ಪೌಲನು ಫಿಲಿಪ್ಪಿಯವರಿಗೆ ಬರೆದ ಪತ್ರಿಕೆ
ಪೌಲನೆ ಫಿಲಿಪ್ಪಿವಾಳಾನ ಲೀಖ್ಯೋತೆ ಚಿಟ್ಟಿ
ಮಾಲುಮ್ ಕರಾನು
ಪೌಲನೆ ಕ್ರಿಸ್ತನಿ ಪೈದಾಖ್ಹ್‌ನ ವಾರ್ ಖ್ಹುಮಾರ್ 61 ನು ವರಖ್ಹ್‌ಮ ಆ ಚಿಟ್ಟಿ ಫಿಲಿಪ್ ಖ್ಹಯೇರ‍್ನ ವಿಶ್ವಾಸಿನ ಲೀಖ್ಯೋತೆ, ಆ ವೇಳ್ಮ ಯೊ ಘಣೇಥಿ ರೋಮ್‍ನ ಖ್ಹಾರ್ಕೊಟ್‌ಮ ಥೊ. 1:13 ಆ ಚಿಟ್ಟಿ ಫಿಲಿಪ್ಪಿ ಖ್ಹಯೇರ್‌ಮ ಛಾ಼ತೆ ಸಬೇನ ಲಿಖೈರ‍್ಹುಸ್. ಅಪೊಸ್ತಲನು ಕಾಮ್ನ ಪುಸ್ತಕ್‌ಮ ಫಿಲಿಪ್ಪಿನಿ ಬಾರೇಮ ಅಪ್ಣೆ ಥೋಡಿ ವಾತೇವ್ನ ಮಾಲುಮ್ ಕರೆಜಾ಼ಯ್. ಫಿಲಿಪ್ಪಿ ಖ್ಹಯೇರ್ ಮೆಸೆಡೋನಿಯ ತಬರ್‌ಖಾನು ರಾಜಧಾನಿ ಹುಯಿರ‍್ಹುಥು. ಆ ಸಭೆ ಮೆಸೆಡೋನಿಯಮ ಭಂದೈರ‍್ಹುತೆ ಪಹಿಲಿ ಸಭೆ ಹುಯಿರ‍್ಹಿಥಿ. ಪೌಲಬಿ ಸೀಲಾನೆ ಆ ಸಬೆನ ಶುರುಕರ‍್ಯ ಅಜು಼ ಹಿಜ಼್ಜಾಥಾತೆ ತದೆ ಏಕ್‌ ದನ್ ಖ್ಹಾರ್ಕೊಟ್‌ಮ ಘಲೈರ‍್ಹಾಥ ಅಪೊ 16.
ಆ ಚಿಟ್ಟಿ ಲಿಖಾನ ಪೌಲನಿ ಕೈಯೇಕ್ ಉದ್ದೇಶ್ ರ‍್ಹೇವ್ಣುಕರಿ ದೆಖಾವಸ್ ಇನೆ ಆ ಮೋಕಾನ ಇವ್ಣೆ ಖ್ಹಾರ್ಕೊಟ್‌ಮ ಛಿಯ್ಯೆಕರಿ ಖ್ಹಮ್‌ಜಿನ್‌ ಇವ್ಣೆ ಮೋಕ್‌ಲ್ಯುತೆ ಇನಾಮ್ನಖ್ಹಾಜೆ ಸಬೆನ ಧನ್ಯವಾದ್ ಬೋಲಾನ ಉಪಯೋಗ್ ಕರಿಲೇಸ್ 4:10-19 ಇನೆ ಖ್ಹಾರ್ಕೊಟ್‌ಮ ಥೂತೆ ಇವ್ಣಿ ಹಾಲತ್ನಿ ಬಾರೇಮ ಬೋಲಸ್ ಅಜು಼ ತಿಮೊಥೆಬಿನ್ ಎಪಪ್ರೊದಿಕನ ಸಬೆನ ಮಾಲುಮ್ ಕರೈವತಾಳಸ್‍ 2:19-30 ಅಮ್ ಇವ್ಣೆ ಇವ್ಣುನ ಸ್ವಾಗತ್ ಕರಾನಿಮತ್‌ ಅಜು಼ ಇವ್ಣಿ ಗಲ್‌ಢಾನ ಮರ್ಯಾದಿ ಆವಾನಿಘೋಣಿ ಬೋಲಸ್.
ಕಾಡಿದೇಖೊ
1 ಪೌಲನೆ ಫಿಲಿಪ್ಪಿನಿ ಸಬೇನ ಖ್ಹಲಾಮ್ ಕರ್ತೊಹುಯಿನ್ ಶುರುವಾತ್ ಕರಸ್. 1:1-2
2 ಇನಕೇಡೆಥು ಯೊ ಇನಿ ರ‍್ಹಾನಿ ಬಾರೇಮ ಥೋಡು ಸಂದೇಶ್ನ ವಾಟಪಾಡಿಲೆಸ್ ಅಜು಼ ಇನಥೂತೆ ಥೋಡಿ ತರಖ್ಹ್‌ಥಿ ವಾಟಪಾಡಿಲೆಸ್. 1:3—2:3
3 ಇನಕೇಡೆಥು ಯೊ ಕ್ರಿಸ್ತನು ವಿಶ್ವಾಸಿನ ಜಿವ್ಣಾನಖ್ಹಾಜೆ ಘಣೇಥಿ ಘಣು ಕಾಮ್‌ಕರ್ತೊಹುಯಿನ್‌ ವಾಟ್‌ವತಾಳ್ತೊ ಗಯೊ 3:1—4:9
4 ಪೌಲನೆ ಫಿಲಿಪ್ಪಿ ಸಬೇನ ಇವ್ಣೆ ಮೋಕ್‌ಲ್ಯುತೆ ಇನಾಮ್ನಖ್ಹಾಜೆ ಧನ್ಯವಾದ್ ಬೋಲಿನ್ ಇನಿ ಖ್ಹಲಾಮ್ನ ಬೋಲ್ತೊಹುಯಿನ್ ಚಿಟ್ಟಿನ ಖತಮ್ ಕರಸ್ 4:10-23
1
1 ಕ್ರಿಸ್ತ ಯೇಸುನ ದಾಸ ಹುಯಿರಾತೆ ಪೌಲಬಿ ತಿಮೊಥೆ, ಫಿಲಿಪ್ಪಿ ಖ್ಹಯೇರ‍್ನ ವಿಶ್ವಾಸಿಖ್ಹಾರಾನ ಅಜು಼ ಇವ್ಣ ಜೋ಼ಡೆ ರ‍್ಹವಾಳನ ಸಬೇನ ಮೋಟಾನ ಅಜು಼ ಮದತ್ ಕರವಾಳನ ಲೀಖಾನು ಶಾತ್‌ಕತೊ,
2 ಬಾ ದೇವ್‌ಥಿಬಿ ಪ್ರಭು ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
ಇನ ಪಢವಾಳನಖ್ಹಾಜೆ ಪೌಲನಿ ಪ್ರಾರ್ಥನೆ
3 ತುಮುನ ಯಾದ್ ಕರಾನಿ ಖ್ಹಾರಿ ವಖ್ಹತ್‌ಮ ಮೆ ದೇವ್ನ ಧನ್ಯವಾದ್ ಕರುಸ್,
4 ಮೇ ತುಮಾರಖ್ಹಾಜೆ ಪ್ರಾರ್ಥನೆ ಕರಾನಿ ಅಖ್ಖೀಸ್ ವಖ್ಹತ್‍ಮಾಬಿ ಶಂತೋಖ್ಹ್‌ಥೀಸ್ ಪ್ರಾರ್ಥನೆ ಕರಾವಾಳೊ ಹುಯಿರ‍್ಹೋಸ್.
5 ಶನಕತೊ ತುಮೆ ಪಹಿಲೆಥ ಹಮ್ಕೆಲಗುಬಿ ಸುವಾರ್ತೆನು ಬೋಧನೆಮ ಭಾಗ್‌ರ‍್ಹವಾಳ ಹುಯಿರ‍್ಹಾಸ್.
6 ಆ ಅಛ಼್ಛುಕಾಮ್ನ ತುಮಾರಮ ಶುರುಕರ‍್ಯೊತೆ ದೇವ್ನೆ ಇನ ಚ಼ಲಾವ್ತೊಹುಯಿನ್ ಯೇಸು ಕ್ರಿಸ್ತ ಆವಾನಮಹಿ ಪೂರ ಕರ್ಶೆಕರಿ ಮನ ಭರೋಖ್ಹೊ ಛಾ಼.
7 ತುಮಾರಿ ಬಾರೇಮ ಮನ ಅಮ್ ಬೋಲಾವಸ್ತೆ ಖ್ಹಾಚು಼ಸ್. ಶನಕತೊ ಮೆ ಬಂದಿ ಹುಯಿರ‍್ಹವಾನಿ ವಖ್ಹ್‌ತೆಬಿ, ಸುವಾರ್ತೆನಿ ಬಾರೇನು ಆಡ್‌ಫೇಡ್‌ಮಾಬಿ ತುಮೆಖ್ಹಾರು ಮಾರಜೋ಼ಡೆ ದೇವ್ನಿ ವಾರ್‌ಖ್ಹಾಮ ಭಾಗ್‌ವಾಳ ಹುಯಿರ‍್ಹಾಸ್ ಕರಿ ತುಮುನ ಮಾರ ದಿಲ್ಮ ರಾಖಿಮ್ಹೇಲ್ಯೋಸ್.
8 ಕ್ರಿಸ್ತ ಯೇಸುನ ಛಾ಼ತೆ ಗೋರ್‌ಥೀಸ್ ತುಮಾರ ಹರೇಕ್ನ ಖ್ಹಾಜೆ ಕೆತ್ರೇಕ್ಕಿ ತರ್ಖ್ಹುಕರುಸ್. ಅನ ದೇವಸ್ ಸಾಕ್ಷಿ.
9 ಅಜು಼ ತುಮಾರಿ ಪ್ಯಾರ್ ಅಜೂ಼ಬಿ ಜಾ಼ಖ್ಹತ್ ಭಡಿನ್ ಪೂರ ಅಕ್ಕಲ್‍ಥೀಬಿ ಖ್ಹಯಾಲ್‌ಥಿ ಮಳಿರ‍್ಹವಾಳ ಹುಯಿರ‍್ಹೇವ್ಣುಕರಿ ಮೆ ತುಮಾರಖ್ಹಾಜೆ ಪ್ರಾರ್ಥನೆ ಕರುಸ್.
10 ಅಮ್ ಮಹಾನ್ ಕಾಮ್‌ಖ್ಹಾರು ಖಿವುಕರಿ ಬೋಲಾನು ತುಮೆ ಪರ್ಖಾವಾಳ ಹುಯಿರ‍್ಹೇಣು ಕರೀಬಿ ಬಿಜು಼ ಕ್ರಿಸ್ತ ಆವಾನ ದನ್ಮ ತುಮೆ ಪರಿಶುದ್‌ಥೀಬಿ ದೋಷ್‌ಕೊಂತೇಬಿ ರ‍್ಹಿಶು.
11 ಯೇಸು ಕ್ರಿಸ್ತಮ ಛಾ಼ತೆ ಅಛ್ಛು಼ಗುಣ್‌ನ ಭರೈರ‍್ಹವಾಳ ಹುಯಿನ್ ರ‍್ಹೇವ್ಣುಕರಿ ದೇವ್ನ ಮಹಿಮೆ ಅಜು಼ ದನ್ಯವಾದ್‌ನ ದೇವ್ಣುಕರಿ ಬಿಂತಿಕರಿಲೇವುಸ್.
ಜಿವಾನಖ್ಹಾಜೆ ಕ್ರಿಸ್ತ
12 ಭೈಯೇ ಭೇನೆವೊ, ಮನ ಹುಯೂತೆ ಅಖ್ಖೂಬಿ ಸುವಾರ್ತೆನ ಭಡಾವನ ಮದತ್ ಹುಯಿಕರಿ ತುಮೆ ಮಾಲುಮ್ ಕರಿಲೇವ್ಣುಕರಿ ಮೆ ಹರ್‌ಖ್ಹುಸ್.
13 ಕಿಮ್‌ಕತೊ ಮೆ ಜೇಲ್‌ಮ ರ‍್ಹವಾನು ಕ್ರಿಸ್ತನ ಖ್ಹಾಜೆಸ್ ಕರಿ ಮಹೇಲ್‌ನ ಕಾವ್ಲಿ ಕರಾವಾಳ ಖ್ಹಾರನಾಬಿ ಬಿಜು಼ಖ್ಹಾರನಾಬಿ ಮಾಲುಮ್‌ಪಡ್ಯು.
14 ಆ ನಾಹುಯಿನ್ ಭೈಯೇ ಭೇನೇಮ ಜಾ಼ಖ್ಹತ್ ಅದ್ಮಿ ಮಾರಿ ಭಂದಣ್‌ಥೀಸ್ ಪ್ರಭುಮ ಭರೋಖ್ಹಾಥಿ ದೇವ್ನಿ ವಚನ್ನ ಡರ್‌ಕೊಂತೆ ಬೋಲಾನ ಅಜೂ಼ಬಿ ಘಣು ಭಾಲಿ ಲೀರಾಖ್ಯುಸ್.
15 ಥೋಡುಜ಼ಣು ಪೇಟ್ನೊ ಬಳಾಪೊಕರಿನ್ ದಿಲ್ಮ ಕಚ಼್ಚರ್ ರಾಖವಾಳ ಹುಯಿರ‍್ಹೇಸ್. ಕತೋಬಿ ಅಲಕ್ ಥೋಡುಜ಼ಣು ಅಛ್ಛಿ ಉದ್ದೇಶ್‌ಥಿ ಕ್ರಿಸ್ತನಿ ಸುವಾರ್ತೆನ ಬೋಲಿವತಾಳಸ್.
16 ಅವ್ಣೇತೊ ಮೆ ಸುವಾರ್ತೆನಿ ಬಾರೇಮ ಜ಼ವಾಬ್ ಬೋಲಾನಖ್ಹಾಜೆ ಹಜ್ಜಾ಼ ಮೆ ಘಲೈರ‍್ಹೋಸ್ ಕರಿ ಮಾಲುಮ್ ಕರಿನ್ ಪ್ಯಾರ್‌ಥಿ ಪ್ರಚಾರ್ ಕರುಕರಸ್.
17 ಥೋಡುಜ಼ಣು ಇಮಾಂಧಾರಿನಖ್ಹಾಜೆ ಕಾಹೆ, ಶೊಂತ್‌ ಆಖ್ಹ್‌ನ ಖ್ಹಾಜೆಸ್ ಕ್ರಿಸ್ತನ ಪ್ರಚಾರ್ ಕರಾಸ್. ಕತೋಬಿ ಥೋಡುಜ಼ಣು ಮೆ ಬೇಡಿ ಘಲೈನ್ ಕೋಂಡೈರ‍್ಹವಾನಿ ವಖ್ಹ್‌ತೆ ಮನ ಖ್ಹತಾಪ್ಣಿ ಜಾ಼ಖ್ಹತ್ ಕರ್ನುಕರಿ ಸೋಚ್ಯು.
18 ಇವ್ಣಿ ಉದ್ದೇಶ್ ಶಾತಸ್ ಹುಯಿರ‍್ಹವಾದೆ, ಠಗಾವಾಥಿ ರ‍್ಹವೊ ನತರ್ ಖ್ಹಾಚೇಥಿ ರ‍್ಹವೊ ಯೋ ಮನ ಮುಖ್ಯಕಾಹೆ. ಕ್ರಿಸ್ತಯೇಸುನ ಬಾರೇಮ ಬೋಲಿವತಾಳು ಕರುಕರಾತೆಸ್ ಮನ ಖುಷಿ. ಅಜು಼ ಅಗ್ಗಳ್‌ಬಿ ಖುಷಿ ಕರುಸ್.
19 ಶನಕತೊ ತುಮಾರಿ ಬಿಂತಿಥಿಬಿ ಅಜು಼ ಯೇಸು ಕ್ರಿಸ್ತನು ಆತ್ಮನಿ ಮದತ್‌ಥೀಬಿ ಆ ಹೈರುತೆ ಮಾರು ಛುಟ್ಕಾರ್‌ನ ಶುಲ್ಬ ಉಷೆಕರಿ ಮಾಲುಮ್ ಛಾ಼.
20 ಕಿಮ್‌ಕತೊ ಮೆ ಖಿವಿ ವಿಚಾರ್‌ಮಾಬಿ ಖ್ಹರ್ಮಾಯೊಕೊಂತೆ ಕೆದೇಬಿ ರ‍್ಹವಾನಿತರಸ್ ಹಮ್ಕೇಬಿ ಜಿನು ಘಣು ಭಾಲಿಥಿ ಛೂ಼ತೆ ಇನಖ್ಹಾಜೆ ಜಿವ್ತೊ ರ‍್ಹಿಯೊತೋಬಿ ಬರೋಬರಸ್ ನತರ್ ಮರ‍್ಯೊತೋಬಿ ಬರೋಬರಸ್ ಮಾರಿ ಶರೀರ್‌ಥಿ ಕ್ರಿಸ್ತನ ಮಹಿಮೆ ಹುವಾದೆಕರಿ ಮಾರಿ ಮೋಟಿ ಹರಖ್ಹ್ ಹುಯಿರ‍್ಹೀಸ್, ಇಮ್ಮಸ್ ಉಷೆಕರಿ ಭರೋಖ್ಹೊ ಛಾ಼.
21 ಮನತೊ ಬಚಾ಼ನುಕತೊ ಕ್ರಿಸ್ತಸ್, ಮರಾನು ನಫ್ಫೋಸ್.
22 ಅಮ್ ಶರೀರ್‌ಮ ಬಚಾ಼ನುಸ್ ಫಲ್ ದ್ಯವಾನು ರ‍್ಹಯೂತೊ, ಅನಾಮಾಥು ಖಿವು ಚೂ಼ಣಿಲೇವ್ಣುಕರಿ ಮನ ಮಾಲುಮ್ ಕೊಪಡುಕರಾನಿ.
23 ಆ ಭೇನ ಇಚ಼್‌ಮ ಖ್ಹಪ್‌ಡಿರ‍್ಹೋಸ್, ಹಜ್ಜಾ಼ಥು ನಿಕ್ಳಿನ್ ಕ್ರಿಸ್ತ ಯೇಸುನಿ ಜೋ಼ಡ್ಮ ರ‍್ಹೇವ್ಣುಕರಿ ಬೋಲಾನುಸ್ ಮಾರಿ ಆಖ್ಹ್ ಹುಯಿರ‍್ಹೀಸ್, ಯೊ ಘಣು ಅಛ್ಛು಼ಸ್ ಹುಯಿರ‍್ಹುಸ್.
24 ಕತೋಬಿ ಮೇ ಬಿಜೂ಼ಬಿ ಶರೀರ್‌ಮ ಜಿವ್‌ಕರಾನು ತುಮಾರಖ್ಹಾಜೇಥಿ ಘಣು ಜ಼ರೂರತ್ ಛಾ಼.
25 ಇನಖ್ಹಾಜೆ ತುಮುನ ವಿಶ್ವಾಸ್ಮ ಭಡೀನ್ ಶಂತೋಖ್ಹ್‌ಥಿ ರ‍್ಹವಾನಖ್ಹಾಜೆ ಮೇ ಬಚಿರ‍್ಹೀನ್ ತುಮಾರ ಅಖ್ಖಾಸ್ನಿ ಜೋ಼ಡ್ಮರ‍್ಹೀಷ್ ಕರಿ ಘಟ್ ವಿಶ್ವಾಸ್ ಛಾ಼.
26 ಅಮ್ ಮೆ ಫಾಛೊ಼ಫರಿ ಆವಾಥಿ ತುಮೆ ಕ್ರಿಸ್ತ ಯೇಸುನ ಗಳ್‌ಜೋ಼ಡ್ಮ ಖುಷಿ ಕರಾನ ಮಾರೇಥಿ ಘಣಿ ಹುಮ್ಮಖ್ಹ್‌ ರ‍್ಹಿಶೆ.
27 ಕಿಮ್‌ಬಿ ಕ್ರಿಸ್ತನಿ ಸುವಾರ್ತೆನ ಲ್ಹಾಯೇಕ್‌ಹುಯಿನ್ ಚಾ಼ಲಿಲೆವೊ. ತದೆ ಮೆ ಐನ್ ತುಮುನ ದೇಖ್ಯೊತೋಬಿ ಚಾ಼ಲಸ್, ದೂರ್ ರ‍್ಹೀನ್ ತುಮಾರಿ ಖಬರ್‌ನ ಖ್ಹಮ್‌ಜೊ ಚಾ಼ಲಸ್, ತುಮೆ ತುಮಾರ ವಿರೋದಿನ ಖಿವಿ ವಿಚಾರ್‌ಮಾಬಿ ನಾಡರ‍್ನುತೆ ಏಕ್‌ ದಿಲ್‌ಥಿ ಘಟ್‍ಥಿ ಭೀರಿನ್ ಸುವಾರ್ತೆಮ ರಾಖ್ಯತೆ ವಿಶ್ವಾಸ್ನಖ್ಹಾಜೆ ಏಕ್‌ ಮನ್‌ಥಿ ಲಡವಾಳ ಹುಯಿರ‍್ಹಾಸ್‍ಕರಿ ಮೆ ಲ್ಹಾವ್ಸ್.
28 ತುಮೆ ತುಮಾರ ವಹೇರ‍್ಯಾಥಿ ನಕೊ ಡರೊ ಕೆದೇಬಿ ಭಾಲ್‌ಥಿ ರ‍್ಹವೊ, ಅಜು಼ ಅನ ಸಬೂತ್ ಕರೂಸ್ಕಿ ವಿರೋದಿನ ನಾಶ್‌ ಅಜು಼ ತುಮುನ ರಕ್ಷಣೆ. ಶನಕತೊ ಆ ದೇವ್‍ಥಿಸ್ ಹುಯಿರ‍್ಹುಸ್.
29 ಕ್ರಿಸ್ತನವಾಳಾನ ಹಾತ್‌ ಫೈಲೈನ್ ದ್ಯವಾಳ ಹುಯಿರೇವೊ. ಕ್ರಿಸ್ತಪರ್ ವಿಶ್ವಾಸ್‌ರಾಖಾನು ಖಲಿ ಕಾಹೆ ಇನಖ್ಹಾಜೆ ವದೇಖ್ಹ್‌ಪಡಾನುಬಿ ಅಛ್ಛು಼ ವರ ಮಳಿರ‍್ಹೂಸ್‌.
30 ಅಮ್ ತುಮೆ ಮಾರಮ ದೇಖ್ಯಾತೆ ಯೋಸ್ ಲಡ್ವಾನು ತುಮುನಾಬಿ ಛಾ಼.