ಮತ್ತಾಯನು ಬರೆದ ಯೇಸುವಿನ ಸುವಾರ್ತೆ
ಮತ್ತಾಯನೆ ಲೀಖ್ಯೋತೆ ಯೇಸುನಿ ಅಛ್ಛಿ ಸಮಾಚಾರ್
ಮಾಲುಮ್ ಕರಾನು
ಮತ್ತಾಯನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ನು ಪುಸ್ತಕ್ ನವಿ ಒಪ್ಪಂದನು ಚಾರ್‌ಮ ಏಕ್‌ ಭಾಗ್‌ ಹುಯಿರ‍್ಹೂಸ್. ಆ ಪುಸ್ತಕ ಯೇಸುನಿ ಬಾರೇಮ ಖೇಣಿಥಿ ಬೊಲೈರ‍್ಹೂಸ್. ಆ ಪುಸ್ತಕ್ ಖ್ಹಾರು ಅಛ್ಛಿ ಸಮಾಚಾರ್‌ಕರಿ ಯೇಸುನಿ ಬಾರೇಮ ಬೊಲೈರ‍್ಹೂಸ್ ಆ ಅಛ್ಛಿಸಮಾಚಾರ್‌ ಕತೊ ಅಛ್ಛಿಸಂದೇಶ್, ಆ ಪುಸ್ತಕಖ್ಹಾರು ಯೇಸುನು ಮರಣ್ಣಿ ಬಾದ್‌ಮ ಮತ್ತಾಯ, ಮಾರ್ಕ, ಲೂಕ, ಬಿಜು಼ ಯೋಹಾನಥಿ ಲೀಖೈರ‍್ಹುಸ್, ಪಂಡಿತ್‌ನ ಆ ಮತ್ತಾಯನೆ ಲೀಖ್ಯುತೆ ಅಛ್ಛಿ ಸಮಾಚಾರ್ನು ಪುಸ್ತಕ್ ಬರೊಬರ್‌ನು ಪಕ್ಕಾ ತಾರಿಕ್‌ ಬಿಜು಼ ವರಖ್ಹ್‌ಅಖ್ಖು ಮಾಲುಮ್‌ಕೊಯ್ನಿ, ತೋಬಿ ಯೇಸು ಪೈದಹುಯಿನ್ ತೀನಿಖ್ಹ್‌ ವರಖ್ಹ್‌ನ ಬಾದ್‌ಮ ಲೀಖಿರಾಖ್ಯುಉಷೆ, ಬಿಜು಼ ಆ ಪುಸ್ತಕ್ ಲೀಖಿಹುಯು ಝ಼ಗೋಬಿ ಜಿನುಕು ಮಾಲುಮ್‌ಕೊಯ್ನಿ. ಕತೋಬಿ ಘಣು ಅದ್ಮಿಖ್ಹಾರು ಆ ಪುಸ್ತಕ್ ಪ್ಯಾಲೆಸ್ಟೇನ್‌ಮ ಲೀಖೈರ‍್ಹುಸ್‍ಕರಿ ಲಾಝಿರಾಖ್ಯುಸ್. ಆ ಪುಸ್ತಕನ ಲೀಖ್ಯೋತೆ ಮತ್ತಾಯ ಕರಿ, ಯೋಬಿಜಿನು ಯೇರೂಸಲೇಮ್‌ ಖ್ಹಯೇರ್‌ಮ ಥೊ. ಯೋ ಶುಂಕ ವಶೂಲಿ ಕರಾವಾಳನ ಯೇಸುನೆ ಇನೊ ಶಿಷ್ಯ ಹುವಾನ ಬುಲಾಯೊ ಇನ ಲೇವಿ ಕರಿ ನಾಮ್‌ಥಿಬಿ ಖ್ಹಣೇದ್ ಹುಯೊ. ಮತ್ತಾಯ ಭಾರಜ಼ಣ ಅಪೊಸ್ತಲರ್‌ಮ ಏಕ್‌ ಜ಼ಣೊ. ಯೋ ಯೆಹೂದ್ಯರ್‌ನ ಪಢಾವಳಾನ ಲೀಖ್ಯೊ, ಆ ಜೂ಼ನು ಒಪ್ಪಂದಾನು ತಿನಿಖ್ಹ್‌ಥೀಬಿ ಜಾ಼ಖ್ಹತ್ ಸಂಬಂದ್‌ನ ಅಛ್ಛಿ಼ನಿತರ ದೆಖೈಗೈ ಇನಿ ಖ್ಹೂಜ಼್ ಯೇಸುನ ಕ್ರಿಸ್ತಕರಿ ಬಿಜು಼ ದೇವ್ನೆ ಚೂ಼ಣಿರಾಖ್ಯೊತೆ ರಕ್ಷಕ್ ಕರಿ. ಇನಿ ಪ್ರವಾದ್‌ನೆನಾ ವತಾಳನಖ್ಹಾಜೆ. ಮತ್ತಾಯನೆ ದೇವ್ನಿ ರಾಜ್ಯನಿ ಬಾರೇಮ ಘಣು ಲೀಖ್ಯೊ. ಕ್ರಿಸ್ತ ರಾಜಕೀಯಾನೊ ರಾಜ಼ ಬಣೀನ್ ಹುಕುಮ್‌ ಚ಼ಲಾವನ ದೇಖುಕರಸ್ ಕರಿ ಯೆಹೂದ್ಯರ್‌ನಿ ಖ್ಹೂಜ಼್ ಥಿ. ಮತ್ತಾಯನೆ ಘಣು ಆಖ್ಹ್‌ಥಿ ಸವಾಲ್‌ ನಾಖಿನ್. ವಿಶ್ವಾಸ್‍ಥಿ ಆತ್ಮೀಕ್ ಹುಯಿರ‍್ಹೂತೆ ದೇವ್ನಿ ರಾಜ಼್‌ನ ಬೋಲಿವಾತಾಳ್ಯೊ. ಮತ್ತಾಯನೆ ಲೀಖ್ಯೋತೆ ನವಿ ಒಪ್ಪಂದಾನ ಶುರುವಾತ್ ಕರಾನ ಅಛ್ಛು಼ ಪುಸ್ತಕ್ ಶನಕತೊ ಆ ಪುಸ್ತಕ್ ಜೂ಼ನು ಒಪ್ಪಂದಾನ ಮಳಿರ‍್ಹೂಸ್‌ ಆ ಬೇ ಒಪ್ಪಂದಾನನ ಮಳಾವಸ್‌. ಯೋ ಖೆವುಕತೊ ಮೋಶೆನೆ ಲೀಖ್ಯೊತೆ ಪಹಿಲೆನು ಜೂ಼ನು ಒಪ್ಪಂದಾನು 5 ಪುಸ್ತಕ್ ಘೋಣಿ, ಮತ್ತಾಯಬಿ ಪುಸ್ತಕ್ನ ಲೀಖಾನ ಮ್ಹಿನತ್ ಕರ‍್ಯೊಕರಿ ಪಂಡಿತ್ ಖ್ಹಾರು ಸೋಚ್ಯು. ಮೋಶೆನಿ ಘೋಣಿ ಯೇಸುನು ಪಹಡ್‌ನು ಬೋಧನೆ ಮತ್ತಾಯ 5—7 ಮೋಶೆನ ದೇವ್ನೆ ದಿದೋತೆ ದಖ್ಹ್‌ ಹುಕುಮ್‌ನ ಬರೊಬರ್‌ ಕರೆಜಾ಼ಯ್ ಧರ್ಮೊ 19:3—23:25
ಕಾಡಿದೇಖೊ
1. ಯೇಸು ಪೈದಹುಯೊತೆ ಅಜು಼ ಇನಿ ಸೇವೆನಿ ಬಾರೇಮ ಶುರುವಾತ್ ಕರ‍್ಯೊತೆ. 1—4
2. ಯೇಸುನಿ ಸೇವೆ ಅಜು಼ ಇನಿ ಘಣಿ ಶಿಕಾಡನು ಬಾರೇಮ ಬೋಲಿವತಾಳಾಸ್. 5—25
3. ಇನಿ ಆಖ್ರಿ ಭಾಗ್‌ಮ ಯೇಸುನಿ ಮ್ಹಿನತ್‌ನಿ ಸೇವೆ ಮರಣ್ ಅಜು಼ ಜಿವಿನ್‍ಉಠ್ಯೋತೆ ಕಿಮ್ ಪೂರಹುಯು ಇನಿ ಬಾರೇಮ. 26—28
1
ಯೇಸು ಕ್ರಿಸ್ತನಿ ಗುರುಗುರಬ್‍ಲ್ಯಾನಿ ಪಟ್ಟಿ
(ಲೂಕ 3:23-38)
1 ಹೈರಿತೆ ಯೇಸು ಕ್ರಿಸ್ತನಿ ಗುರುಗುರಬ್‍ಲ್ಯಾನಿ ಪಟ್ಟಿ: ಯೇಸು ದಾವೀದನೊ ಖಾಂದಾನ್‌ವಾಳೊ, ದಾವೀದ ಅಬ್ರಹಾಮನೊ ಖಾಂದಾನ್‌ವಾಳೊ.
2 ಅಬ್ರಹಾಮ್ ಇಸಾಕನೊ ಬಾ, ಇಸಾಕ್ ಯಾಕೋಬನೊ ಬಾ, ಯಾಕೋಬನ ಯೆಹೂದ ಅಜು಼ ಇನ ಭೈಯೇ ಪೈದಹುಯ.
3 ಯೆಹೂದ ಪೆರೆಚ ಅಜು಼ ಜೆರಹಾನೊ ಬಾ (ಅವ್ಣಿ ಆಯ ತಾಮರ), ಪೆರೆಚ ಹೆಚ್ರೋನನೊ ಬಾ, ಹೆಚ್ರೋನ ಅರಾಮನೊ ಬಾ.
4 ಅರಾಮ ಅಮ್ಮಿನಾದಾಬನೊ ಬಾ, ಅಮ್ಮಿನಾದಾಬ ನಹಶೋನನೊ ಬಾ, ನಹಶೋನ ಸಲ್ಮೋನನೊ ಬಾ.
5 ಸಲ್ಮೋನಬಿ ರಾಹಾಬನೊ ಛಿಯ್ಯೊ ಬೋವಜ, ಬೋವಜಬಿ ರೂತ್‍ನೊ ಛಿಯ್ಯೊ ಓಬೇದ, ಓಬೇದ ಇಷಯನೊ ಬಾ.
6 ಇಷಯ ದಾವೀದ್‌ ರಾಜಾ಼ನೊ ಬಾ, ದಾವೀದ ಸೊಲೊಮೋನನೊ ಬಾ (ಸೊಲೊಮೋನ್ನಿ ಆಯ ಪಹಿಲೆ ಉರಿಯಾನಿ ಬಾವಣ್‍ ಹುಯಿರ‍್ಹೀಥಿ),
7 ಸೊಲೊಮೋನ ರೆಹಬ್ಬಾಮ್ನೊ ಬಾ, ರೆಹಬ್ಬಾಮ ಅಬೀಯನೊ ಬಾ, ಅಬೀಯ ಆಸನೊ ಬಾ.
8 ಆಸನ ಯೆಹೋಷಾಫಾಟನೊ ಬಾ, ಯೆಹೋಷಾಫಾಟ ಯೆಹೋರಾಮನೊ ಬಾ, ಯೆಹೋರಾಮ ಉಜ್ಜೀಯಾನೊ ಬಾ.
9 ಉಜ್ಜೀಯ ಯೋತಾಮನೊ ಬಾ, ಯೋತಾಮ ಆಹಾಜನೊ ಬಾ, ಆಹಾಜ ಹಿಜ್ಕೀಯಾನೊ ಬಾ.
10 ಹಿಜ್ಕೀಯ ಮನಸ್ಸೆನೊ ಬಾ, ಮನಸ್ಸೆ ಆಮೋನನೊ ಬಾ, ಆಮೋನ ಯೋಷೀಯಾನೊ ಬಾ.
11 ಯೋಷೀಯಾನ ಯೆಕೊನ್ಯ ಅಜು಼ ಇನ ಭೈಯೇ ಪೈದಹುಯ. ಯೆಹೂದ್ಯರ್‌ನ ಅದ್ಮಿನ ಬಾಬೇಲ್‌ನ ಧರ್‌ಲಿಗಯೂತೆ ಯೋ ವಖ್ಹತ್‌ಮ ಅವ್ಣೆ ಪೈದಹುಯುತೆ.
12 ಯೆಹೂದ್ಯರ್‌ನ ಅದ್ಮಿನ ಬಾಬೇಲ್‌ನ ಧರಿಲೀನ್ ಜಾ಼ವಾನ ಬಾದ್‌ಮ, ಪೈದಹುಯುತೆ ಇವ್ಣಿ ಖೇಣಿ, ಯೆಕೊನ್ಯ ಶೆಯಲ್ತಿಯೇಲ್‌ನೊ ಬಾ, ಶೆಯೆಲ್ತಿಯೇಲ್ ಜೆರುಬ್ಬಾಬೆಲ್‍ನೊ ಬಾ.
13 ಜೆರುಬ್ಬಾಬೆಲ್ ಅಬಿಹೂದನೊ ಬಾ, ಅಬಿಹೂದ ಎಲ್ಯಕೀಮ್‌ನೊ ಬಾ, ಎಲ್ಯಕೀಮ್ ಅಜೋರನೊ ಬಾ.
14 ಅಜೋರ ಸದೋಕನೊ ಬಾ, ಸದೋಕ ಅಖೀಮನೊ ಬಾ, ಅಖೀಮ ಎಲಿಹೂದನೊ ಬಾ.
15 ಎಲಿಹೂದ ಎಲಿಯಾಜರನೊ ಬಾ, ಎಲಿಯಾಜರ ಮತ್ತಾನನೊ ಬಾ, ಮತ್ತಾನ ಯಾಕೋಬನೊ ಬಾ.
16 ಯಾಕೋಬ ಯೋಸೇಫ್‌ನೊ ಬಾ, ಯೋಸೇಫ ಮರಿಯನೊ ಬಾವ್ರಿ. ಮರಿಯ ಯೇಸುನಿ ಆಯ, ಯೇಸುನ, ಬಚಾ಼ಡವಾಳೊ ಕ್ರಿಸ್ತ ಕರಿ ಚಿಕರ್ತುಥು.
17 ಅಬ್ರಹಾಮ್‍ಥು ಧರಿನ್ ದಾವೀದತೋಡಿ ಚೌ಼ಧ ಮುಂಡಿ, ದಾವೀದ್‌ಥು ಧರಿನ್ ಬಾಬೇಲ್‌ನ ಧರಿಲಿಗಯೂತೆ ಇವ್ಣಾತೋಡಿ ಚೌ಼ಧ ಮುಂಡಿ, ಬಾಬೇಲ್‌ನ ಧರಿಲಿಗಯೂತೆ ಹಿಜ್ಜಾ಼ಥು ಧರೀನ್ ಕ್ರಿಸ್ತಲಗು ಚೌ಼ಧ ಮುಂಡಿ.
ಯೇಸು ಕ್ರಿಸ್ತ ಪೈದಹುಯೊತೆ
(ಲೂಕ 2:1-7)
18 ಯೇಸು ಕ್ರಿಸ್ತ ಪೈದಹುಯೊತೆ ಕಿಮ್‌ಕತೊ; ಇನಿ ಆಯ ಮರಿಯನ ಯೋಸೇಫ್‌ಥಿ ಖ್ಹಗೈ ನಾಖಿರಾಖ್ಯೂಥು, ಕತೋಬಿ ಇವ್ಣೊ ವ್ಯಹಾ ಹುವಾನ ಅಗಾಡಿಸ್, ಯೋ ಪವಿತ್ರಾತ್ಮಾಥಿ ಬೇಜೂನಿ ಹುಯಿರ‍್ಹೀಥೀತೆ ಇನ ಮಾಲುಮ್‌ಪಡ್ಯು.
19 ಯೋಸೇಫ ಏಕ್‌ ನೀತಿವಾಳೊ ಅದ್ಮಿ ಹುಯಿರ‍್ಹೋಥೊ, ಇನಖ್ಹಾಜೆ ಯೋಸೇಫ ಅದ್ಮಿನ ಖ್ಹಾಮ್ಣೆ ಮರಿಯನಿ ಖ್ಹರಮ್‌ ನಾ ಕಾಡ್ಣು ಕರಿ, ಕಿನಾಬಿ ಮಾಲುಮ್‌ಪಡ್ಣುನಾತೆ ಇಮ್‌, ಖ್ಹಗೈನ ತೋಡಿನಾಕ್‌ಣು ಕರಿ ಥೊ.
20 ಯೋ ಇಮ್‌ ಸೋಚುಕರಾನಿ ವಖ್ಹತ್‌ಮ, ದೇವ್ನದೂತನೆ ಇನ ಖ್ಹೋಣ್ಯಮ ದೆಖೈನ್, “ದಾವೀದನೊ ಖಾಂದಾನ್‌ವಾಳ ಯೋಸೇಫ, ಮರಿಯನ ತಾರಿ ಬಾವಣ್‍ ಕರಿಲ್ಯವಾನ ಡರ್‌ನಕೊ. ಯೋ ಪವಿತ್ರಾತ್ಮಥೀಸ್ ಬೇಜೂನಿ ಹುಯಿರ‍್ಹೀಸ್ತೆ.
21 ಯೋ ಏಕ್‌ ಪರ್ಖ್ಹೊ ಲಡ್ಕಾನ ಜ಼ಣ್‌ಶೆ, ತೂ ಇನ ಯೇಸುಕರಿ ನಾಮ್ ಮ್ಹೇಲ್ನು. ಶನಕತೊ, ಯೋ ಇನ ಅದ್ಮಿಯೇವ್ನ ಪಾಪ್‌ಮಾಥು ಬಚಾ಼ವ್‍ಶೆ” ಕರಿ ಬೋಲ್ಯೊ.
22 ಪ್ರಭುನೆ ಪ್ರವಾದಿಯೇನ ಮ್ಹೋಡವಾಟೆ ಬೋಲಾಯೋತೆ ವಾತೆ ಖ್ಹಾರು ಚಾ಼ಲಾನಟೇಕೆ, ಆ ಖ್ಹಾರು ಚಾ಼ಲ್ಯುತೆ.
23 ಯೋ ವಾತೆ ಶಾತ್‌ಕತೊ, “ಹಂದೇಖೊ, ಏಕ್‌ ಕವಾರಿ ಬೇಜೂನಿ ಹುಯಿನ್, ಏಕ್‌ ಛಿಯ್ಯಾನ ಜ಼ಣ್‌ಶೆ. ಅಜು಼ ಇನ, ‘ಇಮ್ಮಾನುವೇಲ್’ ಕರಿ ನಾಮ್ ಮ್ಹೇಲ್‌ಶೆ!” ಇಮ್ಮಾನುವೇಲ್ ಕತೊ, “ದೇವ್ ಅಪ್ಣ ಜೋ಼ಡೆ ಛಾ಼” ಕರಿ.
24 ಯೋಸೇಫ ನಿಂದರ್‌ಮಾಥು ಹೊಷಾರಿ ಹುಯಿನ್ ಉಠಾನ ಬಾದ್‌ಮ, ದೇವ್ನದೂತನೆ ಬೋಲ್ಯೋತೆ ಇಮ್ಮಸ್, ಮರಿಯನ ವ್ಯಹಾ ಕರಿಲಿದೊ.
25 ಕತೋಬಿ ಮರಿಯ ಛಿಯ್ಯೊ ಪೈದಾಕರಾತೋಡಿ, ಯೋಸೇಫ ಇನಜೋ಼ಡೆ ಖ್ಹುತೊಕೊಯ್ನಿ. ಯೋಸೇಫ್‌ನೆ ಯೋ ಲಡ್ಕಾನ ಯೇಸು ಕರಿ ನಾಮ್ ಮ್ಹೇಲ್ಯೊ.