21
ನವು ಸೊರ್ಗ ಅಜು಼ ನವಿ ಧರ್ತಿ
1 ಇನ ಪಾಛ಼ಳ್ ಮೆ ನವು ಸೊರ್ಗ ಅಜು಼ ಜ಼ಮೀನ್ನ ದೇಖ್ಯೊ. ಪಹಿಲೇನು ಆಕಾಶ್ ಅಜು಼ ಪಹಿಲೇನು ಜ಼ಮೀನ್‌ಕೊಂತೆ ಹುಯಿಗಯು. ಹಿಜ್ಜಾ಼ ದರ‍್ಯಾವ್‍ಬಿ ಕೋಥೂನಿ.
2 ಅತ್ರೇಸ್ ಕಾಹೆತೆ ಸೊರ್ಗಾಥು ಪರಿಶುದ್ ನಂಗರ್ ಯೆರೂಸಲೇಮ್ ದೇವ್‌ಕಂಥು ಉತ್ರಿ ಆವನು ಮೇ ದೇಖ್ಯೊ. ಯೋ ಇನ ಬಾವ್ರಿನಖ್ಹಾಜೆ ತಯಾರ್ ಹುಯಿರ‍್ಹವಾಳಿ ವ್ಯತುಲ್ಡಿನಿ ಘೋಣಿ ಶನ್‌ಗಾರ್ ಹುಯಿರ‍್ಹುಥು.
3 ಆ ನಾಹುಯಿನ್ ಸಿಂಹಾಸನ್‌ಥು ಏಕ್‌ ಮೋಟು ಅವಾಜ಼್ ಮೆ ಖ್ಹಮ್‌ಜೊ. ಯೊ ಅವಾಜ಼್ ದೇಖೊ, ದೇವ್ನು ಘರ್‌ ಅದ್ಮಿನಿ ಜೋ಼ಡ್ಮ ಛಾ಼. ಯೊ ಇವ್ಣಿ ಜೋ಼ಡ್‌ಮರ‍್ಹಿಷೆ. ಇವ್ಣೆ ಇನವಾಳ ಹುಯಿರ‍್ಹಿಷೆ ಅಜು಼ ಯೊ ಇವ್ಣೊ ದೇವ್ ಹುಯಿರ‍್ಹಿಷೆ.
4 ಯೊ ಇವ್ಣ ಆಂಝಾ಼ನ ನೂಛಿನಾಕ್ಷೆ. ಹಿಜ್ಜಾ಼ ಪಾಛು಼ ಮರಣ್ ರ‍್ಹಿಶೆಕೊಯ್ನಿ, ಪಾಛು಼ ದುಖ್ ರ‍್ಹಿಶೆಕೊಯ್ನಿ, ಖ್ಹರಪ್‌ಗೋಳ್‌ ಕೊರ‍್ಹಿಶೇನಿ, ಅಜು಼ ವದೇಖ್ಹೊ ಕೊರ‍್ಹಿಶೇನಿ ಜೂ಼ನೊ ಮಾರಗ್‌ಖ್ಹಾರು ಚ಼ಲಿಗಯು” ಕರಿ ಬೋಲ್ಯು.
5 ತದೆ ಸಿಂಹಾಸನ್‌ಪರ್ ಬೆಠೊಥೋತೆ ಇನೆ, “ದೇಖ್ ಮೇ ಖ್ಹಾರುಸ್ ನವೇಥಿ ಉಬ್‌ಜಾ಼ವುಸ್‌” ಕರಿ ಬೋಲ್ಯೊ. ಅಜು಼ ಏಕ್‌ ಜ಼ಣಾನೆ ಮನ, ತೂ ಅನ ಲೀಕ್. ಶನಕತೊ ಆ ವಚನ್‌ಖ್ಹಾರು ಖ್ಹಾಚು಼ಬಿ ವಿಶ್ವಾಸ್‌ ಕರಖ್ಹರ್ಕೂಬಿ ಹುಯಿರ‍್ಹುಸ್” ಕರಿ ಬೋಲ್ಯೊ.
6 ತದೆ ಸಿಂಹಾಸನ್‌ಪರ್ ಬೆಠೊಥೋತೆ ಇನೆ, “ಅಖ್ಖೂಸ್ ಕರಿಹುಯ್ಗು; ಮೇಸ್ ಪಹಿಲೋಬಿ, ಖ್ಹರ್ತಿಬಿ, ಶುರುವಾತ್‍ಬಿ, ಖತಮ್‌ಬಿ ಹುಯಿರ‍್ಹೋಸ್. ತರ್ಖ್ಹವಾಳನ ಜಾನ್ನು ಪಾಣಿನೊ ಚೇಜ಼್‌ಭಾರನ ಮೋಲ್‌ಕೊಂತೆ ಫುಗಟ್‍ಥಿ ಪಿಯಾನ ದಿಶ್.
7 ಜೂತವಾಳನ ಆ ಖ್ಹಾರುಸ್ ಮಳ್‌ಶೆ. ಮೇ ಇನ ದೇವ್ ಹುಯಿರ‍್ಹಿಶ್. ಯೊ ಮನ ಛಿಯ್ಯೊ ಹುಯಿರ‍್ಹಿಶೆ.
8 ಕತೋಬಿ ಡರ್‌ಪೋಕ್‌ಖ್ಹಾರು, ವಿಶ್ವಾಸ್‌ಕೊಂತೆ ಖ್ಹಾರು, ಗಲೀಜ಼್ ಕಾಮ್ ಕರವಾಳು, ಖೂನಿಖ್ಹಾರು, ವ್ಯಬಿಚಾರ್ ಕರವಾಳು, ಜಾ಼ದುಕರಾವಳು, ಮೂರತ್ನ ಆರಾದನೆ ಕರವಾಳು, ಅಖ್ಖೂಸ್ ಜ್ಹೂ಼ಟು ಬೋಲವಾಳು ಅವ್ಣುನ ಮಳ್‌ಶೇತೆ ವಾಟೊ ಆಗ್ ರಂಜ಼ಕ್‌ಥಿ ಬಳ್ವಾನು ತಲಾವಸ್; ಯೋ ಬೇನು ಮರಣ್” ಕರಿ ಮನ ಬೋಲ್ಯೊ.
ನವು ಯೆರೂಸಲೇಮ್
9 ಖ್ಹರ್ತಿನು ಖ್ಹಾತ್ ಖ್ಹತಾಪ್ಣಿಥಿ ಭರೈರುತೆ ಖ್ಹಾತ್ ಕಟೋರವ್ನ ಧರಿರಾಖ್ಯುತೆ ಖ್ಹಾತ್‌ಜ಼ಣ ದೇವ್‌ದೂತರ್‌ಮ ಏಕ್‍ಜ಼ಣೊ ಐನ್ ವಾತೆ ಬೋಲ್ತೊಹುಯಿನ್, “ಮಾರಿ ಜೋ಼ಡ್ಮ ಆವ್, ಮೇಂಢಾನ ಚೆಲ್ಕಾನ ಬಾವಣ್‍ ಹುವಾಳಿ ವ್ಯತುಲ್ಡಿನ ತುನ ವತಾಳುಸ್‌” ಕರಿ ಬೋಲ್ಯೊ.
10 ಯೊ ದೇವ್ನದೂತನೆ ಪವಿತ್ರಾತ್ಮಾಥಿ ದಾಬುಕ್ಮ ಥೋತೆ ಮನ, ಘಣೊಮೋಟೊ ಅಜು಼ ಊಚೊ಼ ಪಹಡ್‌ಕನ ಲೀಜೈ಼ನ್, ಪರಿಶುದ್ ಖ್ಹಯೇರ್ ಯೆರೂಸಲೇಮ್, ಸೊರ್ಗಮಾಥು ದೇವ್‌ಕಂಥು ಉತ್ರಿ ಉಳ್ಯಾವತೆ ಯೊ ಮನ ವತಾಳ್ಯೊ.
11 ಯೋ ಖ್ಹಯೇರ್ ದೇವ್ನಿ ಶಕಥ್ಥಿ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಅಜು಼ ಝ಼ಗೇಗುಕರಾತೆ ವಜ್ರನಿತರ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಘಣ ಮೋಲ್ನ ಐರಾನಿತರ ಜ಼ಮ್ಕು ಕರ್ತುಥು.
12 ಯೋ ಖ್ಹಯೇರ‍್ನ ಊಚು಼ ಭೀತ್ ತು. ಯೋ ಅಖ್ಖಾ ಬಾಕಲ್‍ಕನ ದೇವ್‌ದೂತರ್‌ ಥಾ. ಅಖ್ಖಾನ ಬಾಕಲ್‌ನ ಉಪ್ಪರ್ ಇಸ್ರಾಯೇಲ್‌ನು ಭಾರ ಖೂಮ್ನು ನಾಮ್ ಲೀಖೈರ‍್ಹೂಥು.
13 ಪೂರಬ್ ದಿಕ್ಮ ತೀನ್ ಬಾಕಲ್, ಉತ್ತರ್ ದಿಕ್ಮ ತೀನ್ ಬಾಕಲ್, ದಕ್ಷಿಣ್ ದಿಕ್ಮ ತೀನ್ ಬಾಕಲ್, ಪಶ್ಚಿಮ್ ದಿಕ್ಮ ತೀನ್ ಬಾಕಲ್‌ಥು.
14 ಯೋ ಖ್ಹಯೇರ‍್ನು ಭೀತ್‌ನ ಭಾರ ಹದಿಪಾಯನುಬಂಡೊ ಥು. ಇನಪರ್ ಮೇಂಢಾನು ಚೆಲ್ಕಾನು ಭಾರಜ಼ಣ ಅಪೊಸ್ತಲರ‍್ನು ನಾಮ್ ಥು.
15 ಮಾರೇಥಿ ವಾತೆ ಬೋಲು ಕರ್ತೊಥೋತೆ ದೂತನೆ ಯೊ ಖ್ಹಯೇರ್‌ನಾಬಿ ಇನ ಬಾಕಲ್ನಾಬಿ ಅಜು಼ ಇನು ಭೀತ್‌ನ ಆಳ್ತಿಕರಾನಖ್ಹಾಜೆ ಇನ ಹಾತ್ಮ ಖ್ಹೊನ್ನಾನೊ ಆಳ್ತಿನೊಲಠ್ಠೊ ಧರಿರಾಖ್ಯೋಥೊ.
16 ಯೋ ಖ್ಹಯೇರ್ ಚಾರ್‌ಕೂಠಿ ಥು. ಯೊ ಕೆವ್ಡು ಲಾಂಬುಕಿ ಎತ್ರೇಸ್ ಚೌ಼ಡುಥು. ದೇವ್ನದೂತನೆ ಖ್ಹಯೇರ‍್ನ ಇನ ಆಳ್ತಿನಲಠ್ಠೇಥಿ ಗಣ್ಯೊ. ಯೊ ಖ್ಹಯೇರ್ ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಲಾಂಬು, ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಚೌ಼ಡು, ಬಿಜು಼ ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಊಚು಼ಥು.
17 ದೇವ್‌ದೂತನೆ ಯೋ ಭೀತ್‌ನ ಆಳ್ತಿಕರ‍್ಯೊ, ಯೊ ಬೇಖ್ಹೊ ಖ್ಹೋಳ ಅಡಿಯೆತ್ರೆ ಆಳ್ತಿ ಥು. ಆ ಗಣ್ತಿಮ ಅದ್ಮಿನು ಹಾತ್‌ಯೆತ್ರೆ ಕತೊ ದೇವ್ನದೂತಾನ ಹಾತ್‌ಯೆತ್ರೇಸ್.
18 ಯೋ ಭೀತ್ ವಜ್ರಾನಬಂಡೇಥಿ ಭಂದೈರ‍್ಹುಥು ಯೊ ನಂಗರ್ ಐರಾನಿತರನು ಅಶ್ಲಿ ಖ್ಹೊನ್ನು ಹುಯಿರ‍್ಹುಥು.
19 ಖ್ಹಯೇರ‍್ನ ಭೀತ್‌ನು ಹದಿಪಾಯನ ಕೈಯೇಕ್ ಥರಾನು ಮುತ್ನೊ ಕಾಕ್ರೊಖ್ಹಾರೊಥೊ, ಫೈಲೊ ಕೋಣಾನೊ ಬಂಡೊ ವಜ್ರಾಥಿ, ಬೇನೊಬಂಡೊ ವೈಡೂರ‍್ಯ, ತೀನ್ನೊ ಪಚ್ಚೆ. ಚಾರ‍್ನು ಪದ್ಮರಾಗ್,
20 ಪಾಚ಼್‌ನು ಗೋಮೇಧಿಕ, ಛೋ಼ನು ಮಾಣಿಕ್ಯ, ಖ್ಹಾತ್ನು ಪೀತರತ್ನ, ಆಟ್ನು ಬೆರುಲ್ಲ, ನೌನು ಪುಷ್ಯರಾಗ್, ದಖ್ಹ್‌ನೊ ಗರುಡಪಚ್ಚೆ, ಘ್ಯಾರಾನೊ ಇಂದ್ರನೀಲ, ಬಿಜು಼ ಭಾರಾನೊ ಬಂಡೊ ನೀಲಸ್ಪಟಿಕ.
21 ಭಾರ ಬಾಕಲ್‍ಖ್ಹಾರು ಭಾರ ಮುತ್ತ್ ಹುಯಿರ‍್ಹುಥು. ಹರೇಕ್ ಬಾಕಲ್ನಾಬಿ ಏಕೇಕ್‌ ಮುತ್ತ್‌ಥಿ ಬಣೈರಾಖ್ಯುಥು. ನಂಗರ‍್ನು ಗಲ್ಲಿ ಪಾಕ್‌ಥಿ ರ‍್ಹವಾನ ಶಿಖ್ಹಾನಿತರನು ಅಶ್ಲಿ ಖ್ಹೊನ್ನೇಥಿ ಬಣೈರ‍್ಹೂಥು.
22 ಮೆ ಖ್ಹಯೇರ್‌ಮ ಮಂದಿರ್‌ಬಿ ದೇಖ್ಯೊ ಕೊಯ್ನಿ. ಶನಕತೊ ಸರ್ವಶಕತ್‌ನೊ ದೇವ್‌ಹುಯಿರ‍್ಹೋತೆ ಪ್ರಭು ಅಜು಼ ಮೇಂಢಾನು ಚೆಲ್ಕುಹುಯಿರ‍್ಹವಾಳೊ ಯೊ ಇನು ಮಂದಿರ್‌ ಹುಯಿರ‍್ಹೂಸ್.
23 ಖ್ಹಯೇರ‍್ನ ಉಜಾ಼ಳು ದ್ಯವಾನ ಚಾ಼ಂದ್‌ರ‍್ಹವೊ ಚ಼ಂದರ್‌ಮೊರ‍್ಹವೊ ಹೋಣುಥುಕೊಯ್ನಿ ಶನಕತೊ ದೇವ್ನಿ ಮಹಿಮೆಸ್ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಮೇಂಢಾನು ಚೆಲ್ಕುಸ್ ನಂಗರ‍್ನ ದೀವೊ ಹುಯಿರ‍್ಹೋಥೊ.
24 ಇನ ಉಜಾ಼ಖ್ಹ್‌ಮಾಸ್ ಹರೇಕ್ ಜ಼ಗ್‌ಜಾ಼ತ್‌ ಚಾ಼ಲ್‌ಷೆ. ಜ಼ಮೀನ್ನ ರಾಜ಼ವ್‌ಖ್ಹಾರು ಇವ್ಣ ಧನ್‌ದೌಲತ್ನ ಖ್ಹಯೇರ್‌ಕನ ಲೀನ್ ಆವ್‌ಶೆ.
25 ಖ್ಹಯೇರ‍್ನು ದರ‍್ವಾಜು಼ಖ್ಹಾರು ದನ್ಮ ಮುಚಾ಼ವ್‌ಶೇಸ್ ಕೊಯ್ನಿ. ಹಿಜ್ಜಾ಼ ರಾತ್‌ಕತೊ ಕೊಯ್ನಿಸಸ್ ಕೊಯ್ನಿ.
26 ಜ಼ಗ್‌ಜಾ಼ತ್‌ನು ಧನ್‌ದೌಲತ್‌ಬಿ ಮರ್ಯಾದೀಬಿ ಹಿಜ್ಜಾ಼ ಲೀನ್‌ಆವ್‌ಶೆ.
27 ಕತೋಬಿ ಅಶುದ್ದ ರ‍್ಹವಾನು ಖಿವು ಏಕ್‌ಬಿ ಕೊಪೇಖ್ಹ್‌ಶೇನಿ. ಇಮ್ಮಸ್ ಕಚಿಂಡ್‌ಕಾಮ್‌ ಕರಾವಳೊಬಿ ಠಗಾವವಾಳೋಬಿ ಇನಾಮ ಪೇಖ್ಹ್‌ಶೆ ಕೊಯ್ನಿ. ಕತೋಬಿ ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಕಿನುಕಿನು ನಾಮ್‌ಖ್ಹಾರು ಲೀಖೈರ‍್ಹೇಸ್ಕಿ ಇವ್ಣೆಖಲಿ ಯೊ ಖ್ಹಯೇರ್‌ಮ ಪೇಖ್ಹ್‌ಶೆ.