పౌలు తిమోతికు వ్రాసిన రెండవ పత్రిక
పౌల్ తిమోతినా లిఖ్యొతె బెంమ్మను పుస్తక్
అగాఢిను వాతె
2 తిమోతిను ఆ పుస్తక్ అపోస్తలుహుయుతే పౌల్ ఇను సిష్యుడ్ హుయోతే తిమోతి లిఖ్యోతే బేమాను లేఖ 2 తిమోతి పౌల్ కన అఖరిమా లిఖ్కాయ్‍రూస్. యో వహాఃత్మా యో రోమమా ఖైది హుయిన్ థొ.1:16. పౌల్ తిమోతితీ అష్యల్ మలీన్ థొ, అజు ఇనా ఛియ్యానితార వోతలస్ 1:18.
చర్చినా బదుల్ ఏక్ ఆద్మినా బోలిన్ పౌల్ లిఖ్యొతె ఛార్ లేఖమా ఆ ఏక్. యెజాత్ను అజు తీన్ లేఖల్ 1 తిమోతి, తీతు, అజు ఫిలేమోన్‍. 2 తిమోతి లీఖ్యుతే వహాఃత్ రోమన్ సామ్రాజ్యంమా క్త్రెస్తవుల్ హింసించబడ్యా. పౌల్ ఠాణమా ర్హావను అజు మిన్హత్ భరించనా తిమోతినా భడ్డానాటేకె ఆ కారణం హువ్వజాయి. 1 తిమోతి తారస్ పౌల్ తిమోతి గలత్ బోధనా గురించి ఘాణు గుక్వాణే దిదో 1:1-2. అగాఢి మిన్హాత్ ర్హాసేకరి తిమోతినాబి బోల్యో 3:1.
విషయమ్‍ బోలను
1. పౌల్ తిమోతినా వాత్ బోల్యొ, ఇనా ఉసీకరమా సురుహువ్వాస్ 1:3-18.
2. తెదె పౌల్ తిమోతి సహించ్నుకరి సవాల్ కరను 2:1-13.
3. బాద్మా యోస్ మాముల్ హాఃనద్ దేస్ 2:14-26.
4. తెదె యో భవిష్యత్‍మా వాత్నా బారెమా అజు జబాబ్ దేవన అష్యను వాట్ బారెమా గుర్కావ్‍తో 3:1–4:8
5. పౌల్ తిమోతినటేకె థోడు వ్యక్తిగతను బోల్తొ ఉత్తరంనా ఖతమ్ కర్యొ 4:9-22
1
అపొస్తల్నా హఃలామ్‍
1 క్రీస్తు యేసుమా ఛాతె జీవ్ను బారెమా వాగ్దానమ్‍నా లీన్‍ దేవ్ను చిత్తంను ప్రకారం క్రీస్తుయేసునొ అపొస్తల్‍హుయోతె పౌల్
2 లాడ్నొ ఛియ్యో హుయోతె తిమోతినా సుభంకరి బోలిన్ లిఖ్కుకరూస్‍. భా హుయోతె దేవ్‍కంతూ ప్రభూ హుయోతె క్రీస్తుయేసుకంతూ కృపబి, గోర్‍బి, సమాధానంబి తుమ్నామలను హువదా.
సువార్తమా నమ్మకంతి ర్హావను
3 మారు ప్రార్థనమా బార్‍బార్‍ తున యాద్‍ కర్తొహుయీన్, మారు జమాణను అద్మియే తారు ఆంజునా హఃయల్‍ కర్లీన్‍, మన సంపూర్ణ ఖుషి హువనాటేకెస్‍ తున దేక్నుకరి రాత్‍ ధన్‍ ఆహ్‍ః కర్తొహుయిన్‍,
4 తారకన ఛాతె నిష్కపటంను విష్వాస్‍నా హఃయల్‍ కర్లీన్‍, మారు పితరూల్ను ఆచారం ప్రకారంతి సుద్ధ్ హుయుతె మనసాక్చితి సేవ కరూకరుతె దేవ్‍ఫర్‍ కృతజ్ఞుడ్ హుయీన్‍ ఛౌవ్‍.
5 ఆ విష్వాస్‍ అగాఢి తారి నానిహుయితె ల్హొయిమాను తారి ఆయాహుయితె యునీకేలోమాబి ఛా. యో తారమాబి కల్గీన్‍ ఛాకరి మే ఖచ్చితంతీ భరోసకరూకరుస్‍.
6 యో కారణంతి మే తారఫర్‍ మారు హాత్‍ మ్హేలను ఆషీస్‍కరను బారెమా తునా మల్యుతె దేవ్నుకంతూ కృపవరంనా బ్హడావును కర్లేనుకరి తున హఃయల్‍ కర్వాంకరియేస్‍.
7 దేవ్‍ అప్నా తాఖత్‍తి, ఫ్యార్‍బి, ఆంగ్తాన్‍ ఖడీన్‍ర్హాయ్‍తె అష్యల్ దిమాగ్‍హుయితె ఆత్మనాస్‍ దిదొ పన్కి ఢర్జావను ఆత్మన దిదొకొయిని.
8 అనటేకె తూ అప్నొ ప్రభూవును విషయం హుయుతె సాబుత్‍నా లీన్‍హో, ఇనొ ఖైదిహుయోతె మన లీన్‍హో షరం నాహుయిన్‍, దేవ్ను తాఖత్నా బట్టీన్‍ సువార్తనటేకె మిన్హత్‍మా భాగ్‍ హుయిన్ ర్హా.
9 అప్న కామ్ను బట్టీన్‍ కాహెతిమ్‍ ఇను హుఃద్‍ సంకల్పంనా బట్టీన్‍బీ జమాణనూ అగాఢీస్‍ యేసుక్రీస్తుమా అప్నా అనుగ్రహీంచ్యొతె కృపనా లీన్‍ అప్నా బఛ్చాయిన్‍ పరిసుద్ధ్ హుయుతె బులావన దిదొ.
10 పన్కి అప్నొ బఛ్చావాలొహుయోతె యేసుక్రీస్తు బారెమా ఆ సువార్తనా విషయంమా మరణ్‍నా మర్రాఖీన్‍ నిత్యజీవంమా ఉజాళుహుయీన్‍ ఆయో హంకె క్రీస్తుయేసుకరి బోలతె అప్నొ బఛ్చాడవాలొ రక్చకుడ్‍ ప్రతక్చ్యాం హువను బారెమా హుయు ఇను మరణ్‍నా నాషనంకరీన్ జీవంతి ఉట్టిన్‍ సువార్త బారెమా ఉజాళుమా లీన్‍ ఆయో.
11 ఆ సువార్తను విషయంమా మే ప్రచార్‍కరనటేకె, అపొస్తల్‍నితరా, బోధకుడ్‍నితరా దేవ్‍ నియమించ్యొ.
12 యో కారణ్‍నటేకె మే ఆ మిన్హత్‍నా అనుభవించుకరూస్‍, పన్కి మే నమ్యొతె ఇనా మాలంహుయీన్‍ ఛా అనటేకె షరం హుయీస్‍కొయిని; మే ఇనా ధరాయ్‍దిదొతె ఇనా ఆవజాసెతె యో ధన్మా యో బఛ్చావ్సెకరి పూర్తి భరోసకరుకరూస్‍.
13 క్రీస్తు యేసుమా రాక్నుతె విష్వాస్‍నా ఫ్యార్‍వాలొహుయిన్‍ తూ మరావల్లా హాఃమ్జొతె హాఃఛివాక్యంనా మాదిరి లీన్‍ పాటించ్‍.
14 తున దెవ్వాయ్‍రూతె యో అచ్చును బారెమా అప్నమా జింకరతె పరిసుద్ధాత్మనా బారెమా బఛ్చాయిలా.
15 ఆసియమాను ఇవ్నె హాఃరుజణు మన బెందీన్‍ చలిగూతె సంగతి తున మాలంహుయిన్‍ ఛా; ఇవ్నమా ఫుగెల్లు, హెర్మొగెనే యెజాత్నుస్‍.
16 ప్రభూ ఒనేసిఫోరు ఘేర్‍వాలంఫర్‍ గోర్‍ వతాలను హువదా.
17 యో రోమాన ఆయోతెదె మే ఖైదికరి షరంనాఖైయిన్‍ గణిచోట్‍ మన ష్రద్ధతి దూంఢీన్‍ మాలంకరీన్‍, ఆదరించ్యొ.
18 బుజు ఇనె ఎఫెసుమా కేత్రెకి ఉపచార్ కర్యొకీ యోతునా అచ్చుతీ మాలంహుయీన్‍ ఛా. యోధన్మా ఇనె ప్రభునుబారెమా గోర్‍ మలహఃర్కు ప్రభూ అనుగ్రహీంచును హువదా.