5
ಯೇಸುನೆ ಪಹಿಲ ಶಿಷ್ಯರ್‌ನ ಬುಲಾಯೋತೆ
(ಮತ್ತಾಯ 4:18-22; ಮಾರ್ಕ 1:16-20)
1 ಏಕ್‌ ದನ್ನೆ ಯೇಸು ಗೆನೆಸರೇತ್‍ ದರ‍್ಯಾವ್‍ನ ಕನಾರಿಕನ ಭೀಯೋಥೊ. ತದೆ ಅದ್ಮಿಖ್ಹಾರು ದೇವ್ನಿ ವಚನ್ ಖ್ಹಮ್‌ಜಾ಼ನಖ್ಹಾಜೆ ಧಕೇಲ-ಧಕೇಲಿ ಹೋತುಹುಯಿನ್, ಇನ ಅಶ್‌ಪಿಶ್ ಆಯಿನ್ ಭರಾಯು
2 ತದೆ ದರ‍್ಯಾವ್‍ನಿ ಕನಾರಿಕನ ಭೀರಿಥೀತೆ ಬೇ ಡೋಣ್ಣಾ ಯೇಸುನೆ ದೇಖ್ಯೊ. ಮಾಛ್ಲು಼ ಖ್ಹಾವಾಳು ಖ್ಹಾರು ಡೋಣ್‌ಮಾಥು ಭಾರ್ ಆಯಿನ್, ಇವ್ಣು-ಇವ್ಣು ಜಾ಼ಳು ಧೊವ್‍ಕರ್ತೂಥು.
3 ಯೋ ಡೋಣೆಮಾಥು ಸೀಮೋನ್ನಿ ಏಕ್‌ ಡೋಣ್‌ಮ ಯೇಸು ಚ಼ಢೀನ್, ಕನಾರೆಕಂಥು ಜ಼ರದೂರ್ ಡೋಣ್ಣಾ ಧಕೇಲ್‍ ಕರಿ ಇನ ಬೋಲಿಲಿದೊ. ಬಾದ್‌ಮ ಡೋಣ್‌ಮ ಬೇಶಿನ್, ಯೋ ಅದ್ಮಿನಿ ಭೀಡ್‌ಣ ವಚನ್ನ ಬೋಲಿದಿದೊ.
4 ವಚನ್ ಬೋಲಿದ್ಯವಾನ ಬಾದ್‌ಮ ಯೇಸುನೆ ಸೀಮೋನ್ನ, “ಗಧಾರ್ ಪಾಣಿನಿ ಝ಼ಗೋಮ ಡೋಣ್ಣಾ ಚ಼ಲೈನ್, ಮಾಛ್ಲು಼ ಧರಾನ ಖ್ಹಾಜೆ ತುಮಾರು ಜಾ಼ಳು ನಾಖೊ” ಕರಿ ಬೋಲ್ಯೊ.
5 ತದೆ ಸೀಮೋನ್ನೆ, “ಗುರು, ಹಮೆ ರಾತ್ ಅಖ್ಖು ಮ್ಹಿನತ್ ಕರ‍್ಯಾತೋಬಿ, ಏಕ್‌ ಮಾಛ್ಲು಼ಬಿ ಕೋಮಳ್ಯುನಿ, ಕತೋಬಿ ತಾರಿ ವಾತ್‌ಪರ್, ಮೇ ಜಾ಼ಳು ನಾಖುಸ್” ಕರಿ ಬೋಲ್ಯೊ.
6 ತದೆ ಇವ್ಣೆ ಜಾ಼ಳಾವ್‍ನ ನಾಖ್ಯು. ತದೆ ಮಾಛ಼್‌ಲಾನಿ ಗುಡ್ಡಾರಾಶೆ ಜಾ಼ಳಾವ್‍ಮ ಖ್ಹಪ್‌ಡ್ಯು. ಅನೇಥಿ ಇವ್ಣು ಜಾ಼ಳು ಫಾಟಾನ ಐಲಾಗ್ಯೂಥು.
7 ತದೆ ಇವ್ಣೆ ಬಿಜಿ ಡೋಣ್‌ಮ ಥೂತೆ ಇವ್ಣು ಜೋ಼ಡೆವಾಳನ ಹಾತ್‌ನೊ ಝಾ಼ಲೊ ಕರೀನ್, ಮದತ್ನಖ್ಹಾಜೆ ಬುಲಾಯು. ಇವ್ಣೆ ಆಯಿನ್ ಭೇ ಡೋಣ್‌ಮ ಮಾಛ್ಲು಼ ಭರಾಖ್ಹತರ್, ಯೋ ಡೋಣೆ ಡುಬಾನಿಘೋಣಿ ಹುವ್ವಾಲಗ್ಯೂಥು.
8 ಅನ ದೇಖಿನ್ ಸೀಮೋನ್ ಪೇತ್ರನೆ ಯೇಸುನ ಗುಡ್‌ಘ್ಯಪರ್ ಪಡೀನ್, “ಪ್ರಭು ಮನ ಮ್ಹೆಂದಿನ್ ಜಾ಼! ಮೇ ಪಾಪಿ ಅದ್ಮಿ ಹುಯಿರ‍್ಹೋಸ್!” ಕರಿ ಬೋಲ್ಯೊ.
9 ಸೀಮೋನ್ನಾಬಿ ಇನ ಜೋ಼ಡ್ಮ ಥೂತೆ ಬಿಜ಼ ಖ್ಹಾರಾನಾಬಿ, ಇವ್ಣೆ ಧರ‍್ಯೂತೆ ಮಾಛ಼್‌ಲಾವ್ನ ದೇಖಿನ್ ಆಶ್ಚರ್ಯ ಹುಯು.
10 ಸೀಮೋನ್ನ ಜೋ಼ಡ್‍ವಾಳ ಹುಯಿರ‍್ಹಾಥಾತೆ ಜೆಬೆದಾಯನ ಛಿಯ್ಯಾ ಯಾಕೋಬ ಅಜು಼ ಯೋಹಾನನೆಬಿ ಇಮ್ಮಸ್ ಆಶ್ಚರ್ಯಖಾದು. ತದೆ ಯೇಸುನೆ ಸೀಮೋನ್ನ, “ಡರ್‌ನಕೊ, ಆಜ಼್‌ಥು ತೂ ಅದ್ಮಿನ ಖ್ಹಾವಾನು ಕಾಮ್ ಕರೀಶ್!” ಕರಿ ಬೋಲ್ಯೊ.
11 ಇವ್ಣೆ ಇವ್ಣು ಡೋಣೇನ ಕನಾರಿಕನ ಲಯಿನ್, ತಮಾಮ್‌ ರಾಛಾ಼ನ ಮ್ಹೆಂದಿನ್, ಯೇಸುನ ಕೇಡೆ ಗಯ.
ಯೇಸುನೆ ಏಕ್‌ ಅದ್ಮಿನ ಅಛ್ಛು಼ ಕರ‍್ಯೊತೆ
(ಮತ್ತಾಯ 8:1-4; ಮಾರ್ಕ 1:40-45)
12 ಏಕ್‌ ದನ್ನೆ ಯೇಸು ಏಕ್‌ ಗಾಮ್ಮ ಥೊ. ಹಿಜ್ಜಾ಼ಸ್ ಆಂಗ್‌ತನ್‌ ಅಖ್ಖುಸ್ ಖೋಡ್‍ ಲಾಗಿಹುಯು ಏಕ್‌ ಅದ್ಮಿ ಥೂ. ಯೋ ಯೇಸುನ ದೇಖಿನ್, ಇನಖ್ಹಾಮ್ಣೆ ಆಡು ಪಡೀನ್, “ಪ್ರಭು, ತೂ ಮನ್ ಕರ‍್ಯೋತೊ ಮನ ಶುದ್ದಿ ಕರೆಜಾ಼ಯ್! ಕರಿ ಗಿಂಗೈಲಿದೊ.
13 ಯೇಸುನೆ ಇನೊ ಹಾತ್ನ ಭಡೈನ್, ಇನ ಛೀಮಿನ್‌, “ಮನ ಮನ್ ಛಾ಼, ಶುದ್ದಿ ಹೂ” ಕರಿ ಬೋಲ್ಯೊ. ತದ್‌ನು ತದ್ದೇಸ್ ಯೋ ಅದ್ಮಿನೊ ಖೋಡ್‍ ಖ್ಹಾರು ನಿಕ್ಳಿಗಯು.
14 ತದೆ ಯೇಸುನೆ ಇನ, “ತೂ ಕಿನಾಬಿ ನಕೊ ಬೋಲಿಶ್, ಕತೋಬಿ ಯಾಜಕಕನ ಜೈ಼ನ್ ತಾರು ಆಂಗ್‌ತನ್ನ ವತಾಳ್, ಮೋಶೇನೆ ಹುಕುಮ್ ದೀರಾಖ್ಯೋತೆ ಕಾಣ್ಕೆದೀನ್ ತಾರಿ ಅಶ್ನಾನ್‍ಧಾನ್ನ ಚ಼ಲಾವ್‍, ಅದ್ಮಿನ ಆ ಸಾಕ್ಷಿ ಹುಯಿರ‍್ಹವಾದೆ” ಕರಿ ಹುಕುಮ್ ದಿದೊ.
15 ತೋಬಿ ಯೇಸುನಿ ಬಾರೇಮ ಅಜೂ಼ಬಿ ಜಾ಼ಖ್ಹತ್ ಫೈಲೈಗಯು, ಅದ್ಮಿಖ್ಹಾರು ಇನಿ ವಚನ್ ಖ್ಹಮ್‌ಜಾ಼ನಖ್ಹಾಜೆ ಅಜು಼ ಇವ್ಣು-ಇವ್ಣು ರೋಗ್‌ ಅಛ್ಛು಼ ಕರೈಲ್ಯವಾನಟೇಕೆ, ಝೂ಼ಂಡೆ-ಝೂ಼ಂಡೆ ಹುಯಿನ್ ಇನಾಕನ ಆಯು.
16 ಕತೋಬಿ ಯೇಸುತೊ ಉಜ್ಜಾ಼ಡಿ ಝ಼ಗೋಮ ಜೈ಼ನ್, ಪ್ರಾರ್ಥನೆ ಕರುಕರ್ತೊಥೊ.
ಯೇಸುನೆ ಲಕ್ವೊ ಮಾರಿರಾಖ್ಯುಥೂತೆ ಏಕ್‌ ಅದ್ಮಿನ ಅಛ್ಛು಼ ಕರ‍್ಯೊತೆ
(ಮತ್ತಾಯ 9:1-8; ಮಾರ್ಕ 2:1-12)
17 ಏಕ್‌ ದನ್ನೆ ಯೇಸು ವಚನ್ ಬೋಲಿ ದೆವ್‍ಕರ್‌ತೋಥೊ. ಗಲಿಲಾಯ ಅಜು಼ ಯೂದಾಯ ತಬರ್‌ಖಾನು ತಮಾಮ್‌ ಗಾಮ್‌ಥು ಅಜು಼ ಯೆರೂಸಲೇಮ್‌ಥು ಆಯುಹುಯು ಫರಿಸಾಯರ್‌ಬಿ, ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಹಿಜ್ಜಾ಼ ಬೆಠೂಥು. ರೋಗ್‌-ರಾಯೊ ಅಛ್ಛು಼ ಕರಾನವಾಖ್ಹ್‌ತೆ ಪ್ರಭುನಿ ಶಕತ್ ಯೇಸುಮ ಥೀ.
18 ತದೆ ಥೋಡ ಪರ್ಖ್ಹಾವ್‍ನೆ ಏಕ್‌ಜ಼ಣೊ ಲಕ್ವೊ ಮಾರ‍್ಯುಹುಯಾನ ಬಿಛಾ಼ವ್ಣಿಪರ್ ಪಾಡಿಲಿನ್ ಆಯು. ಕತೋಬಿ ಇನಮಹಿ ಲೀಜೈ಼ನ್, ಯೇಸುನ ಖ್ಹಾಮ್ಣೆ ಮ್ಹೇಲ್ನುಕರಿ ಕರ‍್ಯುತೋಬಿ,
19 ಅದ್ಮಿನಿ ಭೀಡ್ ಥೀತೆ ಇನಾಖ್ಹಾಜೆ, ಇನಮಹಿ ಲೀಜಾ಼ವಾನ ವಾಟ್‌ಕೊಂತೆ ದೇಖಿನ್, ಇನ ಪಾಡಿಲಿನ್ ಛ಼ತ್‍ನ ಉಪ್ಪರ್ ಜೈ಼ನ್, ಛ಼ತ್‍ನ ಕಾಡಿನ್, ಇನ ಬಿಛಾ಼ವ್ಣಿ ಖ್ಹಮೇದ್ ಯೇಸುನ ಖ್ಹಾಮ್ಣೆ ಉತಾರ‍್ಯು.
20 ಯೇಸುನೆ ಇವ್ಣಿ ವಿಶ್ವಾಸ್‌ನ ದೇಖಿನ್, ಯೋ ಲಕ್ವೊ ಮಾರಿರಾಖವಾಳನ, “ದೇಕ್‌ಲಾ ದೋಸ್, ತಾರು ಪಾಪ್‌ಖ್ಹಾರು ಮಾಪ್‌ ಹುಯಿಗಯು” ಕರಿ ಬೋಲ್ಯೊ.
21 ತದೆ ಮೋಶೇನು ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್ ಖ್ಹಾರು ಇವ್ಣ-ಇವ್ಣಾಮಸ್‌, “ಆ ಅದ್ಮಿ ಕೋಣ್ ಉಶೆ, ದೇವ್ನ ವಿರೋದ್ ವಾತೆ ಬೋಲಾಸ್ತೆ? ದೇವ್ನ ಮ್ಹೇಲಿನ್ ಬಿಜು಼ ಕಿನೇಥಿ ಪಾಪ್‌ಖ್ಹಾರು ಮಾಪ್‌ ಕರಾನ ಹುವಾನು? ಕರಿ ಸೋಚಾಲಗ್ಯು.
22 ಕತೋಬಿ ಯೇಸುನೆ ಇವ್ಣೆ ಇಮ್‌ ಸೋಚುಕರಾತೆ ಮಾಲುಮ್‌ ಕರೀಲಿನ್‌ ಇವ್ಣುನ, “ತುಮೆ ತುಮಾರ ಮನ್‌ಮ ಅಮ್ ಶನ ಸೋಚೋ಼ಸ್ತೆ?
23 ಕೆಹು ಶುಲ್ಬ? ತಾರು ಪಾಪ್‌ಖ್ಹಾರು ಮಾಪ್‌ ಹುಯಿಗು ಕರಿ ಬೋಲಾನುಕಿ? ಉಠಿ ಚಾ಼ಲ್ ಕರಿ ಬೋಲಾನು?
24 ಕತೋಬಿ ಜ಼ಮೀನ್‌ಪರ್ ಪಾಪ್‌ಖ್ಹಾರು ಮಾಪ್‌ ಕರಾನ ಅದ್ಮಿನೊ ಛಿಯ್ಯಾನ ಅದಿಕಾರ್ ಛಾ಼ ಕರಿ ಬೋಲಾನು ತುಮೂನ ಮಾಲುಮ್‌ ಪಡ್ಣು, ಕರಿ ಬೋಲಿನ್ ಯೋ ಲಕ್ವೊ ಮಾರಿರಾಖವಾಳ ಭಣಿ ದೇಖಿನ್, ‘ಉಟ್ ತಾರಿ ಬಿಛಾ಼ವ್ಣಿನ ಪಳ್ಳಿನ್ ಘರೆ ಜಾ಼ ಕರಿ ತುನ ಬೋಲುಸ್” ಕರಿ ಬೋಲ್ಯೊ.
25 ಇಮ್‌ ಬೋಲ್ತಾಸ್‌ನ ಯೋ ಇವ್ಣ ಖ್ಹಾಮ್ಣೆಸ್ ಉಠೀನ್, ಯೋ ಖ್ಹುತೊಥೋತೆ ಬಿಛಾ಼ವ್ಣಿನ ಪಳ್ಳಿನ್, ದೇವ್ನ ಖ್ಹರಾವ್‌ತೊ ಹುಯಿನ್, ಘರೆ ಗಯೊ.
26 ದೇಖ್ಯೂತೆ ತಮಾಮ್‌ ಅದ್ಮಿನೆ ಘಣು ಆಶ್ಚರ್ಯಖಾದು! ಅಜು಼ ಡರ್‌ಥಿ ಭರೈನ್ ದೇವ್ನ ಖ್ಹರಾಯು, ಅಜು಼ ಬೋಲ್ಯೂಕಿ, “ಆಜ಼್ ಹಮೆ ಆಶ್ಚರ್ಯನು ಬಾರೇಮ ದೇಖ್ಯ!”
ಯೇಸುನೆ ಲೇವಿನ ಬುಲಾಯೋತೆ
(ಮತ್ತಾಯ 9:9-17; ಮಾರ್ಕ 2:13-17)
27 ಅನ ಬಾದ್‌ಮ, ಯೇಸು ಹಿಜ್ಜಾ಼ಥೊ ಬಹರ್ ಜೈ಼ನ್, ಶುಂಕ ಮಾಂಗಾನಿ ಝ಼ಗೋಪರ್‌ ಬೆಠೊಥೋತೆ ಏಕ್‌ ಜ಼ಣಾನ ದೇಖ್ಯೊ. ಇನು ನಾಮ್ ಲೇವಿ. ಯೇಸುನೆ ಇನ, “ಮಾರ ಪೀಠೆ ಆವ್” ಕರಿ ಬುಲಾಯೊ.
28 ಇನೆ ಉಠೀನ್, ಖ್ಹಾರುಸ್ ಮ್ಹೆಂದಿನ್, ಯೇಸುನ ಪೀಠೆ ಗಯೊ.
29 ಬಾದ್‌ಮ ಲೇವಿನೆ ಇನ ಘರ್‌ಮ ಯೇಸುನಖ್ಹಾಜೆ, ಏಕ್‌ ಮೋಟಿ ಮಿಝ಼್‌ವಾನ್ ಪಿಕಾಯೊ. ಹಿಜ್ಜಾ಼ ಶುಂಕ ವಶೂಲ್ ಕರಾವಾಳು ಅಜು಼ ಬಿಜು಼ ಅದ್ಮಿಖ್ಹಾರು ಝೂ಼ಂಡ್‌ ಭರೈನ್ ಇವ್ಣ ಜೋ಼ಡೆ ಖಾಣನ ಬೆಠೂಥು.
30 ಅನ ದೇಖಿನ್, ಫರಿಸಾಯರ್ ಅಜು಼ ಇವ್ಣಿ ಝೂ಼ಂಡ್‌ನ ಮಳಿಹುಯು ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿ ಖ್ಹಾರು ಯೇಸುನ ಶಿಷ್ಯರ್‌ಪರ್ ಮಶ್ಲಾ ಮಾರ್‌ತುಹುಯಿನ್, “ತುಮೆ ಶುಂಕ ಮಾಂಗವಾಳನ ಅಜು಼ ಪಾಪಿ ಖ್ಹಾರಾನ ಜೋ಼ಡೆ ಶನ ಖಾಣುಖಾಸ್ತೆ?” ಕರಿ ಬೋಲ್ಯು.
31 ಅನ ಖ್ಹಮ್‌ಜಿನ್‌ ಯೇಸುನೆ ಇವ್ಣುನ, “ಅಛ್ಛು಼ರ‍್ಹಾವಾಳನ ವೈದ್ಯನಿ ಜ಼ರೂರತ್ ಕೋ ಪಡಾನಿ, ಕತೋಬಿ ರೋಗ್‌ರಾಯಮ ರ‍್ಹಾವಾಳನ ವೈದ್ಯ ಹೋಣು ಪಡಾಸ್‌” ಕರಿ ಬೋಲ್ಯೊ.
32 ದೇವ್‌ಭಣಿ ಫರೊ ಕರಿ,ನೀತಿವಾಳ ಅದ್ಮಿಯೇನ ಬುಲಾವನ ಕಾಹೆ, ಪಾಪಿ ಖ್ಹಾರಾನ ಬುಲಾವನ ಆಯೋತೆ” ಕರಿ ಜವಾಬ್‌ ದಿದೊ.
ಉಪವಾಸ್‌ನಿ ಬಾರೇಮ ಪುಛಾ಼ಯೂತೆ
(ಮತ್ತಾಯ 9:14-17; ಮಾರ್ಕ 2:18-22)
33 ಥೋಡು ಅದ್ಮಿ ಯೇಸುನ, “ಯೋಹಾನನು ಶಿಷ್ಯರ್‌ ಖ್ಹಾರು ಘಡಿಕೇಡೆ ಉಪವಾಸ್ ರ‍್ಹೇಸ್‌ ಅಜು಼ ಬಿಂತಿನಿ ಪ್ರಾರ್ಥನೆ ಕರ್ತು ರ‍್ಹೇಸ್‌, ಇಮ್ಮಸ್ ಫರಿಸಾಯರ್‌ನು ಶಿಷ್ಯರ್‌ಬಿ ಉಪವಾಸ್ ಕರಾಸ್, ಕತೋಬಿ ತಾರು ಶಿಷ್ಯರ್‌ ಕದೇಬಿ ಖಾವಣ್‌ಪಿವಾಣ್‌ ಕರ್ತು ರ‍್ಹೇಸ್‌ನಿ” ಕರಿ ಬೋಲ್ಯು.
34 ತದೆ ಯೇಸುನೆ ಇವ್ಣುನ, “ವ್ಯಹಾನ ಛ಼ತ್‍ಮ ಅದ್ಮಿನ ಜೋ಼ಡೆ ನೌಶೊ ರ‍್ಹವಾನಿ ವಖ್ಹತ್‌ಮ ಇವ್ಣುನ ಉಪವಾಸ್ ಕರಾವಾನ ತುಮಾರೇಥಿ ಉಶೇಕಿ ಶು? ಕೊಯ್ನಿ!
35 ಕತೋಬಿ ನೌಶೊನ ಇವ್ಣಾಕಂಥು ದೂರ್ ಲೀಜಾ಼ವಾನ ದನ್ ಆವ್‌ಶೆ, ತದೆ ಇವ್ಣೆ ಉಪವಾಸ್ ಕರ್ಶೆ” ಕರಿ ಜ಼ವಾಬ್‌ದಿದೊ.
36 ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ: ಯೋ ಶಾತ್‌ಕತೊ, ಕೋಣ್‌ಬಿ ನವು ಲುಂಗ್ಡಾನು ಏಕ್‌ ಥಿಗ್‍ಳಾನ ಫಾಡಿನ್, ಫಾಟಿಹುಯು ಜೂ಼ನ ಲುಂಗ್ಡಾಕೇಡೆ ಲಗಾಡಿನ್ ಶಿವಾಕೊಯ್ನಿ. ಇಮ್‌ ಶಿವ್ಯುತೊ, ಯೋ ನವು ಲುಂಗ್ಡಾನ ಫಾಡಿನ್ ಖರಾಬ್ ಕರಾದಾಖ್ಹಲ್, ಎತ್ರೇಸ್ ಕಾಹೆತೆ ನವ ಲುಂಗ್ಡಾನು ಥಿಗ್‌ಳು, ಯೋ ಜೂ಼ನ ಲುಂಗ್ಡಾಪರ್‌ ಖ್ಹಾಜ಼ಕೊಯ್ನಿ.
37 ಕೋಣ್‌ಬಿ ಜೂ಼ನಿ ಚಾ಼ಂಬ್ಡಾನಿ ತಿತ್ತಿಯೇಮ ನವು ದ್ರಾಕ್ಷಿನು ರಖ್ಹ್‌ನ ಭರಿನ್ ಮ್ಹೇಲಾಕೊಯ್ನಿ. ಶನಕತೊ ಯೋ ನವು ದ್ರಾಕ್ಷಿನು ರಖ್ಹ್‌, ಜೂ಼ನು ಚಾ಼ಂಬ್ಡಾನಿ ತಿತ್ತಿಯೇನ ಫೋಡಿನ್ ಭಾರ್ ರಂಚೈ಼ಜಾ಼ವಾನು ಕಾಹೆತೆ, ತಿತ್ತಿಯೇಬಿ ಖರಾಬ್ ಹುಯಿಜಾ಼ಸ್.
38 ಇನಖ್ಹಾಜೇಸ್ ನವು ದ್ರಾಕ್ಷಿನು ರಖ್ಹ್‌ನ ನವಿ ಚಾ಼ಂಬ್ಡಾನಿ ತಿತ್ತಿಯೇಮ ಭರಿ ಮ್ಹೇಲಾಸ್!
39 ಜೂ಼ನು ದ್ರಾಕ್ಷಿನು ರಖ್ಹ್‌ ಪೀದುಹುಯು ಅದ್ಮಿ, ನವು ದ್ರಾಕ್ಷಿನು ರಖ್ಹ್‌ ಹೋಣು ಕರಿ ಬೋಲಾಕೊಯ್ನಿ. ಯೋ ಜೂ಼ನು ದ್ರಾಕ್ಷಿನು ರಖ್ಹ್‌ನಾಸ್ ಅಛ್ಛು಼ಕರಿ ಬೋಲಾಸ್.