15
ಬಿಜಾ಼ನ ಲ್ಹಾಯಕ್‌ ಕರಾವೊ ತುಮುನ ಕಾಹೆ
1 ವಿಶ್ವಾಸ್ಮ ಘಟ್‌ಹುಯಿರ‍್ಹಾತೆ ಅಪ್ಣೆ ಕಮ್‍ಜೋ಼ರಿವಾಳನು ಭೋಜ಼್‌ನ ಖ್ಹಮಾಳಿರ‍್ಹವಾಳ ಹುಯಿರ‍್ಹಿನ್ ಇನಾಮ ಅಪ್ಣು ಅಪ್ಣೆಸ್ ಕಮ್‍ಠೋಕಿಲ್ಯವಾಳ ನಾಹುಯಿರ‍್ಹೇವ್ಣು.
2 ಅಪ್ಣಾಮ ಹರೇಕ್‍ಜ಼ಣು ಇನ ಭೀಡೆವಾಳನು ಭಕ್ತಿನ ಭಡಾವಾನಖ್ಹಾಜೆ, ಆಖ್ಹ್‌ಕರಿನ್ ಅಪ್ಣ ಭೈಯೇ ಭೇನೇನ ಅಛ್ಛಾ಼ನಖ್ಹಾಜೆ ಕಮ್‍ಠೋಕವಾಳ ಹುಯಿರ‍್ಹೇಣು.
3 ಶನಕತೊ ಪವಿತ್ರ ದಪ್ತರ್‌ಮ ಬೋಲಾತೆ ತಿಮ್ ತುನ ಚಿಂಗಾವವಾಳನಿ ಚಿಂಘಾವ್ಣಿ ಮಾರಪರ್ ಆಯು ಕರಿ ಕ್ರಿಸ್ತ ಜಿನುಬಿ ಇನು ಯೊ ಖ್ಹರೈಲಿದೊಕೊಯ್ನಿ.
4 ಪವಿತ್ರದಪ್ತರ್‌ಮ ಅಗಾಡಿಸ್ ಲೀಖೈರ‍್ಹೂತೆ ಅಪ್ಣುನ ಬೋಧನೆ ಕರಾನಖ್ಹಾಜೇಸ್ ಲೀಖೈರ‍್ಹೂಥು. ಅಪ್ಣೆ ಫಡೀನ್ ಘಟ್‌ದಿಲ್‌ಥೀಬಿ ಭಾಲಿಲೀನ್ ಭರೋಖ್ಹಾಥಿ ರ‍್ಹವಾಳ ಹುಯಿರ‍್ಹೇವ್ಣುಕರಿ ದಪ್ತರ್‌ಮ ಲೀಖಾಯು
5 ಖ್ಹಮಾಳಾನು ಅಜು಼ ಭಾಲಿ ದೆವಾಳೊ ದೇವ್, ತುಮೆ ಕ್ರಿಸ್ತಯೇಸುನ ಪೀಛೆಜಾ಼ವಾನೊ ಎಕ್ಕಸ್ ದಿಲ್‌ದ್ಯವಾದೆ.
6 ಅಮ್ ತುಮೆ ಎಕ್ಕಸ್ ದಿಲ್‌ ಅಜು಼ ಎಕ್ಕಸ್ ಗಳೇಥಿ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸುಕ್ರಿಸ್ತನೊ ಬಾ ಹುಯಿರೋತೆ ದೇವ್ನ ಖ್ಹರಾವ್‌ಶು.
ಯೆಹೂದ್ಯರ್ ಕಾಹೆತೆ ಇವ್ಣಖ್ಹಾಜೆ ಸುವಾರ್ತೆ
7 ದೇವ್ನ ಮಹಿಮೆ ಹುವಾನಖ್ಹಾಜೆ, ಕ್ರಿಸ್ತ ತುಮೂನ ಮಳೈಲಿದೊತೆ ತಿಮ್ಮಸ್ ತುಮೇಬಿ ಏಕ್‌ಥಿ ಏಕ್‌ ಮಳೈಲೆವೊ.
8 ಶನಕತೊ ಕ್ರಿಸ್ತಾನು ಸೇವೆನು ಜಿವ್ಣು ಯೆಹೂದ್ಯರ್‌ನ ಸಾಕ್ಷಿ ಹುಯಿರ‍್ಹುಸ್‌ಕರಿ ಮೇ ಬೋಲುಸ್, ಕತೋಬಿ ದೇವ್ನೆ ಗುರುಗುರಬ್‍ಲ್ಯನ ಕರ‍್ಯೊತೆ ವಾಗ್ದಾನ್‍ಖ್ಹಾರು ಖ್ಹಾಚ಼ನ ಒತಾಳನಖ್ಹಾಜೆ ಖ್ಹತ್ನಕರಿ ಪದತ್ತಿನ ಖ್ಹಾಜೇಥಿಬಿ ಕ್ರಿಸ್ತ ಯೆಹೂದ್ಯರ್‌ನೊ ಚಾ಼ಕ್ರಿವಾಳೊ ಬಣ್ಯೊ.
9 ದೇವ್ ಇವ್ಣುನ ವತಾಳನು ಗೋರ್‌ನಖ್ಹಾಜೆ ಯೆಹೂದ್ಯರ್‌ಕಾಹೆತೆ ಇವ್ಣೆ ದೇವ್ನ ಮಹಿಮೆ ಕರಾದೆಕರಿ ಕ್ರಿಸ್ತಾನೆ ಅಮ್‌ಕರ‍್ಯೊ ಕರಿ ಮೆ ಬೋಲುಕರುಸ್. ಆ ಧರ್ಮಶಾಸ್ತ್ರಮ ಅಮ್ ಬೋಲಾಸ್, “ಇನಖ್ಹಾಜೆ ಯೆಹೂದ್ಯರ್ ಕಾಹೆತೆ ಇವ್ಣ ಬೀಚ್ಮ ಮೇ ತುನ ಸ್ತುತಿಕರುಸ್; ಮೇ ತಾರ ನಾಮ್ನ ಸ್ತುತಿನು ಗೀದ್‌ ಬೋಲುಸ್.” ಕರಿ ಬೋಲೈರ‍್ಹುಸ್.
10 ಬಿಜೇಕ್‍ಹಲ್ಲ ಅಮ್‍ಬೋಲಾಸ್, “ಯೆಹೂದ್ಯರ್‌ಕಾಹೆತೆ ಅದ್ಮಿವೊ ದೇವ್ನ ಅದ್ಮಿನ ಜೋ಼ಡ್ಮ ಖುಷಿಥಿ ಏಕ್‌ ಹುವೊ,
11 ಅಜು಼ ಪಾಛು಼ ಯೆಹೂದ್ಯರ್‌ಕಾಹೆತೆ ಅಖ್ಖಾಸ್ ಅದ್ಮಿವೊ ಪ್ರಭುನ ಸ್ತುತಿಕರೊ, ತಮಾಮಸ್ ಅದ್ಮಿಖ್ಹಾರು ಇನ ಧನ್ಯವಾದ್‌ಕರೊ” ಕರೀಬಿ ಲೀಖೈರ‍್ಹುಸ್.
12 ಪಾಛೊ಼ ಯೆಶಾಯ ಶಾತ್ ಬೋಲಸ್‍ಕತೊ, “ಇಷಯನ ಪಿಳ್ಗಿವಾಳೊ ಏಕ್‍ಜ಼ಣೊ ದೆಖೈಲೇಸ್. ಯೊ ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರಾನ ಚ಼ಲಾವನ ಆವ್‌ಶೆ. ಅಜು಼ ಯೊ ಅದ್ಮಿಖ್ಹಾರು ಇನಖ್ಹಾಜೆ ಭರೋಖ್ಹೊ ಕರ್ಶೆ.
13 ಭರೋಖ್ಹಾನ ದ್ಯವಾಳೊ ದೇವ್ ಪವಿತ್ರಾತ್ಮನಿ ಶಕಥ್ಥಿ ಘಣು ಭರೋಖ್ಹಾಥಿ ನಂಬಾವಾಳನ ಖ್ಹುಶಿ ಅಜು಼ ಸಮಾಧಾನ್‌ಥಿ ಭರಾದೆ, ಅನಖ್ಹಾಜೇಥಿ ಶಕಥ್ಥಿ ಆಖ್ಹ್‌ಮ ಭಡ್ತಾ ಜಾ಼ವ್ಣುತೆ ತಿಮ್ ತುಮೂನ ವಿಶ್ವಾಸ್‍ಥಿ ಮಳಾತೆ ಹರೇಕ್ ಖುಷಿ ಸಮಾಧಾನ್ ದ್ಯವಾದೆ.
ಪೌಲ ಶನುಸ್ ಡರ್‌ಕೊಂತೆ ಲಿಖಾನ ಕಾರಣ್
14 ಮಾರ ಭೇನ್ ಭೈಯೇವೊ, ತುಮೆ ಅಛ್ಛಿ ಗುಣಥೀಬಿ ಹರೇಕ್ ಅಕ್ಕಲ್‍ಥೀಬಿ ಭರೈರ‍್ಹವಾಳ ಹುಯಿರ‍್ಹಿನ್, ಏಕ್‌ಥಿಏಕ್ ಬುದ್ಧಿ ಬೋಲಾನ ಶಕತ್‌ವಾಳ ಹುಯಿರ‍್ಹಾಸ್ ಕರೀಬಿ ತುಮಾರಿ ಬಾರೇಮ ಮನ ಭರೋಖ್ಹೊ ಛಾ಼.
15 ಕತೋಬಿ ಮೇ ತುಮೂನ ಥೋಡಿ ವಾತೆಖ್ಹಾರಿ ಯಾದ್ ಕರಾವನಖ್ಹಾಜೆ ಘಣಿ ವಿಶ್ವಾಸ್‍ಥಿ ಅಮ್ ಲೀಖಿರಾಖ್ಯೊಸ್.
16 ಅಮ್ಮಸ್ ಯೆಹೂದ್ಯರ್‌ಕಾಹೆತೆ ಅದ್ಮಿವೊನಖ್ಹಾಜೆ ಯೇಸುಕ್ರಿಸ್ತನಿ ಸೇವಕ್‌ಹುವಾನಖ್ಹಾಜೆ ಮನ ದೇವ್ನಿ ಆಶೀರ್ವಾದ್‌ ಹುಯು. ಮೇ ದೇವ್ನಿ ಸುವಾರ್ತೆನಿ ಸೇವೆನ ಏಕ್‌ ಯಾಜಕ್‍ನಿತರ ಚ಼ಲೈನ್ ಪವಿತ್ರಾತ್ಮಥಿ ದೇವ್ನ ಸಮರ್ಪಣ್‌ಕರಾನ ಕೋಶಿಷ್ ಕರುಕರೂಸ್.
17 ಇನಖ್ಹಾಜೆ ಕ್ರಿಸ್ತಯೇಸುಮ, ದೇವ್ನ ಕಾಮ್ನಿ ಬಾರೇಮ ಮೇ ಖ್ಹರೈಲಿಯೇಜಾ಼ಯ್.
18 ಕ್ರಿಸ್ತಾನೆ ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ನ ವಿಧೇಯ ಹುವಾನಖ್ಹಾಜೆ ಆಖ್ಹಾರಾನಿ ಬಾರೇಮ ಮೇಖಲಿ ಭಾಲ್‌ಥಿ ಬೋಲೆಜಾ಼ಯ್ ಅತ್ರೇಸ್ ಕಾಹೆತೆ ವಾತ್‍ಮಾಬಿ ಕಾಮ್‍ಥೀಬಿ,
19 ಅಜು಼ ಖ್ಹಣೇದ್ನ ಕಾಮ್‍ಥೀಬಿ, ಅದ್ಭುತ್‌ಕಾಮ್‌ನಿ ತಾಖತ್ತಿ ಅಜು಼ ದೇವ್ನುಆತ್ಮನ ಕಾಮ್‍ಥೀಬಿ ಕರಿರಾಖ್ಯೊಸ್. ಇನಖ್ಹಾಜೆ ಯೆರೂಸಲೇಮ್‍ಥೊ ಧರೀನ್ ಇಲ್ಲುರಿಕ ತಬರ್‌ಖಾಲಗು ಜಾ಼ವಾನಿ ವಖ್ಹ್‌ತೆ ಮೇ ಕ್ರಿಸ್ತನಿ ಸುವಾರ್ತೆನ ಅಖ್ಖಿ ಪೂರಫೈಲಾಯೊ.
20 ಮಾರಿ ಆಖ್ಹ್ ಶಾತ್ಕತೊ, ಕಿಜ್ಜಾ಼ ಕ್ರಿಸ್ತನು ನಾಮ್ನ ಖ್ಹಮ್‍ಜಾ಼ಡಿ ಕೊರಾಖ್ಯುನಿತೆ ಯೊ ಝ಼ಗೋಪರ್ ಸುವಾರ್ತೆನ ಬೋಲಾನು ಮಾರಿ ದಿಲ್ನಿ ಆಖ್ಹ್. ಇನಖ್ಹಾಜೆ ಬಿಜೇಕ್‍ಜ಼ಣು ನಾಖಿರಾಖ್ಯುತೆ ಹದಿಪಾಯನ ಉಪ್ಪರ್ ಮೇ ನಾಭಾಂದ್‍ಣು.
21 “ಕೋಣ್ ಇನಿ ಬಾರೇಮ ಮಾಲುಮ್ ಕರ‍್ಯುಕೊಯ್ನಿಕಿ ಇವ್ಣೆಸ್ ಇನ ದೇಕ್‌ಶೆ. ಕೋಣ್ ಇನಿ ಬಾರೇಮ ಖ್ಹಮ್‌ಜಿರಾಖ್ಯಕೊಯ್ನಿಕಿ ಇವ್ಣೆ ಪರ್‌ಖಿಲಿಶೆ. ಕರಿ ಪವಿತ್ರ ದಪ್ತರ್‌ಮ ಲೀಖೈರುತೆ ತಿಮ್ ಮಾರ ಕಾಮ್ನ ಚ಼ಲೈರಾಖ್ಯೊಸ್.
ರೋಮ್‍ನ ಭೇಟಿಕರಾನ ಜಾ಼ವಾನಿ ಪೌಲಾನಿ ಖ್ಹೂಜ಼್
22 ಇನಖ್ಹಾಜೇಸ್, ತುಮಾರಕನ ಆವ್ಣುನಾತೆ ತಿಮ್ ಮನ ಕೈಏಕ್ ವಖ್ಹ್‌ತೆ ತಕಲೀಬ್ ಹುಯು.
23 ಕತೋಬಿ ಇನಾಪರ್ ಆ ತಬರ್‌ಖಾವ್‍ಮ ಮಾರು ಸೇವೆಕರಿ ಹುಯಿಗು. ಕೈಏಕ್ ವರಖ್ಹ್‌ಥು ತುಮೂನ ಮಳ್‌ಣುಕರಿ ಬೋಲಾನಿ ಆಖ್ಹ್‌ಥೀಬಿ
24 ಮೇ ಸ್ಪೇನ್ ಜಾ಼ವಾನಿ ವಖ್ಹ್‌ತೆ ತುಮೂನ ಮಳಾನಖ್ಹಾಜೆ ಟಿವೈರ‍್ಹೋಸ್. ದರ್ರಾಖ್ಹ ದನ್ ತುಮಾರಿ ಲಾಡ್‍ಮೋಹಬತ್ನಿ ಖುಷಿಮ ಮೇ ರ‍್ಹೀನ್, ಇನಕೇಡೆಥು ಯೋ ದೇಖ್ಹ್‌ನ ಜಾ಼ವಾನ ಮನ ತುಮಾರಿ ಮದತ್ ಮಳ್‌ಶೆಕರಿ ವಿಶ್ವಾಸ್‍ಕರುಸ್.
25 ಕತೋಬಿ ಹಮ್ಕೆ ಮೇ ದೇವ್ನ ಅದ್ಮಿವೊನ ಚಾ಼ಕ್ರಿಕರಾನಖ್ಹಾಜೆ ಯೆರೂಸಲೇಮ್ನ ವಳೆಜ಼ವುಸ್.
26 ಶನಕತೊ ಮೆಕೆದೋನ್ಯ ಅಜು಼ ಅಖಾಯ ತಬರ್‌ಖಾವಾಳು ವಿಶ್ವಾಸಿ ಯೆರೂಸಲೇಮ್ಮ ದೇವ್ನ ಅದ್ಮಿವೋನ ಮಳಿನ್ ರ‍್ಹವಾಳ ಗರೀಬ್ ವಿಶ್ವಾಸಿನ ಮದತ್ ಕರಾನಖ್ಹಾಜೆ ಖ್ಹಯಾಲ್ ಕರಿರಾಖ್ಯಸ್.
27 ಇವ್ಣೆ ಯೋ ಕರಾನ ಆಖ್ಹ್ ಕರಿರಾಖ್ಯುಸ್ ಏತ್ರೇಸ್ ಕಾಹೆತೆ, ಯೆಹೂದ್ಯರ್‌ಕಾಹೆತೆ ಅದ್ಮಿ ಯೆಹೂದ್ಯರ್‌ನ ಆತ್ಮೀಕ ಆಶೀರ್ವಾದ್‌ಮ ಭಾಗ್‌ ಲೀರಾಖ್ಯುತೆ ಇನಖ್ಹಾಜೆ ಇವ್ಣೆ ಜಗತ್ನ ಸಂಬಂಧನಿ ಕಾಮ್ಮ ಇವ್ಣುನ ಸೇವೆಕರಾನಿ ಫರಜ಼್‌ಮ ಛಾ಼.
28 ಇನಖ್ಹಾಜೆ ಆ ಕಾಮ್ನ ಖ್ಹತಮ್‍ಕರೀನ್ ಆ ಪ್ಯಾರ‍್ನಫಲ್ನ ಹಿಜ್ಜಾ಼ವಾಳನ ದೀನ್ ಭರ್‌ಪೂರ್‌ ಹುವಾನ ಬಾದ್ಮ ತುಮುನ ಮಳಿನ್ ಯೋಸ್ ಮಾರ್ಗೆ ಸ್ಪೇನ್ ದೇಖ್ಹ್‌ನ ಜೈ಼ಶ್.
29 ಆ ನಾಹುಯಿನ್ ತುಮಾರಕನ ಆವಾನಿ ವಖ್ಹ್‌ತೆ ಕ್ರಿಸ್ತಥಿ ಹುವಾನು ಘಣಿ ಆಶೀರ್ವಾದ್‌ನ ಮೇ ತುಮಾರಕನ ಲಾಯಿಶ್, ಕರಿ ಮಾಲುಮ್ ಛಾ಼.
30 ಭೇನ್ ಭೈಯೇವೊ, ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತಬಿ, ಪವಿತ್ರಾತ್ಮನಿ ಪ್ಯಾರ್‌ಥೀಬಿ, ಮೇ ಗಿಂಗೈಲ್ಯವಾನು ಶಾತ್ಕತೊ, ಮಾರಖ್ಹಾಜೆ ದೇವ್‌ಮ ಪ್ರಾರ್ಥನೆಥಿ ಮಾರಿ ಜೋ಼ಡ್ಮರ‍್ಹವೊ.
31 ಮೇ ಯೂದಾಯಮ ಅವಿಶ್ವಾಸಿನ ಹಾತ್ಮಥು ಛೋ಼ಡಾವ್ಣುಕರೀಬಿ ಮಾರಿ ಸೇವೆ ಯೆರೂಸಲೇಮ್ಮ ಛಾ಼ತೆ ದೇವ್ನ ಅದ್ಮಿಯೇವ್‍ನ ಸ್ವೀಕಾರ್ ಹೋಣುಕರಿ ಪ್ರಾರ್ಥನೆ ಕರೊ.
32 ತದೆ ಯೋ ದೇವ್ನಿ ಮರ್ಜಿಥಿ ತುಮಾರಕನ ಖ್ಹುಶಿಥಿ ಆಯಿನ್ ತುಮಾರಿ ಜೋ಼ಡ್ಮ ರ‍್ಹೀನ್ ಅರಾಮ್ ಕರಾನು ಹುವಾದೆ.
33 ಸಮಾಧಾನ್ನೊ ದೇವ್ ತುಮಾರ ಖ್ಹಾರಾನಿ ಜೋ಼ಡ್ಮ ರ‍್ಹವಾದೆ. ಆಮೆನ್.