22
ವ್ಯಹಾನು ಮಿಝ಼್‌ವಾನ್ನಿ ಬಾರೇಮಾನು ಮತ್ಲಬ್‌ನಿ ಖೇಣಿ
(ಲೂಕ 14:15-24)
1 ಯೇಸುನೆ ಬಿಜೂ಼ಬಿ ಮತ್ಲಬ್‌ನಿ ಖೇಣಿಥಿ ಅದ್ಮಿ ಖ್ಹಾರಾನ ಬೋಲ್ಯೋಕಿ,
2 “ಸೊರ್ಗಾನು ರಾಜ್ಯ ಇನ ಛಿಯ್ಯಾನಿ ವ್ಯಹಾ ಕರ‍್ಯೊತೆ ಏಕ್‌ ರಾಜಾ಼ನಿಘೋಣಿ ಛಾ಼.
3 ಇನೆ ವ್ಯಹಾನು ಮಿಝ಼್‌ವಾನ್ ಖಾವಾನ ಬುಲಾಯೊಥೋತೆ ಮೆಹೆಮಾನ್ನಖ್ಹಾರು ಬುಲಾವಾನಟೇಕೆ ಇನ ಆಳ್‌ನ ಖ್ಹಾರು ಮೋಕ್‌ಲ್ಯೊ, ಕತೋಬಿ ಇವ್ಣುನ ಆವಾನ ಮನ್ ಕೋ ಥೂನಿ.
4 ತದೆ ಇನೆ ಪಾಛೊ಼ ಬಿಜಾ಼ಖ್ಹಾರ ಆಳ್‌ನ ಬುಲೈನ್, ‘ತುಮೆ ಜೈ಼ನ್, ಮೇ ಮಿಝ಼್‌ವಾನ್ನ ಬುಲಾಯೊಥೋತೆ ಇವ್ಣುನ, ಹಂದೇಖೊ, ಮಿಝ಼್‌ವಾನ್ ತೈಯಾರ್ ಹುಯಿಗಯು, ಮಾರು ಢಾಂಡಾವ್‍ನ ಅಜು಼ ಪಲ್ಯಹುಯ ಮೇಂಢಾವ್ನ ರ‍್ಹೇ಼ಖ್ಹಯ್‌ರಾಖ್ಯೋಸ್; ಖ್ಹಾರುಸ್ ತೈಯಾರ್ ಹುಯಿಗಯು. ವ್ಯಹಾನು ಮಿಝ಼್‌ವಾನ್ ಖಾವಾನ ಆವೊ’ ಕರಿ ಬೋಲೊ” ಕರಿ ಹುಕುಮ್ ದೀನ್, ಮೋಕ್‌ಲ್ಯೊ.
5 ಕತೋಬಿ ಇವ್ಣೆ ಮಜು಼ರಸ್ ಕರ‍್ಯುಕೊಂತೆ ಏಕ್‌ ಜ಼ಣೊ ಖೇತರ್‌ನ, ಏಕ್‌ ಜ಼ಣೊ ಧಂದಾನ ಚ಼ಲೆಗಯೊ.
6 ಬಿಜು಼ ಥೋಡು ಜ಼ಣು ಯೋ ಆಳ್‌ನ ಖ್ಹಾರು ಧರೀನ್, ಇವ್ಣುನ ಮಾರಿನ್, ಮರ್‌ನಾಖಿದಿದು.
7 ತದೆ ಯೋ ರಾಜಾ಼ನೆ ಘಣು ಖಿಜೈ಼ನ್, ಇನು ದಂಡ್‌-ದಳ್‌ವಾಯಿನ ಮೋಕ್ಲಿನ್, ಇನ ಆಳ್‌ನ ಖೂನಿಯೇವ್ನ ಮರೈನಾಖ್ಯೊ ಅಜು಼ ಇವ್ಣು ಖ್ಹಯೇರ‍್ನ ಬಾಳಿನಾಖ್ಯೊ.
8 ಅನಕೇಡೆಥು ಇನೆ ಇನ ಆಳ್‌ ಖ್ಹಾರಾನ, “ವ್ಯಹಾನು ಮಿಝ಼್‌ವಾನ್ ತೈಯಾರ್ ಛಾ಼, ಕತೋಬಿ ಮೇ ಬುಲಾಯೊಥೋತೆ ಅದ್ಮಿಖ್ಹಾರು ಇನ ಲ್ಹಾಯಕ್‌ನು ಕೋ ಥೂನಿ.
9 ಇನಖ್ಹಾಜೇಸ್ ತುಮೆ ಗಲ್ಲಿ-ಗಲ್ಲಿಯೇಮ ಜೈ಼ನ್, ತುಮೂನ ದೆಖಾವಸ್ತೆ ಅದ್ಮಿಖ್ಹಾರಾನ ಬುಲಾವೊ” ಕರಿ ಬೋಲ್ಯೊ.
10 ಇಮ್ಮಸ್ ಯೋ ಆಳ್‌ಖ್ಹಾರು ಗಲ್ಲಿ ಗಲ್ಲಿಯೇಮ ಜೈ಼ನ್, ಅಛ಼್ಛು ಖರಾಬ್ ಕರಿ ದೇಖ್ಯುಕೊಂತೆ, ಇವ್ಣುನ ಮಳಾತೆ ಖ್ಹಾರ ಅದ್ಮಿನ ಎಕ್ಟು ಕರಿನ್, ಬುಲೈಲಿ ಆಯೊ; ಅಮ್ ಯೋ ವ್ಯಹಾನುಮಂಟಪ್ ಅಖ್ಖುಸ್ ಅದ್ಮಿ ಭರೈಗಯು.
11 ಅನ ಬಾದ್‌ಮ ಯೋ ರಾಜಾ಼ನೆ ಖಾಣನ ಬೆಠುಥೂತೆ ಇವ್ಣುನ ದೇಖಾನಖ್ಹಾಜೆ ಆಯೊ, ತದೆ ವ್ಯಹಾನು ಲುಂಗ್ಡ ಪೇರ‍್ಹಿರಾಖ್ಯುಕೊಂತೆ ಏಕ್‌ ಅದ್ಮಿನ ದೇಖಿನ್,
12 ‘ಅಲಾ ದೋಸ್ತ್, ವ್ಯಹಾನು ಲುಂಗ್ಡ ಕೊಂತೆ ತೂ ಕಿಮ್ ಮಹಿ ಆಯೊ?’ ಕರಿ ಪುಛಾ಼ಯೊ. ಕತೋಬಿ ಯೋ ಅದ್ಮಿನೆ ಶಾತ್ಬಿ ಜ಼ವಾಬ್ ಕೋ ದಿದೋನಿ.
13 ತದೆ ಯೋ ರಾಜಾ಼ನೆ ಇನ ಆಳ್‌ನ ಖ್ಹಾರು, ‘ಅನ ಹಾತ್-ಗೋಡ ಭಾಂದಿನ್, ಭಾರ್‌ ಅಂಧಾರಾಮ ಫೇಕಿದೆವೊ’ ಕರಿ ಬೋಲ್ಯೊ. ಹಿಜ್ಜಾ಼ ಅದ್ಮಿಖ್ಹಾರು ರೊವ್‌ತುಹುಯಿನ್, ಕರ್‌-ಕರ್‌ ದಾತ್‌ ಚಾ಼ವ್ತು ರ‍್ಹಿಶೆ.
14 ಅಮ್ ಬುಲಾಯೂತೆ ಘಣು ಅದ್ಮಿನ, ಕತೋಬಿ ಚೂ಼ಣಾಯೂತೆ ಥೋಡುಸ್ ಅದ್ಮಿ” ಕರಿ ಯೇಸುನೆ ಬೋಲ್ಯೊ.
ಶುಂಕ ಭಾಂದಾನಿ ಬಾರೇಮ ಪುಛಾ಼ಯೂತೆ
(ಮಾರ್ಕ 12:13-17; ಲೂಕ 20:20-26)
15 ತದೆ ಫರಿಸಾಯರ್ ಜೈ಼ನ್, ಯೇಸುನ ವಾತೇಮ ಖ್ಹಪ್‌ಡಾವ್ಣು ಕರಿ ವಾತೆ ಕರಿಲೀನ್, ಇನಾಕನ ಆಯು.
16 ಪರಿಸಾಯರ್‌ನು ಶಿಷ್ಯರ್‌ಮ ಥೋಡಾನ ಅಜು಼ ಹೆರೋದ ಭಣಿವಾಳ ಥೋಡು ಅದ್ಮಿನ ಮೋಕ್‍ಲ್ಯು. ಇವ್ಣೆ ಐನ್, “ಗುರು, ತೂ ಖ್ಹಾಚಿಸ್ ಬೋಲಾಸ್ ಕರಿ ಹಮೂನ ಮಾಲುಮ್. ತೂ ಅದ್ಮಿನಖ್ಹಾಜೆ ಛಾ಼ತೆ ದೇವ್ನಿ ಮರ್ಜಿನಿ ಬಾರೇಮ ಖ್ಹಾಚಿಸ್ ಬೋಲಿವತಾಳಸ್, ಎತ್ರೇಸ್ ಕಾಹೆತೆ ಅದ್ಮಿಖ್ಹಾರು ಶಾತ್ ಸೋಚ್‌ಶೆ ಕರಿ ಬೋಲಾನಿ ಬಾರೇಮ ತುನ ಫಿಕರ್ ಕೊಯ್ನಿ, ಶನಕತೊ, ತು ಕಿನಾಬಿ ಮ್ಹೋಡು ದೇಖಿನ್, ವಾತೆ ಬೋಲಾಕೊಯ್ನಿ.
17 ಇನಖ್ಹಾಜೇಸ್ ಹಮೂನ ಬೋಲ್, ಕೈಸರ್‌ನ ಶುಂಕ ಭಾಂದಾನು ನಿಯಮ್‌ಕಿ ಕೊಯ್ನಿ? ತುನ ಕಿಮ್ ದೆಖಾವಸ್?
18 ಯೇಸುನೆ ಇವ್ಣಿ ಖರಾಬ್ ಚಾ಼ಲ್‌ನ ಮಾಲುಮ್ ಕರಿಲೀನ್, “ತುಮೆ ಖೋಟ್ ದಿಲ್‌ವಾಳ! ತುಮೆ ಮನ ಖ್ಹಪ್‌ಡಾವ್ಣು ಕರಿ ಶನ ದೇಖೋಸ್ತೆ?
19 ಶುಂಕ ಭಾಂದಾಸ್ತೆ ಪೈಶಾನ ಮನ ವತಾಳೊ!” ಕರಿ ಬೋಲ್ಯೊ.
ಇವ್ಣೆ ಏಕ್ಕಾಖ್ಹ್‌ ಲಯಿನ್ ಇನ ದಿದು.
20 ತದೆ ಯೇಸುನೆ ಇವ್ಣುನ, “ಅನಾಪರ್ ಕಿನು ರೂಪ್ ಅಜು಼ ಕಿನುನಾಮ್‍ ಛಾ಼ತೆ?” ಕರಿ ಪುಛಾ಼ಯೊ.
21 ಇವ್ಣೆ, “ಕೈಸರ್‌ನು” ಕರಿ ಜ಼ವಾಬ್ ದಿದು.
ತದೆ ಯೇಸುನೆ ಇವ್ಣುನ, “ಇಮ್‍ಕತೊ, ಕೈಸರ್‌ನು ಶಾತ್ ಛಾ಼ಕಿ, ಯೋ ಕೈಸರ್‌ನ ದೆವೊ, ಅಜು಼ ದೇವ್‌ನು ಶಾತ್ ಛಾ಼ಕಿ, ಯೋ ದೇವ್ನ ದೆವೊ” ಕರಿ ಬೋಲ್ಯೊ.
22 ಇವ್ಣೆ ಆ ವಾತೇನ ಖ್ಹಮ್‌ಜಿನ್‌, ಆಶ್ಚರ್ಯಖೈನ್, ಇನ ಮ್ಹೆಂದಿನ್, ಚ಼ಲ್ಯುಗಯು.
ಮರ‍್ಯುಹುಯು ಪಾಛು಼ ಜಿವ್ತುಹುಯಿನ್ ಉಠಾನಿ ಬಾರೇಮ ಪುಛಾ಼ಯೂತೆ
(ಮಾರ್ಕ 12:18-27; ಲೂಕ 20:27-40)
23 ಯೋಸ್ ದನ್ನೆ ಸದ್ದುಕಾಯವಾಳು ಯೇಸುಕನ ಆಯು. ಅವ್ಣೆ ಮರ‍್ಯುಹುಯು ಅದ್ಮಿ ಪಾಛು಼ ಜಿವ್ತುಹುಯಿನ್ ಉಠಾಕೊಯ್ನಿ ಕರಿ ಬೋಲಾವಾಳು.
24 ಇವ್ಣೆ ಯೇಸುನ, “ಗುರು, ಏಕ್‌ ಅದ್ಮಿ ಲಡ್ಕಾಕೊಂತೆ ಮರಿಗೋತೊ, ಇನಿ ಬಾವಣ್ಣ ಇನೊ ಭೈ ಕರಿಲೇವ್ಣು, ಅಜು಼ ತದೆ ಇವ್ಣುನ ಲಡ್ಕಾ ಹುಯಾತೊ, ಯೋ ಲಡ್ಕಾ ಮರ‍್ಯೋತೆ ಭೈನ ಲಡ್ಕಾ ಹುಯಿರ‍್ಹಿಶೆ ಕರಿ ಮೋಶೆನೆ ಬೋಲಿರಾಖ್ಯೊಸ್.’
25 ಹಜ್ಜಾ಼ ಖ್ಹಾತ್ ಜ಼ಣ ಭೈಯೆ ಥಾ. ಮೋಟೊ ಭೈ ವ್ಯಹಾ ಕರಿಲೀನ್, ಲಡ್ಕಾ ಕೊಯ್ನಿತೇಸ್ ಮರಿಗಯೊ, ಇನಖ್ಹಾಜೇಸ್ ಇನ ಭೈನೆ ಇನಿ ಬಾವಣ್ಣ ಕರಿಲಿದೊ.
26 ಯೋ ಬೇನೊ ಭೈನಾಬಿ ಇಮ್ಮಸ್ ಹುಯು, ಅಮ್ಮಸ್ ತೀನ್ನೊ ಭೈನಾಬಿ, ಅಜು಼ ಖ್ಹರ್ತಿಮ ಖ್ಹಾತೆ ಭೈಯೇನಾಬಿ ಇಮ್ಮಸ್ ಹುಯು.
27 ಆ ಖ್ಹಾರಾನ ಬಾದ್‌ಮ ಯೋ ತಯೇಡಾಬಿ ಮರಿಗೈ.
28 ಇಮ್‍ಕತೊ, ಮರವಾಳು ಜಿವ್ತುಹುಯಿನ್, ಆವ್‌ಶೇತೆ ತದೆ ಯೋ ತಯೇಡ ಖೆವಾನಿ ಬಾವಣ್‍ ಹುಯಿರ‍್ಹಿಶೆ? ಇವ್ಣೆ ಖ್ಹಾರಾಸ್ ಇನ ವ್ಯಹಾ ಕರಿಲಿದಾಥಾನಿ?” ಕರಿ ಪುಛಾ಼ಯು.
29 ಯೇಸುನೆ ಇವ್ಣುನ, “ತುಮೆ ಕೆತ್ರೆ ಗಲ್ತಿಮ ಪಡ್ಯಾಸ್ತೆ ದೇಖೊ! ಶನಕತೊ ತುಮೂನ ದೇವ್ನಿ ವಚನ್‌ಬಿ ನಾತೊ ದೇವ್ ಕೆತ್ರೆ ಶಕತ್‌ವಾಳೊ ಕರೀಬಿ ಮಾಲುಮ್‌ಕೊಂತೆ ಇನಖ್ಹಾಜೇಸ್.
30 ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ತದೆ, ಇವ್ಣೆ ಸೊರ್ಗಾನು ದೂತರ್‌ನಿ ಘೋಣಿ ರ‍್ಹಿಶೆ, ಅಜು಼ ಇವ್ಣೆ ವ್ಯಹಾ ಕರ್ಶೆ ಕೊಯ್ನಿ.
31 ಮರವಾಳು ಜಿವ್ತುಹುಯಿನ್ ಆವ್‌ಶೇತೆ ಬಾರೇಮ ದೇವ್ನೆ ಬೋಲ್ಯೋತೆ ಇನ ತುಮೆ ಪಢ್ಯಾಕೊಯ್ನಿಕಿ ಶು?
32 ‘ಮೇ ಅಬ್ರಹಾಮ್‌ನೊ ದೇವ್, ಇಸಾಕನೊ ದೇವ್, ಯಾಕೋಬನೊ ದೇವ್ ಕರಿ ಯೋ ಜಿವ್ತಾ ಅದ್ಮಿನೊ ದೇವ್ ಹುಯಿರ‍್ಹೋಸ್, ಪಣ್ಕಿ ಮರ‍್ಯಾಹುಯಾನೊ ಕಾಹೆ” ಕರಿ ಬೋಲ್ಯೊ.
33 ಅದ್ಮಿಖ್ಹಾರು ಇನ ಖ್ಹಮ್‌ಜಿನ್‌, ಯೋ ಬೋಲಿವತಾಳಾಸ್ತೆ ಬಾರೇಮ ಆಶ್ಚರ್ಯ ಖಾದು.
ಖ್ಹಾರೇಥಿ ಮೋಟಿ ಹುಕುಮ್
(ಮಾರ್ಕ 12:28-34; ಲೂಕ 10:25-28)
34 ಯೇಸುನೆ ಬರೋಬರ್‌ನು ಜ಼ವಾಬ್‌ದೀನ್, ಸದ್ದುಕಾಯವಾಳನು ಮ್ಹೋಡು ಭಾಂದ್ಯೊ ಕರಿ ಫರಿಸಾಯರ್‌ನೆ ಖ್ಹಮ್‌ಜಿನ್‌, ಇವ್ಣೆ ಎಕ್ಟು ಹುಯಿನ್ ಹಿಜ್ಜಾ಼ ಆಯು.
35 ಇವ್ಣಾಮ ಥೋತೆ ಮೋಶೆನಿ ವಚನ್ ಶಿಕಾಡವಾಳೊ ಶಾಸ್ತ್ರಿಮ ಏಕ್‍ಜ಼ಣೊ ವಾತೆಥಿ ಯೇಸುನ ಖ್ಹಪ್‌ಡಾವ್ಣು ಕರಿ,
36 “ಗುರು, ಧರ್ಮಶಾಸ್ತ್ರನಿ ನಿಯಮ್ ಖ್ಹಾರೇಥಿ ಮೋಟಿ ಹುಕುಮ್ ಖೆವಿ?” ಕರಿ ಪುಛಾ಼ಯೊ.
37 ಯೇಸುನೆ, “ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ತಾರೊ ಪೂರ ದಿಲ್‌ಥಿ, ಪೂರ ಜಾನ್‌ಥಿ, ತಾರೊ ಪೂರ ಮನ್‌ಥಿ ಪ್ಯಾರ್‌ಕರ‍್ನು.
38 ಆಸ್ ಖ್ಹಾರೇಥಿ ಮೋಟಿ ಅಜು಼ ಮುಖ್ಯ ಹುಕುಮ್.
39 ಆಸ್ ಹುಕುಮ್‌ನಿಘೋಣಿ ಛಾ಼ತೆ ಬೇನೆ ಮುಖ್ಯ ಹುಕುಮ್ ಖೆವಿಕತೊ, ತಾರು ತೂ ಕಿಮ್ ಪ್ಯಾರ್ ಕರಾಸ್ಕಿ ಇಮ್ಮಸ್, ತಾರ ಭೀಡೆವಾಳಾನ ಪ್ಯಾರ್ ಕರ‍್ನು’ ಕರಿ ಬೋಲನುಸ್.
40 ಹಿಡಿ ಮೋಶೇನು ಧರ್ಮಶಾಸ್ತ್ರ ಅಜು಼ ಪ್ರವಾದೀನು ವಚನ್‌ಖ್ಹಾರು ಆ ಬೇಸ್ ಹುಕುಮ್‌ಪರ್ ಟಿಕ್ಯುಸ್ತೆ” ಕರಿ ಬೋಲ್ಯೊ.
ಕ್ರಿಸ್ತ ದಾವೀದ್ ರಾಜ಼ನೊ ಘರ್‌ವಾಳೊ
(ಮಾರ್ಕ 12:35-37; ಲೂಕ 20:41-44)
41 ಫರಿಸಾಯರ್ ಖ್ಹಾರು ಎಕ್ಟು ಹುಯಿನ್ ಆವಾದಿನ್, ಯೇಸುನೆ ಇವ್ಣುನ,
42 ಆವ್ಣುತೆ ಕ್ರಿಸ್ತನಿ ಬಾರೇಮ ತುಮಾರಿ ಸೋಚ್ ಶಾತ್? ಯೋ ಕಿನೊ ಛಿಯ್ಯೊ?” ಕರಿ ಪುಛಾ಼ಯೊ. ಇವ್ಣೆ,
“ಯೋ ದಾವೀದ್‌ನೊ ಛಿಯ್ಯೊ” ಕರಿ ಜ಼ವಾಬ್ ದಿದು.
43 ತದೆ ಯೇಸುನ, ದಾವೀದನೊ ಛಿಯ್ಯೊಕರಿ ಬೋಲ್ಯು. ತದೆ ಇನೆ,ಇಮ್‍ಕತೊ, ದಾವೀದಸ್‌, ಪವಿತ್ರಾತ್ಮನಿ ಖ್ಹಯಾಲ್‌ಥಿ ಇನ ಪ್ರಭುಕರಿ ಬುಲಾಯೋನಿ, ಯೋ ಕಿಮ್?
44 ಮೇ ತಾರ ದುಶ್‌ಮನ್ನ ಖ್ಹಾರು ತಾರ ಗೋಡ ಹೇಟ್ ನಾಖಾಲಗು, ಮಾರಿ ಖಾವಿ ಬಾಜೂ಼ಮ ಬೆಠೋರೆ ಕರಿ ಪ್ರಭುನೆ ಮಾರ ಮಾಲಿಕ್‌ನ ಬೋಲ್ಯೊ’ ಕರಿ ಪವಿತ್ರಾತ್ಮಥಿ ಬೋಲ್ಯೋನಿ.
45 ದಾವೀದಸ್‌ ಕ್ರಿಸ್ತನ ಪ್ರಭುಕರಿ ಬೋಲಾಪರ್, ಕ್ರಿಸ್ತ ದಾವೀದ್‌ನೊ ಛಿಯ್ಯೊ ಕಿಮ್ ಉಶೆ?” ಕರಿ ಬೋಲ್ಯೊ.
46 ಯೇಸುನೆ ಪುಛಾ಼ಯೋತೆ ಇನ ಕಿನಾಬಿ ಜ಼ವಾಬ್ ದ್ಯವಾನ ಕೋ ಹುಯೂನಿ, ಅತ್ರೇಸ್ ಕಾಹೆತೆ ತಪ್‌ಥು ಇನ ಬಿಜು಼ ಶಾತ್ಬಿ ಸವಾಲ್‌ಕರಾನ ಇವ್ಣೆ ಹಿಮ್ಮತ್ ಕೋ ಕರ‍್ಯುನಿ.