8
ವ್ಯಬಿಚಾರ್‌ಮ ಖ್ಹಪ್‌ಡೀತೆ ತಯೇಡಾನಿ ಬಾರೇಮ
1 ಕತೋಬಿ ಯೇಸು ಆಲಿವ್ ಪಹಡ್‌ನ ಗಯೊ.
2 ಯೋ ಪಾಛೊ಼ಫರಿ ಮಂದಿರ್‌ನ ಆಯೊ. ತದೆ ತಮಾಮ್‌ ಅದ್ಮಿ ಐನ್, ಇನ ಅಶ್‌ಪಿಶ್‍ ಭರಾಯು, ಅಜು಼ ಯೇಸು ಬೇಶಿನ್, ಇವ್ಣುನ ಬೋಲಿ ವತಾಳಲಗ್ಯೊ.
3 ಮೋಶೆನಿ ವಚನ್ ಶಿಕಾಡವಾಳು ಅಜು಼ ಫರಿಸಾಯರ್‌ವಾಳು ವ್ಯಬಿಚಾರ್‌ಮ ಖ್ಹಪ್‌ಡೀತೆ ಏಕ್‌ ತಯೇಡಾನ ಇನಾಕನ ಲೈನ್‌, ಖ್ಹಾರಾನ ಖ್ಹಾಮ್ಣೆ ಭೀರಾಖ್ಯು.
4 ಅಜು಼, “ಗುರು, ಆ ತಯೇಡ ವ್ಯಬಿಚಾರ್‌ ಕರಾನಿ ವಖ್ಹತ್‌ಮಾಸ್‌ ಖ್ಹಪ್‌ಡಿಗೈ.
5 ಅಮ್ನಿ ತಯೇಡಾವ್‍ನ ಬಂಡೊ ಫೇಕಿನ್‌ ಮಾರ‍್ನು ಕರಿ ಮೋಶೆನೆ ಧರ್ಮಶಾಸ್ತ್ರಮ ಹಮೂನ ಹುಕುಮ್‌ ದೀರಾಖ್ಯೊಸ್. ಕತೋಬಿ ಅನಿ ಬಾರೇಮ ತೂ ಶಾತ್ ಬೋಲಾಸ್?” ಕರಿ ಇನ ಪುಛಾ಼ಯು.
6 ಯೇಸುನಿ ವಾತೇಮ ಶಾತ್‌ತೋಬಿ ಗಲತ್‌ ಮಳ್ಯುತೊ, ಅಪ್ಣೆ ಇನ ಖ್ಹಪ್‌ಡಾಯೆಜಾ಼ಯಿ ಕರಿ ಇವ್ಣೆ ಯೇಸುನ ಸವಾಲ್‌ಕರ‍್ಯು? ಕತೋಬಿ ಯೇಸು ಮುಡ್‌ಕ್ಯು ಝು಼ಕೈನ್‌, ಇನಿ ಅಂಗ್‌ಳೀಥಿ ಜ಼ಮೀನ್‌ಪರ್ ಲೀಖಾಲಗ್ಯೊ.
7 ಇವ್ಣೆ ಲಗತ್ತರ್‌ ಇನ ಪುಛಾ಼ವ್‌ ಕರ್ತುಥೂತೆ ಇನಖ್ಹಾಜೆ, ಯೇಸುನೆ ಮುಡ್‌ಕ್ಯು ಪಾಡೀನ್, ಇವ್ಣಾಮ ಏಕ್‌, “ತುಮಾರಮ ಕೋಣ್ ಪಾಪ್ ಕರಿರಾಖ್ಯುಕೊಯ್ನಿಕಿ, ಇವ್ಣೆ ಪಹಿಲೆ ಇನಾಪರ್ ಬಂಡೊ ಫೇಕಾದೆ” ಕರಿ ಬೋಲ್ಯೊ.
8 ಅನಕೇಡೆಥು ಅಜು಼ಪಾಛು಼ ಮಡ್‌ಕ್ಯು ಝು಼ಕೈನ್‌ ಜ಼ಮೀನ್‌ಪರ್ ಲೀಖಾಲಗ್ಯೊ.
9 ಆ ವಾತೇನ ಖ್ಹಮ್‌ಜಿನ್‌, ಪಹಿಲೆ ಶಾಣು ಅಜು಼ ಬಿಜು಼ಖ್ಹಾರು ಏಕೆಕೇಸ್ ನಿಕ್ಳಿನ್ ಚ಼ಲಿಗಯು. ಯೇಸು ಎಕ್ಕಸ್ ಜ಼ಣೊ ರಹಿಗೊ ಅಜು಼ ಯೋ ತಯೇಡ ಇನಖ್ಹಾಮ್ಣೆ ಭೀಥಿ.
10 ಯೇಸು ಉಠಿ ಭೀರಿನ್, ಯೋ ತಯೇಡಾನ ದೇಖಿನ್‌, “ಅಲಿ ಬಾಯಿ, ಇವ್ಣೆ ಖ್ಹಾರು ಕ್ಯಾ? ತಾರಪರ್ ಗಲತ್‌ ಲಗಾಡನಖ್ಹಾಜೆ ಕೋಣ್‌ಬಿ ಕೋ ಬಚ್ಯೂನಿಕಿ ಶು? ಕರಿ ಬೋಲ್ಯೊ.
11 ಯೋ ತಯೇಡಾನೆ, “ಕೋಣ್‌ಬಿ ಕೋ ಬಚ್ಯೂನಿಲಾ ಪ್ರಭು! ಕರಿ ಬೋಲಿ.
ತದೆ ಯೇಸುನೆ ಇನ, “ಇಮ್‍ಕತೊ, ಮೇಬಿ ತಾರಪರ್ ಗಲತ್‌ ಕೋ ಲಗಾಡುನಿ. ಹಮ್ಕೆ ತೂ ಜಾ಼, ಅಜು಼ಪಾಛು಼ ಪಾಪ್ ನಕೊ ಕರೀಶ್” ಕರಿ ಬೋಲ್ಯೊ.
ಯೇಸು ಜಗತ್‌ನು ಉಜಾ಼ಳು
12 ಅನ ಬಾದ್‌ಮ ಯೇಸು ಪಾಛೊ಼ ಅದ್ಮಿಖ್ಹಾರನ ವಾತೆ ಬೋಲ್ತೊಹುಯಿನ್, “ಮೇಸ್ ಜಗತ್ನ ಉಜಾ಼ಳು ಹುಯಿರ‍್ಹೋಸ್, ಮಾರಪೀಠೆ ಆವಾಳು ಅಂಧಾರಮ ಚಾ಼ಲ್‌ಶೆಸ್‌ ಕೊಯ್ನಿ ಅಜು಼ ಯೊ ಜಾನ್ನು ಉಜಾ಼ಳು ಲೀರ‍್ಹಾವಳೊ ಹುಯಿರೊಸ್” ಕರಿ ಬೋಲ್ಯೊ.
13 ಫರಿಸಾಯರ್‌ವಾಳು ಯೇಸುನ, “ತಾರಿ ಬಾರೇಮ ತೂಸ್ ಸಾಕ್ಷಿ ಬೋಲಿಲೆಸ್; ತಾರಿ ಸಾಕ್ಷಿ ಖ್ಹಾಚು಼ ಕಾಹೆ” ಕರಿ ಬೋಲ್ಯು.
14 ತದೆ ಯೇಸುನೆ ಜ಼ವಾಬ್ ದಿದೊ, “ಮೇಸ್ ಮಾರಿ ಬಾರೇಮ ಸಾಕ್ಷಿ ಬೋಲಿಲಿದೊತೊ ಯೋ ಖ್ಹಾಚು಼ ಹುಯಿರುಸ್. ಶನಕತೊ ಮೇ ಕಿಜ್ಜಾಥೊ ಆಯೊ ಅಜು಼ ಕಿಜ್ಗಾ಼ ಜೈ಼ಶ್ ಕರಿ ಬೋಲಾನು ಮನ ಮಾಲುಮ್. ಕತೋಬಿ ತುಮುನ ಮೇ ಕಿಜ್ಜಾಥೊ ಆಯೊ ಕಿಜ್ಗಾ಼ ಜೈ಼ಶ್ ಕರಿ ಮಾಲುಮ್ ಕೊಯ್ನಿ.
15 ತುಮೆ ಅದ್ಮಿ ತೀರ್ಪ್ ಕರಾನಿತರ ಕರೋಸ್; ಕತೋಬಿ ಮೇ ಕಿನಾಬಿ ತೀರ್ಪ್ ಕೋ ಕರೂನಿ.
16 ಕತೋಬಿ ಮೇ ತೀರ್ಪ್ ಕರ‍್ಯೊತೋಬಿ ಬರಾಬರಸ್‌ ರ‍್ಹೇಸ್‌, ಶನಕತೊ ಮೇ ಎಕ್ಕಸ್ ಜ಼ಣೊ ಕಾಹೆ; ಮನ ಮೋಕ್‌ಲ್ಯೊತೆ ಬಾಬಿ ಮಾರ ಜೋ಼ಡೆ ರ‍್ಹೇಸ್‌.
17 ಬೇ ಜ಼ಣು ಬೋಲಾಸ್ತೆ ಸಾಕ್ಷಿ ಖ್ಹಾಚಿಕರಿ ತುಮಾರಿ ಧರ್ಮಶಾಸ್ತ್ರಮಾಸ್ ಬೋಲಾಸ್ನಿ.
18 ಮಾರಿ ಬಾರೇಮ ಮೇ ಸಾಕ್ಷಿ ಬೋಲುಸ್ತೆ, ಮೆ ಏಕ್ಜ಼ಣೊ, ಅತ್ರೇಸ್ ಕಾಹೆತೆ ಮನ ಮೋಕ್‌ಲ್ಯೊತೆ ಬಾಬಿ ಬಿಜೇಕ್ ಸಾಕ್ಷಿ ಹುಯಿರೊಸ್” ಕರಿ ಬೋಲ್ಯೊ.
19 ತದೆ ಇವ್ಣೆ, “ತಾರೊ ಬಾ ಕಿಜ್ಗಾ಼ ಛಾ಼?” ಕರಿ ಪುಛಾ಼ಯು. ಯೇಸುನೆ,
“ತುಮೂನ ಮೇ ರ‍್ಹವೊ, ಮಾರೊ ಬಾ ರ‍್ಹವೊ ಮಾಲುಮ್ ಕೊಯ್ನಿ. ತುಮೆ ಮನ ಮಾಲುಮ್ ಕರ‍್ಯಾಹೋತ್ತೊ, ಮಾರ ಬಾನಾಬಿ ಮಾಲುಮ್ ಕರಿಲಿದಾಹೋತ್‌” ಕರಿ ಜ಼ವಾಬ್ ದಿದೊ.
20 ಯೇಸುನೆ ಮಂದಿರ್‌ಮ ಅದ್ಮಿ ಕಾಣ್ಕೇನಿ ಹುಂಡಿನಿ ಝ಼ಗೋಕನ ಭೀರಿನ್ ಶಿಕಾಡುಕರಾನಿ ವಖ್ಹತ್‌ಮ ಆ ವಾತ್ನ ಬೋಲ್ಯೊ. ಇನಖ್ಹಾಜೆ ಕೋಣ್‌ಬಿ ಇನ ಕೋ ಧರ‍್ಯುನಿ.ಶನಕತೊ ಇನಿ ವಖ್ಹತ್ ಬಿಜೂ಼ಬಿ ಕೋ ಐರ‍್ಹಿಥೀನಿ,
ಮೇ ಜ಼ಯಿಸ್ತೆ ಹಿಜ್ಜಾ಼ ತುಮೆ ಜಾ಼ವಾನ ಕೊ ಹುವಾನಿ
21 ಯೇಸುನೆ ಪಾಛು಼ ಇವ್ಣುನ, “ಮೇ ಒಳೆಜ಼ವುಸ್ ತುಮೆ ಮನ ಢೂಂಡ್‌ಶು, ಅಜು಼ ತುಮಾರ ಪಾಪ್‌ಮ ತುಮೆ ಮರ್‌ಶು. ಮೇ ಜ಼ವುಸ್ತೆ ಹಿಜ್ಜಾ಼ ತುಮೆ ಕೋ ಆವಾನ ಉಶೇನಿ” ಕರಿ ಬೋಲ್ಯೊ.
22 ಆ ಯೆಹೂದ್ಯರ್‌ನ, “ಮೇ ಜ಼ವುಸ್ತೆ ಹಿಜ್ಜಾ಼ ತುಮೆ ಆವಾನ ಕೋ ಉಶೇನಿ ಕರಿ ಬೋಲುಕರಾಸ್‌ ಕಿಶು? ಆ ಇನು ಯೋಸ್‌ ಮರಿಜಾ಼ವ್ಣು ಕರಿ ಛಾ಼ಕಿ ಶುಕಿ?” ಕರಿ ಬೋಲಿಲ್ಯವಾನಿತರ ಹುಯಿರೂಥು.
23 ಯೇಸುನೆ, “ತುಮೆ ಹೇಟ್‌ಲ್ಯಾವಾಳ ಹುಯಿರ‍್ಹಾಸ್‌, ಮೆ ಉಪ್ಪರ್‌ವಾಳೊ ಹುಯಿರೊಸ್ ತುಮೆ ಆ ಜಗತ್‌ವಾಳ, ಕತೋಬಿ ಮೇ ಆ ಜಗತ್‌ವಾಳೊ ಕಾಹೆ.
24 ಇನಖ್ಹಾಜೇಸ್ ತುಮೆ ತುಮಾರ ಪಾಪ್‍ಮಾಸ್‌ ಮರ್‌ಶು ಕರಿ ಮೇ ಬೋಲ್ಯೋತೆ. ಮೇ ಕೋಣ್ ಕರಿ ತುಮೆ ವಿಶ್ವಾಸ್‌ ನಾ ಕರ‍್ಯಾತೊ ತುಮಾರ ಪಾಪ್‌ಮ ತುಮೇಸ್ ಮರ್‌ಶು” ಕರಿ ಬೋಲ್ಯೊ.
25 ತದೆ ಇವ್ಣೆ ಇನ, “ತೂ ಕೋಣ್?” ಕರಿ ಪುಛಾ಼ಯು. ಯೇಸುನೆ, “ಮೇ ಕೋಣ್ ಕರಿ ಪಹಿಲೇಥೋಸ್‌ ತುಮೂನ ಬೋಲ್ತೊ ಆಯೊತೇಸ್ ಮೆ.
26 ತುಮಾರಿ ತೀರ್ಪ್‌ನಿ ಬಾರೇಮ ವಾತೆ ಬೋಲಾನು ಮಾರಕನ ಘಣು ಛಾ಼. ಕತೋಬಿ ಮನ ಮೋಕ್‌ಲ್ಯೊತೆ ಯೋ ಖ್ಹಾಚೊ಼ ಹುಯಿರ‍್ಹೋಸ್ ಅಜು಼ ಇನೇಥಿ ಮೇ ಶಾತ್ ಖ್ಹಮ್‌ಜ್ಯೋಕಿ ಇನಾಸ್ ಆ ಜಗತ್ನ ಮೇ ಬೋಲುಸ್” ಕರಿ ಬೋಲ್ಯೊ.
27 ಯೇಸು ಬಾನಿ ಬಾರೇಮ ವಾತೆ ಬೋಲುಕರಾಸ್‌ ಕರಿ ಬೋಲಾನು ಇವ್ಣುನ ಮಾಲುಮ್ ಕೋ ಪಡ್ಯುನಿ.
28 ಕತೋಬಿ ಇನೆ ಇವ್ಣುನ, “ತುಮೆ ಅದ್ಮಿನ ಛಿಯ್ಯಾನ ಉಪ್ಪರ್ ಪಾಡ್‌ಶುಕಿ, ತದೆ ‘ಮೇಸ್ ಯೋ’ ಕರಿ,ತುಮುನ ಮಾಲುಮ್ ಪಡ್‌ಶೆ. ಮೆ ಕರುಸ್ತೆ ಮಾರಿ ಶೊಂತ್ ಆಖ್ಹ್‌ಥಿ ಕಾಹೆ ಪಣ್ಕಿ, ಮಾರೊ ಬಾ ಬೋಲಾತೆ ಇಮ್ಮಸ್ ಶಿಕಾಡುಕರೂಸ್.
29 “ಮನ ಮೋಕ್‌ಲ್ಯೊತೆ ಯೋ ಮಾರ ಜೋ಼ಡೆ ಛಾ಼; ಮನ ಎಕ್ಲೋಸ್ ಕೋ ಮ್ಹೇಲ್ಯೋನಿ, ಇನಖ್ಹಾಜೇಥಿ ಮೆ ಕೆದೇಬಿ ಇನ ಇಷ್ಟನಿತರಾಸ್ ಕರುಸ್ತೆ” ಕರಿ ಬೋಲ್ಯೊ.
30 ಯೇಸು ಆ ವಾತೆ ಖ್ಹಾರು ಬೋಲಾನಿ ವಖ್ಹತ್‌ಮ ಘಣು ಅದ್ಮಿ ಇನಾಪರ್ ವಿಶ್ವಾಸ್‌ ಕರ‍್ಯು.
ಖ್ಹಾಚು಼ ತುಮೂನ ಛೋ಼ಡಾವ್‌ಶೆ
31 ತದೆ ಯೇಸುನೆ ಇನಾಪರ್ ವಿಶ್ವಾಸ್‌ ಕರ‍್ಯೋತೊ ಯೆಹೂದ್ಯರ್‌ನ, “ತುಮೆ ಮಾರಿ ವಾತೇನಿತರ ಚಾ಼ಲ್ಯಾತೊ,ತುಮೆ ಖ್ಹಾಚ಼ಮಾಬಿ ಮಾರ ಶಿಷ್ಯ ಹುಯಿರ‍್ಹಿಶು.
32 ತುಮೆ ಖ್ಹಾಚ಼ನ ಮಾಲುಮ್ ಕರಿಲಿಶು, ಅಜು಼ ಯೋ ಖ್ಹಾಚು಼ ತುಮೂನ ಛೋ಼ಡಾವ್‌ಶೆ” ಕರಿ ಬೋಲ್ಯೊ.
33 ಇನ ಇವ್ಣೆ, “ಹಮೆ ಅಬ್ರಹಾಮ್‌ನಿ ಖಾಂದಾನ್‌ವಾಳ, ಹಮೆ ಕದೇಬಿ ಕಿನಾಬಿ ಗುಲಾಮ್ ಕೋಹೂಯಾನಿ. ಅಮ್ ರ‍್ಹವಾಪರ್, ‘ತುಮೆ ಛು಼ಟ್‌ಶು’ ಕರಿ ತೂ ಬೋಲಾಸ್ತೆ ಕಿಮ್?” ಕರಿ ಜವಾಬ್‌ ದಿದು.
34 ಯೇಸುನೆ ಇವ್ಣುನ, “ತುಮೂನ ಖ್ಹಾಚಮಾಬಿ ಬೋಲುಸ್ಕಿ: ಪಾಪ್ ಕರಾವಾಳು ಖ್ಹಾರು ಪಾಪ್ನ ಗುಲಾಮ್ ಹುಯಿರ‍್ಹುಸ್‍.
35 ಗುಲಾಮ್ ಘರ್‌ಮ ಹಮೇಶಾನಖ್ಹಾಜೆ ಕೋ ರಿಶೇನಿ, ಕತೋಬಿ ಛಿಯ್ಯೊ ಘರ್‌ಮ ಹಮೇಶಾನಖ್ಹಾಜೆ ರ‍್ಹೇಸ್‌.
36 ಇನಖ್ಹಾಜೆ ಛಿಯ್ಯೊ ತುಮೂನ ಛೋ಼ಡಾಯೋತೊ, ತುಮೆ ಖ್ಹಾಚಮಾಬಿ ಛು಼ಟ್‌ಶು.
37 ತುಮೆ ಅಬ್ರಹಾಮ್‌ನಿ ಪಿಳ್ಗಿವಾಳ ಕರಿ ಮನ ಮಾಲುಮ್. ತೋಬಿ ತುಮೆ ಮನ ಮರ್‌ನಾಕ್ಣು ಕರಿ ಕೋಶಿಶ್ ಕರೋಸ್, ಶನಕತೊ ಮಾರಿ ವಾತೇನ ತುಮೆ ಮಾನ ಕೊಯ್ನಿ.
38 ಮಾರ ಬಾನೆ ಮನ ವತಾಳ್ಯೊತೆ ಇನಿ ಬಾರೇಮ ಮೇ ಬೋಲುಸ್, ಕತೋಬಿ ತುಮಾರ ಬಾನೆ ಶಾತ್ ಖ್ಹಮ್‍ಜಾ಼ಡ್ಯೋಕಿ ಯೋ ತುಮೆ ಕರೋಸ್” ಕರಿ ಬೋಲ್ಯೊ.
39 ಇವ್ಣೆ ಇನ, “ಹಮಾರೊ ಬಾ ಅಬ್ರಹಾಮ್‌” ಕರಿ ಜವಾಬ್‌ ದಿದು.
ಯೇಸುನೆ ಇವ್ಣುನ, “ತುಮೆ ಅಬ್ರಹಾಮ್‌ನ ಲಡ್ಕಾ ಹುಯಿರ‍್ಹಾಹೋತ್ತೊ, ಅಬ್ರಹಾಮ್‌ನೆ ಕರ‍್ಯೊತೆ ಇಮ್ಮಸ್ ಕರ‍್ಯಾಹೋತ್‌.
40 ಮೇ ದೇವ್‍ಥಿ ಖ್ಹಮ್‌ಜೋತೆ ಖ್ಹಾಚಿನ ತುಮುನ ಬೋಲಿವತಾಳ್ಯೋತೆ ಏಕ್ಜ಼ಣೊ ಮೆ ಹುಯಿರೊಸ್, ತೋಬಿ ತುಮೆ ಮನ ಮರ್‌ನಾಕ್ಣು ಕರಿ ದೇಖೊಸ್‍. ಅಬ್ರಹಾಮ್‌ನೆ ಅಮ್ ಶಾತ್ ಕೋ ಕರ‍್ಯೋನಿ!
41 ತುಮೆ ತುಮಾರ ಬಾನ ಕಾಮ್ನ ಅಖ್ಖು ಕರುಕರಸ್ ಕರಿಬೋಲ್ಯೊ. ತದೆ ಇವ್ಣೆ, ಹಮೆ ಪಾಪೇಲ ಕಾಮ್‍ಥಿ ಪೈದಕೊಹುಯಾನಿ.
ಹಮೂನ ಎಕ್ಕಸ್ ಜ಼ಣೊ ಬಾ, ಯೋ ದೇವಸ್ ಕರಿ ಬೋಲ್ಯು.
42 ಯೇಸುನೆ ಯೆಹೂದ್ಯರ್‌ನ, “ಖ್ಹಾಚಮಾಬಿ ದೇವಸ್ ತುಮಾರೊ ಬಾ ಹುಯಿರ‍್ಹೊಹೋತ್ತೊ, ತುಮೆ ಮನ ಪ್ಯಾರ್ ಕರ‍್ಯಾಹೋತ್‌, ಶನಕತೊ ಮೇ ದೇವ್‌ಕಂಥೊ ಆಯೊ ಅಜು಼ ಹಮ್ಕೆ ಹಜ್ಜಾ಼ ಛು಼. ಮೇ ಆಯೋತೆ ಮಾರಿ ಶೊಂತ್ ಅದಿಕಾರ್‌ಪರ್‌ ಕಾಹೆ, ಪಣ್ಕಿ ದೇವ್ನೇಸ್ ಮನ ಮೋಕ್‌ಲ್ಯೊ.
43 ತುಮೆ ಮಾರಿ ವಾತೇನ ಶನ ಖ್ಹಮ್‌ಜಾ಼ ಕೊಯ್ನಿ? ಶನಕತೊ ತುಮೆ ಮಾರಿ ವಾತೇನ ಕಾನ್‌ ಕೋ ದೆವ್‌ಕರಾನಿತೆ ಇನಖ್ಹಾಜೇಸ್.
44 ಶೈತಾನಸ್ ತುಮಾರೊ ಬಾ, ಇನ ತುಮೆ ಛಿಯ್ಯಾ ಹುಯಿರಾಸ್, ಇನೀನಿಘೋಣಿ ಖರಾಬ್ ಆಖ್ಹ್‌ನ ಕರಾನ ದೇಖೊಸ್‍. ಯೋ ಶುರುವಾತ್‌ಥೋಸ್ ಖೂನಿಹುಯಿರ‍್ಹೊಸ್ ಅಜು಼ ಖ್ಹಾಚಾಮ ಟಿಕ್ಯೊಕೊಯ್ನಿ. ಶನಕತೊ ಇನಾಮ ರತ್ತಿಬಿ ಖ್ಹಾಚಿ ಕೊಯ್ನಿ, ಯೋ ಝೂ಼ಟಿ ಬೋಲಾನಿ ವಖ್ಹತ್‌ಮ ಆದತ್‌ನಿಘೋಣಿ ಬೋಲಾಸ್, ಶನಕತೊ ಯೋ ಝೂ಼ಟಿಸ್ ಬೋಲವಾಳೊ ಅಜು಼ ಹರ್ ಥರಾನು ಝೂ಼ಟಿನ ಬಾ ಹುಯಿರ‍್ಹೋಸ್.
45 ಮೇ ಖ್ಹಾಚಿ ಬೋಲುಸ್ತೆ ಇನಖ್ಹಾಜೆ ತುಮೆ ವಿಶ್ವಾಸ್‌ ಕರಾಕೊಯ್ನಿ.
46 ಮಾರಾಮ ಪಾಪ್ನ ವತಾಳವಾಳೊ ತುಮಾರಮ ಕೋಣ್‌ತೋಬಿ ಛಾ಼? ಮೇ ಖ್ಹಾಚಿ ಬೋಲ್ಯೊತೋಬಿ, ತುಮೆ ಮನ ಶನ ವಿಶ್ವಾಸ್‌ ಕರಾಕೊಯ್ನಿ?
47 ಖಿವು ಏಕ್‍ಜ಼ಣು ದೇವ್‍ಥಿ ಪೈದಾಹುಯುಕಿ ದೇವ್ನಿ ವಾತೆನ ಖ್ಹಮ್‌ಜಾ಼ಸ್‌, ತುಮೆ ದೇವ್ನ ಸಂಬಂದ್ ನಾರ‍್ಹಯಾತೊ, ಇನಖ್ಹಾಜೆ ಇನ ಖ್ಹಮ್‌ಜಾ಼ಕೊಯ್ನಿ” ಕರಿ ಬೋಲ್ಯೊ.
ಯೇಸು ಅಜು಼ ಅಬ್ರಹಾಮ್‌
48 ತದೆ ಯೆಹೂದ್ಯರ್‌ನೆ ಯೇಸುನ ಬೋಲ್ಯು,ಹಮೆ ಬೋಲಾನು ಬರಾಬರ್‌ ಕಾಹೆಕಿ ಶು? “ತೂ ಸಮಾರಿಯಾವಾಳೊ ಅಜು಼ ತಾರಾಮ ಭೂತ್‌ ಛಾ಼” ಕರಿ ಬೋಲ್ಯು.
49 ಯೇಸುನೆ, “ಮಾರಾಮ ಭೂತ್‌ ಕೊಯ್ನಿ, ಮೇ ಮಾರ ಬಾನ ಮರ್ಯಾದಿ ದೆವ್‌ಸ್‌, ಕತೋಬಿ ತುಮೆ ಮನ ಮರ್ಯಾದಿ ಕೋ ದೇಯ್ನಿ.
50 ಮನ ಮರ್ಯಾದಿ ಮಳಾದೆ ಕರಿ ಮೇ ಆಖ್ಹ್ ಕೋ ಕರೂನಿ, ಕತೋಬಿ ಮನ ಮರ್ಯಾದಿ ಮಳ್‌ಣು ಕರಿ ಆಖ್ಹ್ ಕರಾವಾಳೊ ಏಕ್‌ ಜ಼ಣೊ ಛಾ಼, ಯೋ ಮಾರಭಣಿಥೊ ನ್ಯಾವ್‌ ಫೇಡಾವಾಳೊ.
51 ಮೇ ತುಮೂನ ಖ್ಹಾಚಸ್ ಬೋಲುಸ್, ಮೆ ಶಿಕಾಡನು ಖ್ಹಮ್‌ಜಿನ್‌ ಇನೀನಿಘೋಣಿ ಚಾ಼ಲವಾಳು ಕದೇಬಿ ಮರ್‌ಶೆ ಕೊಯ್ನಿ” ಕರಿ ಬೋಲ್ಯೊ.
52 ಇನ ಯೆಹೂದ್ಯವಾಳನೆ, “ತುನ ಭೂತ್‌ ಧರಿರಾಖ್ಯುಸ್ ಕರಿ ಹಮ್ಕೆ ಹಮೂನ ಮಾಲುಮ್ ಪಡ್ಯು! ಅಬ್ರಹಾಮ್‌ ಮರಿಗಯೊ, ಅಜು಼ ಪ್ರವಾದಿ ಖ್ಹಾರುಬಿ ಮರಿಗಯು, ತೋಬಿ ತೂ ಬೋಲಸ್ಕಿ, ಮೆ ಶಿಕಾಡನಿಘೋಣಿ ಚಾ಼ಲವಾಳು ಕದೇಬಿ ಮರ್‌ಶೆಕೊಯ್ನಿ ಕರಿ.
53 ಹಮಾರೊ ಮೋಟೊ ಹುಯಿರ‍್ಹೋತೆ ಅಬ್ರಹಾಮ್‌ಥೀಬಿ ತೂ ಮೋಟೋಕಿ ಶು? ಅಬ್ರಹಾಮ್‌ಬಿ, ಪ್ರವಾದಿ ಖ್ಹಾರುಬಿ ಮರಿಗಯು. ಅಮ್ ರ‍್ಹವಾಪರ್, ತಾರು ತೂ ಕೋಣ್ ಕರಿ ಸೋಚಾ಼ಸ್‌?” ಕರಿ ಪುಛಾ಼ಯು.
54 ತದೆ ಯೇಸುನೆ, “ಮಾರು ಮೇಸ್ ಖ್ಹರೈಲಿದೋತೊ, ಯೋ ಮರ್ಯಾದಿನ ಶನೀಶ್ ಬೆಲೆಕೊಯ್ನಿ. ಮನ ಮರ್ಯಾದಿ ದ್ಯವಾಳೊ ಮಾರೊ ಬಾ, ತುಮೆ ಇನ ಹಮಾರೊ ದೇವ್ ಕರಿ ಬೋಲೋಸ್‌.
55 ತೋಬಿ ತುಮೆ ಇನ ಪರ್ಖಿರಾಖ್ಯಕೊಯ್ನಿ, ಕತೋಬಿ ಮನ ಯೋ ಮಾಲುಮ್. ಯೋ ಮನ ಮಾಲುಮ್‌ಕೊಯ್ನಿ ಕರಿ ಮೇ ಬೋಲ್ಯೊತೊ, ಮೇಬಿ ತುಮಾರಿನಿತರ ಝೂ಼ಟೊ ಹುಯಿಜೈ಼ಶ್‌. ಕತೋಬಿ ಮನ ಯೋ ಮಾಲುಮ್, ಅಜು಼ ಮೇ ಇನಿ ವಾತೆನಿಘೋಣಿ ಚಾ಼ಲುಸ್‌.
56 ತುಮಾರೊ ಬಾ ಹುಯಿರ‍್ಹೋತೆ ಅಬ್ರಹಾಮ್‌ನೆ ಮೇ ಆಯಿಶ್‍ತೆ ದನ್ನ ದೇಖಿಶ್‌ ಕರಿ ಘಣು ಶಂತೋಖ್ಹ್‌ ಕರ‍್ಯೊ, ಅಜು಼ ಇನೆ ಯೋ ದನ್ನ ದೇಖಿನ್‌ ಖ್ಹುಶಿ ಕರ‍್ಯೊ” ಕರಿ ಬೋಲ್ಯೊ.
57 ಇನ ಯೆಹೂದ್ಯರ್‌ನೆ, “ತುನ ಬಿಜೂ಼ಬಿ ಅಡೈವಿಖ್ಹ್‌ ವರಖ್ಹ್‌ ಕೋ ಹುಯಿರಾನಿ, ತುನೆ ಅಬ್ರಹಾಮ್‌ನ ದೇಖಿರಾಖ್ಯೋಸ್ಕಿ ಶು?” ಕರಿ ಯೇಸುನ ಬೋಲ್ಯು.
58 ಯೇಸುನೆ, “ಮೇ ಖ್ಹಾಚ ಬೋಲುಸ್ಕಿ, ಅಬ್ರಹಾಮ್‌ ಪೈದಾ ಹುವಾನ ಅಗಾಡಿಸ್, ಮೇ ಥೊ!” ಕರಿ ಬೋಲ್ಯೊ.
59 ಆ ವಾತೆನ ಖ್ಹಮ್‌ಜಿನ್‌, ಇವ್ಣೆ ಇನ ಮಾರಾನಖ್ಹಾಜೆ ಬಂಡಾ ಪಾಡಿಲಿದು, ಕತೋಬಿ ಯೇಸು ಓಠೆಹೋತೊಹುಯಿನ್, ಮಂದಿರ್‌ನ ಮಹಿಕರಿ ಚ಼ಲೆಗಯೊ.