18
ಏಕ್‌ ಮುಂಡಚ್ಚಿ ಅಜು಼ ನಯ್ಯೊನಿ ಬಾರೇಮಾನು ಮತ್ಲಬ್‌ನಿ ಖೇಣಿ
1 ತದೆ ಯೇಸುನೆ ಖಟು ನಾ ಖಾಣುತೆ, ಹಮೇಶ ಪ್ರಾರ್ಥನೆ ಕರ್ತುರ‍್ಹೇವ್ಣು ಕರಿ ವತಾಳಾನಟೇಕೆ, ಇನ ಶಿಷ್ಯರ್‌ನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
2 ಯೋ ಶಾತ್‌ಕತೊ, “ಏಕ್‌ ಗಾಮ್ಮ ಏಕ್‌ ನಯ್ಯೊ ಥೊ. ಯೋ ದೇವ್‍ನಾಬಿ ದೇಖಿನ್ ಡರ್‌ತೋಥೊ ಕೊಯ್ನಿ, ಅಜು಼ ಅದ್ಮಿನ ಮಜೂ಼ರ್‌ ಕರ್ತೊಥೊ ಕೊಯ್ನಿ.
3 ಯೋಸ್ ಗಾಮ್ಮ ಏಕ್‌ ಮುಂಡಚ್ಚಿ ತಯೇಡ ಥೀ. ಯೋ ಘಡಿಕೇಡೆ ಇನಾಕನ ಐನ್, ‘ಮಾರೊ ನ್ಯಾವ್‍ಫೇಡೈನ್, ಮಾರ ದುಶ್‌ಮನ್‌ಥಿ ಮನ ಬಚಾ಼ಡ್‍’ ಕರಿ ಬೋಲ್‍ತಿರ‍್ಹೇತೀಥಿ.
4 ಥೋಡ ದನ್ ಇನೆ ಧ್ಯಾನ್ ಕೋ ದಿದೋನಿ. ಕತೋಬಿ ಬಾದ್‌ಮ ಇನು ಯೋಸ್, ‘ಮೇ ದೇವ್‍ನಾಬಿ ದೇಖಿನ್ ಡರಾವಾಳೊ ಕಾಹೆ, ಅದ್ಮಿನಾಬಿ ಮಜೂ಼ರ್‌ ಕರಾವಾಳೊ ಕಾಹೆ,
5 ತೋಬಿ ಆ ಮುಂಡಚ್ಚಿ ತಯೇಡ ಘಡಿಕೇಡೆ ಆಯಿನ್, ಮನ ಬೋಲ್‍ತಿರ‍್ಹೇಸ್ತೆ ಇನಖ್ಹಾಜೆ, ಮೇ ಅನಿ ನ್ಯಾವ್ ಫೇಡೈನಾಖುಸ್. ನತರ್‌ಕಿ ಆ ಘಡಿಕೇಡೆ ಆಯಿನ್ ಮನ ಖ್ಹತಾವ್‌ಶೆ!’ ಕರಿ ಬೋಲಿಲಿದೊ.”
6 ಅಜು಼ ಪ್ರಭುನೆ, “ಯೋ ಠಗಾರು ನೈಯಾನೆ ಬೋಲ್ಯೋತೆ ಇನ ಖ್ಹಮ್‌ಜೊ಼.
7 ದೇವ್ನೆ ಚೂ಼ಣ್ಯೋತೆ ಅದ್ಮಿ ರಾತ್-ದನ್ ಇನ ಮದತ್‌ಖ್ಹಾಜೆ ಬಿಂತಿಕರ‍್ಯೊತೊ, ಯೋ ಇವ್ಣಿ ಬಾರೇಮ ದೇರ್‌ಕರ‍್ಯುತೋಬಿ ಇವ್ಣಿ ನ್ಯಾವ್‌ನ ಫೇಡವಸ್‍ಕೊಂತೆ ರ‍್ಹಿಶೇಕಿ ಶು? ಯೋ ಇವ್ಣಿ ಮದತ್ ಕರಾನ ವೇರಸ್‌ ಕರ್ಶೆ ಕೊಯ್ನಿ.
8 ಮೇ ತುಮೂನ ಬೋಲುಸ್ಕಿ, ಯೋ ಒಗ್ಗಿಸ್‌ಮ ಇನ ಅದ್ಮಿ ಖ್ಹಾರಾನು ನ್ಯಾವ್ ಫೇಡ್‌ಶೆ. ಅಮ್ ರ‍್ಹಯುತೋಬಿ, ಅದ್ಮಿನೊ ಛಿಯ್ಯೊ ಆವ್‌ಶೇತೆ ತದೆ, ಜ಼ಮೀನ್‌ಪರ್ ವಿಶ್ವಾಸ್‌ನ ದೇಕ್‌ಶೇಕಿ ಶು?” ಕರಿ ಬೋಲ್ಯೊ.
ಪರಿಸಾಯರ್‌ವಾಳೊ ಅಜು಼ ಶುಂಕ ವಶೂಲ್ ಕರಾವಾಳಾನಿ ಬಾರೇಮಾನು ಮತ್ಲಬ್‌ನಿ ಖೇಣಿ
9 ಅತ್ರೇಸ್ ಕಾಹೆತೆ, ಹಮೇಸ್ ನೀತಿವಾಳ ಕರಿ ಭರೋಖ್ಹೊ ಕರೀನ್, ಬಿಜ಼ ಖ್ಹಾರಾನ ಕಡ್‌ತೇಲ್‌ನಿಮತ್ ದೇಖಾತೆ ಇವ್ಣುನಾಬಿ, ಯೇಸುನೆ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
10 ಏಕ್‌ ಹಲ್ಲ ಬೇ ಜ಼ಣ ಪ್ರಾರ್ಥನೆ ಕರ‍್ನು ಕರಿ ಮಂದಿರ್‌ನ ಗಯ, ಏಕ್‌ ಜ಼ಣೊ ಫರಿಸಾಯರ್‌ವಾಳೊ ಅಜು಼ ಬಿಜೇಕ್ ಜ಼ಣೊ ಶುಂಕ ವಶೂಲ್ ಕರಾವಾಳೊ.
11 ಫರಿಸಾಯರ್‌ವಾಳೊ ಭೀರಿನ್, ಪ್ರಾರ್ಥನೆ ಕರಾನಿ ವಖ್ಹತ್‌ಮ, ‘ಓ ದೇವ್, ಲೂಟಿ ಕರಾವಾಳು, ಠಗಾವವಾಳು, ವ್ಯಬಿಚಾರ್ ಕರಾವಾಳು ಅಲಕ್ ಅದ್ಮಿವೊನಿಘೋಣಿ ಮೇ ಕಾಹೆ. ಆ ಶುಂಕ ವಶೂಲ್ ಕರಾವಾಳಾನಿ ಘೋಣಿಬಿ ಮೇ ಕಾಹೆತೆ, ಇನಖ್ಹಾಜೆ ತುನ ಧನ್ಯವಾದ್ ಕರುಸ್.
12 ವಾರಾನ ಬೇಹಲ್ಲ ಉಪವಾಸ್ ರ‍್ಹವುಸ್, ಅಜು಼ ಮೇ ಕಮಾವ್‌ಸ್ತೆ ಖ್ಹಾರಾಸ್‌ಮಾಬಿ ದಖ್ಹ್‌ಮ ಏಕ್‌ ಭಾಗ್‌ ದೆವುಸ್’ ಕರಿ ಬೋಲ್ಯೊ.
13 ಕತೋಬಿ, ಯೋ ಶುಂಕ ವಶೂಲ್ ಕರಾವಾಳೊ ದೂರ್ ಭೀರಿನ್, ಆಬ್‍ಭಣಿ ಡೋಳಪಾಡಿ ದೇಖಾನಾಬಿ ಮನ್‌ಕೊಂತೆ, ಛಾ಼ತಿ ಕೂಟ್‌ತೊ ಹುಯಿನ್, ‘ದೇವ್, ಪಾಪಿ ಹುಯಿರ‍್ಹೋತೆ ಮಾರಪರ್ ಗೋರ್‌ ಕರ್‌’ ಕರಿ ಬೋಲ್ಯು.
14 ಮೇ ತುಮೂನ ಬೋಲುಸ್ಕಿ, ಆ ಶುಂಕ ವಶೂಲ್ ಕರಾವಾಳುಸ್ ದೇವ್ನ ಡೋಳಾಮ ಬರೊಬರ್‌ ಕರಿ ಬೋಲೈಲಿನ್, ಘರೆ ಗಯೊ. ಕತೋಬಿ ಯೋ ಪರಿಸಾಯವಾಳೊ ಇಮ್‌ ಕೊಗಯೋನಿ. ಇನುಯೋಸ್ ಮೋಟೊಕರಿ ಬೋಲೈಲ್ಯವಾಳೊ ಹರೇಕ್‌ಜ಼ಣೊ ಹೇಟು ಹುಯಿಜಾ಼ಶೆ, ಇನುಯೋಸ್ ಹೇಟುಕರಿ ಬೋಲೈಲ್ಯವಾಳೊ ಯೋ ಮೋಟೊ ಹುಯಿಜಾ಼ಶೆ ಕರಿಬೋಲ್ಯೊ.
ಯೇಸುನೆ ಅಡ್ಡಾಣಿ ಲಡ್ಕಾವ್‍ನ ಆಶೀರ್ವಾದ್‌ ಕರ‍್ಯೊತೆ
(ಮತ್ತಾಯ 19:13-15; ಮಾರ್ಕ 10:13-16)
15 ಥೋಡು ಅದ್ಮಿ ಇವ್ಣ ಅಡ್ಡಾಣಿ ಲಾಡ್ಕಾವ್‍ಪರ್‌ ಯೇಸುನೊ ಹಾತ್ ಮ್ಹೆಲಾವ್ಣು ಕರಿ ಇನಾಕನ ಲಾಯು. ಕತೋಬಿ ಅನ ದೇಖಿನ್ ಶಿಷ್ಯರ್‌ಖ್ಹಾರು ಇವ್ಣುನ ಗುರ್‌ಕಾಯು.
16 ಕತೋಬಿ ಯೇಸುನೆ ಲಡ್ಕಾವ್‍ನ ಇನ ಖನ್ನೆ ಬುಲೈನ್, “ಅಡ್ಡಾಣಿ ಲಡ್ಕಾವ್‍ನ ಮಾರಕನ ಆವಾನ ಮ್ಹೇಲೊ, ಇವ್ಣುನ ಭಿರಾಕೊ ನಕೊ, ಶನಕತೊ ದೇವ್‌ನು ರಾಜ್ಯ ಅಮ್‌ನಾಸ್‌ವಾಳಾನು.
17 ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಕೋಣ್ ಅಡ್ಡಾಣಿ ಲಡ್ಕಾನಿ ಘೋಣಿ ದೇವ್ನಿ ರಾಜ್ಯನ ನಾ ಮಾನ್ಯೂತೊ, ಇವ್ಣೆ ಇನಮಹಿ ಕೋಸ್‌ಜಾ಼ಶೇನಿ” ಕರಿ ಬೋಲ್ಯೊ.
ಏಕ್‌ ಶೌಕಾರ್ ಅದ್ಮಿನಿ ಬಾರೇಮ
(ಮತ್ತಾಯ 19:16-30; ಮಾರ್ಕ 10:17-31)
18 ಯೆಹೂದ್ಯರ್‌ನೊ ಏಕ್‌ ಅದಿಕಾರಿ ಯೇಸುನ, “ಅಛ್ಛೊ಼ ಗುರು, ಹಮೇಶಾನಿ ಜಿ಼ಂದ್‌ಗಿ ಮನ ಮಳ್‌ಣುಕತೊ, ಮೇ ಶಾತ್‌ ಕರ‍್ನು? ಕರಿ ಪುಛಾ಼ಯೊ.
19 ತದೆ ಯೇಸುನೆ ಇನ, “ಮನ ಅಛ್ಛೊ಼ ಕರಿ ಶನ ಬೋಲಾಸ್ತೆ? ದೇವ್ ಎಕ್ಕಸ್ ಜ಼ಣೊ ಅಛ್ಛೊ಼ ಪಣ್ಕಿ ಬಿಜು಼ ಕೋಣ್‌ಬಿ ಅಛ್ಛು಼ ಕಾಹೆ.
20 ವ್ಯಬಿಚಾರ್ ನಾ ಕರ‍್ನು, ಖೂನಿ ನಾಹೋಣು, ಚೋ಼ರಿ ನಾ ಕರ‍್ನು, ಝೂ಼ಟಿ ಇಂಜಾ಼ಮ್ ನಾ ಲಗಾಡ್‌ಣು, ತಾರ ಆಯ ಬಾನ ಮರ್ಯಾದಿ ದೇವ್ಣು ಕರಿ ಛಾ಼ತೆ ದೇವ್ನಿ ಹುಕುಮ್‌ ಖ್ಹಾರಿ ತುನ ಮಾಲುಮ್‌ ಛಾ಼ನಿ.” ಕರಿ ಬೋಲ್ಯೊ
21 ತದೆ ಯೋ ಅದ್ಮಿ, “ಮೇ ಅಡ್ಡಾಣಿಪರ್‌ಥೋಸ್‌ ಆ ಖ್ಹಾರು ಪಾಡಿ ಚಾ಼ಲ್ತೊ ಐರ‍್ಹೋಸ್” ಕರಿ ಫರೈನ್ ಬೋಲ್ಯೊ.
22 ಅನ ಖ್ಹಮ್‌ಜಿನ್‌, ಯೇಸುನೆ ಇನ, “ತೂ ಕರ್ನುತೆ ಬಿಜ್ಜೇಕ್‌ ಕಾಮ್ ಛಾ಼, ತಾರಕನ ಛಾ಼ತೆ ಖ್ಹಾರುಸ್‌ ಶೊತ್ನ ವೇಚಿನ್, ಆವಸ್ತೆ ಪೈಶಾನ ಗರೀಬ್‌ನ ದೆ. ತದೆ ಪರ್‌ಲೋಕ್‌ಮ ತುನ ಶೊತ್ ರ‍್ಹಿಶೆ; ಅಜು಼ ತೂ ಆಯಿನ್, ಮಾರ ಪೀಠೆ ಆವ್” ಕರಿ ಬೋಲ್ಯೊ.
23 ಕತೋಬಿ ಯೋಅದ್ಮಿ ಘಣು ದನ್-ದೌಲತ್‌ವಾಳೊ ಹುಯಿರ‍್ಹೊಥೋತೆ ಇನಖ್ಹಾಜೆ, ಆ ವಾತೆನ ಖ್ಹಮ್‌ಜೀನ್‌, ಘಣು ದುಖ್‌ ಖಾದೊ.
24 ತದೆ ಯೇಸುನೆ ಇನ ದೇಖಿನ್, ಧನ್‌ದೌಲತ್‌ವಾಳು ಅದ್ಮಿ ದೇವ್ನಿ ರಾಜ್ಯಮ ಜಾ಼ವಾನು ಕೆತ್ರೆಕ್ಕಿ ಮುಶ್ಕಿಲ್!
25 ಶೌಕಾರ್ ಅದ್ಮಿ ದೇವ್ನಿ ರಾಜ್ಯಮ ಜಾ಼ವಾಥೀಬಿ, ಊಟ್‍ ಖ್ಹುಯಿನ ಡೋಳವಾಟೆ ಪೇಶಿಜಾ಼ವನು ಶುಲ್ಬ!” ಕರಿ ಬೋಲ್ಯೊ.
26 ಯೇಸುನಿ ಆ ವಾತೆನ ಖ್ಹಮ್‌ಜ್ಯೂತೆ ಇವ್ಣೆ, “ಅಮ್ ರ‍್ಹಯುತೊ, ಕಿನ ರಕ್ಷಣೆ ಮಳ್‌ಶೆ” ಕರಿ ಪುಛಾ಼ಯು.
27 ಯೇಸುನೆ ಇವ್ಣುನ, “ಅದ್ಮಿನ ಹಾತೆ ಹುವ್ವಾಕೊಂತೆ ಕಾಮ್ ದೇವ್ನ ಹಾತೆ ಹುವ್ವಾಸ್‌” ಕರಿ ಬೋಲ್ಯೊ.
28 ತದೆ ಪೇತ್ರನೆ ಯೇಸುನ, “ಹಂದೇಕ್‌! ಹಮೆ ಹಮಾರು ಘರ್‌ಖ್ಹಾರು ಮ್ಹೆಂದಿನ್, ತಾರ ಪೀಠೆ ಐರ‍್ಹಾಸ್‍ನಿ!” ಕರಿ ಬೋಲ್ಯೊ.
29 ಅನ ಖ್ಹಮ್‌ಜಿನ್‌ ಯೇಸುನೆ ಇವ್ಣುನ, “ತುಮೂನ ಖ್ಹಾಚ ಬೋಲುಸ್ಕಿ, ಕೋಣ್ ದೇವ್ನಿ ರಾಜ್ಯನಖ್ಹಾಜೆ, ಘರ್‌ನ ರ‍್ಹವೊ, ಬಾವಣ್ಣ ರ‍್ಹವೊ, ಭೈಯೇನ ರ‍್ಹವೊ, ಆಯ-ಬಾನ ರ‍್ಹವೊ, ಲಡ್ಕಾನ ರ‍್ಹವೊ ಮ್ಹೆಂದಿದ ಉಶೇತೊ,
30 ಇನ ಆ ಜ಼ಗ್‌ಮಾಸ್ ಇನೇಥಿಬಿ ಜಾ಼ಖ್ಹತ್ ಮಳ್‌ಶೆ, ಅಜು಼ ಉಳ್ಯಾವತೆ ಜಂಗ್‌ಮ ಹರ್‌ಹಮೇಶ ರ‍್ಹವಾಳಿ ಜಿ಼ಂದ್‌ಗಿ ಮಳ್‌ಶೆ” ಕರಿ ಬೋಲ್ಯೊ.
ಯೇಸುನೆ ಇನಿ ಮರಣ್ಣಿ ಬಾರೇಮ ತಿನ್ನೇಹಲ್ಲ ಬೋಲ್ಯೋತೆ
(ಮತ್ತಾಯ 20:17-19; ಮಾರ್ಕ 10:32-34)
31 ಯೇಸುನೆ ಇನ ಭಾರ ಜ಼ಣ ಶಿಷ್ಯರ್‌ನ ಎಕಾಡಿ ಬುಲೈಲಿನ್, “ಖ್ಹಮ್‌ಜೊ಼! ಅಪ್ಣೆ ಯೆರೂಸಲೇಮ್‌ನ ವಳ್ಯಾಜಯ್ಯೇಸ್‌, ಅದ್ಮಿನೊ ಛಿಯ್ಯಾನಿ ಬಾರೇಮ ಪ್ರವಾದಿಯೇನೆ ಲೀಖಿರಾಖ್ಯುತೆ ಇಮ್ಮಸ್, ಹಿಜ್ಜಾ಼ ಚಾ಼ಲ್‌ಷೆ.
32 ಇನ ಪರೈ ಜಾ಼ತ್‌ವಾಳಾನ ಹಾತ್‌ಮ ದಿನಾಕ್‌ಶೆ, ಇವ್ಣೆ ಇನ ಚಿಂಘಾವ್‌ಶೆ, ಇನಿ ಖ್ಹರಮ್‌ ಕಾಡ್‌ಶೆ, ಅಜು಼ ಇನಾಪರ್‌ ಥೂಕ್‌ಶೆ.
33 ಇವ್ಣೆ ಇನ ಕೊಳ್ಡೇಥಿ ಮಾರ್‌ಶೆ ಅಜು಼ ಮಾರಿನಾಕ್‌ಶೆ, ಕತೋಬಿ ತೀನ್ನೊ ದನ್ಮ ಯೋ ಪಾಛೊ಼ ಜಿವ್ತೊಹುಯಿನ್ ಉಠಿ ಆವ್‌ಶೆ” ಕರಿ ಬೋಲ್ಯೊ.
34 ಕತೋಬಿ ಅನಾಮ ಏಕ್‌ ವಾತೇನಾಬಿ ಶಿಷ್ಯರ್‌ ಪರ್‌ಖ್ಯುಕೊಯ್ನಿ; ಶನಕತೊ ಆ ವಾತೆನಿ ಮತ್ಲಬ್‌ನ ಇವ್ಣೇಥಿ ಲಪೈರ‍್ಹೂಥು, ಅಜು಼ ಯೇಸು ಶನಿ ಬಾರೇಮ ಬೋಲುಕರಾಸ್‌ ಕರಿ ಇವ್ಣುನ ಮಾಲುಮ್‌ಪಡ್ಯು ಕೊಯ್ನಿ.
ಯೇಸುನೆ ಧರಮ್ ಮಾಂಗವಾಳ ಕಾಣಾನ ಗುಣ್‌ಕರ‍್ಯೋತೆ
(ಮತ್ತಾಯ 20:29-34; ಮಾರ್ಕ 10:46-52)
35 ಯೇಸು ಯೆರಿಕೋನ ಖನ್ನೆ ಆವ್‍ಕರಾನಿ ವಖ್ಹತ್‌ಮ, ಹಿಜ್ಗಾ಼ ಮಾರಗ್‌ನ ಶೇಡೆ ಬೇಶಿನ್, ಏಕ್‌ ಕಾಣು ಧರಮ್ ಮಾಂಗುಕರ್ತುಥು.
36 ಅದ್ಮಿನಿ ಭೀಡ್ ವಳಿಜಾ಼ತಿಥೀತೆ ಖ್ಹಮ್‌ಜಿನ್‌, ಇನೆ, “ಆ ಶಾತ್‌ ಚಾ಼ಲುಕರಾಸ್ತೆ?” ಕರಿ ಪುಛಾ಼ಯೊ.
37 ಇವ್ಣೆ ಇನ, “ನಜ಼ರೇತ್‌ನೊ ಯೇಸು, ಆ ವಾಟೆ ಕರಿ ವಳೇಜಾ಼ಸ್” ಕರಿ ಬೋಲ್ಯು.
38 ತದೆ ಯೋ ಕಾಣು ಜೋ಼ರೆಥಿ ಚಿಕ್ರಿನ್, “ಯೇಸು! ದಾವೀದ್‌ನ ಛಿಯ್ಯಾ! ಮಾರಪರ್ ಗೋರ್‌ಕರ್‌” ಕರಿ ಬೋಲ್ಯೊ.
39 ಖ್ಹಾಮ್ಣೆ ವಳ್ಯುಜಾ಼ತುಥೂತೆ ಅದ್ಮಿ ಇನ, “ಖ್ಹೊಪ್‌ ರ‍್ಹೆ” ಕರಿ ಬೋಲಿನ್ ಗುರ್‌ಕಾಯು. ಕತೋಬಿ ಯೋ ಬಿಜೂ಼ಬಿ ಜೋ಼ರೇಥಿ ಚಿಕ್ರಿನ್, “ದಾವೀದ್‌ನ ಛಿಯ್ಯಾ! ಮಾರಪರ್ ಗೋರ್‌ ಕರ್‌” ಕರಿ ಬೋಲ್ಯೊ.
40 ತದೆ ಯೇಸುನೆ ಭೀರಿನ್, ಯೋ ಕಾಣಾನ ಇನಾಕನ ಬುಲಾವೊ ಕರಿ ಹುಕುಮ್‌ ದಿದೊ. ಯೋ ಕಾಣು ಖನ್ನೆ ಆವಾದಿನ್, ಯೇಸುನೆ ಇನ,
41 “ಮೇ ತುನ ಶಾತ್‌ ಕರ‍್ನು ಕರಿ ತಾರಿ ಆಖ್ಹ್?” ಕರಿ ಪುಛಾ಼ಯೊ.
ತದೆ ಇನೆ, “ಮನ ಪಾಛು಼ ದೆಖಾವಾನಿ ಘೋಣಿ ಕರ್ಲಾ ಪ್ರಭು” ಕರಿ ಬೋಲ್ಯೊ.
42 ಯೇಸುನೆ ಇನ, “ತುನ ದೆಖಾವಾದೆ, ತಾರಿ ವಿಶ್ವಾಸ್‌ಥೀಸ್‌ ತುನ ಅಛ್ಛು಼ಹುಯು” ಕರಿ ಬೋಲ್ಯೊ.
43 ತದ್‌ನು-ತದ್ದೇಸ್ ಇನ ದೆಖಾಯು. ಯೋ ದೇವ್ನಿ ಸ್ತುತಿ ಕರ್ತೊಹುಯಿನ್, ಯೇಸುನ ಪೀಠೆ ಗಯೊ. ಅದ್ಮಿಖ್ಹಾರು ಚಾ಼ಲ್ಯುತೆ ಇನ ದೇಖಿನ್, ದೇವ್ನಿ ಸ್ತುತಿಕರ‍್ಯು.