7
ಗುರುಗುರಬ್‌ಲ್ಯನೆ ಶಿಕಾಡ್ತು ಆಯೂತೆ
(ಮತ್ತಾಯ 15:1-9)
1 ಬಾದ್‌ಮ ಯೆರೂಸಲೇಮ್‌ಥು ಆಯುಹುಯು ಫರಿಸಾಯರ್‌ಬಿ, ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರೀಮ ಥೋಡು ಜ಼ಣು ಯೇಸುಕನ ಐನ್ ಅಶ್‌ಪಿಶ್‌ ಭರಾಯು.
2 ತದೆ ಇವ್ಣೆ ಯೇಸುನು ಶಿಷ್ಯರ್‌ಮ ಥೋಡುಜ಼ಣು ಅಶುದ್ದ ಹಾಥ್ಥಿ ಕತೊ ಗುರುಗುರಬ್‌ಲ್ಯಥಿ ಚಾ಼ಲ್ತುಆಯುತೆ ಇಮ್‌ ಪರಿಸಾಯರ್ ಖ್ಹಾರು ಶಿಕಾಡ್ತುಥೂತೆ ಇಮ್‌, ಹಾತ್‌ ಧೋಯುಕೊಂತೆ ಖಾಣು ಖಾತಾನ ದೇಖ್ಯು.
3-4 ಫರಿಸಾಯರ್ ಅಜು಼ ಯೆಹೂದ್ಯರ್‌ನ ಖ್ಹಾರುಜ಼ಣು, ಇವ್ಣ ಶಾಣವ್‌ಥಿ ಶಿಕ್ತು ಆಯುತೆ ಇಮ್‌, ಇವ್ಣೊ ಹಾತ್‌ ಬರೋಬರ್‌ನಿ ತರೀಕಾಥಿ ಧೊವಾಕೊಂತೆ ಖಾಣು ಕೋಖಾಯ್ನಿ. ಅಜು಼ ಬಜಾ಼ರೆ ಜೈ಼ನ್ ಆಯೂತೆ ಪಾಣಿ ಛಿಡ್ಕಿಲೇಯ್‌ ಕೊಂತೆ ಖಾಯಿಕೊಯ್ನಿ. ಅತ್ರೇಸ್ ಕಾಹೆತೆ ಇವ್ಣಾಮ ಗಿಳಾಖ್ಹ್, ಕಂಚ಼್‌ನೊತಾಂಬ್ಯೊ, ಹಂಡ್‌ಕು ಖ್ಹಾರು ಮಾಂಜಿನ್ ಧೊವಾನು ಅಜು಼ ಬಿಛಾ಼ವ್ಣಿನ ಧೊವಾನು, ಅಮ್ನು ಖ್ಹಾರು ಶಾಣಾವ್‌ಥಿ ಚಾ಼ಲ್ತು ಆಯುತೆ ಇನ ಬರೋಬರ್‌ಥಿ ಕರ್ತುಥು.
5 ಇನಾಖ್ಹಾಜೆ ಫರಿಸಾಯರ್ ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೇನೆ ಯೇಸುನ, “ತಾರು ಶಿಷ್ಯರ್‌ ಶಾಣವ್‌ನೆ ಶಿಕಾಡ್ತು ಆಯುತೆ ಆದತ್‌ನ ಇಮ್‌ ಶನ ಕೋ ಕರಾನಿ? ಚಾ಼ಲ್ತು ಆಯೂತೆ ಇಮ್‌ ಹಾತ್‌ ಧೊವಾಕೊಂತೆ ಶುದ್ದಕೊಂತೆ ಹಾತೇಖ್ಹು ಶನ ಖಾಣು ಖಾಸ್‌?” ಕರಿ ಫುಛಾ಼ಯು.
6 ಇಮ್‌ ಬೋಲ್ತಾನ ಯೇಸುನೆ, “ತುಮೆ ಠಗಾರು, ತುಮಾರಿ ಬಾರೇಮ ಯೆಶಾಯ ಪ್ರವಾದಿನೆ ಬರೊಬರ್‌ಥೀಸ್‌ ಪ್ರವಾದ್‌ನೆ ಕರಿರಾಖ್ಯೋಸ್. ಯೋ ಶಾತ್‌ಕತೊ,
‘ದೇವ್ನೆ ಬೋಲ್ಯೋಕಿ, ‘ಆ ಅದ್ಮಿಖ್ಹಾರು ವಾತೇಥಿ ಮನ ಖ್ಹರಾವಸ್‌,
ಕತೋಬಿ ಅವ್ಣೊ ದಿಲ್‌ ಮಾರೇಥಿ ದೂರ್ ಛಾ಼’
7 ಅದ್ಮಿನ ಖ್ಹೂಜ಼್‌ನಿತರ ಶಿಕಾಡ್ತು ಆಯೂತೆ ಇನಾಸ್ ದೇವ್ನಿ ಹುಕುಮ್‌ನಿಘೋಣಿ!
ಬೋಲಿಶಿಕಾಡವಾಳ ಅವ್ಣೆ ಮಾರ ಖ್ಹಾಮೆ ಆರಾದನೆ ಕರಾನು ಕಾಮ್ನಕೊಯ್ನಿ’ ಕರಿ ಯೋ ವಾತೆ ಹುಯಿರ‍್ಹೀಸ್!
8 “ತುಮೆ ದೇವ್ನಿ ಹುಕುಮ್‌ನ ಮ್ಹೇಲಿದಿನ್ ಅದ್ಮಿನೆ ಶಿಕಾಡ್ಯುತೆ ಇನ ಧರಿರಾಖ್ಯಾಸ್‌” ಕರಿ ಬೋಲ್ಯೊ.
9 ಯೇಸುನೆ ಬಿಜೂ಼ಬಿ ಇವ್ಣುನ, “ತುಮೆ ಕೆತ್ರೆ ಅಕ್ಲಿ ದೇಖೊ! ತುಮೆ ತುಮಾರಿ ಪದತ್ತಿನ ಪಾಡಿಚಾ಼ಲ್ನು ಕರಿ ದೇವ್ನೆ ದಿದೋತೆ ಹುಕುಮ್‌ನ ಕಾಡಿನಾಖಿದೆವೊಸ್‌ನಿ.
10 ‘ಆಯ-ಬಾನ ಮರ್ಯಾದಿ ದೇವ್ಣು ಕರಿ, ಅಜು಼ ಆಯನ ರ‍್ಹವೊ ಬಾನ ರ‍್ಹವೊ ಶಾಪ್ನ-ಶಬರ್‌ ದೆವಾಳಾನ ಮಾರಿನಾಖಿದೆವ್ಣು’ ಕರಿ ಮೋಶೆನೆ ಹುಕುಮ್‌ ದೀರಾಖ್ಯೊಸ್.
11 ಕತೋಬಿ ತುಮಾರಮ ಕೋಣ್‌ತೋಬಿ ಏಕ್‌ ಜ಼ಣು ಇನ ಆಯ-ಬಾನ ಶಾತ್ತೋಬಿ ದೀನ್, ಮದತ್‌ಕರ್‌ನು ಕರಿ ರ‍್ಹೇಸ್ತೆ ಯೋ ಖ್ಹಾರು ‘ಕೊರ್ಬಾನ್’ ಕರಿನಾಖ್ಯೊ” ಕರಿ ಬೋಲಿಲಿದೊತೊ,
12 ಯೋ ಅದ್ಮಿ ಇನ ಆಯನ ರ‍್ಹವೊ, ಬಾನ ರ‍್ಹವೊ ಬಿಜು಼ ಶಾತ್ಬಿ ದೇಕ್-ಭಾಲ್‌ ಕರ್ನುನಾತೆ ಇಮ್‌ ಭಾಮ್‌ಥಿ ಛು಼ಕಿಜಾ಼ಸ್.
13 ಅಮ್ ತುಮೆ ಏಕ್‌ಥಿ-ಏಕ್‌ ಬೋಲಿದೇತಾಹುಯಿನ್ ದೇವ್ನಿ ಪದತ್ತಿನ ಮರ್ಯಾದಿಕೊಂತೆ ಇಮ್‌ ಕರೋಸ್. ಅತ್ರೇಸ್ ಕಾಹೆತೆ ಅಮ್ನು ಖ್ಹಾರು ಬಿಜೂ಼ಬಿ ಕೈಯೆಕ್ಕಿ ಕರೋಸ್” ಕರಿ ಬೋಲ್ಯೊ.
ಅದ್ಮಿನ ಗಲೀಜ಼್ ಬಣಾವನು ರಾಛು಼.
(ಮತ್ತಾಯ 15:10-20)
14 ಬಾದ್‌ಮ ಯೇಸುನೆ ಅದ್ಮಿನಿ ಝೂ಼ಂಡ್‌ನ ಪಾಛೊ಼ ಖನ್ನೆ ಬುಲೈನ್ ಇವ್ಣುನ, “ಖ್ಹಾರು ಕಾನ್‌ ಜೋ಼ಡಿನ್‌ ಮಾರಿ ವಾತೆನ ಖ್ಹಮ್‌ಜೊ಼, ಅಜು಼ ಪರ್ಖಿಲೆವೊ.
15 ಭಾರ್‌ಥು ಮಹಿ ಜೈ಼ನ್ ಏಕ್‌ ಅದ್ಮಿನ ಪದತ್ತಿನಿಘೋಣಿ ಮೈಲುಕರಾನು ಏಕ್‌ಬಿ ಕೊಯ್ನಿ. ಕತೋಬಿ ಏಕ್‌ ಅದ್ಮಿನ ಮಹಿತು ಭಾರ್‌ ನಿಕ್ಳಾನುಸ್‌ ಇನ ಮೈಲುಬಣಾವಸ್‌”
16 “ಖ್ಹಮ್‌ಜಾ಼ನ ಕಾನ್‌ ಉಶೇತೊ ಖ್ಹಮ್‌ಜಾ಼ದೆ” ಕರಿ ಬೋಲ್ಯೊ.
17 ಬಾದ್‌ಮ ಯೇಸು ಖ್ಹಾರ ಅದ್ಮಿನ ಮ್ಹೆಂದಿನ್ ಘರ್‌ಮ ಆವಾದಿನ್, ಇನ ಶಿಷ್ಯರ್‌ನೆ ಯೋ ಮತ್ಲಬ್‌ಥಿ ಬೋಲ್ಯೊತೆ ವಾತೆನಿ ಬಾರೇಮ ಇನ ಫುಛಾ಼ಯು.
18 ತದೆ ಯೇಸುನೆ ಇವ್ಣುನ, “ಬಿಜಾ಼ನಿ ಘೋಣಿ ತುಮುನಾಬಿ ಎತ್ರೆ ಮಾಲುಮ್‌ ಪಡಾಕೊಯ್ನಿಕಿ ಶು? ಭಾರ್‌ಥು ಖಾವಾನು ರಾಛು಼ ಅದ್ಮಿನ ಮಹಿ ಜೈ಼ನ್ ಇನ ಗಲೀಜ಼್ ಕರಾಕೊಯ್ನಿ, ಕರಿ ತುಮೂನ ಮಾಲುಮ್‌ ಪಡ್ಯುಕೊಯ್ನಿಕಿ ಶು?
19 ಭಾರ್‌ಥು ಅದ್ಮಿನ ಮಹಿ ಜಾ಼ವಾನು ಖ್ಹಾರು ಇನ ದಿಲ್ಮ ಜಾ಼ಯಿಕೊಂತೆ, ಪೇಟ್‌ಮ ಜೈ಼ನ್ ಬಾದ್‌ಮ ಭಾರ್‌ಮ ನಿಕ್ಳಿಜಾ಼ಸ್, ಯೋ ಖ್ಹಾರು ಯೋ ಅದ್ಮಿನ ಗಲೀಜ಼್ ಕರಾಕೊಯ್ನಿ” ಕರಿ ಬೋಲ್ಯೊ. (ಅಮ್ ಬೋಲಾಥಿ, ಖಾವಾನು ಖ್ಹಾರುಸ್ ರಾಛು಼ ಶುದ್ದಕರಿ ಯೇಸುನೆ ವತಾಳಿದಿದೊ).
20 ಯೇಸುನೆ ಬಿಜೂ಼ಬಿ ಇವ್ಣುನ, “ಏಕ್‌ ಅದ್ಮಿನ ಮಹಿತು ನಿಕ್ಳಾನುಸ್‌ ಯೋ ಅದ್ಮಿನ ಗಲೀಜ಼್ ಕರಾಸ್.
21 ಮಹಿತು ಕತೊ ಅದ್ಮಿನ ದಿಲ್ನ ಮಹಿತು ಆವಾತೆ ಖರಾಬ್‌ಸೋಚ್‌, ಬಿಜೇಕ್‌ಜ಼ಣಿನ ಖ್ಹಂಗ್‌ಕರಾನು , ಚೋ಼ರಿ, ಖೂನ್‌ಕರಾನು,
22 ವ್ಯಬಿಚಾರ್, ಪೈಶಾನಿ ಲಾಲಚ್‌, ಬಿಜಾ಼ನ ಖರಾಬ್ ಕರಾನು, ಠಗಾವಾನು, ಪಾಪೇಲಿಆದತ್‌, ಬಳಾಪೊ ಕರಾನು, ಗಾಳೆ ದ್ಯವಾನು, ಹಂಕಾರ್, ಝ಼ಲಕ್‌ಭರ್‍ಯಾನಿ ಘೋಣಿ ಕರಾನು, ಅಮ್ನು ಖ್ಹಾರು ಖರಾಬ್ ಖ್ಹಯಾಲ್ ಭಾರ್‌ ನಿಕ್ಳಾಸ್‌.
23 ಅಮ್ನು ಖರಾಬ್ ಖ್ಹಾರು ಅದ್ಮಿನ ಮಹಿಥು ನಿಕ್ಳಿನ್, ಯೋ ಅದ್ಮಿನ ಗಲೀಜ಼್ ಕರಿದೇಸ್” ಕರಿ ಬೋಲ್ಯೊ.
ಏಕ್‌ ತಯೇಡಾನಿ ವಿಶ್ವಾಸ್
(ಮತ್ತಾಯ 15:21-28)
24 ಹಿಜ್ಜಾ಼ಥೊ ಯೇಸು ನಿಕ್ಳಿನ್ ತೂರ್ ಕರಿ ಬೋಲಾನು ಖ್ಹಯೇರ‍್ನ ಖನ್ನೇನು ತಬರ್‌ಖಾನ ಗಯೊ. ಹಿಜ್ಜಾ಼ ಏಕ್‌ ಘರ್‌ಮ ಥೊ, ಯೋ ಹಿಜ್ಜಾ಼ ಛಾ಼ ಕರಿ ಕಿನಾಬಿ ನಾ ಮಾಲುಮ್‌ಪಡ್ಣು ಕರಿ ಥೊ, ಕತೋಬಿ ಯೋ ಮಾಲುಮ್‌ ಪಡಾಕೊಂತೆ ರ‍್ಹವಾನ ಕೋ ಹುಯುನಿ.
25 ಒಗ್ಗಿಸ್‌ಮ ಏಕ್‌ ತಯೇಡನೆ ಯೇಸು ಹಾ ಛಾ಼ ಕರಿ ಖ್ಹಮ್‌ಜಿನ್‌, ಐನ್ ಯೇಸುನ ಗೋಡಾನ ಖ್ಹಾಮ್ಣೆ ಪಡಿ. ಇನಿ ಛೋ಼ರಿನ ಭೂತ್ ಧರಿರಾಖ್ಯುಥು.
26 ಯೋ ತಯೇಡ ಪರೈ ಜಾ಼ತ್‌ವಾಳಿ ಹುಯಿರ‍್ಹೀಥಿ. ಯೋ ಸಿರಿಯ ತಬರ್‌ಖಾನು ಸುರೋಪೊಯಿನಿಕ್ಯಮ ಪೈದಹುಯಿತೆ ಏಕ್‌ ಗ್ರೀಕ್‌ವಾಳಿ ಹುಯಿರ‍್ಹೀಥಿ. ಯೋ ತಯೇಡ ಇನಿ ಛೋ಼ರಿನ ಧರಿರಾಖ್ಯುಥೂತೆ ಭೂತ್ ಕಾಡ್ಣು, ಕರಿ ಯೇಸುನ ಗಿಂಗಾವಲಗಿ.
27 ತದೆ ಯೇಸುನೆ ಇನ, “ಪಹಿಲೆ ಲಡ್ಕಾ ಪೇಟ್‌ಭರೀನ್‌ ಖವಾದೆ. ಲಡ್ಕಾ ಖಾವಾನು ರೋಟಾವ್ನ ಪಾಡೀನ್, ಕುತ್‌ರ‍್ಯಾನ ಚೆಲ್ಕಾನ ನಾಖಾನು ಬರೋಬರ್‌ಕೊಯ್ನಿ” ಕರಿ ಬೋಲ್ಯೊ.
28 ತದೆ ಯೋ ತಯೇಡಾನೆ, “ಹೋಲಾ ಪ್ರಭು, ತೋಬಿ ಲಡ್ಕಾ ಖಾಣು ಖವಾನಿ ಮೇಜ್‌ಪರ್‌ಥು ನಾಖಿದೇಯಿತೆ ರೋಟಾನ ಟುಕ್ಡಾನ ಹೇಟ್‌ ರ‍್ಹೇಯ್ತೆ ಕುತ್‌ರ‍್ಯಾನ ಚೆಲ್ಕ ಖಾಸ್ನಿ” ಕರಿ ಬೋಲಖ್ಹತರ್‌,
29 ಯೇಸುನೆ ಇನ, “ತುನೆ ಆ ವಾತ್ ಬೋಲಿತೆ ಇನಖ್ಹಾಜೆ, ತಾರಿ ಛೋ಼ರಿನ ಧರಿರಾಖ್ಯುಥೂತೆ ಭೂತ್ ಮ್ಹೆಂದಿದು! ಘರೆ ಜಾ಼” ಕರಿ ಬೋಲ್ಯೊ.
30 ಯೋ ಇನ ಘರೆ ಜೈ಼ನ್ ದೇಖಾತೊ ಇನಿ ಛೋ಼ರಿ ಬಿಛಾ಼ವ್ಣಿಪರ್ ಅರಾಮ್‌ಥಿ ಖ್ಹುತೀಥಿ; ಇನ ಧರಿರಾಖ್ಯುಥೂತೆ ಭೂತ್ ನಿಕ್ಳಿ ಗಯುಥು.
ಯೇಸುನೆ ಭೈರೂಬಿ ತೊತ್‌ಳ್ಯು ಹುಯಿರ‍್ಹುಥೂತೆ ಏಕ್‌ ಅದ್ಮಿನ ಗುಣ್‌ಕರ‍್ಯೋತೆ
31 ಬಾದ್‌ಮ ಯೇಸು ಯೋ ತೂರ್‌ನ ಖನ್ನೇನು ತಬರ್‌ಖಾನ ಮ್ಹೇಲಿನ್ ಸೀದೋನ್‌ನ ವಾಟೆಕರಿ ದೆಕಪೊಲಿ ತಬರ್‌ಖಾಮಾಕರಿ ಹುಯಿನ್ ಗಲಿಲಾಯ ದರ‍್ಯಾವ್‌ಕನ ಆಯೊ.
32 ತದೆ ಥೋಡು ಅದ್ಮಿನೆ ಭೈರೂಬಿ ತೊತ್‌ಳ್ಯು ಹುಯಿರ‍್ಹುಥೂತೆ ಏಕ್‌ ಜ಼ಣಾನ ಯೇಸುಕನ ಬುಲೈಲಾಯಿನ್‌, “ಅನ ಉಪ್ಪರ್ ತಾರೊ ಹಾತ್‌ ಮ್ಹೇಲ್‌” ಕರಿ ಇನ ಗಿಂಗೈಲಿದು.
33 ತದೆ ಯೇಸುನೆ ಇನ, ಅದ್ಮಿನಿ ಭೀಡ್‌ಮಾಥು ಏಕ್‌ ಬಾಜು಼ಮ ಬುಲೈಲಿಜೈ಼ನ್, ಯೇಸುನೆ ಇನಿ ಅಂಗ್‌ಳಿನ ಯೋ ಅದ್ಮಿನ ಕಾನ್‌ಮ ಘಾಲಿನ್, ಥೂಕಿನ್, ಇನಿ ಜೀಬ್‌ನ ಲಗಾಡಿನ್
34 ಉಪ್ಪರ್ ಆಕಾಶ್‌ಭಣಿ ದೇಖಿನ್‌, ಜೋ಼ರೇಥಿ ದಮ್‌ ಲೀಮ್ಹೇಲಿನ್‌, ಇನ ‘ಎಪ್ಫಥಾ’ ಕರಿ ಬೋಲ್ಯೊ, ಅಮ್‌ಕತೊ “ಉಖ್‌ಡೈ ಜಾ಼!” ಕರಿ.
35 ಅಮ್ ಬೋಲ್ತಾಸ್‌ನ ಇನೊ ಕಾನ್‌ ಖ್ಹಮಜ಼್ ಪಡಾಲಗ್ಯು, ಅಜು಼ ಇನಿ ಜೀಬ್‍ನಿ ಭಂದಣ್ ಛು಼ಟಿಗಿ, ಯೋ ಬರೋಬರ್‌ಥಿ ವಾತ್ ಬೋಲಾಲಗ್ಯೊ.
36 ತದೆ ಯೇಸುನೆ ಇವ್ಣುನ, “ಹಾ ಚಾ಼ಲ್ಯುತೆ ಬಾರೇಮ ಕಿನಾಬಿ ನಾ ಬೋಲ್‌ನು” ಕರಿ ಝೇತೈನ್‌ ಬೋಲ್ಯೊ; ತೋಬಿ ಇನೆ ಎತ್ರೆ ಝೇತೈನ್‌ ಬೋಲ್ಯೊತೋಬಿ, ಇನೇಥಿಬಿ ಜಾ಼ಖ್ಹತ್ ಇವ್ಣೆ ಫೈಲೈದಿದು.
37 ಅಜು಼ ಖ್ಹಮ್‌ಜಾ಼ವಾಳು ಖ್ಹಾರು ಘಣು ಅಶ್ಚರ್ಯ ಹುಯಿಜೈ಼ನ್‌, “ಯೇಸು ಖ್ಹಾರು ಅಛ್ಛು಼ಸ್ ಕರಾಸ್! ಭೈರು ಖ್ಹಾರಾನ ಕಾನ್‌ ಖ್ಹಮ್‌ಜಾ಼ವಾನಿಘೋಣಿ ಅಜು಼ ಮುಕ್ಕಾವ್ನ ಖ್ಹಾರು ವಾತೆ ಬೋಲಾನಿ ಘೋಣಿ ಕರಾಸ್!” ಕರಿ ಬೋಲಿಲಿದು.