ಪೇತ್ರನು ಬರೆದ ಮೊದಲನೆಯ ಪತ್ರಿಕೆ
ಪೇತ್ರನೆ ಲೀಖ್ಯೋತೆ ಪಹಿಲಿ ಚಿಟ್ಟಿ
ಮಾಲುಮ್ ಕರಾನು
ಪೇತ್ರನೆ ಲೀಖ್ಯೋತೆ ಪಹಿಲಿ ಚಿಟ್ಟಿನ ಅಪೊಸ್ತಲ ಪೇತ್ರನೆ ಲೀಖಿರಾಖ್ಯೊಸ್. ಪೇತ್ರ ಆ ಚಿಟ್ಟಿ ಶುರುಕರಾನಿ ವಖ್ಹ್‌ತೆ ಕಿನ ಲೀಖುಕರುಸ್ ಕರಿ ಬೋಲಸ್. ಯೊ ಕೊಯ್ನಿಕರಿ ವಖ್ಹ್‌ತೆ ಕ್ರಿಸ್ತ ವಿಶ್ವಾಸಿನ ಲೀಖ್ಯೊ 1:1, 1:17, 2:11.
ಇನೆ ಪಢಾವಳಾನ ಘಣಿ ವಖ್ಹತ್ ಅಮ್ ಲಿಖಸ್. ಶನಕತೊ ಇವ್ಣೆಖ್ಹಾರು ಅಲಕ್ ಅಲಕ್ ದೇಖ್ಹ್‌ಮ ಫೈಲಯ್‌ರ‍್ಹೂಥು. ಶನಕತೊ ಆ ಚಿಟ್ಟಿ ಪೌಲನೆ ಎಫೆಸವಾಳನ ಲೀಖ್ಯೋತೆ ಪರಕ್ಮಾಸ್ ಕೈಏಕ್ ವಾತೇವ್ನ ಮಾಲುಮ್ ಕರಾವಸ್. ಕೈಯೆಕ್‌ ಅದ್ಮಿ ಪೇತ್ರ ಲೀಖ್ಯೋತೆ ಪಹಿಲಿ ಚಿಟ್ಟಿ ಎಫೆಸವಾಳನ ಲೀಖ್ಯುತೆ ಚಿಟ್ಟಿನ ಪಾಛ಼ಳ್ ಕತೊ ಕ್ರಿಸ್ತನು ಪೈದಾಖ್ಹ್‌ನ ವಾರ್‌ ಖ್ಹುಮಾರ್ 65 ಮ ಲಿಖೈರ‍್ಹುಸ್ ಕರಿ ವಿಶ್ವಾಸ್ ಕರಾಸ್. ಪೇತ್ರನೆ ಆ ಚಿಟ್ಟಿನ ಇನೆ ಬಾಬಿಲೋನ್‌ನು ರೋಮ್ ಖ್ಹಯೇರ್‌ಮ ಲೀಖ್ಯೊ 5:13.
ಪೇತ್ರನೆ “ತುಮುನ ಹುಮ್ಮಖ್ಹ್‌ ದ್ಯವಾನ ಆ ಹೈರುತೆ ಖ್ಹಾಚ ದೇವ್ನಿ ಕೃಪೆ ದ್ಯವಾನ” ಕರಿ ಬೋಲಾಥಿ ಇನೆ ಲೀಖ್ಯೋತೆ ಚಿಟ್ಟಿನ ಖ್ಹೂಜ಼್‌ನ ವತಾಳಿ ರಾಖ್ಯೊಸ್‌ 5:121 ಪೇತ್ರ 2:11, 3:7, ಎಫೆಸ 5:18—6:9 ಅಜು಼ ಕೊಲೊಸ್ಸೆ 3:18—4:6 ಅನ ಬೀಚ್ಮ ಕೈಏಕ್ ಪರಕ್ ಛಾ಼. ಆ ತೀನ್ ಭಾಗ್‌ ಕುಟುಂಬ್‌ನು ಸಂಬಂದ್ ಅದಿಕಾರಿನ ಖ್ಹಾಮ್ಣೆ ಹೇಟು ಹುವಾನಿ ಬಾರೇಮ ಖ್ಹಂಜ಼್‌ಕಾರ್‌ ದೇಸ್. ಯೊ ವಿಶ್ವಾಸಿಯೇವ್ನ ವದೇಖ್ಹ್‌ಮ ಮದತ್‌ಕರಿ ಚ಼ಲಾವ್‌ತು ಹುಯಿನ್ ಜಾ಼ವ್ಣು. ಶನಕತೊ ಕಡೆಷಿನ ದನ್ ಖನ್ನೆ ಐಗುಕರಿ ಬೋಲಾಥಿ ಹುಮ್ಮಖ್ಹ್‌ ಜಿನು ದೇಸ್. 4:1
ಕಾಡಿದೇಖೊ
1 ಪೇತ್ರನೆ ಇನ ಶೊಂತ್‌ ವಿಚಾರ‍್ನ ಬೋಲಿಲೆಸ್ ಅಜು಼ ಪಢವಾಳು ಕೋಣ್‌ಕರಿ ಬೋಲಿವತಾಳಸ್. 1:1-2
2 ತದೆ ಇನೆ ಇವ್ಣೆ ಖ್ಹಾರು ಗಳ್‍ಜೋ಼ಡ್ ರಕ್ಷಣೆ ಅಜು಼ ಇವ್ಣ ಜಿವ್ಣಾನಖ್ಹಾಜೆ ಧನ್ಯವಾದ್ ಕರಸ್. 1:3—2:10
3 ಅನಪಾರ್‌ ಇನೆ ಆ ಜಗತ್‌ಮ ವಿಶ್ವಾಸಿಖ್ಹಾರು ಕಿಮ್ ಜಿವ್ಣುಕರ‍್ನು ಅಜು಼ ಕೈಏಕ್ ಸಂಬಂಧಾನಿ ಬಾರೇಮ ಕತೊ ಬಾವಣ್‍ ಬಾವ್ರಿ, ಸೇವಕ್ ಯಜಮಾನ್ನಿಘೋಣಿನು ವಿಚಾರ‍್ನ ಬಾರೇಮ ಛಾ಼ತೆ ಇಮ್‌ ಖ್ಹಣೇದ್ ಕರಾವಸ್. 2:11—4:11
4 ಇನಕೇಡೆಥು ಪೇತ್ರನೆ, ವದೇಖ್ಹ್‌ ಆಯುತೊ ಖ್ಹಮಾಳಿ ರ‍್ಹೇವ್ಣುಕರಿ ಹುಮ್ಮಖ್ಹ್‌ ದೇಸ್. 4:12—5:11
5 ತದೆ ಇನೆ ಇನಿ ಚಿಟ್ಟಿನ ಖ್ಹತಮ್ ಕರಸ್. 5:12-14
1
ಖ್ಹಲಾಮ್
1 ಯೇಸು ಕ್ರಿಸ್ತನೊ ಅಪೊಸ್ತಲ ಹುಯಿರ‍್ಹೋತೆ ಪೇತ್ರನೆ ಪೊಂತ, ಗಲಾತ್ಯ, ಕಪ್ಪದೋಕ್ಯ ಏಷ್ಯಾ ಬಿಥೂನ್ಯ ಕರಿ ತಬರ್‌ಖಾಮ ಛಿಡ್‍ಕೈಗಾತೆ ಪರೈದೇಖ್ಹ್‌ಮ ಜಿವ್‌ಕರಾತೆ ದೇವ್ನ ಅದ್ಮಿವ್‍ನ ಕತೊ,
2 ಪವಿತ್ರಾತ್ಮಥಿ ಅಭಿಷೇಕ್ ಕರೈಲಿದಹುಯಿನ್ ವಿಧೇಯ ಹುವಾನಖ್ಹಾಜೆ, ಯೇಸು ಕ್ರಿಸ್ತನ ಲ್ಹೋಯಿಥಿ ಛಿಡ್‍ಕೈನ್, ಬಾ ಹುಯಿರ‍್ಹೋತೆ ದೇವ್ನಿ ಭವಿಶ್ಯನಿ ಗ್ಯಾನ್‌ಥಿ ಚೂ಼ಣೈಗಯಹುಯಾನ ಲೀಖಾನು ಶಾತ್‍ಕತೊ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಘಣು ಮಳಾದೆ.
ಜಿವ್ತೊ ಭರೋಖ್ಹೊ
3 ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ಬಾಬಿ ದೇವ್‌ಬಿ ಹುಯಿರ‍್ಹವಾಳನ ಧನ್ಯವಾದ್ ಹುವಾದೆ! ಶನಕತೊ ಯೋ ಯೇಸು ಕ್ರಿಸ್ತನ ಮರ‍್ಯಾಹುಯಾಮಾಥು ಜಿವ್ತೊಕರಿನ್, ಇನಿ ಮೋಟಿ ಗೋರ್‌ಥೀಸ್ ಅಪ್ಣುನ ನವೊ ಜ಼ಲಮ್ ಅಜು಼ ಜಾನ್ನ ಭರೋಖ್ಹಾನ ದಿರಾಖ್ಯೊಸ್.
4 ಇಮ್ಮಸ್ ಅಪ್ಣುನ ಮಟಿಜಾ಼ಯಿಕೊಂತೆ ಧನ್‌ದೌಲತ್‌ನ ದ್ಯವಾನಖ್ಹಾಜೆ ಪರಲೋಕ್‌ಮ ಅಪ್ಣಖ್ಹಾಜೆ ಮ್ಹೇಲೈರ‍್ಹೂಸ್. ಯೋ ಕಂದ್‍ ಧರಾಕೊಯ್ನಿ ಅಜು಼ ನಾಶ್ ಹುಯಿಜಾ಼ಯ್‌ ಕೊಯ್ನಿ.
5 ಕಡ್‍ಶೀನ ದನ್ಮ ಮಾಲುಮ್ ಹುವಾನ ತಯ್ಯಾರ್‌ಹುಯಿರ‍್ಹುತೆ ರಕ್ಷಣೆ ವಿಶ್ವಾಸ್ ಕರಾವಾಳ ತುಮುನ ಮಳ್‌ಣುಕರಿ ದೇವ್ ತುಮುನ ಇನಿ ಶಕಥ್ಥಿ ಬಚಾ಼ಡಸ್.
6 ಇನಾಖ್ಹಾಜೆ ತುಮೆ ತಬ್‍ತೋಡಿ ಥೋಡದನ್ ಹೋಣು ಉಷೇತೊ ಕೈಯೇಕ್‌ ಥರಾನಿ ವದೇಖ್ಹ್‌ಮ ದುಖಿ ಹುವಾಳರ‍್ಹಯಾತೋಬಿ, ಖ್ಹುಶಿಕರಾವಾಳ ಹುಯಿರ‍್ಹಾಸ್.
7 ನಾಶಹುಯಿಜಾ಼ವಾನುಬಿ, ಆಗ್‌ಥಿ ಛ಼ಣೈನ್ ಹುಯಿರ‍್ಹುತೆ ಖ್ಹೋನ್ನೇಥಿಬಿ ಘಣು ಮೋಲ್ನು ಹುಯಿರ‍್ಹುತೆ ತುಮಾರಿ ವಿಶ್ವಾಸ್ ಆ ವದೇಖ್ಹ್‌ಥಿ ತರೀಪ್‌ಶ ಹುಯಿನ್ ಯೇಸುಕ್ರಿಸ್ತ ಆವಾನಿ ವಖ್ಹತ್ ತುಮುನ ಕೀರ್ತಿ, ಮಾನ್, ಮಹಿಮೆ ಅಖ್ಖು ಉಬ್ಜಿ ಆವಾನಿತರಾನು ಹುಯಿರ‍್ಹುಸ್.
8-9 ತುಮೆ ದೇವ್ನ ಡೋಳೇಥಿ ನಾ ದೇಖ್ಯಾತೋಬಿ ಇನ ಪ್ಯಾರ್ ಕರೋಸ್. ತುಮೆ ಹಮ್ಕೆ ಇನ ನಾದೇಖ್ಯಾತೊಬಿ ಇನಾಮ ವಿಶ್ವಾಸ್‍ಥಿ ಖ್ಹುಶಿ ಕರ್ಶು. ಶನಕತೊ ತುಮಾರು ವಿಶ್ವಾಸ್‍ನು ಫಲ್‍ಹುಯಿರ‍್ಹುತೆ ಆತ್ಮನು ರಕ್ಷಣೇನ ಲಿಲ್ಯಾವವಾಳ ಹುಯಿನ್ ಮಹಿಮೆನಿ ಖ್ಹುಶಿಕರ್‌ಶು.
10 ದೇವ್ನೆ ತುಮುನ ವತಾಳ್ಯೊತೆ ವಾರ್‌ಖ್ಹಾನಿ ಬಾರೇಮ ಪಹಿಲೇಸ್ ಖ್ಹಮ್‌ಜಾ಼ಡ್ಯೂತೆ ಪ್ರವಾದಿಖ್ಹಾರು ಆ ರಕ್ಷಣೆನಿ ಬಾರೇಮ ಬರೋಬರ್‌ಥಿ ಪುಛೈ಼ನ್ ಪರ್ಖಿನ್ ದೇಖ್ಯು.
11 ಇವ್ಣಾಮಥೂತೆ ಕ್ರಿಸ್ತನು ಆತ್ಮ ಕ್ರಿಸ್ತನ ಆವ್ಣುತೆ ವದೇಖ್ಹ್‌ ಅಖ್ಖಾನಾಬಿ, ಯೋ ಅಖ್ಖಾನವಾರ್ ಉಷೇತೆ ಮಹಿಮೆನಾಬಿ, ಪಹಿಲೇಸ್ ಖ್ಹಮ್‌ಜಾ಼ಡಾದೀನ್ ದೇವ್ ಖೆವ ಹಗಾಮ್ನ ನತರ್ ಕೆಥ್ರಾನ ಹಗಾಮ್ನ ವತಾಳ್‌ಶೇಕರಿ ಬೋಲಾನು ಇವ್ಣೆ ಪರ್ಖಿನ್ ದೇಖ್ಯು.
12 ಪರ್‌ಲೋಕ್‌ಥು ಮೋಕ್‍ಲೈರ‍್ಹುತೆ ಪರಿಶುದ್ದಆತ್ಮಥಿ ತುಮುನ ಸುವಾರ್ತೆನ ಬೋಲವಾಳು ಹಮ್ಕೆ ತುಮುನ ಖ್ಹಮ್‍ಜಾ಼ಡನಿತರ ಅಜು಼ ದೂತರ್ ಡೋಳಲಗಾಡಿನ್ ದೇಕ್ಣು ಕರಿ ಅಖ್ಹ್‌ಕರ‍್ಯುತೆತಿಮ್‍ ಅಖ್ಖಕಾಮ್ಮ ಇವ್ಣಖ್ಹಾಜೆ ಕಾಹೆ ಅಪ್ಣ ಖ್ಹಾಜೆಸ್ ಸೇವೆ ಕರಿರಾಖ್ಯುಸ್‌ಕರಿ ಇವ್ಣುನ ದೆಖಾಯು.
ಪರಿಶುದ್ ಜಿವ್ಣನ ಬುಲಾವ್ಣಿ
13 ಇನಾಖ್ಹಾಜೆ ತುಮೆ ತುಮಾರ ದಿಲ್ನ ಘಟ್‍ಕರಿಲೀನ್, ಅಛ್ಛಿ ಸೋಚ್‌ವಾಳ ಹುಯಿರ‍್ಹಿನ್, ಯೇಸು ಕ್ರಿಸ್ತ ಆವಾನಿ ವಖ್ಹ್‌ತೆ ತುಮುನ ಮಳ್‌ಶೇತೆ ವಾರ್‌ಖ್ಹಾನ ಉಪ್ಪರ್ ತುಮಾರಿ ಪೂರ ಭರೋಖ್ಹೊ ರ‍್ಹವಾದೆ.
14 ವಾತೆ ಖ್ಹಮ್‌ಜಾ಼ತೆ ಲಡ್ಕವ್ನಿತರ ಚಾ಼ಲೊ, ತುಮೆ ಅಗಾಡಿ ಬಿಣ್‍ಖ್ಹೈಲಿರ‍್ಹಾವಾನಿ ವಖ್ಹ್‌ತೆ ತುಮುನ ಥೂತೆ ನಿಕ್‌ಳ್ಯೊಜಾನ್ನಿ ತರಸ್ ಅಜೂ಼ಬಿ ಚಾ಼ಲಿಲ್ಯಾವಾಳ ನಾಹುಯಿರ‍್ಹೆವ್ಣುತೆ,
15 ತುಮುನ ಬುಲಾಯೋಹುಯೊ ಪರಿಶುದ್‌ಹುಯಿರ‍್ಹೋತೆ ಪರಕ್ಮಾಸ್ ತುಮೇಬಿ ವಿಧೇಯಹುಯಿ ರ‍್ಹೀನ್ ತುಮಾರಿ ಖ್ಹಾರಿ ಚಾ಼ಲ್‌ಮ ಇನಖ್ಹಾಜೆ ಪರಿಶುದ್ ಹುಯಿ‍ರ‍್ಹೆವೊ.
16 ಶನಕತೊ ಮೇ ಪರಿಶುದ್ ಹುಯಿರ‍್ಹೋತೆ ತಿಮ್ ತುಮೇಬಿ ಪರಿಶುದ್ ಹುಯಿರ‍್ಹೇವ್ಣು ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‍ನಿ.
17 ಹರೇಕ್ ಜ಼ಣಾನಿ ಚಾ಼ಲ್‌ನ ದೇಖಿನ್ ಯೋ ಬೇದ್‌ಬಾವ್‌ಕೊಂತೆ ತೀರ್ಪ್‌ಕರಾವಾಳನ ತುಮೆ ಬಾಕರಿ ಪುಕಾರವಾಳ ಹುಯಿರ‍್ಹಾತೆ ಇನಾಖ್ಹಾಜೆ ಆ ಲೋಕ್ಮ ತುಮಾರು ಅರಾಮ್‌ನು ಜಿವ್ಣನ ದನ್ನ ಡರ್‌ಭಕ್ತಿಥಿ ಕಾಡೊ.
18 ತುಮಾರ ಗುರುಗುರಬ್‍ಲ್ಯಥಿ ಆಯೂತೆ ಕಾಮ್‌ಕೊಂತೆ ರೀತಿರಿವಾಜ್‍ಮ ಚಾ಼ಲ್‌ಚ಼ಲಣ್‌ಥಿ ತುಮುನ ಛುಟ್ಕಾರ್‌ ಕರ‍್ಯುತೆ, ರೂಪು, ಖ್ಹೊನ್ನನಿತರಾನು ಮಟಿಜಾ಼ವಾನು ರಾಛ಼ವ್‌ಥಿಕಾಹೆ.
19 ಯೇಸು ಕ್ರಿಸ್ತಕರಿ ಬೋಲಾನು ಶನು ದೋಷ್‍ಕೊಂತೆ, ಶುದ್ದ ಹುಯಿರ‍್ಹುತೆ ಮೇಂಢಾನ ಚೆಲ್ಕಾನು ಕಿಮ್ಮತ್ನ ಲ್ಹೋಯಿಥೀಸ್‍ಕರಿ ತುಮುನ ಮಾಲುಮ್‍ಛಾ಼ನಿ.
20 ಯೊ ಜಗತ್‌ ಉಬ್‌ಜಾ಼ನ ಅಗಾಡಿಸ್ ದೆವೈಜಾ಼ವಾಳೂ ಹುಯಿರ‍್ಹಿನ್, ಆ ಖ್ಹರ್ತಿನ ಹಗಾಮ್ಮ ತುಮಾರಖ್ಹಾಜೆ ದೆಖಾಯೊ.
21 ಇನ ಮರ‍್ಯಾಹುಯಾಮಾಥು ಉಠಾಡಿನ್ ಇನ ಮಹಿಮೆ ದಿದಾಹುಯಾ ದೇವ್‌ಮ ತುಮೆ ಇನೇಥಿ ವಿಶ್ವಾಸ್ ಕರಾವಾಳ ಹುಯಿರ‍್ಹಾಸ್. ಅಮ್‍ರ‍್ಹವಾಪರ್ ತುಮಾರಿ ವಿಶ್ವಾಸ್‍ಬಿ ಟಿವಾವ್ಣಿಬಿ ದೇವ್‍ಮಾಸ್‍ ಭೀಯುಸ್.
22 ತುಮೆ ಖ್ಹಾಚ ಉಪದೇಶ್‍ನ ವಿಧೇಯ ಹುಯಿರ‍್ಹಿನ್ ತುಮಾರ ಆತ್ಮಾನ ಪಾಕ್‍ ಕರಿಲಿದಾತೆ ಇನಾಖ್ಹಾಜೆ ಪಾಕ್‌ಮನ್‌ಥಿ ಭೈಯೆಭೇನೆನಿ ಪ್ಯಾರ್‌ವಾಳ ಹುಯಿರ‍್ಹೇವ್ಣು. ಅಮ್‍ರ‍್ಹವಾಪರ್, ಏಕ್‌ಥಿಏಕ್ ಪಾಕ್‍ದಿಲ್‍ಥೀಬಿ, ಛು಼ಟ ದಿಲ್‌ಥಿ ಪ್ಯಾರ್‌ಕರೊ.
23 ಶನಕತೊ ತುಮೆ ನವೇಥಿ ಪೈದಾ ಹುಯಿರ‍್ಹಾಸ್ತೆ ನಾಶ್ ಹುಯಿಜಾ಼ವಾನ ವಚನ್‍ಥಿಕಾಹೆ, ಕತೋಬಿ ನಾಶಹುವಾಕೊಂತೆ ವಚನ್‌ಥೀಸ್. ಯೋ ಕೆದೇಬಿ ಜಿವ್ತಜಾನ್‍ರ‍್ಹವಾಳ ದೇವ್ನಿ ವಚನ್‌ಥೀಸ್ ಉಬ್‌ಜ್ಯುತೆ.
24 ಶನಕತೊ ಪವಿತ್ರ ದಪ್ತರ್‌ಮ ಲೀಖೈರ‍್ಹುತಿಮ್; ಅದ್ಮಿ ಖ್ಹಾರೂಸ್ ಘಾಖ್ಹ್‌ನಿತರ ಛಾ಼. ಇನಿ ಮಹಿಮೆಖ್ಹಾರು ಘಾಖ್ಹ್‌ನು ಫೂಲ್ನಿತರ ಛಾ಼. ಘಾಖ್ಹ್‌ ಖ್ಹುಕೈಜಾ಼ಶೆ. ಇನು ಫೂಲ್ ಝ಼ಟ್‌ಕೈಜಾ಼ಶೆ.
25 ಕತೋಬಿ ಪ್ರಭುನಿ ವಾತ್‍ತೋಬಿ ಹಮೇಶಾಬಿ ರ‍್ಹಿಶೆ. ಯೋ ವಾತೆ ಖಿವಿಕತೊ ತುಮುನ ಬೋಲೈರ‍್ಹೀತೆ ಸುವಾರ್ತೆನಿ ವಚನಸ್.