ಲೂಕನು ಬರೆದ ಯೇಸುವಿನ ಸುವಾರ್ತೆ
ಲೂಕನೆ ಲೀಖ್ಯೋತೆ ಯೇಸುನಿ ಅಛ್ಛಿ ಸಮಾಚಾರ್
ಮಾಲುಮ್ ಕರಾನು
ಲೂಕನೆ ಲೀಖ್ಯೋತೆ ಸುವಾರ್ತೆ ನವಿ ಒಪ್ಪಂದಾಮ ಛಾ಼ತೆ ಯೇಸುಕ್ರಿಸ್ತನು ಜಿವ್ಣನಿಬಾರೇಮ ಲೀಖೈರುತೆ ಚಾರ್ ಪುಸ್ತಕ್‌ಮ ಆ ಪುಸ್ತಕಾಬಿ ಏಕ್ ಹುಯಿರ‍್ಹುಸ್. ಆ ಹರೇಕ್ ಪುಸ್ತಕಾನಾಬಿ ಸುವಾರ್ತೆಕರಿ ಬೋಲಸ್. ಆನಿಮತ್ಲಬ್ ‘ಅಛ್ಛಿ ಸಮಾಚಾರ್’.
ಆ ಅಖ್ಖು ಯೇಸುನಿ ಮರಣ್ಣಿ ಬಾದ್‌ಮ ಮತ್ತಾಯ, ಮಾರ್ಕ, ಲೂಕ ಅಜು಼ ಯೋಹಾನ ಇವ್ಣೇಥಿ ಲೀಖೈರ‍್ಹುಸ್. ಲೂಕನೆ ಖಲಿ ಯೇಸುನಿ ಜಿವ್ಣಾನಿ ಖೇಣಿನ ಎತ್ರೇಸ್ ಲೀಖಿರಾಖ್ಯೊಕೊಯ್ನಿ, ಕತೋಬಿ ಇನೆ ಯೇಸುನಿ ಮರಣ್ಣ ಅಜು಼ ಮರೀನ್ ಜಿವ್‍ಯೊತೆ ಇನ ಬಾದ್‌ಮ ಇನ ಶಿಷ್ಯರ್‌ಖ್ಹಾರು ಕರ‍್ಯುತೆ ಥೋಡಿ ಸಮಾಚಾರ‍್ನ ಬಾರೇಮ ಲೀಖಿರಾಖ್ಯುಸ್. ಯೋ ಪುಸ್ತಕಾನು ನಾಮ್ ಅಪೊಸ್ತಲರ‍್ನು ಕಾಮ್‍ಅಖ್ಖು.
ಲೂಕನೆ ಲೀಖ್ಯೋತೆ ಸುವಾರ್ತೆ ಯೋಸ್ ವೇಳ್ಮ ಲೀಖೈರುಸ್ಕರಿ ಬೋಲಾನು ಖ್ಹಾಚು಼ಕೊಯ್ನಿ. ಕತೋಬಿ ಘಣೇಥಿ ಘಣು ಲೀಖಾಪಟ್‌ವಾಳು ಕ್ರಿಸ್ತಪೈದ ಹುಯಿನ್ 70 ವರಖ್ಹ್‌ನ ಬಾದ್‌ಮ ಲೀಖೈರು ಉಷೆಕರಿ ಮಾನಿಲೇಸ್.
ಲೀಖಾಪಟ್‍ವಾಳೊ ಲೂಕ ಏಕ್ ಪಂಡಿತ್ ಹುಯಿರ‍್ಹೋಥೊ. ಇನೆ ಲೀಖ್ಯೋತೆ ಪರಕ್ಮ ಅಜು಼ ಲಿಖಾಪಟ್‍ನಿ ವಾತೆ ಯೋ ಏಕ್ ಲೀಖಾಪಟ್‍ವಾಳೊ ಹುಯಿರ‍್ಹೊಥೊಕರಿ ವತಾಳಿಲೇಸ್. ಲೂಕನೆ ಅಜೂ಼ಬಿ ಯೇಸುನಿ ಜಿವ್ಣನಿಬಾರೇಮ ಬರೋಬರ್‌ಥಿ ಲೀಖಾನ ಕೋಶಿಶ್ ಕರಿರಾಖ್ಯೋಸ್ ತದೆ ಚಾ಼ಲಿತೆಅಖ್ಖು ಚಾಲ್ಯುಕಿಮ್ಕಿ ತಿಮ್ಮಸ್ ಬೋಲಿರಾಖ್ಯೊಸ್ ಇನಖ್ಹಾಜೆ ಫಡವಾಳನ ಅನೇಥಿ ಫಾಯಿದೊ ಹುವಾನಿಘೊಣಿ ಕರ‍್ಯೊ.
ಯೋ ಯೆಹೂದ್ಯ ಹುಯಿರ‍್ಹೊಥೊಕೊಯ್ನಿ ಕೊಲೊಸ್ಸೆ 4:10-14 ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿವೋಬಿ ಮಾಲುಮ್ ಕರಿಲ್ಯವಾನಿ ಪರಕ್ಮ ಇನೆ ಲೀಖಿರಾಖ್ಯೊಸ್. ಇನೆ ಯೆಹೂದ್ಯರ್‌ನಿ ಪದತ್ತಿನಿ ಬಾರೇಮ ಛೋ಼ಡಿ ಬೋಲಿರಾಖ್ಯೋತೆ ಇನ ದೇಖ್ಯುತೊ ಅಪ್ಣುನ ಮಾಲುಮ್‍ಪಡಸ್ ಲೂಕ 1:4.
ಲೂಕನೆ ಲೀಖ್ಯೋತೆ ಸುವಾರ್ತೆ ಮತ್ತಾಯ ಅಜು಼ ಮಾರ್ಕನೆ ಲೀಖ್ಯೋತೆ ಸುವಾರ್ತೆನಿಘೊಣಿಸ್ ಛಾ಼, ಶನಕತೊ ಯೋ ಅಖ್ಖು ಎಕ್ಕಸ್‍ಪರಕ್ಮ ಛೋ಼ಡಿ ಬೋಲೈರ‍್ಹುಸ್. ಆ ತೀನ್ ಪುಸ್ತಕಮಾಬಿ ಲೂಕನೆ ಬ್ಯಾಪ್ತಿಸ್ಮ ದ್ಯವಾಳನಿ ಯೋಹಾನನಿ ಪೈದಾಖ್ಹ್‌ನಿ ಬಾರೇಮ ಬೋಲಿರಾಖ್ಯುಸ್. ಲೂಕ 3:3, 11:4, 17:3-4,23:34, 24:47 ಅಜು಼ ಪ್ರಾರ್ಥನೇನಿ ಬಾರೇಮ ಬೋಲಿರಾಖ್ಯೊಸ್. ಲೂಕ 3:21, 5:16,6:12, 11:1-12, 22:32.
ಕಾಡಿದೇಖೊ
1. ಅದ್ಯಾಯ 1-4 ಲೂಕನೆ ಇನಿ ಸುವಾರ್ತೆನಿ ಪರಿಚಯ್ ಕರಿರಾಖ್ಯೊಸ್. ಅಜು಼ ಯೋ ಶನಖ್ಹಾಜೆ ಲೀಖಿರಾಖ್ಯೊಸ್‌ಕರಿ ಬೋಲಾನು ಛೋ಼ಡಿ ವತಾಳಿರಾಖ್ಯೊಸ್. 1:1-4
2. ಇನಕೇಡೆಥು ಇನೆ ಯೇಸು ಪೈದಹುಯೊತೆ ಅಜು಼ ಯೋ ಸೇವೆನಖ್ಹಾಜೆ ಕಿಮ್ ತಯಾರ್ ಹುಯೊಕರಿ ಬೋಲಾನು ಲೀಖಿರಾಖ್ಯೊಸ್. 1:5—4:13
3. ಉಬ್‍ರ‍್ಯುತೆ ಸುವಾರ್ತೆಮ ಹೈರೂತೆ ಘಣು ಮೋಟು ಭಾಗ್‌ ಹುಯಿರ‍್ಹುಸ್. ಲೂಕನೆ ಯೇಸು ಕರ‍್ಯೊತೆ ಕಾಮ್ನಿಬಾರೇಮ ಬೋಲಿರಾಖ್ಯೊಸ್. ವಿಶೇಷ್‌ಥಿ ಕರ‍್ಯೊತೆ ಕಾಮ್‍ಅಖ್ಖು ಅಜು಼ ಇನಿ ಬೋಧನೆನಿ ಬಾರೇಮ ಬೋಲಸ್. 4:14—21:38
4. ಖ್ಹರ್ತಿಮ ಕಡೇಶೆನಿ ಬೇನಿ ಅಧ್ಯಾಯಮ. ಇನೆ ಯೇಸು ಕಿಮ್ ಮರ‍್ಯೊತೆ, ಮಖ್ಹಾಣ್ಯುಹುಯ್ಯೊತೆ ಅಜು಼ ಮರಣ್‍ಥಿ ಕಿಮ್ ಆಯೊಕರಿ ಬೋಲಾನು ಇನೆ ಬೋಲಿರಾಖ್ಯೊಸ್. 22—24
1
1-2 ಪ್ಯಾರ್‌ನೊ ಥಿಯೊಫಿಲ, ಅಪ್ಣ ಇಚ಼್‌ಮ ಚಾ಼ಲಿರ‍್ಹೀತೆ ಕಾಮ್‍ಅಖ್ಖಾನ ಇನಿ ಬಾರೇಮ ಪಹಿಲೇಥು ಡೋಳೆಖ್ಹು ದೇಖಿನ್, ದೇವ್ನಿ ಅಛ್ಛಿ ಖಬರ್‌ನ ಬೋಲಿದ್ಯವಾಳು ಅಪ್ಣುನ ಖ್ಹಮ್‌ಜಾ಼ಡ್ಯುಥೂತೆ ಇಮ್ಮಸ್, ಲೀಖಾನ ಕೈಯೆಕ್ಕಿ ಅದ್ಮಿನೆ ಕೋಶಿಶ್ ಕರಿರಾಖ್ಯುಸ್.
3 ಮೇಬಿ ಜ಼ಡ್‌ಥುಧರಿ ಮೂಳಿಲಗು ಅಛ್ಛಿನಿತರ ಪುಛೈ಼ನ್, ಮಾಲುಮ್ ಕರಿರಾಖ್ಯೋಸ್ತೆ ಇನಾಖ್ಹಾಜೆ, ಯೋ ಖ್ಹಾರಸ್ನ ಏಕಾಡಿಥು ಥಿಯೊಫಿಲ ಹುಯಿರ‍್ಹೋತೆ ತುನ ಲೀಖಿನ್ ವತಾಳನು ಅಛ್ಛು಼ಕರಿ ಮನ ಸೋಚಾ಼ಯು.
4 ಅನೇಥಿ ತುನ ಶಿಕಾಡ್ಯೂತೆ ಖ್ಹಾರುಸ್ ಖ್ಹಾಚು಼ಕರಿ ತೂ ಮಾಲುಮ್ ಕರಿಲಿಶ್‌.
ಯೋಹಾನ ಪೈದಾ ಉಷೇತೆ ಬಾರೇಮ ಮಾಲುಮ್ ಪಡ್ಯೂತೆ
5 ಹೆರೋದ ಯೂದಾಯ ಮುಲಕ್‌ನೊ ರಾಜ಼ ಹುಯಿರ‍್ಹೊಥೋತೆ ಹಗಾಮ್ಮ, ಜಕರೀಯ ಕರಿ ಏಕ್ ಯಾಜಕ್ ಹಿಜ್ಜಾ಼ ಥೊ, ಯೋ ಅಬೀಯ ಯಾಜಕ್‌ನೊ ಖೂಮ್‌ವಾಳೊ ಹುಯಿರ‍್ಹೋಥೊ. ಇನಿ ಬಾವಣ್ಣು ನಾಮ್ ಎಲಿಜ಼ಬೇತ್, ಯೋ ಆರೋನ್ನಿ ಕುಟುಂಬ್‌ವಾಳಿ ಹುಯಿರ‍್ಹೀಥಿ.
6 ಇವ್ಣೆ ಭೇ ಜ಼ಣ ದೇವ್ನ ಡೋಳಾಮ ಅಛ಼್ಛ ಹುಯಿರ‍್ಹಾಥ ಅಜು಼ ಪ್ರಭುನಿ ಖ್ಹಾರಿಸ್ ಖಾನುಲ್‌ ಅಜು಼ ಹುಕುಮ್‌ನ ಪಾಡಿ ಚಾ಼ಲಿನ್, ಜ಼ರಾಬಿ ಗಲ್ತಿಕೊಂತೆ ಇಮ್‌ ಥಾ.
7 ಕತೋಬಿ ಎಲಿಜ಼ಬೇತ್ ವಾಂಝ಼್‌ಣಿ ಹುಯಿರ‍್ಹಿಥೀತೆ ಇನಾಖ್ಹಾಜೆ ಇವ್ಣುನ ಲಡ್ಕಾ ಕೋ ಥಾನಿ. ಎತ್ರೇಸ್ ಕಾಹೆತೆ ಇವ್ಣೆ ಭೇ ಜ಼ಣ ಬುಢಾ ಹುಯಿಗಾಥ.
8 ಅಮ್ ರ‍್ಹಾವಾನಿ ವಖ್ಹತ್‌ಮ, ಏಕ್ ದನ್ನೆ ಜಕರೀಯಾನಿ ಶಾಲ್‌ವಾಳಾನ ದೇವ್ನಿ ಮಂದಿರ್‌ಮ ಯಾಜಕ್ನು ಕಾಮ್ ಕರಾನಿ ವಖ್ಹತ್ ಆವ್ತಾನ, ಜಕರೀಯ ದೇವ್ನ ಖ್ಹಾಮ್ಣೆ ಯಾಜಕ್‍ನಿಸೇವೆ ಕರುಕರ್ತೊಥೊ.
9 ಯಾಜಕ್‌ಖ್ಹಾರು ಮಳಿನ್, ಪ್ರಭುನಿ ಮಂದಿರ್‌ನ ಮಹಿ ಜೈ಼ನ್, ಢಪ್ಕಾರ್‌ ದ್ಯವಾನಟೇಕೆ ಚೀಟಿ ನಾಖಿನ್ ಏಕ್ ಯಾಜಕ್‌ನ ಚೂ಼ಣ್‌ತೂಥು. ಇಮ್‌ ಕರಾಖ್ಹತರ್ ಜಕರೀಯ ಚೂ಼ಣಾಯೊ.
10 ಢಪ್ಕಾರ್‌ ದ್ಯವಾನಿ ವಖ್ಹತ್‌ಮ ಭಾರ್ ಭರೈರ‍್ಹುಥೂತೆ ಅದ್ಮಿಖ್ಹಾರು ದೇವ್ನ ಪ್ರಾರ್ಥನೆ ಕರುಕರ್ತುಥು.
11 ತದೆ ಪ್ರಭುನೊ ದೂತ ಢಪ್ಕಾರ್‌ ದ್ಯವಾನಿ ಢಾಕ್ಣಿನ ಖಾವಿ ಬಾಜು಼ಮ ಆಯಿ ಭೀರಿನ್, ಜಕರೀಯಾನ ದೆಖಾಯೊ.
12 ಜಕರೀಯಾನೆ ದೇವ್‌ನೊ ದೂತನ ದೇಖಿನ್ ಧರ್‌ಧರ್‌ ಕಾಪಿನ್, ಡರ್‌ಘಲ್ಲಿದೊ.
13 ಕತೋಬಿ ದೇವ್‌ನೊ ದೂತನೆ ಇನ, “ಜಕರೀಯ, ಡರ್‌ನಕೊ! ದೇವ್ನೆ ತಾರಿ ಬಿಂತಿನ ಖ್ಹಮ್‌ಜಿಲಿದೊ. ತಾರಿ ಬಾವಣ್‍ ಹುಯಿರ‍್ಹೀತೆ ಎಲಿಜ಼ಬೇತ್ ತುನ ಏಕ್ ಪರ್ಖ್ಹೊ ಲಡ್ಕಾನ ಜ಼ಣಿ ದಿಶೆ. ತೂ ಯೋ ಲಡ್ಕಾನ ಯೋಹಾನ ಕರಿ ನಾಮ್ ಮ್ಹೇಲ್ನು.
14 ಯೋ ಲಡ್ಕಾಥಿ ತುನ ಘಣು ಖ್ಹುಶಿ ಅಜು಼ ಶಂತೋಖ್ಹ್‌ ಉಶೆ, ಎತ್ರೇಸ್ ಕಾಹೆತೆ ಯೋ ಪೈದಹುಯೊತೆ ಇನಾಟೇಕೆ ಕೈಯೆಕ್ಕಿ ಜ಼ಣು ಖ್ಹುಶೀಕರ್‌ಶೆ!
15 ಪ್ರಭುನ ಡೋಳಾಮ ಯೋಹಾನ ಮಹಾನ್ ಅದ್ಮಿ ಹುಯಿರ‍್ಹಿಶೆ. ಕಂದಾಯುಹುಯು ದ್ರಾಕ್ಷಿನು ರಖ್ಹ್‌ನ ರ‍್ಹವೊ ನತರ್‌ಕಿ ಕೆಹೂಬಿ ನಿಶಾನುರಖ್ಹ್‌ನ ರ‍್ಹವೊ ಯೋ ಪೀಶೆಸ್‌ ಕೊಯ್ನಿ. ಪೈದಾಖ್ಹ್‌ಥೋಸ್‌ ಯೋ ಪವಿತ್ರಾತ್ಮಥಿ ಭರೈರ‍್ಹೀಶೆ.
16 ಅಜು಼ ಇಸ್ರಾಯೇಲ್‌ನ ಘಣ ಅದ್ಮಿನ ಇವ್ಣೊ ದೇವ್ ಹುಯಿರ‍್ಹೋತೆ ಪ್ರಭುಭಣಿ ಫರಾವ್‌ಶೆ.
17 ಯೋ ಪ್ರಭುನ ಅಗಾಡಿ ಜೈ಼ನ್, ಪ್ರವಾದಿ ಎಲೀಯನಿಘೋಣಿ ಮಹಿಮೆಮಾಬಿ ಶಕತ್‍ಮಾಬಿ ಭರೈನ್, ಬಾನ ದಿಲ್ನ ಲಡ್ಕಾವ್‌ಭಣಿ ಫರಾವ್‌ಶೆ, ಅಜು಼ ಮೊಂಡಿ ಖ್ಹಾರಾನ ನೀತಿನಿ ವಾಟ್‌ಭಣಿ ಫರಾವ್‌ಶೆ. ಅಮ್ ಪ್ರಭುನ ಅಛ಼್ಛ ಅದ್ಮಿನ ತೈಯಾರ್ ಕರ್ಶೆ” ಕರಿ ಬೋಲ್ಯೊ.
18 ತದೆ ಜಕರೀಯಾನೆ ದೇವ್ನ ದೂತನ, “ತೂ ಬೋಲುಕರಾಸ್ತೆ ಉಷೆಕರಿ ಮೇ ಶನೇಥಿ ಮಾಲುಮ್‌ಕರು? ಶನಕತೊ ಮೇ ಬುಢೋ ಹುಯಿಗಯೊ, ಮಾರಿ ಬಾವಣ್‌ಬಿ ಬುಢಿಯಾ ಹುಯಿಗೈ” ಕರಿ ಬೋಲ್ಯೊ.
19 ಇಮ್‌ ಬೋಲಾಖ್ಹತರ್ ದೇವ್‌ನೊ ದೂತನೆ, “ಮಾರು ನಾಮ್ ಗಬ್ರಿಯೇಲ್, ಮೇ ದೇವ್ನ ಖ್ಹಾಮ್ಣೆ ಭೀರ‍್ಯಾವವಾಳೊ, ತಾರ ಜೋ಼ಡೆ ವಾತೆಬೋಲಿನ್, ಆ ಸುವಾರ್ತೆನ ತುನ ಖ್ಹಮ್‍ಜಾ಼ಡನಖ್ಹಾಜೆ ದೇವ್ನೆ ಮನ ಮೋಕ್ಲಿರಾಖ್ಯೊಸ್.
20 ಆ ಮಾರಿ ವಾತೆ ಬರೋಬರ್‌ನಿ ವಖ್ಹತ್‌ಮ ಪೂರಉಶೆ. ಕತೋಬಿ ತುನೆ ಆ ವಾತೇನ ನಂಬ್ಯೊಕೊಂತೆ ಇನಖ್ಹಾಜೆ, ಆ ಖ್ಹಾರು ಹುವಾನ ದನ್‌ತೋಡಿ ತೂ ವಾತೆ ಕೋಬೋಲಿಶ್‍ನೀತೆ, ಮುಕ್ಕೊ ಹುಯಿರ‍್ಹೀಶ್” ಕರಿ ಜವಾಬ್‌ ದಿದೊ.
21 ಯೋಸ್ ವಖ್ಹತ್‌ಮ ಜಕರೀಯಾನ ಖ್ಹಾಜೆ ಭಾರ್ ಟಿವವ್‍ಕರ್ತುಥೂತೆ ಅದ್ಮಿಖ್ಹಾರು, ಔಡಿ ಘಡಿಲಗೂ ಯೋ ಮಂದಿರ್‌ನ ಮಹಿ ಶನ ಛಾ಼ತೆ ಕರಿ ಬೋಲಿನ್ ಆಶ್ಚರ್ಯಖಾದು.
22 ಯೋ ಮಂದಿರ್‌ಮಾಥೊ ಭಾರ್‌ಆಯಿನ್, ಇವ್ಣ ಜೋ಼ಡೆ ಏಕ್ ವಾತ್‍ಬಿ ಬೋಲ್ಯೊಕೊಂತೆ ದೇಖಿನ್, ಅನ ಮಂದಿರ್‌ಮ ಶಾತ್ಕಿ ದರ್ಶನ್ ಹುಯು ಉಶೆ ಕರಿ ಮಾಲುಮ್ ಕರಿಲಿದು. ತಪ್‌ಥೊ ಜಕರೀಯ ಮುಕ್ಕೋಸ್ ರ‍್ಹೀನ್ ಹಾತ್‌ನೊ ಝಾ಼ಲೊಥೀಸ್ ಬೋಲಿವತಾಳ್‌ತೋಥೊ.
23 ಮಂದಿರ್‌ಮ ಇನಿ ಯಾಜಕ್‌ನಿ ಸೇವೆನೊ ದನ್‌ಖ್ಹಾರೊ ಖತಮ್ ಹುವಾನ ಬಾದ್‌ಮ, ಜಕರೀಯ ಪಾಛೊ಼ ಇನ ಘರೆ ಚ಼ಲೆಗಯೊ.
24 ಥೋಡ ದನ್ನ ಬಾದ್‌ಮ ಇನಿ ಬಾಯ್ಕೊ ಎಲಿಜ಼ಬೇತ್ ಬೇಜೂನಿ ಹುಯಿನ್, ಪಾಚ಼್ ಮಹಿನಾತೋಡಿ ಘರ್‌ಥಿ ಭಾರ್ ಕೋ ನಿಕ್ಳಿನಿ.
25 ತದೆ ಎಲಿಜ಼ಬೇತ್‌ನೆ, “ಆ ಉಂಬರ್‌ಮ ಪ್ರಭುನೆ ಮಾರಪರ್ ಡೋಳಪಾಡಿ ದೇಖ್ಯೊ. ಅನೇಥಿ ಅದ್ಮಿಮ ಮನ ಥೂತೆ ಚಿಂಘಾವ್ಣಿನ ದೂರ್ ಕರ‍್ಯೊ” ಕರಿ ಬೋಲಿ.
ಯೇಸು ಪೈದಾ ಹುವಾನಿ ಬಾರೇಮ ದೇವ್‌ನೊ ದೂತನೆ ಬೋಲಿವತಾಳ್ಯೋತೆ
26 ಎಲಿಜ಼ಬೇತ್ ಛೊ಼ ಮಹಿನಾನಿ ಬೇಜೂನಿ ಥೀತೆ ತದೆ, ದೇವ್ನೆ ಗಬ್ರಿಯೇಲ್ ಕರಿ ನಾಮ್ನ ದೂತನ ಗಲಿಲಾಯ ತಬರ್‌ಖಾನು ನಜ಼ರೇತ್ ಕರಿ ಗಾಮ್ಮ ಥೀತೆ ಏಕ್ ಕವಾರಿಕನ ಮೋಕ್‌ಲ್ಯೊ.
27 ಯೊ ಕವಾರಿನು ನಾಮ್ ಮರಿಯ. ದಾವೀದ್‌ ರಾಜಾ಼ನಿ ಪಿಳ್ಗಿವಾಳೊ ಹುಯಿರ‍್ಹೊಥೋತೆ ಯೋಸೇಫ್‌ನ ಜೋ಼ಡೆ ಇನಿ ಖ್ಹಗೈ ಪಡಿರ‍್ಹೀಥಿ.
28 ಯೋ ದೇವ್‌ನೊ ದೂತನೆ ಮರಿಯನ, “ದೇವ್ನಿ ಆಶೀರ್ವಾದ್‌ವಾಳಿ, ತುನ ಸಮಾಧಾನ್ ಹುವಾದೆ! ಪ್ರಭು ದೇವ್ ತಾರ ಜೋ಼ಡೆ ಛಾ಼!” ಕರಿ ಬೋಲ್ಯೊ.
29 ದೇವ್‌ನು ದೂತರ್‌ನಿ ವಾತೇನ ಖ್ಹಮ್‌ಜಿನ್‌ ಮರಿಯ ಘಬ್‌ರೈಗೈ ಅಜು಼ ಆ ವಾತೆನಿ ಮತ್‌ಲಬ್ ಶಾತ್‌ ಉಶೆ? ಕರಿ ಸೋಚಾಲಗಿ.
30 ತದೆ ದೇವ್‌ನೊ ದೂತನೆ ಇನ, “ಮರಿಯ ಡರ್‌ನಕೊ, ದೇವ್ನೆ ತಾರಪರ್ ಘಣಿ ಮೋಟಿ ವಾರ್‌ಖ್ಹೊ ಕರಿರಾಖ್ಯೋಸ್.
31 ಹಂದೇಕ್, ತೂ ಬೇಜೂನಿ ಹುಯಿನ್ ಏಕ್ ಪರ್ಖ್ಹೊ ಲಡ್ಕಾನ ಜ಼ಣಿಶ್, ಯೋ ಲಡ್ಕಾನ ಯೇಸು ಕರಿ ನಾಮ್ ಮ್ಹೇಲ್ನು.
32 ಯೋ ಮೋಟೊ ಅದ್ಮಿಹುಯಿನ್ ಪರಮಂಡಲ್‌ನೊ ದೇವ್‌ನೊ ಛಿಯ್ಯೊ ಕರಿ ಬೋಲೈಲಿಶೆ. ದೇವ್ ಹುಯಿರ‍್ಹೋತೆ ಪ್ರಭು ಇನೊ ಗುರುಗುರಬ್‌ಲ್ಯೊ ಹುಯಿರೋತೆ ದಾವೀದ್‌ನಿ ಸಿಂಹಾಸನ್ನ ಇನ ದಿಶೆ.
33 ಅಜು಼ ಯೋ ಯಾಕೋಬ್‍ನಿ ಪಿಳ್ಗಿಪರ್ ಹರ್‌ಹಮೇಶಾನಖ್ಹಾಜೆ ರಾಜ಼್ಕರ್ಶೆ. ಇನಿ ರಾಜ್ಯ ಖತಮಸ್ ಕೋ ಉಶೇನಿ” ಕರಿ ಬೋಲ್ಯೊ.
34 ತದೆ ಮರಿಯನೆ, “ಆ ಕಿಮ್ ಉಶೆ? ಮೇ ಕವಾರಿನಿ” ಕರಿ ದೇವ್‌ನೊ ದೂತನ ಬೋಲಿ.
35 ತದೆ ದೇವ್‌ನೊ ದೂತನೆ ಮರಿಯನ, “ತಾರಪರ್ ಪವಿತ್ರಾತ್ಮ ಆವ್‌ಶೆ ಅಜು಼ ದೇವ್ನಿ ಶಕತ್ ಆಯಿನ್ ತಾರಪರ್ ಢಪಾವ್‌ಶೆ, ಅನಖ್ಹಾಜೆಸ್ ಪೈದಾ ಉಷೇತೆ ಯೋ ಪವಿತ್ರ ಲಡ್ಕು ದೇವ್‌ನೊ ಛಿಯ್ಯೊ ಕರಿ ಬೋಲೈಲಿಶೆ” ಕರಿ ಜವಾಬ್‌ ದಿದೊ.
36 ಎತ್ರೇಸ್ ಕಾಹೆತೆ ತಾರಿ ಖನ್ನೆವಾಳಿ ಹುಯಿರ‍್ಹೀತೆ ಎಲಿಜ಼ಬೇತ್ ಛಾ಼ನಿ, ಯೋ ಬುಢಿಯಾ ಹುಯಿಗಿತೋಬಿ ಬೇಜೂನಿ ಛಾ಼. ಇನ ಪೇಟ್‌ಮ ಪರ್ಖ್ಹೊ ಲಡ್ಕು ಛಾ಼, ವಾಂಝ಼್‌ಣಿ ಕರಿ ಬೊಲೈಲಿದಿಥೀತೆ ಇನ ಆ ಛೋ಼ನೆ ಮಹಿನೊ.
37 ಶನಕತೊ ದೇವ್ನ ಹಾತೆ ಹುವ್ವಾಕೊಂತೆ ಏಕ್‌ಬಿ ಕೊಯ್ನಿ” ಕರಿ ಬೋಲ್ಯೊ.
38 ತದೆ ಮರಿಯನೆ, “ಮೇ ಪ್ರಭುನಿ ದಾಸಿ, ತುನೆ ಕಿಮ್ ಬೋಲ್ಯೋಕಿ ಇಮ್ಮಸ್ ಮನ ಹುವಾದೆ” ಕರಿ ಬೋಲಿ. ಅನ ಬಾದ್‌ಮ ಯೋ ದೇವ್‌ನೊ ದೂತ ಇನಕಂಥೊ ಚ಼ಲೆಗಯೊ.
ಮರಿಯ ಎಲಿಜ಼ಬೇತ್‌ನ ಮಳಾನ ಗೈತೆ
39 ತದ್‌ನು-ತದ್ದೇಸ್ ಮರಿಯನೆ ಖ್ಹವಾರಿಲೀನ್, ಒಗ್ಗಿ-ಒಗ್ಗಿಸ್ ಪಹಾಡ್‌ನು ಮುಲಕ್‌ಭಣಿ ಥೂತೆ ಯುದಾಯ ತಬರ್‌ಖಾನು ಏಕ್ ಗಾಮ್‌ನ ಗೈ.
40 ಹಿಜ್ಜಾ಼ ಜಕರೀಯಾನ ಘರ್‌ಮ ಜೈ಼ನ್ ಎಲಿಜ಼ಬೇತ್‌ನ ಖ್ಹಲಾಮ್ ಕರಿ.
41 ಮರಿಯನೆ ಖ್ಹಲಾಮ್ ಕರಿ ಬೋಲಿತೆ ಅವಾಜ಼್ ಎಲಿಜ಼ಬೇತ್ ಖ್ಹಮಜ಼್‌ತಾನ, ಇನ ಪೇಟ್‌ಮಾನು ಲಡ್ಕು ಉಛ಼್‌ಳಿ ಪಡ್ಯು. ಅಜು಼ ಎಲಿಜ಼ಬೇತ್ ಪವಿತ್ರಾತ್ಮಥಿ ಭರೈಗಿ.
42 ಜೋ಼ರ್ ಆವಾಜ಼್‌ಥಿ ಚಿಕ್ರಿನ್ ಬೋಲಿಕಿ, “ಮರಿಯ, ದೇವ್ನೆ ತುನ ಬಿಜಿ ಖ್ಹಾರಿ ತಯೇಡಾಥೀಬಿ ಜಾ಼ಖ್ಹತ್ ಆಶೀರ್ವಾದ್‌ ಕರಿರಾಖ್ಯೋಸ್. ತೂ ಪೈದಾ ಕರೀಶ್ತೆ ಲಡ್ಕಾನ ದೇವ್ನೆ ಆಶೀರ್ವಾದ್‌ ಕರಿರಾಖ್ಯೋಸ್.
43 ಮಾರ ಪ್ರಭುನಿ ಆಯ ಮಾರಕನ ಆವಾಯೆತ್ರೆ ಭಾಗ್ಯ, ಮನ ಕಿಜ್ಜಾ಼ಥಿ ಮಳ್‌ಷೆ?
44 ಹಂದೇಕ್, ತೂ ಖ್ಹಲಾಮ್ ಕರಿ ಬೋಲಿತೆ ಅವಾಜ಼್ ಮಾರ ಕಾನ್‌ಮ ಪಡ್‌ತಾಸ್‌ನ, ಮಾರ ಪೇಟ್‌ಮಾನು ಲಡ್ಕು ಖ್ಹುಶೀಥಿ ಉಛ಼್‌ಳಿ ರಹಿಗು.
45 ಪ್ರಭುನೆ ತುನ ಬೋಲ್ಯೋತೆ ವಾತೆ ಉಷೆಕರಿ ನಂಬಿತೆ ಇನಖ್ಹಾಜೆ ತೂ ಧನ್ಯಹುಯಿರ‍್ಹೀಸ್”!
ಮರಿಯನು ಸ್ತುತಿನು ಗೀದ್‌
46 ತದೆ ಮರಿಯನೆ,
“ಮಾರೊ ಜಾನ್‌ ಪ್ರಭುನ ಸ್ತುತಿ ಕರಾಸ್.
47 ದೇವ್ ಮನ ಬಚಾ಼ಡವಾಳೊ ಹುಯಿರ‍್ಹೋಸ್ತೆ ಇನಖ್ಹಾಜೆ ಮಾರು ಆತ್ಮ ಖ್ಹುಶಿ ಛಾ಼.
48 ದೇವ್ನಿ ದಾಸಿ ಹುಯಿರ‍್ಹೀತೆ ಮೇ, ಲ್ಹಾಯಕ್‌ಕೊಂತೆ ಇಮ್‍ಥೀತೆ ತದೆ, ಇನೆ ಮನ ಯಾದ್ ಕರ‍್ಯೊ!
ಖ್ಹಾಚಮಾಬಿ ಹಂಕೇಥು ತಮಾಮ್‌ ಅದ್ಮಿ ಮನ ದೇವ್ನಿ ಆಶೀರ್ವಾದ್‌ವಾಳಿ ಕರಿ ಚಿಕರ್‌ಶೆ.
49 ಶನಕತೊ ಘಣಿ ಶಕತ್‌ವಾಳೊ ದೇವ್ ಮಾರಖ್ಹಾಜೆ ಮಹಾನ್ ಕಾಮ್‌ಖ್ಹಾರು ಕರಿರಾಖ್ಯೋಸ್.
ಇನು ನಾಮ್ ಪವಿತ್ರ್‌ ಹುಯಿರ‍್ಹೂಸ್.
50 ಕೋಣ್ ದೇವ್‌ಮ ಪೂರ ಮನ್‌ಥಿ ಡರಿನ್ ಚಾ಼ಲಸ್ಕಿ ಇವ್ಣಾಪರ್
ದೇವ್ ಮುಂಡಿಥು ಧರಿನ್ ಮುಂಡಿಲಗೂ ಗೋರ್‌ ಕರಾವಾಳೊ ಹುಯಿರ‍್ಹೊಸ್.
51 ದೇವ್ನೆ ಇನಿ ಭುಜ಼್‌ನಿ ಶಕತ್ ವತಾಳಿನ್,
ಹಂಕಾರ್ ಭರ‍್ಯಾ ದಿಲ್‌ವಾಳಾನ ಛಿಂಧೊಭಾಂಗ್‌ ಕರಿನಾಖ್ಯೊ.
52 ದೇವ್ನೆ ರಾಜಾ಼ವ್‌ನ ಸಿಂಹಾಸನ್‌ಪರ್‌ಥು ಧಕೇಲಿನ್,
ಶಾತ್ಬಿಕೊಂತೆ ಗರೀಬ್‌ನ ಉಪ್ಪರ್ ಲೈರಾಖ್ಯೊಸ್.
53 ಯೋ ಭುಕ್ಯಾವ್‌ನ ಮಿಝ಼್‌ವಾನ್ ಖಡಾಯೊ, ಕತೋಬಿ
ಧನ್‌-ದೌಲತ್‌ವಾಳಾನ ಖಾಲಿ ಹಾತೆ ಮೋಕ್ಲಿದಿದೊ.
54 ದೇವ್ನೆ ಅಪ್ಣ ಗುರುಗುರಬ್‍ಲ್ಯನ ವಾಗ್ದಾನ್ ದಿದೊತೆ ಇಮ್ಮಸ್,
ಇನೊ ಸೇವಕ್ ಹುಯಿರ‍್ಹೋತೆ ಇಸ್ರಾಯೇಲ್‌ನೊ ಹಾತ್ ಧರಿರಾಖ್ಯೋಸ್‌.
55 ಅಬ್ರಹಾಮ್‌ನಾಬಿ ಇನಿ ಪಿಳ್ಗಿವಾಳಾನ ಹರ್‌ಹಮೇಶ ಗೋರ್‌ ವತಾಳ್ಣು ಕರಿ ಯಾದ್ ಕರಿರಾಖ್ಯೋಸ್!” ಕರಿ ಬೋಲಿ.
56 ಮರಿಯ ತೀನ್ ಮಹಿನಾತೋಡಿ ಎಲಿಜ಼ಬೇತ್‌ನ ಜೋ಼ಡೆ ರ‍್ಹೀನ್ ಪಾಛಿ ಫರೀನ್ ಇನ ಘರೆ ಗೈ.
ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಪೈದಹುಯೊತೆ
57 ದನ್ ಭರಾವಾನ ಬಾದ್‌ಮ ಎಲಿಜ಼ಬೇತ್‌ನೆ ಏಕ್ ಪರ್ಖ್ಹೊ ಲಡ್ಕು ಜ಼ಣಿ.
58 ತದೆ ಎಲಿಜ಼ಬೇತ್‌ನ ಅಶ್‌ಪಿಶ್‌ವಾಳು ಅಜು಼ ಮಾಯಮಾತ್ರಾವ್ನೆ ಪ್ರಭುನೆ ಇನಾಪರ್ ಘಣು ಗೋರ್‌ ಕರ‍್ಯೊತೆ ಇನಿ ಬಾರೇಮ ಖ್ಹಮ್‌ಜಿನ್‌, ಇನಜೋ಼ಡೆ ಮಳಿನ್ ಖ್ಹುಶಿ ಕರ‍್ಯು.
59 ಆಟ್ ರೋಜ಼್ ಹುವ್ವಾದೀನ್, ಯೋ ಲಡ್ಕಾನ ಖ್ಹತ್ನ ಕರ‍್ನು ಕರಿ ಲಾಯು. ಇವ್ಣೆ ಯೋ ಲಡ್ಕಾನ ಜಕರೀಯಕರಿ ಬಾನೂಸ್ ನಾಮ್ ಮ್ಹೇಲ್ನು ಕರಿ ಥು.
60 ಕತೋಬಿ ಯೋ ಲಡ್ಕಾನಿ ಆಯ ಎಲಿಜ಼ಬೇತ್‌ನೆ, “ನಕೊ! ಯೋಹಾನ ಕರಿ ಮ್ಹೇಲ್ನು” ಕರಿ ಬೋಲಿ.
61 ಇಮ್‌ ಬೋಲಾಖ್ಹತರ್ ಇವ್ಣೆ, “ಕತೋಬಿ ಅಮ್ನು ನಾಮ್ ತಾರ ಮಾಯಮಾತ್ರಾಮ ಕಿನೂಸ್ ಕೊಯ್ನಿನಿ!” ಕರಿ ಇನ ಬೋಲ್ಯು.
62 ಬಾದ್‌ಮ ಇವ್ಣೆ ಯೋ ಲಡ್ಕಾನ ಬಾನ, ಹಾತ್‌ನೊ ಝಾ಼ಲೊ ಕರಿನ್, “ಆ ಲಡ್ಕಾನ ಕೆಹುನಾಮ್‌ ಮ್ಹೇಲ್ನು” ಕರಿ ಪುಛಾ಼ಯು.
63 ತದೆ ಜಕರೀಯಾನೆ ಏಕ್ ಲೀಖಾನು ಪಲ್ಗು ಮಂಗೈನ್ ಇನಾಪರ್, “ಇನು ನಾಮ್ ಯೋಹಾನ” ಕರಿ ಲೀಖ್ಯೊ. ತದೆ ತಮಾಮ್‌ ಅದ್ಮಿನ ಆಶ್ಚರ್ಯ ಹುಯಿಗಯು.
64 ತದ್‌ನು-ತದ್ದೇಸ್ ಜಕರೀಯ ಪಾಛು಼ ವಾತೆ ಬೋಲಾಲಗ್ಯೊ. ಅಜು಼ ವಾತೆ ಬೋಲ್ತೊಹುಯಿನ್ ದೇವ್ನಿ ಸ್ತುತಿ ಕರಾಲಗ್ಯೊ.
65 ಅನ ಖ್ಹಮ್‌ಜ್ಯೂತೆ ಅಶ್‌ಪೀಶ್‌ವಾಳ ಅದ್ಮಿಮ ಡರ್‌ ಪೇಶಿಗೊ, ಅಜು಼ ಯೂದಾಯ ತಬರ್‌ಖಾನು ಪಹಾಡಿ ಮುಲಕ್ನು ಖ್ಹಾರಿ ಬಾಜು಼ಮ ಆ ವಾತೆ ಫೈಲಿಗು.
66 ಖ್ಹಮ್‌ಜ್ಯೂತೆ ಖ್ಹಾರು ಅದ್ಮಿ ಆಶ್ಚರ್ಯ ಹುಯಿನ್, “ಆ ಲಡ್ಕು ಖ್ಹಾಮ್ಣೆ ಕಿಮ್ನು ಉಶೇಕಿ?” ಕರಿ ಅನಿ ಬಾರೇಮ ಮನ್‌ಮ ಸೋಚಾಲಗ್ಯು, ಅಜು಼ ಪ್ರಭುನೊ ಹಾತ್ ಯೋ ಲಡ್ಕಾಪರ್ ಥೊ.
ಜಕರೀಯಾನೆ ಪ್ರವಾದ್‌ನೆ ಕರ‍್ಯೊತೆ
67 ತದೆ ಯೋಹಾನ್ನೊ ಬಾ ಜಕರೀಯಾನೆ ಪವಿತ್ರಾತ್ಮಥಿ ಭರೈನ್ ಅಮ್ ಪ್ರವಾದ್‌ನೆ ಬೋಲ್ಯೊ:
68 “ಇಸ್ರಾಯೇಲ್‌ನೊ ದೇವ್ ಹುಯಿರ‍್ಹೋತೆ ಪ್ರಭುನ ಧನ್ಯವಾದ್ ಹುವಾದೆ!
ಇನ ಅದ್ಮಿಕನ ಐನ್, ಇವ್ಣಾಪರ್ ಗೋರ್‌ಕರೀನ್, ಇವ್ಣುನ ಛುಟ್ಕಾರ್‌ ಕರಿರಾಖ್ಯೋಸ್;
69 ಇನೊ ಸೇವಕ್ ಹುಯಿರ‍್ಹೊಥೋತೆ ದಾವೀದ್‌ನ ಖಾನ್‌ದಾನ್‌ಮಾಥು
ಅಪ್ಣಖ್ಹಾಜೆ ಘಣಿ ಶಕತ್‌ವಾಳೊ ಏಕ್ ರಕ್ಷಕ್‌ನ ದೀರಾಖ್ಯೊಸ್.
70 ದೇವ್ನೆ ತದೇಸ್‌ ಇನು ಪವಿತ್ರ ಪ್ರವಾದಿ ಖ್ಹಾರಾವ್‌ನ ಮ್ಹೋಡಾಥಿ ಬೋಲಾಯೊ ಥೋತೆ ಇಮ್ಮಸ್,
71 ಅಪ್ಣುನ ಕೋಣ್-ಕೋಣ್ ವಹೇರ್‌ ಕರುಕರ್ತುಥೂಕಿ ಇವ್ಣ ಹಾತೇಥಿ ಛೋ಼ಡೈನ್,
ಅಪ್ಣ ದುಶ್‌ಮನ್‌ಥಿ ಅಪ್ಣುನ ಬಚಾ಼ಡಿರಾಖ್ಯೊಸ್.
72 ದೇವ್ನೆ ಅಪ್ಣ ಗುರುಗುರಬ್‍ಲ್ಯನ ಗೋರ್‌ಖೈನ್,
ಪವಿತ್ರ ಒಪ್ಪಂದನ ಯಾದ್‌ಕರಿನ್,
73 ಅಪ್ಣೊ ಗಲ್‌ಢೊ ಹುಯಿರ‍್ಹೋತೆ ಅಬ್ರಹಾಮ್‌ನ ಜಿಭಾನ್‌ ದೀರಾಖ್ಯೋಥೋತೆ ಇಮ್‌,
74 ಅಪ್ಣುನ ದುಶ್‌ಮನ್ನ ಹಾತೇಖ್ಹು ಛೋ಼ಡೈನ್,
ಡರ್‌ಕೊಂತೆ ಇಮ್‌ ಇನಿ ಸೇವೆ ಕರಾನಿಮತ್‌ ಅಪ್ಣುನ ಅಕ್ಲಾಶ್‌ ಬಣೈರಾಖ್ಯೊಸ್.
75 ಅನೇಥಿ ಅಪ್ಣೆ ಜಿವಿರ‍್ಹವಾನ ದನ್‌ಖ್ಹಾರೊ,
ಇನಖ್ಹಾಮ್ಣೆ ಇಮಾನ್‌ದಾರ್ ಅಜು಼ ನೀತಿಥಿ ರ‍್ಹೇಣು ಕರಿ ಅಮ್ ಕರಿರಾಖ್ಯೋಸ್.
76 ಅಜು಼ ಜಕರೀಯಾನೆ, “ಮಾರು ಲಡ್ಕು, ತೂತೊ, ಪರಮಂಡಲ್‌ನೊ ದೇವ್‌ನೊ ಪ್ರವಾದಿ ಕರಿ ಬೋಲೈಲಿಶ್.
ತೂ ಪ್ರಭುನ ಅಗಾಡಿ ಜೈ಼ನ್,
ಇನಿ ವಾಟ್ನ ಖ್ಹವಾರವಾಳೊ ಹುಯಿರ‍್ಹೀಶ್.
77 “ಪಾಪ್‌ಖ್ಹಾರು ಮಾಪ್‌ ಹುವಾಥೀಸ್ ರಕ್ಷಣೆ ಮಳಾನು ಕರಿ,
ಇನ ಅದ್ಮಿನ ಬೋಲವಾಳೊ ಹುಯಿರ‍್ಹಿಶೆ.
78 ಅಪ್ಣೊ ದೇವ್ ದಯಕರವಾಳೊ, ಇನಿ ಗೋರ್‌ಥಿ ಅಪ್ಣುನ ಭಾಗಳ್ ಫಾಟಿ.
ಅನೇಥಿ ಉಪ್ಪರ್‌ಥು ದನ್ ನಿಕ್ಳಿನ್, ಅಪ್ಣಕನ ಆವ್‌ಶೆ,
79 ಅಜು಼ ಅಂಧಾರಮಾಬಿ, ಮರಣ್ಣಿ ಛಾ಼ಳಿಮ ರ‍್ಹವಾಳ ಖ್ಹಾರಾನ ಉಜಾ಼ಳು ದಿಶೆ,
ಅಪ್ಣುನ ಸಮಾಧಾನ್ನಿ ವಾಟ್‌ ವತಾಳಿನ್ ಚ಼ಲಾವ್‌ಷೆ” ಕರಿ ಬೋಲ್ಯೊ.
80 ಯೋ ಲಡ್ಕು ಮೋಟು ಹುಯಿನ್ ಆತ್ಮಮಾಬಿ ಅಜು಼ ಶಕತ್‍ಮಾಬಿ ಭಡ್ಯು, ಅಜು಼ ಇಸ್ರಾಯೇಲ್‌ ಅದ್ಮಿಯೇನ ಯೋಹಾನ ದೆಖಾವಾನ ದನ್‌ಲಗೂ ಉಜ್ಜಾ಼ಡಿ ಜ಼ಂಗಳ್‌ಮ ಥೊ.