14
Kugawilwa kwa isi ya Kanaani
1 Awu ndo uhalizi wa isi iwele wapegwe Waisilaeli kuli isi ya Kanaani. Mtambika Eleasali na Yoshua, mwana wa Nuni, hamwe na wakulu wa lukolo lwa nhanzi ya Waisilaeli nawawagawila Waisilaeli.
2 Uhalizi wa hewo nawapegwa kwa kutowa simbi kota vila Mkulu Nguluwi vyoyamlajize Musa kota zipegwe zila nhanzi tisa na nusu uwe wa hewo.
3 Musa nayali yazipele nhanzi mbili na nusu uhalizi wa hewo, kolilawilaga isanya mwa lwanda lwa Yolodani, ila Walawi hawawele wapegwe honhu ha hewo hamwe na hewo.
4 Walelwa wa Yusufu nawali nhanzi mbili, Manase na Efulaimu. Nhanzi ya Lawi haipegwe honhu honeche ha isi, ila miji ja kikala hela na honhu ha kudimila kwa chiwalo cha misenga na ming'holo ja hewo.
5 Lelo Waisilaeli nawaigawa isi kota vila Mkulu Nguluwi vyoyamlajize Musa.
Kalebu kangupegwa muji wa Hebuloni
6 Zuwa limwe wanhu wa nhanzi ya Yuda nawamlutila Yoshua ako Giligali. Kalebu mwana wa Yefune, nayawele Mkenisi, nakamlonjela Yoshua, “Kwangukumbuchila vila Mkulu Nguluwi vyoyamlajize Musa, munhu wa Nguluwi, kuwala heni na hegwe vyonatwali Kadeshi-balineya.
7 Vyonandali na miyaka makumi gane, Musa chitumagwa wa Mkulu Nguluwi, nakandajiza kulawa Kadeshi-balineya kuza kupugajiza isi. Vyonyhiluche nandimgalila mbuli kota vyoiwele mnhumbula ya heni,
8 ila wala wayangu walutile hamwe na heni nawawadita wanhu wagozole, ila heni nandimuwinza ng'hatu Mkulu Nguluwi, Nguluwi wa heni.
9 Zuwa alyo Musa nakelaha, ‘Ndangukomya honhu ha isi yila youkolile iwe ya hegwe na walelwa wa hegwe mazuwa gose, kwa vila nakumuwinza ng'hatu Mkulu Nguluwi, Nguluwi wa hegwe.’
10 Ila lelo ulole! Ndo miyaka makumi gane na jihano kulawila Mkulu Nguluwi vyoyalongase na Musa, mhela Waisilaeli vyonawali wokola kuchiwala. Kulawa mhela awo Mkulu Nguluwi, kota vyoyalonjile, nakandita ndiwe mkomu mbaka lehano na sambi ndina miyaka makumi nane na jihano.
11 Ila nding'hali ndina mong'ho kota vyondiwele mhela wula Musa vyoyandajize. Ndina mong'ho wa kuweza kitowa ngondo ama kukola mijito jiyage joneche.
12 Lelo ndangulanda umhe isi ayi ya chidunda chiwele Mkulu Nguluwi nakalonga zuwa alyo. Hegwe nakuhulika zuwa lila kota Waanaki nawekala amo kuli miji jiwele na lugagala. Hanji Mkulu Nguluwi kowa hamwe na heni, nani ndowawinga kota Mkulu Nguluwi vyoyalonjile.”
13 Yoshua nakamtambichiza Kalebu mwana wa Yefune na kumha muji wa Hebuloni uwe uhalizi wa heye.
14 Ahyo, muji wa Hebuloni ndo uhalizi wa walelwa wa Kalebu, mwana wa Yefune, mbaka lehano. Kalebu ndo Mkenisi. Nakapegwa muji wula kwa vila nayali yomuwinza ng'hatu Mkulu Nguluwi, Nguluwi wa Isilaeli.
15 Muji wa Hebuloni aho hamwande nawali uchemigwa Kiliati-aliba. Aliba nayali munhu yazeleche kusinda weng'ha hali Waanaki. Isi yeng'ha nayali tulu ilihela ngondo.