7
సైఫను ప్రచార్‍
1 ప్రధాన యాజకుడ్‍ ఆ వాతె హఃచిస్నా? కరి కేఫను పుఛాయో.
2 ఇనఖాజే స్తెఫన్‍ బోల్యోతే ష్యాత్‍ కతో భైయ్యే, భా హాఃజో. అప్నో పితరుడ్‍హూయోతే అబ్రాహామ్ను హారాన్‍మా కాపరం ర్హవానా అగడీ మెసొపొతమియమా ర్హయా తెదె మహిమనో దేవ్ ఇనా దేఖైన్‍,
3 తూ తారు దేహ్‍ఃనా తారు ఘేర్‍వాల్నా మేందిన్‍ ఏజ్గాతూ నికీన్‍, మే తునా దేఖాడజైస్‍తే దేహ్‍ఃనా జాకరీ ఇనేతి బోల్యొ.
4 తెదె యో ఇను దేహ్‍ఃనా మేందిన్‍ జైన్‍ హారాన్‍మా కాపరం ర్హయో. ఇనో భా మర్మఆయిజావాన బాద్‍మా, ఏజ్గాతు తుమే హాంకే కాపరంఛాతే ఆ దేహ్‍ఃమా జీవాన టేకె దేవ్ ఇనా బులైలీ ఆయో.
5 దేవ్ ఇనమతూ ఇనా గోఢో మంద ఏత్రే జమీన్‍నాబి స్వాస్థంగా నా దీన్‍, ఇనా ఛియ్యో కోయినితేదె ఇనాబి ఇనబాద్‍నూ ఇను సంతాన్‍నాబి అనా స్వాధీన్‍ కరీస్‍ కరి ఇనా వాగ్దన్‍ కర్యో.
6 హుయుతో దేవ్ ఇనూ సంతాన్‍ పరాయి దేహ్‍ఃమా పరవాసుల్‍ హూసే కరి, యో దేహ్‍ఃవాళు ఛార్‍ఖోః వరహ్‍ఃతోడి యూవ్నా దాస్యంనా లోపరచీలీన్‍ హింసకర్‍సే కరి బోల్యొ.
7 బుజు దేవ్ జనంనా యూవ్నే దాసుల్‍ హుయిర్హస్‍కీ యో జనంనా మే న్యాయం కరీస్‍ కరి, ఇనబాద్‍మా యూవ్నే ఆయిన్‍ ఆ జోగోమా మన ఆరాదనాకర్స్యు కరి బోల్యు.
8 తెదె దేవ్ అబ్రాహానా నిబంధన గుర్తు సున్నతి హుయుతె ఆచార్‍ను ఇనా దిదో. యో ఇస్సాక్‍నా జణీన్‍ యో ఆట్‍మనూ ధన్నే ఇనా సున్నతి కర్యు, ఇస్సాక్ యాకోబునా జాన్యో యాకోబును ద్వారా బారగోత్రాల్నామోట్వనా ఇనా చియ్యవ్నా ఇవ్నాసున్నతి కారాయో.
9 యాకోబ్‍ ఛీయ్యా ఇను భైయే హుయుతే యోసేపు పార్‍ మత్సర్‍ పడీన్‍ ఇనా ఐగుప్తుమా బనిసతార యెచినాఖ్యా గానీ, దేవ్‍ఇనా కేడై ర్హైన్‍.
10 ఇను ష్రమల్‍ అక్కమా ఛుఖైన్, దయనా అఖ్కాల్‍నా ఐగుప్తు రాజోనా హాఃమే ఇబనా దేవామా ఐగుప్తునాబి ఇను ఘర్‍హాఃరనాఫర్‍ ఇనా అధిపతింతర మ్హెంద్యు.
11 ఇనబాద్‍మా ఐగుప్తు దేహ్ః అక్కునాబి కనాను దేహ్‍ఃనాబి ఖళ్‍బి ఘణు ష్రమబి ఆయు ఇనటేకె అప్నా పితరుల్‍నా ఖాణు కోయినితిమ్‍ హుయిగు.
12 ఐగుప్తుమా ధాన్యమ్‍ ఛాకరీ యాకోబ్‍ హాఃమ్జీన్‍, అప్నూ పితరుల్‍ ఎజ్గా ఫైలు బార్‍ బోలిమొక్‍ల్యు.
13 యూవ్నే బెంమ్మనూ వోహాఃత్‍ ఆయుతేదె యోసేపు ఇను భైయ్యే వ్‍నా యో మాలంకరైలిదో; తెదె యోసేపును పరివార్కరి రాజోనా మాలంహూయు.
14 యోసేపు ఇను భా హూయోతే యాకోబ్‍ ఇను సోంత జనాల్‍నా బులావనా మొక్‍ల్యో; యూవ్నే ఫాచుఫర్‍ హాఃడ్‍తీనీహ్‍ః జణా థా.
15 యాకోబ్‍ ఐగుప్తునా గయో; ఎజ్గా యోబి అప్నూ కుమారులుబి మరీజైన్‍ ఏజ్గాథూ షెకెమునా బులామంగైన్‍;
16 షెకెముమకరి హమోరు ఛీయ్యాకనా అబ్రాహామ్ను ఫైసా దీన్‍ మోల్‍ లీన్‍ సమాధిమా ఘలాయో.
17 కాని దేవ్ అబ్రాహామ్‍నా దిదోతే వాగ్దన్‍నూ ధన్‍ ఖందే ఆవాతిమ్‍ ప్రజల్‍ ఐగుప్తుమా కెత్రుకీ భడిగయు.
18 ఆఖ్రీనా యోసేపు మాలంకొయింతే ఉజేక్‍ రాజో ఐగుప్తునా ఏలానూ సురు కర్యో.
19 యో అప్నూ ఖాందాన్‍నూ పట్ల కపటింతర చాల్యో, యూవ్నూ లడ్క నాజీవ్నూతిమ్‍ యూవ్నా భార్‍ ఫేఖీనాక్నూ కరి అప్నూ పితరుల్‍నా బాధ కర్యు.
20 యో ధన్నువ్‍మా మోషే ఫైధాహూయో. యో కెత్రూకి రంగేలో హూయిరైన్‍ ఇను భానూ ఘర్‍ కనా తీన్‍ మైనా వ్వోధో.
21 ఇనబాద్‍మా యో భార్‍ ఫేఖైగో తెదె రాజోని ఛోరీ ఇనా ఫళ్ళీన్‍ ఇనూఛీయ్యోంతర పాళీల్దు.
22 మోషే ఐగుప్తునూ హాఃరు ఫఢాయినా షీకీన్‍, వాతేమాహో, కామేవ్‍మాహో ప్రవీణ్‍ హుయిన్ ర్హయో.
23 ఇనా ఛాళీహ్‍ః వరహ్ః భరాయా తెదె ఇష్రాయేల్నా ఇన భైయ్యేవ్‍నా దేక్నూ కరి ఖాయలెఆవు.
24 తెదె యూవ్నామా ఎక్‍ జణో అన్యాయంహూయిజౌంకరాతే ఇనా దేఖీన్‍, ఇనా భచైన్‍ బాధపడుకరతే యూవ్నా మణీ ఐగుప్తు వాళనా మార్రాకీన్‍ ప్రతీకార్‍ కర్యో.
25 ఇనేతి ఇనా భైయ్యేవానా దేవ్ రక్చణ దేంక్రస్‍తే సంగతి యూవ్నే మాలంకర్సె కరి యో సోచ్వో గానీ యూవ్నే అర్ధంకర్యు కోయిని.
26 బుజేక్‍ ధన్నే బేఝణా లఢాయ్‍ కర్‍లేంకరాతో యో యూవ్నా దేఖీన్‍ హాఃయాప్‍, తుమె భైయ్యే; తుమె ష్యాన ఏక్నాఏక్‍ అన్యాయం కర్‍లేంకరాస్‍ కరి బోలిన్‍ యూవ్నా సమాదాన్‍ కర్నూ కరి దేఖ్యో.
27 హూయుతోబి ఇను ఫరాయినా అన్యాయం కర్యోతే యో హామారఫర్‍ అధికారుల్‍ తర న్యావ్‍ కరంతర తూనా మ్హేంద్యూతే యో కోన్‍? కరి పుచ్ఛయో
28 తూ కాల్‍ ఐగుప్తుయుడ్‍నా మార్యోతిమ్‍ మనాబి మార్నూకరీ ఛానా.
29 మోషే యో వాత్‍ హాఃమ్జీన్‍ మీలైలిన్‍ మిద్యాను దేహ్‍ఃమా పరదేషిహుయిరైన్‍, ఎజ్గా బే ఛీయ్యానా జణ్యో.
30 ఛాళీహ్‍ః వరహ్‍ఃనా బాద్‍మా సీనాయిపర్వత్‍నా సేడె ఛాతే ఝాడీమా ఏక్ డాగ్‍మాను ఆగ్‍మా ఏక్ ప్రభు దూత ఇనా దేఖాయు.
31 మోషే దేఖీన్‍ యో హాషం హూయిజైన్‍ ఇనా హాళేతి దేఖాన టేకె ఖందే ఆవమా
32 మే తారు పితరుల్‍నూ దేవ్, అబ్రాహామ్ను ఇస్సాక్ యాకోబ్‍నో దేవ్ కరి ప్రభునూ గళు హఃమ్జాయు ఇనటేకె మోషే కాఫీన్‍, ఢారిన్‍ దేఖాన దైర్యంకర్యో కోయిని.
33 ఇనటేకే ప్రభు తారు చేప్పల్‍ కాఢ్‍; తూ హీభ్రోతే జోగొ పవిత్ర జమీన్‍.
34 ఐగుప్తుమ ఛాతే మారు ప్రజల్‍నను దుఃఖమును రోవును మే ధేఖీరాక్యోస్‍; యూవ్న రోవ్ను హాఃమ్జీరాక్యోస్‍, యూవ్నా చోఢవనాటేకె ఉత్రి ఆయిరోస్‍, ఆవ్‍ మే హాంకే తునా ఐగుప్తునా బోలిమొక్లుస్‍ కరి ఇనేతి బోల్యొ.
35 అధికారుల్‍ తర న్యావ్‍బోలావళోంతర తూనా మ్హేంద్యూతే కోన్‍ కరి యూవ్నే నిరాకరించ్యూతే ఆ మోషేనా ఇనా డాగ్‍మా దేఖైన్‍ ప్రభూ దూతతి దేవ్ అధికారింతర చుఖాడో వాలోనితర నియమించిన్‍ మోక్‍ల్యో.
36 యో ఐగుప్తుమాహో లాల్‍ ధర్యావ్‍మాహో చాలిహ్ః వరహ్ః జంగాళ్‍మాహో మహాత్‍ కార్యల్‍ సూచక క్రియల్‍నా కరీన్‍ యూవ్నా కేడె లీన్‍ చలాయొ.
37 మారీన్‍ జోణ్‍నో ఏక్ ప్రవక్త దేవ్ తూమార భైయ్యేవ్‍మా తూమ్‍నా ఫైధా కర్షే కరి ఇష్రాయేల్‍థీ బోల్యోతే మోషే ఆస్‍.
38 సీనాయి పర్వత్‍ ఫర్‍ ఇనేతి వాతేబోల్యోతే దెవా దూతథి, అప్ను పితరుల్‍థి ఝంగాళ్‍మాను గల్లో అప్నా దేవాన టేకె జీవా వాక్యంనా లీధోతే యో ఆస్‍.
39 పన్కి అప్నూ పితరుల్‍ లోబడనా కోహోయినింతే ఇనా ధఖల్‍ నాఖిన్‍, యూవ్నూ దిల్‍మా ఐగుప్తునా జావవాళా హూయిన్‍.
40 హామార హాఃమే ఛాలహాఃర్‍కూ దేవ్నా హామ్నా కర్‍; ఐగుప్తు దేహ్‍ఃథూ బులైలీ ఆయోతే ఆ మోషే ష్యాత్‍ హూయిగోకీ హమ్నా మాలంకోయిని కరి అహరోన్‍తి బోల్యా.
41 యో ధన్నువ్‍యూవ్నే ఏక్ కేల్డొనా కరీన్‍ యో విగ్రహాంనా బలి దీన్‍ యూవ్నా హాతేహూః కర్యూతే ఇనా కనా హూఃషీ హుయు.
42 ఇనహాఃజే దేవ్ యూవ్నా మెందావాన హుయిన్ ఆకాష్ సేవించనా హాఃజే యూవ్నా మ్హేందిదో. ఇనహాఃజే ప్రమాణ్‍తి ప్రవక్తల్‍నూ గ్రంథంమా అమ్‍ లిఖైర్యూస్‍. ఇష్రాయేల్‍నూ ఘర్‍వాళాతూమే ఘంగాళ్‍మా ఛాళీహ్‍ః వరహ్ః బలినూ ఢాండవ్‍నా అర్పణ్‍ల మన అర్పిపించ్యా?
43 తుమె పూజ కరానఅ టేకె కర్‍లీదాతే మూర్తే మెలొకు గుడార్‍బి రొంఫాయబి దేవతనూ సుఖ్కర్‍నా ఢోహ్‍లీన్‍ గయా కాబట్టి బబులోనునా పార్‍ బులైలిన్జాసే.
44 యో ధేఖ్యోతే ప్రకార్ ఇనా కర్నూ కరి మోషేథి బోల్యోహూయో యో అజ్ఞా దిదూతే ప్రకార్, సాక్చ్యంనూ గుడారం జంగాళ్‍మా అప్ను పితరుల్‍ కనా రయు.
45 పాసల్తి అప్ను పితరుల్‍ యూవ్నా పెద్దల్‍థి ఇనా లీదాహుయా హూయిన్‍, దేవ్ యూవ్నా హాఃమేతూ రఫాట్‍నాక్యుతే జనాల్‍నా యూవ్నే స్వాధీన్‍ కర్‍లీదూతేదె యెహోషువానా కేడె ఆ దేహ్‍ఃమా ఇనా లీన్‍ ఆయు. యో దావీద్‍నూ ధన్‍తోడి రయు.
46 యో దేవ్ను దయ పోందిన్‍ యాకోబ్‍ను దేవ్ను జోగొ భాంద్నూ కరి దేవ్తి మాంగో.
47 కాని సోలోమోన్‍ దేవ్నా హాఃజే మందిర్‍నా భాంద్యో.
48 హూయుతోబి “ఆకాష్ మారు సింహాసన్‍, జమీన్‍ మారు పాదపీట్‍” తుమె మారటేకే కీమ్‍నూ మందిర్‍ భాంద్‍స్యు?
49 మారు జమీన్‍ కేహూకరి
50 ప్రవక్త బొల్యోతిం సర్వషక్తిషాలి హఃతేఖు బణాయు హుయుమ రైకోయిని.
51 బండనుదిల్వాళా దిల్‍నా కాన్‍నా దేవ్‍నూ వాక్యంనా లోబడవాకోయిన్తె ఇవ్నే, తూమారు పితరుల్‍నితర తూమేబి కెధేబి పరిసుద్ధాత్మనా ఎదిరించుకరస్‍.
52 తూమారు పితరుల్‍ ప్రవక్తల్‍మా కినాబి హింసించుకోయినితిమ్‍ ర్హయ్యనా? యో దేవ్ను సమాచార్‍ బోలవాలు నీతిమంతుడ్‍ సేవకుల్నా ఆవ్‍సే కరి అగాడి బోల్యుతే యూవ్నా మర్రాఖ్యు. ఇనా తుమె హాంకే ధరైన్‍ హత్య కర్యాహుయా వాళా హుయిగా.
53 దేవదూతల్‍తి నియమింపబడ్యుతే నియమషాస్త్రంనా తుమె పోంద్యా గాని ఇనా పాటించ్యాకోయిని.
స్తెఫన్నా పత్రావ్తి మారను
54 సభమ రవాలు వాతె హాఃమ్జీన్‍ ఛండాల్తీ భళిన్‍ స్టేఫన్నాదేఖీన్‍ ధాత్‍ చావనిక్యా.
55 కాని పరిషరద్ధాత్మతి భరైహూయో హుయిన్ ఆకాష్‍మ్హణీ ఠర్ర్కీన్‍ దేఖీన్‍, స్తెఫన్ను దేవ్ను మహిమనా యేసు దేవ్ను ఖావాత్‍మ్హణి భీరిర్హవానూ దేఖీన్‍
56 ఆకాష్మని దేకిన్, అద్మినొ ఛియ్యో భీరిర్హవాను దేఖుకరుస్‍ కరి బోల్యొ.
57 తెదె మహాసభమ రవాళు మోటు కైఖార్‍ మ్హేందీన్‍ కాన్ మూచీలీన్‍ ఏక్‍హుయిన్‍ ఇనాఫర్‍ పడీన్‍,
58 హాఃయార్‍నా భార్‍ ఇనా రఫ్‍టిన్‍, ఫత్‍రావ్‍తి మర్రాఖ్యు. సాక్చితర సౌల్‍ కనా ఏక్ కవారునా గోఢాకనా యూవ్నూ లుంగుఢా మ్హేంద్యు.
59 ఇవ్నే హఃరు పత్రవ్తి మారుకరతో యేసు ప్రభు, మారు ఆత్మనా చేర్సాయిలా కరి స్టేఫనే బోల్యొ.
60 యో ఢూగ్నేవ్‍ఫర్‍ బేసిన్‍ ప్రభు, యూవ్నా ఫర్‍ ఆ పాప్‍ నాక్‍నకో కరి మోటా ఆవాజ్‍థి బోల్యొ; ఆ వాత్‍ బోలిన్‍ హూఃయిగో. సౌలు తన మరణ్‍నా ఒప్పిలిదు.