ತಿಮೊಥೆಯನಿಗೆ ಬರೆದ ಎರಡನೆಯ ಪತ್ರಿಕೆ
ಪೌಲನೆ ತಿಮೊಥೆಯನ ಲೀಖ್ಯೋತೆ ಬೇನಿ ಚಿಟ್ಟಿ
ಮಾಲುಮ್ ಕರಾನು
ಬೇನು ತಿಮೊಥೆನು ಪುಸ್ತಕ ಅಪೊಸ್ತಲ ಹುಯಿರೋತೆ ಪೌಲ ಇನ ಶಿಷ್ಯಹುಯಿರೋತೆ ತಿಮೊಥೆನ ಲೀಖಿರಾಖ್ಯೊಸ್. ಬೇನು ಪುಸ್ತಕ ಪೌಲನ ಜಿವ್ಣನು ಖ್ಹರ್ತಿನು ವೇಳ್ಮ ಲೀಖಿರಾಖ್ಯೊಸ್. ಪೌಲ ಆ ವಖ್ಹತ್‌ಮ ರೋಮ್ನಿ ಖ್ಹಾರ್ಕೊಟ್‌ಮ ಥೊ 2 ತಿಮೊ 1:16 ಪೌಲಬಿ ತಿಮೊಥೆನ ಜೋ಼ಡ್ಮ ಅಛ್ಛಿ ಖ್ಹಂಗ್ ಥಿ. ಘಣಿಹಲ್ಲ ತಿಮೊಥೆಯನ ಛಿಯ್ಯೊಕರಿ ಬುಲಾವ್ತೊಥೊ. ಫಿಲಿಪ್ಪಿ 2:22, 1 ತಿಮೊ 1:2,1:18.
ಪೌಲನೆ ಲೀಖ್ಯೋತೆ ಆ ಚಿಟ್ಟಿ ಸಭೆನ ಕಾಹೆ, ಅದ್ಮಿವೊನ ಲಿಖ್ಯೋತೆ ಚಾರ್ ಚಿಟ್ಟೀಮ ಆ ಏಕ್‌ ಚಿಟ್ಟಿ ಹುಯಿರುಸ್. ಉಭ್ರೀತೆ ತೀನ್ ಚಿಟ್ಟಿ ಖಿವಿಕತೊ, 1 ತಿಮೊಥೆ, ತೀತ, ಅಜು಼ ಫಿಲೆಮೋನ, ಬೇನಿ ತಿಮೊಥೆ ಲೀಖಾನಿ ವಖ್ಹತ್‌ಮ ರೋಮಾಪುರಮ ಥೂತೆ ಕ್ರಿಸ್ತಾನ್‍ವಾಳಾನ ಖ್ಹತಾಪ್ಣಿನಿ ವೇಳ್ ಹುಯಿರ‍್ಹಿಥಿ. ಇನಖ್ಹಾಜೆ ಪೌಲನೆ ಖ್ಹಾರ್ಕೊಟ್‌ಮಥೊ. ಅಜು಼ ತಿಮೊಥೆಯನ ಖ್ಹತಾಪ್ಣಿನ ಖ್ಹಮಾಳಿಲ್ಯವಾನ ಖ್ಹೂಜ಼್ ದಿದೊ. ಏಕ್‌ನಿ ತಿಮೊಥೆನು ಚಿಟ್ಟೀಮ ರ‍್ಹವಾನಿತರಸ್ ಪೌಲನೆ ತಿಮೊಥೆನ ಝೂ಼ಟ ಬೋಧಕರ್‌ನಿ ವಿರೋದ್ ಝೇತಾಯೊ. 1 ತಿಮೊ 1:16-18 ಅಗಾಡಿ ಆವ್‌ಶೇತೆ ಖ್ಹತಾಪ್ಣಿನಿ ಬಾರೇಮ ಬೋಲಿರಾಖ್ಯೊಸ್ 1 ತಿಮೊ 3:1
ಕಾಡಿದೇಖೊ
1 ಪೌಲ ತಿಮೊಥೆನ ಖ್ಹಲಾಮ್ ಕರ್ತೊ ಆ ಚಿಟ್ಟಿನ ಶುರುಕರಿರಾಖ್ಯೊಸ್. 1:1-2 ಇನಪಾರ್ ಇನ ಹುಮ್ಮಖ್ಹ್‌ ಕರಸ್.1:3-18
2 ಇನಕೇಡೆಥು ತಿಮೊಥೆಯನ,ಆವ್‌ಶೇತೆ ಮುಶ್‍ಕೀಲ್ನಿ ಬಾರೇಮ ಖ್ಹಾಮಾಳಿಲೀನ್ ರ‍್ಹವಾನ ಬೋಲಿರಾಖ್ಯೊಸ್. 2:1-13
3 ಇನಪಾರ್ ಮಾಮೂಲಿ ಖ್ಹೂಜ಼್ ದೀರಾಖ್ಯೊಸ್. 2:14-26
4 ಅಜು಼ ಖ್ಹಾಮ್ಣೆ ಉಷೇತೆ ವಿಚಾರ‍್ನಿ ಬಾರೇಮ ಅಛ್ಛಿನಿತರ ಫೇಡ್ ದೇವ್ಣುಕರಿ ಹೊಷಾರಿ ಕರ‍್ಯೊ.3:1—4:8
5 ತಿಮೊಥೆನ ಥೋಡಿ ಇನು ಬುದ್ದಿವಾತೆನ ಬೋಲ್ತೊಹುಯಿನ್ ಖ್ಹರ್ತಿ ಕರಿರಾಖ್ಯೊಸ್. 4:9-22
1
1 ಅಪೊಸ್ತಲ ಹುಯಿರೋತೆ ಪೌಲನೆ, ಇನೊ ಪ್ಯಾರ್‌ನೊ ಛಿಯ್ಯೊ ತಿಮೊಥೆನ ಲೀಖ್ಯೋತೆ ಶಾತ್ಕತೊ, ಪೌಲಾಥಿ ಯೋ ದೇವ್ನಿ ಮರ್ಜಿನಿತರ ಕ್ರಿಸ್ತ ಯೇಸುಮ ಛಾ಼ತೆ ಜಾನ್ನಿ ವಾಗ್ದಾನ್ನ ಬೋಲಾನಖ್ಹಾಜೆ ಕ್ರಿಸ್ತ ಯೇಸುನೊ ಅಪೊಸ್ತಲ ಹುಯಿರೋಸ್.
2 ಮಾರೊ ಪ್ಯಾರ್‌ನೊ ಛಿಯ್ಯೊ ತಿಮೊಥೆಯನ ಲೀಖಾನು ಶಾತ್ಕತೊ, ಬಾ ಹುಯಿರ‍್ಹೋತೆ ದೇವ್‍ಥಿ ಅಜು಼ ಪ್ರಭು ಹುಯಿರ‍್ಹೋತೆ ಕ್ರಿಸ್ತ ಯೇಸುಥಿ ತುನ ವಾರ್‌ಖ್ಹೊ, ಗೋರ್‌ ಅಜು಼ ಶಾಂತಿ ಮಳಾದೆ.
ಧನ್ಯವಾದ್ ಅಜು಼ ಭಾಲಿನಿ ವಾತೆ
3 ಮೇ ಕೆದೇಬಿ ರಾತ್-ದನ್ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತಾರಿ ಬಾರೇಮ ಯಾದ್‌ಕರಿನ್, ದೇವ್ನ ಖ್ಹಲಾಮ್ ಕರುಸ್. ಅಜು಼ ಇನು ಸೇವೆನ ಮಾರ ಬಾಬ್‌ದಾದವ್‍ನಿತರ ಶುದ್‍ ದಿಲ್‌ಥಿ ಕರುಸ್
4 ತಾರ ಆಂಝಾ಼ನ ಮೇ ಯಾದ್ಮ ಲಯಿನ್ ತುನ ಘಣಿ ಶಂತೋಖ್ಹ್‌ಮ ಭರಾವ್ಣು ಕರಿ ಮೆ ಮನ್‌ಕರುಸ್.
5 ತಾರಿ ಶುದ್ಧಮನ್‌ಥಿ ಛಾ಼ತೆ ವಿಶ್ವಾಸ್‌ ಮಾರಿ ಯಾದ್ಮ ಛಾ಼, ಇಮ್ನಿ ವಿಶ್ವಾಸ್‌ ತಾರಿ ನಾನಿ ಲೋವಿಮಾಬಿ ಅಜು಼ ತಾರಿ ಆಯ ಯೂನಿಕೇಮಾಬಿ ಥಿ. ಯೋಸ್ ವಿಶ್ವಾಸ್‌ ತಾರಮಾಬಿ ಛಾ಼ಕರಿ ಮನ ಅಛ್ಛಿನಿತರ ಮಾಲುಮ್.
6 ಅನಖ್ಹಾಜೆಸ್ ದೇವ್ನೆ ತುನ ದಿದೋತೆ ಯೋ ವರದಾನ್ ದೀವಾನಿತರ ಖ್ಹಲಗ್‌ತು ರ‍್ಹವಾದೆ ಅಜು಼ ಮೇ ತಾರಪರ್ ಹಾತ್ ಮ್ಹೇಲ್ಯೊಥೋತೆ ತದೆ ಯೋ ತುನ ಮಳ್ಯು.
7 ದೇವ್ನೆ ಅಪ್ಣುನ ದೀರಾಖ್ಯೋತೆ ಆತ್ಮ ಡರ್‌ಪೋಕ್‌ ಬಣಾವವಾಳು ಆತ್ಮ ಕಾಹೆ; ಇನು ಆತ್ಮ ಅಪ್ಣುನ ಶಕತ್, ಪ್ಯಾರ್ ಅಜು಼ ಗ್ರಿಸ್ತಿಥಿ ಭರಿದೇಸ್.
8 ಅನಖ್ಹಾಜೆ ಅಪ್ಣೊ ಪ್ರಭುನಿ ಬಾರೇಮ ಸಾಕ್ಷಿ ಬೋಲಾನ, ಕ್ರಿಸ್ತನಖ್ಹಾಜೆ ಜೇಲ್‌ಮ ಛೂ಼ತೆ ಮಾರಿಬಾರೇಮ ಖ್ಹರ್‌ಮೈಶ್ ನಕೊ.ತುನ ಹೋಣುತೆ ಶಕತ್ನ ದೇವಸ್ ದಿಶೆ. ಇನ ಬದಲ್ ದೇವ್ನಿ ಅಛ್ಛಿ ಖಬರ್‌ನಖ್ಹಾಜೆ ಮಾರ ಜೋ಼ಡೆ ಲತಾಡ ಪಡ್.
9 ಇನೆ ಅಪ್ಣಾಮ ಛಾ಼ತೆ ಅಛ಼್ಛಕಾಮ್‌ನ ದೇಖ್ಯೊತೆ ಇನಖ್ಹಾಜೆ ಕಾಹೆ. ಇನಿ ಖ್ಹೂಜ಼್‍ಥಿ ಅಜು಼ ವಾರ್‌ಖ್ಹೇಥಿ ಅಪ್ಣುನ ಬಚಾ಼ಡಿನ್ ಪರಿಶುದ್ ಹುವಾನ ಬುಲಾಯೊ, ಇನೆ ಜ಼ಗ್‌ಜ಼ಮಾನೇಥಿ ಯೊ ವಾರ್‌ಖ್ಹೊ ಯೇಸು ಕ್ರಿಸ್ತಥಿ ಅಪ್ಣುನ ಮಳ್ಯು.
10 ಕತೋಬಿ ಹಮ್ಕೆ ಅಪ್ಣೊ ಬಚಾ಼ಡವಾಳೊ ಹುಯಿರ‍್ಹೋತೆ ಕ್ರಿಸ್ತ ಯೇಸು ದೆಖಾವಾನಿ ಜೋ಼ಡ್ಮ ಅಪ್ಣುನ ಪ್ರಕಟ್‌ಹುಯು. ಇನೆ ಮರಣ್ಣ ನಾಶ್ ಕರ‍್ಯೊ ಅಜು಼ ಜಾನ್ನಬಿ ಮರಾನುಕೊಂತೆ ಸುವಾರ್ತೆ ವತಾಳಿರಾಖ್ಯೊಸ್.
11 ದೇವ್ನೆ ಮನ ಅಪೊಸ್ತಲ ಅಜು಼ ಶಿಕಾಡವಾಳೊ ಹುಯಿನ್, ಆ ಅಛ್ಛಿ ಖಬರ್‌ನ ಬೋಲಿದ್ಯವಾನಖ್ಹಾಜೆ ಮ್ಹೇಲಿರಾಖ್ಯೋಸ್‌.
12 ಅನಖ್ಹಾಜೆಸ್ ಮೇ ಆ ಖ್ಹಾರು ಖ್ಹಮಾಳುಕರುಸ್ತೆ. ತೋಬಿ ಮೇ ಖ್ಹರ್‌ಮಾವ್‍ಕೊಯ್ನಿ. ಶನಕತೊ ಮೇ ಕಿನಾಪರ್ ಭರೋಖ್ಹೊ ಕರಿರಾಖ್ಯೋಸ್‌ಕಿ ಯೊ ಮನ ಮಾಲುಮ್ ಕರಿರಾಖ್ಯೋಸ್. ಅಜು಼ ಮನ ಅಛ್ಛಿನಿತರ ಮಾಲುಮ್‍ಕಿ ಯೋ ಮಾರ ಹಾತ್ಮ ಶಾತ್ ದೀರಾಖ್ಯೋಸ್ತೆ ಇನ, ಪ್ರಭು ಆವಾನು ಯೊ ದನ್ ಆವಾತೋಡಿ ಬಚಾ಼ಡನ ಶಕತ್‌ವಾಳೊ ಹುಯಿರ‍್ಹೋಸ್.
13 ತೂ ಮಾರೇಥಿ ಶನಿಬಾರೇಮ ಶಿಕಿರ‍್ಹೋಸ್ಕಿ ಇನ ವಿಶ್ವಾಸ್‌ಥಿಬಿ ಅಜು಼ ಕ್ರಿಸ್ತ ಯೇಸುನಿ ಪ್ಯಾರ್‌ಮ ಖ್ಹಾಚಿವಾತೆ ಬೋಲಿದ್ಯವಾನ ಘಟ್ ಧರಿರಾಕ್.
14 ತಾರ ಹಾತ್ಮ ದೆವೈರ‍್ಹೀತೆ ಅಛ್ಛಿ ಖಬರ್‌ನ, ಅಪ್ಣ ಮಹಿ ಛಾ಼ತೆ ಪವಿತ್ರಾತ್ಮಾನಿ ಶಕಥ್ಥಿ ಜ಼ತನ್‌ಥಿ ರಾಕ್.
15 ಏಷ್ಯಾ ತಬರ್‌ಖಾನು ತಮಾಮ್‌ ಅದ್ಮಿ, ಮನ ಹಾತ್ ಮ್ಹೆಂದಿದು ಕರಿ ಬೋಲಾನು ತುನ ಮಾಲುಮ್. ಇವ್ಣಾಮ ಫುಗೇಲಬಿ ಅಜು಼ ಹೇರ್ಮೋಗೇನ್‌ ಮಳಿರ‍್ಹಾಸ್.
16 ಒನೇಸಿಪೊರನ ಘರ್‌ವಾಳಾನ ಪ್ರಭು ಗೋರ್‌ ವತಾಳದೆ, ಇನೆ ಘಣಿ ಹಲ್ಲ ಮನ ಖುಷಿ ಕರಾಯೊ. ಮೇ ಜೇಲ್‌ಮ ರ‍್ಹೀನ್ ಖ್ಹಂಕ್‌ಳಿನ ಖ್ಹರ್‌ಮಾಯೊ ಕೊಂತೆ,
17 ರೋಮ್ ಖ್ಹಯೇರ್‌ಮ ಆವ್‌ತಾಸ್ನ ಮೇ ಮಳಾಲಗೂಬಿ ಯೊ ಢೂಂಡೂಕರ್ತೊಥೊ.
18 ಪ್ರಭು ಇವ್ಣುನ ಯೋ ದನ್ಮ ಇನಿ ಗೋರ್‌ ಮಳಾದೆ. ಯೊ ಎಫೆಸಮ ಇನೆ ಖಿವಿಖಿವಿ ಪರಕ್ಮ ಸೇವೆ ಕರ‍್ಯೋಥೋಕಿ ಯೊ ತುನ ಅಛ್ಛಿನಿತರ ಮಾಲುಮ್ ಛಾ಼.