4
ಯೇಸು ಅಜು಼ ಸಮಾರಿಯಾನಿ ತಯೇಡ
1 ಯೇಸು ಯೋಹಾನ್‌ಥೀಬಿ ಜಾ಼ಖ್ಹತ್ ಶಿಷ್ಯರ್‌ನ ಕರುಕರಸ್, ಇವ್ಣುನ ಬ್ಯಾಪ್ತಿಸ್ಮ ದೆವ್‌ಕರಾಸ್ ಕರಿ ಬೋಲಾನಿ ಖಬರ್ ಫರಿಸಾಯರ್‌ವಾಳು ಖ್ಹಮ್‌ಜ್ಯು. ಆ ಯೇಸುನ ಮಾಲುಮ್ ಪಡ್ಯು.
2 ಕತೋಬಿ ಖ್ಹಾಚಮ ಬ್ಯಾಪ್ತಿಸ್ಮ ದೆವ್‌ಕರ್ತೊಥೋತೆ ಯೇಸು ಕಾಹೆ, ಖಲಿ ಇನು ಶಿಷ್ಯರ್‌ ದೆವ್‌ಕರ್‌ತುಥೂತೆ.
3 ಅದ್ಮಿಖ್ಹಾರು ಬೋಲಾನು ಯೇಸುನೆ ಖ್ಹಮ್‍ಜ್ಯೊತೆ ತದೆ ಯೂದಾಯ ತಬರ್‌ಖಾನ ಮ್ಹೆಂದಿನ್, ಪಾಛು಼ ಗಲಿಲಾಯನ ಚ಼ಲೆಗಯೊ.
4 ಯೋ ಜಾ಼ವಾನಿ ವಖ್ಹತ್‌ಮ, ಸಮಾರ್ಯ ತಬರ್‌ಖಾಪರ್ ಕರಿ ಜಾ಼ವ್ಣುಪಡ್ಯು.
5 ಸಮಾರ್ಯನ ಮಳ್ಯುಹುಯು ಸುಖರ್‌ ಕರಿ ಗಾಮ್‌ನ ಆಯೊ, ಯೋ ಗಾಮ್‍ ಯಾಕೋಬ್‍ನೆ ಇನೊ ಛಿಯ್ಯೊ ಯೋಸೇಫನ ದಿದೊತೆ ಝ಼ಗೋನ ಖನ್ನೆ ಥೂ.
6 ಯಾಕೋಬ್‍ನಿ ಬಾವ್ಡಿ ಹಿಜ್ಜಾ಼ ಥಿ, ಯೇಸು ಚಾ಼ಲಿನ್ ಥಕಿರ‍್ಹೋಥೋತೆ, ಇನಖ್ಹಾಜೆ ಯೋ ಬಾವ್ಡಿಕನ ಐನ್ ಬೇಶಿಗಯೊ. ತದೆ ಕಮ್‍ಶಿಕಮ್ ಧೊಪಾರ್‌ ಹುಯಿರ‍್ಹುಥು.
7 ಏಕ್‌ ಸಮಾರ್ಯನಿ ತಯೇಡ ಪಾಣಿ ಭರಾನಟೇಕೆ ಹಿಜ್ಜಾ಼ ಆಯಿ, ತದೆ ಯೇಸುನೆ ಇನ, “ಪಿಯ್ಯಾನ ಥೋಡು ಪಾಣಿ ಮಳ್ಶೆ?” ಕರಿ ಬೋಲ್ಯೊ.
8 ತದೆ ಇನ ಶಿಷ್ಯರ್‌ ಖಾಣಾನು ರಾಛು಼ಲ್ಯವಾನಟೇಕೆ ಖ್ಹಯೇರ‍್ನ ಜೈ಼ರ‍್ಹೂಥು.
9 ತದೆ ಯೋ ತಯೇಡಾನೆ, “ತೂ ಯೆಹೂದ್ಯರ್‌ವಾಳೊ, ಅಜು಼ ಮೇ ಸಮಾರ್ಯವಾಳಿ, ಅಮ್ ರ‍್ಹವಾಪರ್ ತೂ ಮಾರಕನ ಪಿಯ್ಯಾನ ಪಾಣಿ ಮಾಂಗೇಜಾ಼ಯ್ಕಿ ಶು?” ಕರಿ ಜಾ಼ವಾಬ್‌ ದಿದಿ. ಯೆಹೂದ್ಯವಾಳು ಸಮಾರ್ಯವಾಳನಿ ಜೋ಼ಡ್ಮ ಖಿವಿ ಸಂಬಂದ್ ರಾಕ್‍ತುಥು ಕೊಯ್ನಿ.
10 ಯೇಸುನೆ ಯೊ ತಯೇಡನ ಬೋಲ್ಯೊಕಿ, “ತುನ ದೇವ್ನಿ ಬಾರೇಮ ಅತ್ರುಖ್ಹು ಮಾಲುಮ್ ರ‍್ಹಿಯುಹೊತ್ತೊ ಯೊ ಕೋಣ್ ಹುಯಿರೊಸ್, ದೇವ್ ಶಾತ್‌ ದೀರಾಖ್ಯೊಸ್ ಕರಿ, ತುನ ಮಾಲುಮ್ ರ‍್ಹಿಯುಹೊತ್.ತಾರಕನ ಪಿಯ್ಯಾನ ಪಾಣಿ ಮಾಂಗ್ಯೋತೆ ಯೋ ಕೋಣ್ ಕರಿ ಮಾಲುಮ್ ರ‍್ಹಯುಹೋತ್ತೊ, ತೂ ಇನಾಕನ ಮಾಂಗಿಲಿದಿಹೊತ್, ಅಜು಼ ಯೋ ತುನ ಜಾನ್ನಪಾಣಿನ ದಿದೋಹೊತ್‌” ಕರಿ ಬೋಲ್ಯೊ.
11 ಯೋ ತಯೇಡ ಇನ, “ಪ್ರಭು, ಪಾಣಿ ಶೇಂದಾನ ತಾರಕನ ಶಾತ್ಬಿ ಕೊಯ್ನಿ, ಬಾವ್ಡಿ ಘಣಿ ಗಧಾರ್ ಛಾ಼, ಅಮ್ ರ‍್ಹವಾಪರ್ ಯೋ ಜಾನ್ನು ಪಾಣಿ ತು ಕಿಮ್ ದಿಶ್?
12 ಹಮಾರೊ ಗುರು ಯಾಕೋಬಥೀಬಿ ತೂ ಮೋಟೋಕಿ ಶು? ಇನೇಸ್‌ ಆ ಬಾವ್ಡಿನ ಹಮೂನ ದಿದೋತೆ; ಯೋಬಿ ಇನ ಲಡ್ಕಾಬಿ, ಇನೆ ಪಾಳ್ಯೊತೆ ಖ್ಹಾರುಸ್‌ ಜಾನ್ವರ್‌ ಆ ಬಾವ್ಡಿನು ಪಾಣಿ ಪೀದು” ಕರಿ ಬೋಲಿ.
13 ಯೇಸುನೆ ಅಮ್ ಬೋಲ್ಯೊ, “ಆ ಪಾಣಿನ ಪಿಯ್ಯಾಸ್ತೆ ಹರೇಕ್ನ ಪಾಛು಼ ಠೋಖ್ಹ್‌ ಲಾಗ್‌ಶೆ,
14 ಕತೋಬಿ ಮೇ ದೆವ್‍ಸ್ತೆ ಪಾಣಿನ ಕೋಣ್ ಪಿಯ್ಯಾಸ್‍ಕಿ ಇವ್ಣುನ ಕದೇಬಿ ಠೋಖ್ಹ್‌ ಲಾಗ್‌ಶೆ ಕೊಯ್ನಿ. ಮೇ ಇನ ದೀಶ್‌ತೆ ಪಾಣಿ ಇವ್ಣಾಮ ಭರೈನ್ ಝ಼ರುಕರ್‌ಶೆ. ಯೋ ಇನ ಹಮೇಶಾನಿ ಜಿ಼ಂದ್‌ಗೀನ ದಿಶೆ” ಕರಿ ಬೋಲ್ಯೊ.
15 ಯೋ ತಯೇಡ ಯೇಸುನ, “ಗುರು, ಯೋ ಪಾಣಿನ ಮನ ದೇ! ತದೆ ಮನ ಕದೇಬಿ ಪಾಛು಼ ಠೋಖ್ಹ್‌ ಕೋ ಲಾಗ್‌ಶೇನಿ. ಅಜು಼ ಪಾಣಿ ಶೇಂದಾನ ಹಜ್ಜಾ಼ ಆವಾನಿ ಜ಼ರೂರತ್‌ಬಿ ಕೋ ರ‍್ಹಿಶೇನಿ” ಕರಿ ಬೋಲಿ.
16 ಯೇಸುನೆ ಇನ, “ಜೈ಼ನ್, ತಾರ ಬಾವ್ರಿನ ಹಜ್ಜಾ಼ ಬುಲೈಲಿ ಆವ್” ಕರಿ ಬೋಲ್ಯೊ.
17 ಯೋ ತಯೇಡನೆ, “ಮನ ಬಾವ್ರಿ ಕೊಯ್ನಿ” ಕರಿ ಬೋಲಿ. ಯೇಸುನೆ ಇನ, “ತುನ ಬಾವ್ರಿ ಕೊಯ್ನಿ ಕರಿ ಬೋಲಿತೆ ವಾತೆ ಬರಾಬರಸ್‌.
18 ತುನ ಪಾಚ಼್ ಜ಼ಣ ಬಾವ್ರಿ ಥಾ, ಅಜು಼ ತೂ ಹಮ್ಕೆ ಕಿನ ಜೋ಼ಡೆ ಛಾ಼ಕಿ ಯೋಬಿ ತಾರೊ ಬಾವ್ರಿ ಕಾಹೆ. ತುನೆ ಮನ ಖ್ಹಾಚಿಸ್ ಬೋಲಿ” ಕರಿ ಬೋಲ್ಯೊ.
19 ಯೋ ತಯೇಡಾನೆ, “ಪ್ರಭು, ತೂ ಪ್ರವಾದಿ ಕರಿ ಮನ ದೆಖಾವಸ್” ಕರಿ ಬೋಲಿ.
20 ಹಮಾರು ಗುರುಖ್ಹಾರು ಆ ಪಹಾಡ್‌ಪರ್ ಆರಾದನೆ ಕರ‍್ಯು, ಆ ನಾಹುಯಿನ್ ಅದ್ಮಿಖ್ಹಾರು ಆರಾದನೆ ಕರ್ನುಥೂತೆ ಝ಼ಗೊ ಯೆರೂಸಲೇಮ್‌ ಕರಿ ಯೆಹೂದ್ಯರ್ ಹುಯಿರ‍್ಹಾತೆ ತುಮೇಸ್ ಬೋಲಾಸ್.” ಕರಿ ಬೋಲಿ.
21 ಯೇಸುನೆ ಯೊ ತಯೇಡಾನ ಅಮ್ಮ ಮಾರಿ ವಾತ್ನ ನಂಬ್, “ಏಕ್‌ ವಖ್ಹತ್ ಆವ್‌ಶೆ, ಯೋ ವಖ್ಹತ್‌ಮ ತುಮೆ ಬಾನ ಆರಾದನೆ ಕರಾನಖ್ಹಾಜೆ ಆ ಪಹಾಡ್‌ನಾಬಿ ರ‍್ಹವೊ, ಯೆರೂಸಲೇಮ್‌ನಾಬಿ ರ‍್ಹವೊ ಕೋ ಜಾ಼ಶುನಿ.
22 ತುಮೆ ಸಮಾರಿಯವಾಳ ಕತೋಬಿ ಯೆಹೂದ್ಯರ್ ಹುಯಿರ‍್ಹಾತೆ ಹಮೆ ಕಿನ ಆರಾದನೆ ಕರೇಸ್ ಕರಿ ತುಮುನ ಮಾಲುಮ್ ಕೊಯ್ನಿ, ಶನಕತೊ ರಕ್ಷಣೆ ಯೆಹೂದ್ಯರ್‌ಥೀಸ್‌ ಆವ್‌ಶೆ.
23 ಖ್ಹಾಚ ಆರಾದನೆ ಕರಾವಾಳು ಬಾನಿ ಆರಾದನೆ ಆತ್ಮಥೀಬಿ, ಖ್ಹಾಚಿಥೀಬಿ ಕರ್ಶೆ, ಯೋ ವಖ್ಹತ್ ಹಂಕೇಸ್‌ ಐಗು. ಬಾ ಇನ ಆರಾದನೆ ಕರಾವಾಳು ಅಮ್ನುಸ್ ರ‍್ಹೇವ್ಣುಕರಿ ಆಖ್ಹ್ ಕರಾಸ್.
24 ದೇವ್ ಆತ್ಮ ಹುಯಿರ‍್ಹೋಸ್, ಇನ ಆರಾದನೆ ಕರಾವಾಳು ಆತ್ಮಥೀಬಿ, ಖ್ಹಾಚಿಥೀಬಿ ಆರಾದನೆ ಕರವಾಳು ಹುಯಿರೇಣು” ಕರಿ ಬೋಲ್ಯೊ.
25 ಯೋ ತಯೇಡಾನೆ ಇನ, “ಮೆಸ್ಸೀಯ ಆವ್‍ಶೆಕರಿ ಮನ ಮಾಲುಮ್ ಯೋಸ್ ಕ್ರಿಸ್ತ, ಅಜು಼ ಯೋ ಆವ್‌ಶೇತೆ ತದೆ ಹಮೂನ ಹರೇಕ್ ಬಾರೇಮ ಬೋಲಿವತಾಳ್‌ಶೆ” ಕರಿ ಬೋಲಿ.
26 ತದೆ ಯೇಸುನೆ,ಇನ ಬೋಲ್ಯೊ “ತಾರಿ ಜೋ಼ಡೆ ವಾತೆ ಬೋಲುಕರುತೆ ಮೇಸ್ ಯೋ” ಕರಿ ಬೋಲ್ಯೊ.
27 ಎತ್ರಾಸ್‌ಮ ಯೇಸುನ ಶಿಷ್ಯರ್‌ ಪಾಛು಼ಫರಿ ಆಯಾ, ಅಜು಼ ಯೇಸು ಏಕ್‌ ತಯೇಡಾನ ಜೋ಼ಡೆ ವಾತೆ ಬೋಲುಕರಾತೆ ದೇಖಿನ್‌, ಇವ್ಣೆ ಘಣು ಆಶ್ಚರ್ಯ ಕರ‍್ಯಾ. ಕತೋಬಿ, “ತುನ ಶಾತ್‌ ಹೋಣು?” ಕರಿ ರ‍್ಹವೊ, “ತೂ ಇನಜೋ಼ಡೆ ಶನ ವಾತೆ ಬೋಲುಕರಾಸ್‌?” ಕರಿ ರ‍್ಹವೊ, ಇವ್ಣಾಮ ಏಕ್‌ ಜ಼ಣಾನೇಬಿ ಕೋ ಫುಛಾ಼ಯಾನಿ.
28 ತದೆ ಯೋ ತಯೇಡ ಇನಿ ಕೇಳಿನ ಹಿಜ್ಜಾ಼ಸ್ ಮ್ಹೆಂದಿನ್, ಪಾಛು಼ ಫರೀನ್ ಗಾಮ್‌ನ ಮಹಿ ಜೈ಼ನ್,
29 “ಮೇ ಹಂಕೆತೋಡಿ ಕರೀತೆ ಖ್ಹಾರಸ್ನ ಬೋಲ್ಯೊತೆ ಏಕ್‌ ಅದ್ಮಿ ಹಿಜ್ಜಾ಼ ಛಾ಼. ಐನ್ ದೇಖೊ, ಯೋಸ್ ಕ್ರಿಸ್ತಕಿ ಹುಯಿರೇಣು ಶುಕಿ?” ಕರಿ ಹಿಜ್ಜಾ಼ನು ಅದ್ಮಿ ಖ್ಹಾರಾನ ಬೋಲಿ.
30 ಇನಖ್ಹಾಜೆ ಅದ್ಮಿಖ್ಹಾರು ಖ್ಹಯೇರ‍್ನ ಮ್ಹೆಂದಿನ್, ಯೇಸುಕನ ಆಯು.
31 ಎತ್ರಾಸ್‌ಮ ಯೇಸುನ ಶಿಷ್ಯರ್‌, “ಗುರು, ಖಾಣು ಖಾ” ಕರಿ ಗಿಂಗಾಯು.
32 ಯೇಸುನೆ ಇವ್ಣುನ, “ಮಾರಕನ ಖಾವಾನ ಖಾಣು ಛಾ಼, ಕತೋಬಿ ತುಮೂನ ಇನಿ ಬಾರೇಮ ಮಾಲುಮ್ ಕೊಯ್ನಿ” ಕರಿ ಬೋಲ್ಯೊ.
33 ತದೆ ಶಿಷ್ಯರ್‌, “ಕೋಣ್‌ತೋಬಿ ಇನ ಪಹಿಲೇಸ್ ಖಾಣು ಲೈನ್‌ ದಿದುಕಿ ಶುಕಿ?” ಕರಿ ಇವ್ಣ-ಇವ್ಣಾಸ್‍ಮ ಪುಛಾ಼ವಲಗ್ಯಾ.
34 ಯೇಸು ಇವ್ಣುನ ಬೋಲ್ಯೋಕಿ ಮಾರು ಖಾಣು ಶಾತ್‌ಕತೊ ಕೋಣ್ ಮನ ಮೊಕ್‍ಲ್ಯೊಕೀ ಇವ್ಣಿ ಆಖ್ಹ್‌ನ ಪೂರ ಕರಾನುಸ್ ಹುಯಿರುಸ್. ಅಜು಼ ಮನ ದಿದೂತೆ ಯೊ ಕಾಮ್ನ ಪೂರ ಕರ‍್ನು
35 ‘ಖ್ಹುಗ್ಗೀನು ಹಗಾಮ್‌ ಆವಾನ ಬಿಜು಼ ಚಾರ್ ಮಹಿನ ಛಾ಼’ ಕರಿ ತುಮೆ ಬೋಲೋಸ್‌ನಿ. ಕತೋಬಿ ಮೇ ತುಮೂನ ಬೋಲುಸ್ಕಿ, ತುಮಾರ ಡೋಳಾನ ಪಾಡೀನ್, ಖೇತರ್‌ ಭಣಿ ದೇಖೊ; ಯೋ ವ್ಹಡಾವ್ಣಿನ ತೈಯಾರ್ ಛಾ಼!
36 ವ್ಹಾಡವಾಳನ ಹಮ್ಕೆಸ್‌ ಕೂಲಿ ಮಳ್ಶೆ ಅಜು಼ ಯೋ ಹಮೇಶಾನಿ ಜಿ಼ಂದ್‌ಗೀನಖ್ಹಾಜೆ ಅನಾಜ಼್‌ನ ಜ಼ಮ ಕರಾಸ್. ಅಮ್ ಪಿಕಾವವಾಳಾನ ಅಜು಼ ವ್ಹಾಡವಾಳಾನ ಭೇನ ಎಕ್ಕದಮ್‌ ಖ್ಹುಶಿ ಉಷೆ.
37 ‘ಪಿಕಾವವಾಳೊ ಏಕ್‌ ಜ಼ಣೊ, ವ್ಹಾಡವಾಳೊ ಏಕ್‌ ಜ಼ಣೊ’ ಕರಿ ಬೋಲಾಸ್ತೆ ಕಹಾವತ್ ಖ್ಹಾಚಸ್.
38 ತುಮೆ ಮ್ಹಿನತ್ ಕರ‍್ಯಾಕೊಂತೆ ಅನಾಜ಼್‌ನ ವ್ಹಾಡಾನಟೇಕೆ ಮೇ ತುಮೂನ ಮೋಕ್‌ಲ್ಯೊ; ಬಿಜಾ಼ನೆ ಮ್ಹಿನತ್ ಕರ‍್ಯು, ಇವ್ಣಿ ಮ್ಹಿನಥ್ಥಿ ತುಮೂನ ಫಾಯಿದೊ ಮಳ್ಯು” ಕರಿ ಬೋಲ್ಯೊ.
39 ‘ಮೇ ಕರೀತೆ ಖ್ಹಾರಸ್ನ ಇನೆ ಮನ ಬೋಲ್ಯೊ’ ಕರಿ ಸಾಕ್ಷಿಬೋಲಿತೆ ಯೋ ತಯೇಡಾನಿ ವಾತೆನ ಖ್ಹಮ್‌ಜಿನ್‌, ಯೋ ಗಾಮ್‌ನು ಸಮಾರಿಯವಾಳಾಮ ಘಣು ಜ಼ಣು ಯೇಸುನ ನಂಬ್ಯು.”
40 ಸಮಾರಿಯವಾಳು ಯೇಸುಕನ ಐನ್, ಹಮಾರ ಜೋ಼ಡೆ ರ‍್ಹೇ ಕರಿ ಇನ ಗಿಂಗಾಯು, ಇನಖ್ಹಾಜೆ ಯೇಸು ಬೇದನ್ ಹಿಜ್ಜಾ಼ಸ್ ರ‍್ಹಯಿಗೊ ಥೊ.
41 ಇನೆ ಬೋಲ್ಯೋತೆ ವಾತೆನ ಖ್ಹಮ್‌ಜಿನ್‌ ಬಿಜೂ಼ಬಿ ಘಣು ಅದ್ಮಿ ನಂಬ್ಯು.
42 ಇವ್ಣೆ ಯೊ ತಯೇಡಾನ, ಹಮೆ ಇನ ನಂಬ್ಯಾತೆ ಅಜೂ಼ಬಿ ತಾರಿ ವಾತ್ನ ಉಪ್ಪರ್ ಕಾಹೆ. ಹಮೇಸ್ ಕಾನ್‍ಥಿ ಖ್ಹಮ್‌ಜಿನ್‌ ಇನ ಯೋಸ್ ಖ್ಹಾಚೇಥಿ ಜಗತ್ನ ಬಚಾ಼ಡವಾಳೊಕರಿ ಮಾಲುಮ್ ಕರಿರಾಖ್ಯಾಸ್ ಕರಿ ಬೋಲ್ಯು.
ಯೇಸುನೆ ಅದಿಕಾರಿನ ಛಿಯ್ಯಾನ ಅಛ್ಛು಼ ಕರ‍್ಯೊತೆ
43 ಬೇ ದನ್ ಹಿಜ಼್ಜ ರ‍್ಹವಾನ ಬಾದ್‌ಮ ಯೇಸು ಹಿಜ್ಜಾ಼ಥೊ ಗಲಿಲಾಯನ ಗಯೊ.
44 “ಪ್ರವಾದಿನ ಶೊಂತ್‌ ಗಾಮ್ಮ ಮರ್ಯಾದಿ ಕೊಯ್ನಿ” ಕರಿ ಖ್ಹುದ್ ಯೇಸುನೇಸ್‌ ಬೋಲಿರಾಖ್ಯೋಥೊ.
45 ತದೆ ಯೇಸು ಗಲಿಲಾಯ ಜಾ಼ವಾಮ, ಗಲಿಲಾಯನು ಅದ್ಮಿಖ್ಹಾರು ಇನ ಸ್ವಾಗತ್ ಕರ‍್ಯು, ಶನಕತೊ ಯೊ ಯೆರೂಸಲೇಮ್ಮಾ ಪೂಜಾ಼ನ ದನ್ಮ ಕರಿರಾಖ್ಯೋಥೊತೆ, ಇವ್ಣೆಅಖ್ಖೂಸ್ ದೇಖಿರಾಖ್ಯೂಥು.
46 ಯೇಸು ಪಾಛೊ಼ ಗಲಿಲಾಯನು ಕಾನಾ ಗಾಮ್‌ನ ಗಯೊ ಯೊ ಹಿಜ್ಜಾ಼ಸ್ ಇನೆ ಪಾಣಿನ ದ್ರಾಕ್ಷಿನು ರಖ್ಹ್‌ ಬಣಾಯೊಥೊತೆ. ಹಿಜ್ಜಾ಼ ಖ್ಹರ್ಕಾರ್‌ನೊ ಏಕ್‌ ಶೌಕಾರ್ ಅದಿಕಾರಿ ಥೊ. ಇನ ಛಿಯ್ಯಾನ ಕಪೆರ್ನೌಮ್ಮ ಜಾನ್ನ ಅಛ್ಛು಼ ಕೋ ಥೂನಿ.
47 ಯೇಸು ಯೂದಾಯಥು ಗಲಿಲಾಯನ ಆಯೋತೆ ಖಬರ್ ಖ್ಹಮ್‍ಜ್ಯೊ ಶನಕತೊ ಇನೊ ಛಿಯ್ಯೊ ಮರಾನಲಾಗ್ಯೊ ಥೊ, ತದೆ ಯೊ ಯೇಸುಕನ ಜೈ಼ನ್, ಇನ ಛಿಯ್ಯಾನ ಅಛ್ಛು಼ ಕರ‍್ನು ಕರಿ ಗಿಂಗಾಯೊ.
48 ಯೇಸುನೆ ಇನ, “ತುಮೆ ಖ್ಹಣೇದ್‍ನು ಕಾಮ್ನ ಅಜು಼ ಅದ್ಭುತ್‌ಕಾಮ್ನ ದೇಖ್ಯುನಾತೊ ನಂಬಾಸಸ್ ಕೊಯ್ನಿ” ಕರಿ ಬೋಲ್ಯೊ.
49 ಯೋ ಅದಿಕಾರಿನೆ, “ಗುರು, ಮಾರೊ ಛಿಯ್ಯೊ ಮರ್‌ವಾನ ಅಗಾಡಿ ತೂ ಮಾರ ಕೇಡೆ ಆವ್” ಕರಿ ಬೋಲಿಲಿದೊ.
50 ಯೇಸುನೆ ಇನ, “ಜಾ಼, ತಾರೊ ಛಿಯ್ಯೊ ಜಿವ್‌ಶೆ” ಕರಿ ಬೋಲ್ಯೊ. ಯೋ ಅದ್ಮಿ ಯೇಸುನೆ ಇನ ಬೋಲ್ಯೊತೆ ವಾತೆನ ನಂಬಿನ್, ಚ಼ಲೆಗಯೊ.
51 ಯೋ ಘರೆ ಜಾ಼ವಾನಿ ವಖ್ಹತ್‌ಮ, ಇನೊ ಆಳ್‌ ಐನ್, “ತಾರೊ ಛಿಯ್ಯೊ ಜಿವ್ತೊ ಹುಯಿಗಯೊ” ಕರಿ ಬೋಲ್ಯೊ.
52 ತದೆ ಇನೆ, “ಕೆತ್ರ ಘಂಟಾನ ಮಾರ ಛಿಯ್ಯಾನ ಅಛ್ಛು಼ ಹುಯೂತೆ?” ಕರಿ ಇನ ಪುಛಾ಼ವಖ್ಹತರ್, ಇವ್ಣೆ, “ಕಾಲೆ ಧೋಪಾರ್‌ನು ಏಕ್‌ ಘಂಟಾನ ಇನು ತಾವ್ ಉತ್ರಿಗು” ಕರಿ ಬೋಲ್ಯು.
53 “ತಾರೊ ಛಿಯ್ಯೊ ಜಿವ್‌ಶೆ” ಕರಿ ಯೇಸುನೆ ಇನ ಬೋಲ್ಯೊತೆ ವಖ್ಹತ್‌ಮಾಸ್‌ ಅಛ಼್ಛುಹುಯು ಕರಿ ಬಾನೆ ಮಾಲುಮ್ ಕರಿಲಿದೊ, ಅಜು಼ ಯೋಬಿ, ಇನ ಘರ್‌ವಾಳು ಖ್ಹಾರು ಯೇಸುನ ನಂಬ್ಯು.
54 ಯೇಸು ಯೂದಾಯಥು ಗಲಿಲಾಯ ಆವಾನ ಬಾದ್‌ಮ, ಕರ‍್ಯೊತೆ ಬೇನು ಅದ್ಭುತ್ ಕಾಮ್ ಆ.