16
Isi ya Efulaimu na ya Manase
1 Honhu howapegwe walelwa wa Yusufu kwa kubakana, nahaluchila kuli lwanda lwa Yolodani, kolilawilaga isanya kuli nzasa ya Yeliko, kukolela kuchiwala mbaka kuli isi ya vidunda kulutila Beteli.
2 Kulawila Beteli mbaka nauluta Lusu, hamba naukola Ataloti kuwele wekale Waaliki.
3 Hamba naudulichila kolizinjilaga isanya kuli isi ya Wayafiteti mbaka Beti-holoni ya Hasi na Geseli na kumalila kuli bahali ya Mediteleniyani.
4 Walelwa wa Yusufu, mina ndo nhanzi ya Manase na nhanzi ya Efulaimu, nawapegwa uhalizi wa isi ayo.
Isi ya nhanzi ya Efulaimu
5 Wanhu wa nhanzi ya Efulaimu kota vyoziwele ng'holo za hewo, mbaka wa isi ya hewo nawali ubanzi wa kolilawilaga isanya, naukola Ataloti-adali kuza Beti-holoni ya Kuchanya,
6 hamba kumalila kuli bahali ya Mediteleniyani. Kwa ubanzi wa kasikazini mbaka naukolela Mikimetati. Kolilawilaga isanya nauhinduka na kuluta Taanati-shilo kuwele naukolile ubanzi kolilawilaga isanya mbaka Yanoa.
7 Kulawa Yanoa nauluta mbaka Ataloti na Naala na kufichila Yeliko na naudumila kuli lwanda lwa Yolodani.
8 Kulawa Tapua, mbaka nauluta kolizinjilaga isanya kuza kuli chikolola cha Kana na kumalila kuli bahali ya Mediteleniyani. Ayi ndo isi yowapegwe wanhu wa nhanzi ya Efulaimu kota vyoziwele ng'holo za hewo,
9 hamwe na muji na vijiji ndo nawonjezelwe kulawila kuli isi ya nhanzi ya Manase.
10 Waefulaimu nahawawawinjile Wakanaani wowawele wekale Geseli. Wakanaani awo nawalutilila kikala hali wanhu wa Efulaimu mbaka lehano, ila wawele wapogozi wa kuwakolela mijito.