5
సంఘంమా కరాబ్ను కామ్
1 తుమార ఇచ్మా జారత్వమ్‍ ఛా కరి హఃమ్‍జ్యా, తుమారమా ఏక్జణు ఇను భాని బావన్నా రాకిల్దో కాస్ని, యెజాత్ను వ్యభిచార్‍ యూదుల్‍ కాహెతెవాలమాబి హుయితోబి జర్గకొయిని.
2 అమ్‍ ర్హయిన్బి తుమే బడ్డాయికరుకురాస్‍ పన్కి, తుమె కెత్రేబి దుఃఖపడిన్‍ ఆరంగ్ను కామ్ కరుతే ఇవ్నా తుమారమతూ కోకన్నాఖిదెవుంకరాని.
3 మే ఆంగ్తాన్‍ను విషయంమా తుమారేతి దూర్‍ర్హయితోబి, ఆత్మవిషయంమా హఃమ్దే ర్హయిన్‍, తుమారకేడె ర్హావన్‍తరస్‍, అమ్‍ జోక్ను కామ్ కరవాలనా లీన్‍ న్యావ్‍ తీర్చిరాకోస్‍.
4 కిమ్కతొ ప్రభూవుహుయోతె యేసునా ధనుమా ఇని ఆత్మ బచ్ఛిజావహఃర్కూ ఆంగ్తాన్‍నా నాష్‍హువనటేకె,
5 అప్న ప్రభుహుయోతె యేసుక్రీస్తును నామ్‍తి తుమేబి, మార ఆత్మబి ప్రభూహుయోతె యేసుక్రీస్తు తాఖత్తి మలీన్‍ ఆయోతెదె, యో జోక్ను అద్మియేనా సైతాన్‍నా ధరాయ్‍దేను.
6 తుమె గర్వంతి ముర్సిజావను అష్యల్ కాహె, ఖాటు ఆటో యో ధరాసు ర్హాయితోబి ఆటో హాఃరునా ఖాటు వాహ్ఃకరస్‍కరి తుమ్న మాలంకొయిన్నా?
7 తుమే ఖాటుఆటొ కొయింతెవాల ఇనటేకె నవూ ముద్దొ హువనాటేకె యో జూను ఆటోన పేఖిదెవో, అత్రెస్‍ కాహెతిమ్‍ అప్న క్రీస్తుకరి పస్కాను మ్హేండను చెల్కు బలిహుయో.
8 అనటేకె జూనుహుయూతె పొంగ్యు ఆటొతీబి హుయుతోబి దుర్మార్గత హుయుతోబి దుష్టత్వమ్‍తిహుయుతోబి ఖాటు ఆటొతీబి కాహెతిమ్‍, నిజాయితీబి, హాఃచికరి ఖాటు రోటను పండుగా కరియే.
9 వ్యభిచార్‍ వాలవ్‍తి సహవాసం నొకొకరోకరి మార పత్రికమా తుమ్నా లిఖ్కిరాఖ్యొస్‍.
10 మే అమ్‍ కోబోలుకరుస్ని తుమె ఆ ములక్ను అద్మియోతి మలీన్‍ నొకొర్హవొకరి కాహె; ఇంహుయితో తుమే ములక్‍మతూ నికిజానుపడ్సే కాహెనా?
11 హంకెతొ భైయ్యేకరి బొలైలెవ్వాలు కోన్బిహొ, వ్యభిచారంతోబి, లోభితోబి, మూర్తియేనుపూజతోబి పూజ కరవాలుహో, పీకోఢినితరా, చోర్‍కరవాలుతరా హుయిన్‍ ర్హాయితో, ఇమ్‍ జోక్నుకేడె సహవాసంనా కరను ఇవ్నాకేడె మలీన్‍ ధాన్బి నాఖానుకరి తుమ్న లిఖ్కుకరూస్‍.
12 సంఘంమా బాధర్‍ ఛాతే ఇవ్నా మే సాన న్యావ్‍ కర్ను? మహీ ర్హవ్వాలనా న్యావ్‍ కరావలా కాహేనా?
13 తుమారమా మహీఛాతెవాలనా దేవస్‍ న్యావ్‍ కర్సె, అనటేకె యో దుష్టున్నా తుమారమతూ కన్నాకిదెవొకరి లేఖనంమా లిఖ్కాయ్‍రూస్‍.