18
Nhanzi ziyage zangugawilwa isi
1 Vyowaisumile yila isi, wanhu weng'ha wa Isilaeli nawekungajiza ako Shilo na kulimiza ihema lya Nguluwi.
2 Nazali zisigale hali hewo nhanzi saba ziwele hazigawilwe honhu ha hewo ha isi.
3 Ahyo, Yoshua nakawalonjela Waisilaeli, “Ndaze, mokawila mbaka hanili kuza kuihola isi yila iwele Mkulu Nguluwi, Nguluwi wa wasekulu wa hemwe, yawapele?
4 Mhagule wanhu wadatu kulawa chila nhanzi ndiwalajize kuli isi yeng'ha wakalole na kwandika kota vyowalingugana kwa uhalizi wa hewo, hamba woye wandonjele.
5 Nawo nawaigawa isi ayo kuli honhu saba. Nhanzi ya Yuda naipona na honhu hake ha kusini na nhanzi ya Yusufu ako kasikazini.
6 Mwandiche goya kuwala honhu heng'ha saba na kingalila. Hamba ndotowa simbi hano hali Mkulu Nguluwi, Nguluwi wa hetwe, ilinguwala honhu ha chila nhanzi ya hemwe.
7 Ila Walawi hawopegwa honhu honeche hali hemwe, mina honhu hawo howa ndo watambika wa kumkolela mijito Mkulu Nguluwi. Gadi na Lubeni na nusu ya nhanzi ya Manase, mina nawapegwa honhu ha ubanzi wa kolilawilaga isanya kuli lwanda lwa Yolodani. Nawapegwa honhu aho na Musa, chitumagwa wa Mkulu Nguluwi.”
8 Lelo wanhu awo nawaluka majendo ga kuluta kuilola isi. Lowawele wang'hali kuka, Yoshua nakawalonjela, “Mlute kuli isi zeng'ha mkandiche mbuli ilinguwala ayo isi, hamba mhiluche kundonjela, nani ndotowa simbi hali Mkulu Nguluwi, hano Shilo.”
9 Walume awo nawazunguluta kuli isi yeng'ha, nawandika mbuli ilinguwala honhu aho hamwe na miji jawo kuli vihande saba, hamba nawahiluka kwa Yoshua kula kuli kambi ya Shilo.
10 Ako Shilo, Yoshua nakatowa simbi kwa chiwalo cha honhu aho hali Mkulu Nguluwi, nakawagawila Waisilaeli, chila nhanzi na honhu hake.
Isi ya nhanzi ya Benjamini
11 Simbi ya mwaluko naigwila kwa wanhu wa nhanzi ya Benjamini, kota vyoziwele ng'holo za hewo. Honhu howapegwe wanhu awo nahali hagati ha yila nhanzi ya Yuda na yila nhanzi ya Yusufu.
12 Mbaka wa kasikazini nawaluchila kuli lwanda lwa Yolodani na kukolela kasikazini mwa Yeliko na isi ya vidunda, nauluta kolizinjilaga isanya mbaka kuli chiwala cha Beti-aveni.
13 Kulawa ako, mbaka naulutilila kusini kuza Lusu kukolela ubanzi wa kusini mwa Lusu, mina ndo Beteli, mbaka Ataloti-adali kuli chidunda chiwele kusini mwa Beti-holoni ya Hasi.
14 Ubanzi wa kolizinjilaga isanya mwa chidunda acho chiwele kusini mwa Beti-holoni, mbaka nauhinduka kuluta kusini na Kiliati-baali, ulinguchemigwa kahi Kiliati-yealimu, muji uwele wa nhanzi ya Yuda. Awo ndo nawali mbaka wake ubanzi wa kolizinjilaga isanya.
15 Ubanzi wa kusini, mbaka wake nawaluchila hali ubanzi wa Kiliati-yealimu, naufika Efuloni na kuluta mbaka kuli nzasa ya mazi ga Nefitoa.
16 Hamba naudulika mbaka kuduma kwa chidunda chiwele habehi na ibindi lya mwana wa Hinomu, hali honhu ha kasikazini mwa ibindi lya Walefayi. Kahi mbaka naulutilila kuza kusini, kuli ibindi lya Hinomu, kusini mwa chidunda cha Wayebusi, naulutilila mbaka Eni-logeli.
17 Ako, mbaka nauhinduka kuluta kasikazini kulutila Eni-shemeshi, naukolela Geliloti ulingilola na chiduliko cha Adumimu na kidulika mbaka kuwele na iganga lya Bohani mwana wa Lubeni.
18 Kulawa aho, mbaka nauzunguluta kuza kasikazini hafungo ha Alaba, nawo naudulichila ako Alaba.
19 Kahi, naulutilila kuli ubanzi wa kasikazini kuli chidunda cha Beti-hogila na kumalila kasikazini mwa Bahali ya Mwino, honhu halingwinjilila lwanda lwa Yolodani. Awu ndo nawali mbaka wake kuli ubanzi wa kusini.
20 Lwanda lwa Yolodani ndo nalwali mbaka wake ubanzi wa kolilawilaga isanya. Awu ndo uhalizi wa wanhu wa nhanzi ya Benjamini kota vyoziwele ng'holo za hewo.
21 Miji ja ng'holo za nhanzi ya Benjamini ndo Yeliko na Beti-hogila na Emeki-kesisi
22 na Beti-alaba na Semalaimu na Beteli
23 na Avimu na Pala na Ofila
24 na Kefali-amoni na Ofini na Geba. Miji jeng'ha jowapegwe najali kumi na mili hamwe na vijiji vyake.
25 Miji jiyage najali Gibeoni na Lama na Beeloti
26 na Misipa na Kefila na Mosa
27 na Lekemu na Ilipeeli na Talala
28 na Sela na Haelefu na Yebusi, mina ndo Yelusalemu na Gibeya na Kiliati-yealimu. Miji jeng'ha jowapegwe najali kumi na jine hamwe na vijiji vyake. Aho heng'ha ndo honhu howapegwe wanhu wa nhanzi ya Benjamini, hawe uhalizi wa hewo, kota vyoziwele ng'holo za hewo.