Hoseya
Chilongole
Chitabu cha Hoseya changusimila kuwala kikala kwa Hoseya na kulota kwa heye kwa chiuloli. Hoseya 1:1 yangulonga kota nakalavya uloli kuli mhela wa ulongozi wa wandewa wane wa Yuda na kuli ulongozi wa mndewa wa Isilaeli. Nakaluka kulavya uloli kuli mwaka wa miya saba na makumi gahano, Yesu loyawele yang'hali kupondigwa. Hailinguzeleka kota Hoseya yuye ndo yandiche chitabu achi ama yunji.
Hoseya nakalawa kuli undewa wa kasikazini mwa Isilaeli na ulonzi winji wa heye wa chiuloli nawali kuwala isi yila. Nguluwi nakamlajiza Hoseya yamhese mdala mng'hondwa yalinguchemigwa Gomeli (1:2). Hoseya na Gomeli nawali na wana wadatu, ila Gomeli nakamleka Hoseya na kuwa na mlume yunji. Hamba Nguluwi nakamlajiza Hoseya yalutilile kumgana Gomeli hanga nayali yaditile ung'hondwa (3:1). Ivyazi lyawo nalyali ndo ulajilo wa igano hali Nguluwi na Waisilaeli. Hanga Waisilaeli nawali wambelenhuche Nguluwi kwa kujifugamila jimalukolo, ila nakalutilila kuwagana Waisilaeli kwa kukundigwa na kulagana kuwalohola wanhu wa isi ayo. Uloli wa Hoseya nautawiza kukundigwa na kunoga kwa igano lya Nguluwi.
Gali mgati
1. Sula ya 1-3 zangusimila kuwala kikala kwa Hoseya na Gomeli kuholeka na Hoseya.
2. Sula ya 4-14 zangusimila kuwala kuleka kukundigwa kwa wanhu wa Isilaeli na igano lya kwimilila lya Nguluwi.
1
1 Ulonzi wa Mkulu Nguluwi woumuyile Hoseya mwana wa Beeli, mihela ja ulongozi wa Usiya na Yotamu na Ahasi na Hesekiya wawele ndo wandewa wa Yuda na mhela wa ulongozi wa Yeloboamu mwana wa Yoashi, mndewa wa Isilaeli.
Mche na wana wa Hoseya
2 Mkulu Nguluwi loyaluche kulongasa na Waisilaeli kwa kukolela Hoseya, nakamlonjela hino, “Ulute ukamhese mdala mng'hondwa leka uponde naye wana wa ung'hondwa, kwa vila wanhu wa isi yino wangudita ung'hondwa winji kwa kundeka heni.”
3 Hoseya nakaluta, nakamhesa Gomeli, mhinza wa Dibulaimu. Gomeli nakawa na himila, nakampondela Hoseya mwana msongolo.
4 Mkulu Nguluwi nakamlonjela Hoseya, “Mwana ayo mcheme ‘Yesileeli,’ kwa vila naupona mhela uchefu hela, ndoligaza ivyazi lya Yehu kwa chiwalo cha kukopola koyaditile ako Yesileeli. Nani ndowusa undewa wa Isilaeli.
5 Zuwa alyo ndopungula mong'ho wa Isilaeli ako kuli ibindi lya Yesileeli.”
6 Gomeli nakawa na himila kahi, nakaponda mwana mhinza. Mkulu Nguluwi nakamlonjela Hoseya, “Mwana ayo mcheme ‘Lo-luhama,’ kwa vila silajila kahi igano kuli ng'handa ya Isilaeli leka ndeche kuwalechela.
7 Ila ndolajila igano kuli ng'handa ya Yuda, nani ndowalohola ne upinde ne ipanga ama ngondo ne kwa falasi ne kwa wakwina falasi, ila heni, Mkulu Nguluwi, Nguluwi wa hewo ndowalohola.”
8 Gomeli loyamlecheze kong'ha Lo-luhama, nakawa na himila na kumpondela Hoseya mwana yunji msongolo.
9 Mkulu Nguluwi nakamlonjela Hoseya, “Mwana ayo mcheme ‘Lo-ami,’ kwa vila hemwe hamuwele wanhu wa heni ne nani siwa Nguluwi wa hemwe.”
Isilaeli yowichigwa goya
10 Ila Waisilaeli wowa wenji kota sangalaza hafungo ha bahali, ziwele haziweza kupimigwa ne kuwazigwa. Hanga Nguluwi nakawalonjela, “Hemwe hamuwele wanhu wa heni,” lelo kowalonjela, “Hemwe ndo wana wa Nguluwi yawele mkomu.”
11 Wanhu wa Yuda na wanhu wa Isilaeli wochilumba hamwe kahi na kumhagula chilongozi wa hewo yumwe, mbuli za hewo zolutilila goya kuli isi ya hewo. Zuwa alyo lya Yesileeli lyowa likulu ng'hatu.