2
Makanyo kuli zuwa lya Mkulu Nguluwi
1 Mpembe mhalamhanda ako Siyoni,
mpembe mhalamhanda mchanya mwa chidunda chelile.
Mkakame hemwe mlingikala Yuda,
kwa vila zuwa lya Mkulu Nguluwi lyanguya,
ena, zuwa alyo lya habehi!
2 Alyo ndo zuwa lya jiza,
zuwa lya ng'hungugu na jiza totolo.
Chilundo chikulu cha nzije cha habehi
kota jiza igubiche kuli chidunda,
mbuli kota ayo hainawahika kulawila mazuwa gose
ne haikoneka kahi
kuli lulelo lweng'ha lulinguya.
3 Kota vila chiluli chilingulakaza
chilundo acho changuwifyaga chila chinhu
na kuleka chila chinhu kumbele chidumigwe,
isi yanguwa kota kamgunda ka Edeni,
ila wone chikole, yanguwa chiwala.
Haduhu chilinguweza kiwika kutali.
4 Changoneka kota falasi,
changudumya kota falasi wa ngondo,
5 Changulavya lizi kota mituka ja ngondo,
hochinomoka kuli vinhembenhembe vya vidunda,
kota milapi ja chiluli chilingulakaza mibeleje,
kota chilundo chikulu cha wamizi chiwichile goya kwa ngondo.
6 Hochikoneka, wanhu wa isi wangudumba,
kumeho kwa hewo kwangulajila lunhwinhwi lwa hewo.
7 Changubilima kota wamizi walingujenda kuli ngondo,
changukwinha kuli lukanzi kota wamizi.
Nzije zeng'ha zangujenda kuli misitali,
hambe zileche kukola kuli misitali jawo.
8 Haduhu ilingumkundujiza myage,
chila imwe yanguluta kumwando.
Zangukola kuli lwizi lwa honhu halingwamilwa,
ne kuwifya misitali jawo.
9 Zanguluta himahima kwinjila kuli muji,
zangubilimila kuli lukanzi,
zangwinjila mgati mwa ng'handa,
kwa kukolela kuli mitubuli kota wahizi.
10 Hali hewo isi yangutigasika,
ulanga wangukakama,
isanya na nyelezi vyanguwichigwa jiza,
nhondwe zanguleka kulavya lumuli.
11 Mkulu Nguluwi kangulavya lizi lya kubuma,
wamizi wa heye ndo wenji ng'hatu,
wala walinguhulichiza malajizo ga heye.
Zuwa lya Mkulu Nguluwi ndo likulu na lya kukabusa.
Whaani yoweza kwimilila?
Nyhemo ilinguwala kulonga gehile
12 Mkulu Nguluwi kangulonga,
“Mbaka sambi,
Mnyhiluchile kwa nhumbula za hemwe zeng'ha,
kwa kwesela kulya na kulila na kulombocheza.”
13 Mleche kudadula mivalo ja hemwe kulajila masinzo
ila mumhiluchile kwa nhumbula ya kulonga gehile.
Mumhiluchile Mkulu Nguluwi, Nguluwi wa hemwe,
kwa vila heye ndo yalingulechela na yamemile isungu,
halinguzudila himahima na yamemile igano lya kwimilila,
kangonaga isungu na kuleka kugala magazo.
14 Hanji Mkulu Nguluwi, Nguluwi wa hemwe, kogalula kunuwila kwa heye
na kuwapa hemwe utambichizo wa mbena,
hamba moweza kumlavila nhambiko za nyhule na za kunwa.
15 Mpembe mhalamhanda ako Siyoni.
Mlavye mzilo leka wanhu wesele kulya,
mcheme nhing'hano yelile.
16 Muwakungajize wanhu weng'ha,
muwelize.
Muwegale wasekulu,
muwakungajize wana,
mbaka wana walingong'ha.
Mkasano na mdala yahesigwe
walawe kuli vihengo vya hewo.
17 Hagati ha honhu ha kulavila nhambiko na lwizi lwa ng'handa ya Nguluwi,
watambika, vitumagwa wa Mkulu Nguluwi,
walile na kulanda wolonga,
“Gwa Mkulu Nguluwi, wonele isungu wanhu wa hegwe.
Uleche kuwaleka wanhu wa isi zinji,
watubeze na kulonga,
‘Ka kohi lelo Nguluwi wa hewo?’ ”
Nguluwi koidita isi iwe na mboto na mbena nyinji
18 Hamba Mkulu Nguluwi nayali na fihi ng'hatu kwa chiwalo cha isi ya heye
nakawonela isungu wanhu wa heye.
19 Nakawahulichiza na kuwedichila kulanda kwa hewo, nakalonga,
“Lelo ndowapa hemwe kahi nyhule,
divai inyale na mafuta,
vya kuhega ng'hatu kwa chiwalo cha hemwe,
siwadita mbezigwe kahi na wanhu wa isi zinji.
20 Ndowosa awo wang'honyo walingulawa kasikazini,
ndowawinga mbaka kuli chiwala,
wamizi wa kumwando ndowatoza kuli Bahali ya Mwino
na wala wa kumbele kuli Bahali ya Mediteleniyani.
Wonung'ha ng'hatu,
awo wawele waditile wihe ukulu.
21 Uleche kudumba, gwa isi,
ila usangalale na kusechelela,
kwa vila Mkulu Nguluwi nakadita makulu.
22 Mleche kudumba, hemwe migongolo ja kisolo,
kwa vila misolo kuli chiwala najiwa goya,
migodi jangulela mafuza gake,
mizabibu na mitini jangulela kwa winji.
23 Msangalale, hemwe wanhu wa Siyoni,
msechelele kwa chiwalo cha Mkulu Nguluwi, Nguluwi wa hemwe,
kwa vila nakawapa hemwe nhonya ya kunyalila,
nakawapa hemwe nhonya ya kuhega.
Nhonya ya kunyalila na nhonya za ng'humbusa walimi kota aho hamwande.
24 Honhu ha kupululila homema nyhule,
mibiga jomema divai na mafuta.
25 Ndowahilusila hemwe miyaka jila jiwele chila chinhu nachiwifigwa na nzije vilundo kwa vilundo,
chila chinhu chilichile na nzije zilingunomoka na nzije zilinguwifya na nzije zilingutemanga,
acho chilundo chikulu cha wamizi chondiwagalile.
26 Mopata chilyo chinji cha kuhega,
molitogola itagwa lya Mkulu Nguluwi, Nguluwi wa hemwe,
yaditile mbuli za kububuwaza kwa hemwe.
Wanhu wa heni, mazuwa gose hawobezigwa kahi.
27 Ahyo movizela kota heni nda hamwe na hemwe,
hemwe Waisilaeli,
kota heni Mkulu Nguluwi,
ndo Nguluwi wa hemwe, haduhu yunji.
Wanhu wa heni, mazuwa gose hawobezigwa kahi.
Mkulu Nguluwi kanguwapa wanhu muhe wa heye
28 “Hamba ndowapa muhe wa heni wanhu weng'ha.
Wana wa hemwe wadala na walume wolavya uloli,
wasekulu wa hemwe wolota kahi,
na wasongolo wa hemwe wowona ulotezi.
29 Mbaka vitumagwa walume na wadala,
ndowapa muhe wa heni mhela awo.
30 Ndolavya ulajilo kilanga na kuli isi,
kowa na danda na chiluli na milingo ja iyosi.
31 Isanya lyowichigwa jiza,
na nyelezi yowa ndung'hu kota danda,
Kung'hali kuya kwa zuwa lya Mkulu Nguluwi,
zuwa liwele ndo likulu na lya kukabusa.
32 Ahyo wanhu weng'ha howolanda kwa itagwa lya Mkulu Nguluwi woloholigwa.
Kwa vila kuli chidunda cha Siyoni na Yelusalemu,
kowa na wanhu wasigale wakomu,
wala wawele nandiwachema heni Mkulu Nguluwi.