuchililika. Gala gawele gowa gochililika kulawila ubanzi wa kuchanya gochikungajiza hamwe.”
14 Lelo wanhu nawoka howekale na kuluta kuloka lwanda lwa Yolodani, watambika nawali wapichile isanduku lya ilagano wowalongola wanhu.
15 Lwanda lwa Yolodani lwangumema mhela wa mbena. Baho du wala wapichile isanduku lya ilagano lowafichile Yolodani na magulu ga hewo vyogabijile mazi hafungo ha lwanda alo,
16 mazi gawele gochililika kulawila ubanzi wa kuchanya nagema na kilunda mbaka ako Adamu, chijiji chiwele habehi na muji wa Saletani. Ahyo mazi ago nagali gochidulika kuluta bahali ya Alaba, izeleche kota Bahali ya Mwino, nagema ng'hatu. Wanhu nawaloka kumwando kwa Yeliko.
17 Mhela Waisilaeli vyowawele woloka honhu hawele mazi nagakola, watambika wapichile isanduku lya ilagano lya Mkulu Nguluwi, nawema hagati ha lwanda Yolodani mbaka wanhu weng'ha nawaloka.