ಯೋಹಾನನು ಬರೆದ ಪ್ರಕಟಣೆ
ಯೋಹಾನನೆ ಲೀಖ್ಯೋತೆ ಪ್ರಕಾಶಿತ್ ವಚನ್
ಮಾಲುಮ್ ಕರಾನು
ಪ್ರಕಾಶಿತ್ ಪುಸ್ತಕ್ ನವಿ ಒಪ್ಪಂದಾನು ಪುಸ್ತಕ್ ಹುಯಿರುಸ್. ಆ ಪುಸ್ತಕ್ ಅಪೊಸ್ತಲ ಯೋಹಾನಥಿ ಲೀಖಾಯು. ಖ್ಹರ್ತಿಮ ಕ್ರಿಸ್ತನಿ ಪೈದಾಖ್ಹ್‌ನಿ ಖ್ಹುಮಾರ್ 95 ವರಖ್ಹ್‌ಮ ಲೀಖೈರುಸ್. 1:1 ಇನೆ ಯೋಹಾನ್ನಿ ಸುವಾರ್ತೆ ಅಜು಼ ತೀನ್ ಚಿಟ್ಟಿ ಹುಯಿರೀತೆ ಪಹಿಲಿ ಬೇನಿ ಅಜು಼ ತೀನ್ನಿ ಯೋಹಾನಬಿ ಲೀಖಿರಾಖ್ಯೊಸ್. “ಯೋಹಾನ ಯೇಸುನೊ ಪ್ಯಾರ್‌ನೊ” ಕರೀಬಿ ಬೊಲೈಲೇಸ್. ಯೋಹಾನ 13:23.
ಆ ಪ್ರಕಾಶಿತ್ ಪುಸ್ತಕ ಇನೆ ಯೇಸುಕ್ರಿಸ್ತನಿ ಸುವಾರ್ತೆ ಫೈಲಾವನಖ್ಹಾಜೆ ಪತ್ಮೋಸ್ ಕರಿ ಟಾಪನ ಕೊಂಡೈರ‍್ಹವಾನಿ ವಖ್ಹತ್‌ಮ ಪ್ರಕಾಶಿತ್ 2:3.
ಯೋಹಾನನೆ ಪ್ರಕಾಶಿತ್ ಪುಸ್ತಕ ಲೀಖ್ಯೋತೆ ಶನಕತೊ ಪಢಾವಾಳಾನ ಯೇಸುಕ್ರಿಸ್ತಮ ವಿಶ್ವಾಸಿ ಹುಯಿನ್ ರ‍್ಹವಾನಖ್ಹಾಜೆ ಅಜು಼ ಯೇಸು ಪಾಛು಼ ಆವ್‍ಶೆಕರಿ ಬೋಲಾನು ವೇಳ್ ಖನ್ನೆ ಅಯಿಗಿಕರಿ ಯೋ ಭರೋಖ್ಹೊ ದ್ಯವಾನಖ್ಹಾಜೆ ಹುಮ್ಮಖ್ಹ್ ದ್ಯವಾನು ಹುಯಿರುಸ್1:3—22:7 ಇನೆ ಮ್ಹಾಮೂಲಿ ಅಖ್ಖಾ ಕ್ರಿಸ್ತ ವಿಶ್ವಾಸಿಯೊನ ಅಜು಼ 28.3 ವಚನ್‌ಮ ದೇಖ್ಯೆತೆ ತಿಮ್ ಬರೋಬರ್‌ನಿ 7 ಸಬೆನ ಲೀಖಸ್. ಯೋಹಾನನೆ ಇನೆ ಲೀಖ್ಯೋತೆ ಪ್ರವಾದನೆ ಹುಯಿರುಸ್ ಕರಿ ಬೋಲಸ್ 1:3 ಅಜು಼ ಇನೆ ದೇಖ್ಯೊತೆ ವಿಚಾರ‍್ನ ಬೋಲಾನಖ್ಹಾಜೆ ಆ ಪುಸ್ತಕ್‌ಮ ಅಖ್ಖು ಕೈಏಕ್ ಪೋಟನ ಲೀಖಿ ವತಾಳ್ಯೊ. ಆ ಪುಸ್ತಕ ಜೂ಼ನಿ ಒಪ್ಪಂದನಿ ಥೋಡಿ ಭಾಗ್‌ನಿಮತ್ ಛಾ಼. ಬರೋಬರ್‌ಥಿ ಬೋಲ್ನುಕತೊ ಜೆಕರ್ಯ 6:1-8 ಖ್ಹಾತ್ ತುತ್ತೂರಿ ಅಜು಼ ಖ್ಹಾತ್ ಕಟೋರೊ ಅಖ್ಖು ದೇವ್ನೆ ಈಜಿಪ್ಟ್‌ನ ನಿಶತ್ ದ್ಯವಾನ ಮೋಕ್ಲಾಯುತೆ ಖ್ಹಾತ್ ಖ್ಹತಾಪ್ಣಿನ ವತಳಾನಿತರ ಹುಯಿರುಸ್. ವಿಮೋಚನ 7:9 ಪ್ರಕಾಶಿತ್ ಪುಸ್ತಕ ಹಗಾಮ್ನ ಖ್ಹರ್ತಿನಿ ಬಾರೇಮ ವಾತೆಬೋಲಸ್. ಇನ ಯೇಸು ಜುತಿಲೇಸ್, ಅಜು಼ ಇನ ಉಪ್ಪರ್ ಕೋಣ್ ವಿಶ್ವಾಸ್ ರಾಖಸ್ಕಿ ಇವ್ಣೆ ಇನಿಜೋ಼ಡ್ಮ ಹರ್‌ಹಮೇಶ ಜಿವ್ಣುಕರ್ಶೆ.
ಆ ಪುಸ್ತಕ ಯೇಸು ಒಗ್ಗಿಸ್ ವಳ್ಯಾವಸ್ ಕರಿ ಬೋಲಾನು ಅಪ್ಣುನ ಹೊಷಾರಿ ಕರಸ್ ಅಜು಼ ಭರೋಖ್ಹೊಬಿ ದ್ಯವಾದೆ.
ಕಾಡಿದೇಖೊ
1. ಯೋಹಾನನೆ ಆ ಪ್ರವಾದನೇನಿ ದರ್ಶನ್ ಕಿನೇಥಿ ಲೀಲಿದೊ ಕರಿ ಬೋಲ್ತೊಹುಯಿನ್ ಶುರುಕರಸ್. 1:1-20
2. ಯೋ ನೇರ್‌ಥಿ ಯೇಸುಭಣಿಥು ಆಯೂತೆ ಸಂದೇಶ್ನ 7 ಸಬೇವ್‌ನ ದೇಸ್. 1:1—3:22
3. ಇನಕೇಡೆಥು ಯೋ ಖ್ಹಾತ್ ಮುದ್ರಾನಿ ಬಾರೇಮ ಬೋಲಿವತಾಳಸ್. 4:1—8:5 ಅಜು಼ 7 ತುತ್ತೂರಿನಿ ಬಾರೇಮ ಬೋಲ್ತೊಜಾ಼ಸ್. 8:6—11:19
4. ಇನಕೇಡೆಥು ಯೋಹಾನ 7 ಮುಡ್‌ಕ್ಯಾನು ಮಹಾ ಅರ್ಝ಼ನ ವಿರೋದ್ ಪರ್ಖ್ಹೊಲಡ್ಕಾನಿ ಜಂಗ್‌ನಿ ಬಾರೇಮ ಬೋಲಸ್. 12:1—14:20
5. ಇನಬಾದ್ಮ ಯೋ ಇಂಘಾಠಾಥಿ ಭರೈರುತೆ ರಾಛಾ಼ನ 7 ಸಮಾಚಾರ್‌ನಿ ಬಾರೇಮ ಲೀಖಸ್. 15:1—16:18
6. ಇನಕೇಡೆಥು ಯೋಹಾನನೆ ಸೊರ್ಗನು ದೇವ್ ಇನ ವಹೇರ‍್ಯಾನ ವಿರೋದ್ ಕಿಮ್ ಜೂತಸ್ ಕರಿ ಬೋಲಾನು ಬೋಲಿವತಾಳಸ್. 17:1—20:15
7. ಖ್ಹರ್ತಿಮ ಯೋ ಕಡೇಶಿಮ ಒಳಿಯಾವತೆ ನವಿ ಸೊರ್ಗ ಅಜು಼ ನವು ಜಗತ್‌ ಆವ್‌ಶೇತೆ ಇನಿ ಬಾರೇಮ ಬೋಲಿ ಓತಾಳಸ್‍. 21:1—22:21
1
1 ಯೇಸು ಕ್ರಿಸ್ತನಿ ಪ್ರಕಾಶಿತ್ ವಚನ್ ಒಗ್ಗಿಸ್‌ಮ ಚಾ಼ಲ್ನುತೆ ಬಾರೇಮ ಯೋ ಇನ ದಾಸಖ್ಹಾರನ ವತಾಳನಖ್ಹಾಜೆ ಆ ಖ್ಹಾರು ದೇವ್‍ಥಿ ದೆವಾಯುತೆ. ಯೇಸು ಇನ ದೂತನ ಮೋಕ್ಲಿನ್ ಇನೇಥಿ ಆ ಖ್ಹಾರಿವಾತ್ನ ಯೋಹಾನ ಮಾಲುಮ್ ಕರಾಯೊ.
2 ಯೋಹಾನನೆ ದೇವ್ನಿ ವಚನ್ನಿ ಬಾರೆಮಾಬಿ, ಯೇಸು ಕ್ರಿಸ್ತನೆ ಬೋಲ್ಯೊತೆ ಸಾಕ್ಷಿನಿ ಬಾರೆಮಾಬಿ,ಇನೆ ದೇಖ್ಯೋತೆ ಖ್ಹಾರು ಖ್ಹಮ್‌ಜಾಡವಾಳೊಹುಯಿನ್‌ ಸಾಕ್ಷಿ ಬೋಲ್ಯೊ.
3 ಆ ಪ್ರವಾದ್‌ನೆನಿ ವಚನ್‌ಖ್ಹಾರು ಫಡವಾಳೂಬಿ ಖ್ಹಮ್‌ಜವಾಳೂಬಿ ಅಜು಼ ಅನಾಮ ಲೀಖೈರುತೆ ಇನಲೀನ್ ಚಾ಼ಲವಾಳು ಕೆತ್ರೇಕ್ಕಿ ಧನ್ಯರ್ ಹುಯಿರ‍್ಹುಸ್‍, ಶನಕತೊ ಆ ಖ್ಹಾರು ಚಾ಼ಲನೊದನ್ ಖನ್ನೆ ಐಗು.
ಖ್ಹಾತ್ ಸಬೆನ ಖ್ಹಲಾಮ್
4 ಯೋಹಾನನೆ ಏಷ್ಯಾ ತಬರ್‌ಖಾಮ ರ‍್ಹವಾಳಿ ಖ್ಹಾತ್ ಸಬೆನ ಶಾತ್‌ ಲೀಖುಕರಾಸ್‌ಕತೊ, ರ‍್ಹವಾಳೊ ಅಜು಼ ಅಗ್ಗಳ್‌ಥೋತೆ, ಖ್ಹಾಮ್ಣೆ ಆವವಾಳೊ, ಇನೇಥಿ ಅಜು಼ ಇನು ಸಿಂಹಾಸನ್ನ ಖ್ಹಾಮ್ಣೆಛಾ಼ತೆ ಖ್ಹಾತ್ ಆತ್ಮಥಿ ಅಜು಼ ಯೇಸು ಕ್ರಿಸ್ತಥಿ ವಾರ್‌ಖ್ಹೊಬಿ ಸಮಾಧಾನ್‍ಬಿ ಮಳಾದೆ.
5 ಯೇಸು ವಿಶ್ವಾಸ್‌ನಿ ಸಾಕ್ಷಿ ಹುಯಿರ್‍ಹೊಸ್, ಮರ‍್ಯಹುಯಾಮಥು ಪಹಿಲೆ ಉಠ್ಯೊತೆ ಧರ್ತಿನ ರಾಜಾ಼ವ್ನೊ ಮಾಲಿಕ್ ಹುಯಿರ‍್ಹವವಾಳೊ ಯೇಸು ಕ್ರಿಸ್ತಥಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ. ಅಪ್ಣುನ ಪ್ಯಾರ್‌ಕರವಾಳೊ ಇನು ಪವಿತ್ರ ಲ್ಹೋಯಿಥಿ ಅಪ್ಣುನ ಪಾಪ್‌ಥಿ ಛೋ಼ಡಾಯೊ.
6 ಅಪ್ಣೆ ದೇವ್ನ ರಾಜ್ಯವಾಳಹುಯಿನ್‌ ಇನೊ ಬಾ ಹುಯಿರ‍್ಹೋತೆ, ದೇವ್ನಖ್ಹಾಜೆ ಯಾಜಕರ್‌ ಬಣಾಯೊತೆಯಿನ ಜ಼ಗ್‌ಜ಼ಮಾನಮಾಬಿ ಮಹಿಮೆ ಶಕತ್ ರ‍್ಹವಾದೆ ಆಮೆನ್.
7 “ದೇಖೊ ಯೋ ವಾದ್‍ಳಾನ ಜೋ಼ಡೆ ಆವಾಳೊ ಹುಯಿರೊಸ್, ಹರೇಕ್ನೊ ಡೋಳೊ ಇನ ದೇಕ್‍ಷೆ ಇನ ಭೋಕ್ಯುಹುಯುಬಿ ಇನ ದೇಕ್‍ಷೆ” ಆ ಜಗತ್‌ನು ಅಖ್ಖು ಖೂಮ್‌ವಾಳು ಅಂದ್ರೋಖ್ಹ್‌ ಕರ್ಶೆ. ಒಹೊ ಇಮ್ಮಸ್ ಉಷೆ ಆಮೆನ್.
8 “ಮೇಸ್ ಪಹಿಲೋಬಿ, ಖ್ಹರ್ತಿಬಿ” ರ‍್ಹವಾಳೊ ಅಜು಼ ಅಗ್ಗಳ್‌ಥೋತೆ ಖ್ಹಾಮ್ಣೆ ಆವವಾಳೊ, ಮಹಾನ್ ಶಕತ್‌ವಾಳೊ ಕರಿ ದೇವ್ ಹುಯಿರ‍್ಹೋತೆ ಪ್ರಭು ಬೋಲಾಸ್.
ಕ್ರಿಸ್ತನು ದರ್ಶನ
9 ಯೋಹಾನಕರಿ ಮೆ ಕ್ರಿಸ್ತಮ ತುಮಾರೊ ಭೈ ಹುಯಿರೋಸ್. ಅಪ್ಣೆ ಹಿಡಿಕ್ ಯೇಸುನಖ್ಹಾಜೆ ಖ್ಹತಾಪ್ಣಿಮಾಬಿ,ರಾಜ್ಯಮಾಬಿ, ಖ್ಹಮಾಳಮಾಬಿ ವಾಟೊಲೀರಾಖ್ಯಸ್, ಮೆ ದೇವ್ನಿ ಸಮಾಚಾರ್‌ನಾಬಿ ಯೇಸುನಿ ಬಾರೇಮ ಸಾಕ್ಷಿ ದ್ಯವಾನಖ್ಹಾಜೆ ಪತ್ಮೋಸ್ ಟಾಪಾಮ ಥೊ.
10 ಮೇ ಪ್ರಭುನ ದನ್ಮ ಪವಿತ್ರಾತ್ಮಥಿ ಭರೈನ್ ಮಾರ ಪೀಟ್ ಪಾಛ಼ಳ್ ಮೋಟಿ ಅವಾಜ಼್ ಏಕ್‌ ಖ್ಹಮಜ಼್ ಪಡ್ಯು,ಯೋ ತುತ್ತೂರಿನಿ ಆವಾಜ಼್‌ನಿಮತ್ ಥೂ.
11 ಯೋ ಅವಾಜ಼್‌ನೆ, ತೂ ದೇಖಾನು ಏಕ್‌ ಪುಸ್ತಕ್‌ಮ ಲೀಖಿನ್ ಎಫೆಸ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲಿಡೇಲ್ಫಯ, ಲವೊದಿಕೀಯ, ಕರಿ ಖ್ಹಾತ್ ಸಬೆವ್‍ನ ಮೋಕಲ್ನುಕರಿ ಬೋಲ್ಯು.
12 ಮಾರ ಜೋ಼ಡೆ ವಾತೆ ಬೋಲುಕರ್ತುಥೂತೆ ಅವಾಜ಼್ ಕಿನುಕರಿ ದೇಖಾನ ಮೇ ಪೀಠೆ ಫರ‍್ಯೊ. ಫರಾನಿ ವಖ್ಹತ್‌ಮ ಖ್ಹಾತ್ ಖ್ಹೊನ್ನಾನು ದೀವೊ ಮ್ಹೇಲಾನುಖಮ್‌ ದೇಖ್ಯೊ.
13 ಯೋ ದಿವಳ್ಗಿನ ಇಚ಼್‌ಮ ಅದ್ಮಿನ ಛಿಯ್ಯಾನಿತರ ರ‍್ಹವಾಳನ ದೇಖ್ಯೊ ಇನೆ ಝ಼ಗ್ಗೊ ಫೆರಾಖಿನ್‍ ಖ್ಹೊನ್ನಾನ ಪಟಾನ ಛಾ಼ತಿಪರ್ ಭಾಂದಿರಾಖ್ಯೊಥೊ.
14 ಇನ ಮಾಥಾನು ಕೇಖ್ಹ್‌ ಧೋಳು ಖ್ಹುತ್ತರ್‌ನಿ ಘೋಣಿಬಿ ಬರಪ್‍ನಿ ಘೋಣಿಬಿ ಧೋಳುಫಟ್ ಥೂ.ಇನೊ ಡೋಳೊ ಆಗ್‍ನಿ ಝ಼ಲ್‌ಪಟ್‍ನಿತರ ಥೂ.
15 ಇನ ಭೇ ಪಂಜ಼ ಕೋಲ್‌ಮಿಮ ಬಳಿಹುಯು ತಾಂಬಾನಿ ಘೋಣಿಬಿ ಇನು ಅವಾಜ಼್ ರಂಚಾ಼ವತೆ ಪಾಣಿನ ಘೂಂಜ಼್‌ನಿ ಅವಾಜ಼್‌ನಿತರಬಿ ಥು.
16 ಇನ ಖಾವಹಾತ್ಮ ಖ್ಹಾತ್ ತಾರೊ ಧರೈರೂಥು. ಇನ ಬಾಕಮಾಥು ಬೇಮ್ಹೋಡಾನಿ ತಲ್ವಾರೆ ನಿಕ್ಳುಕರ್ತಿಥಿ ಇನು ಮ್ಹೋಡು ಧೊಪಾರ್‌ಮ ಶಕಥ್ಥಿ ಉಜಾ಼ಖ್ಹ್‌ ದೇಸ್ತೆ ಚಾ಼ಂದ್‍ನಿಘೋಣಿ ಥು.
17 ಮೇ ಇನ ದೇಖಾನಿವಖ್ಹ್‌ತೆ ಮರ‍್ಯಹುಯಾನಿಘೋಣಿ ಇನ ಗೋಡಾನ ಖ್ಹಾಮ್ಣೆ ಪಡ್ಯೊ.ಯೋ ಇನ ಖಾವಹಾತ್ನ ಮಾರಪರ್ ಮ್ಹೇಲಿನ್, ಡರ್‌ನಕೊ ಮೇಸ್ ಪಹಿಲೆನೊ ಖ್ಹರ್ತಿನೊಬಿ.
18 ಕೆದೇಬಿ ಜಿವ್ತುರ‍್ಹವಾಳೊ ಹುಯಿರೊಸ್,ಮರ‍್ಯೊಹುಯೊಥೊ.ಕತೋಬಿ ದೇಕ್ ಜ಼ಗ್‌ಜ಼ಮಾನಮಾಬಿ ಜಿವ್ತು ರ‍್ಹವಾಳೊ ಹುಯಿರೊಸ್. ಮರಣ್ ಅಜು಼ ಪಾತಾಳ್ನ ಬೀಗಾನು ಕೀಲಿ ಮಾರಕನ ಛಾ಼.
19 ಇನಖ್ಹಾಜೆ ತೂ ದೆಖಾವನು ಖ್ಹಾರುಸ್,ಹಮ್ಕೆ ಚಾ಼ಲುಕರಾತೆ ಖ್ಹಾರುಸ್ ಅಗ್ಗಳ್ ಚಾ಼ಲಾನು ಅಖ್ಖಾಸ್ನ ಲೀಖ್.
20 ಮಾರ ಖಾವಹಾತ್ಮ ತುನೆ ದೇಖ್ಯೊತೆ ಖ್ಹಾತ್ ತಾರವ್ನ ಅಜು಼ ಖ್ಹಾತ್ ಖ್ಹೊನ್ನಾನು ದಿವಳ್ಗಿನು ಖಂಬಾನು ಮತ್ಲಬ್ ಬೋಲಿವತಾಳುಸ್, ಯೋ ಖ್ಹಾತ್ ತಾರೊ ಕತೊ ಖ್ಹಾತ್ ಸಬೇನು ದೂತರ್, ಯೋ ಖ್ಹಾತ್ ದಿವಳ್ಗಿನು ಖಂಬಖ್ಹಾರು ಕತೊ ಯೋ ಖ್ಹಾತ್ ಸಬೆಖ್ಹಾರಿ ಹುಯಿರ‍್ಹೀಸ್.