15
ಯೇಸುಸ್‌ ಖ್ಹಾಚೊ಼ ದ್ರಾಕ್ಷಿನೊ ವೇಲೊ
1 “ಮೇಸ್ ಖ್ಹಾಚೊ಼ ದ್ರಾಕ್ಷಿನೊ ವೇಲೊ, ಮಾರೊ ಬಾ ಬಾಗ್‌ನ ದೇಕ್-ಭಾಲ್‌ ಕರಾವಾಳೊ.
2 ಮಾರಾಮ ರ‍್ಹೀನ್, ಪಂಡು ದೇಯಿಕೊಂತೆ ಹರೇಕ್ ಡಾಳಿನ ಯೋ ಕತ್ರಿನಾಖಸ್‌; ಅಜು಼ ಪಂಡು ದೇಸ್ತೆ ಹರೇಕ್ ಡಾಳಿನ ಬಿಜೂ಼ಬಿ ಜಾ಼ಖ್ಹತ್ ಪಂಡು ದ್ಯವಾನಿಘೋಣಿ ಇನ ಛಾ಼ಟಿನ್ ಪಾಕ್‍ಕರಾಸ್.
3 ಮೇ ತುಮೂನ ಬೋಲ್ಯೊತೆ ವಚನ್‌ಥಿ ತುಮೆ ಅಗಾಡಿಸ್ ಪಾಕ್‌ ಹುಯಿರ‍್ಹಾಸ್‌.
4 ತುಮೆ ಮಾರಾಮ ರ‍್ಹವೊ, ಮೇ ತುಮಾರಾಮ ರ‍್ಹೀಶ್. ಡಾಳಿಯೆ ವೇಲಾನ ಜೋ಼ಡೆ ನಾ ರ‍್ಹಿಯುತೊ, ಇನುಯೋಸ್ ಪಂಡು ದ್ಯವಾನ ಕೋ ಹುವ್ವಾನಿಕಿ, ಇಮ್ಮಸ್ ತುಮೆ ಮಾರಾಮ ನಾ ರ‍್ಹಯಾತೊ, ಫಲ್‍ದ್ಯವಾನ ಕೋ ಉಶೇನಿ.
5 ಮೇ ದ್ರಾಕ್ಷಿನೊ ವೇಲೊ, ಅಜು಼ ತುಮೆ ಡಾಳಿಯೆ. ಏಕ್ ಜ಼ಣೊ ಮಾರಾಮ ಅಜು಼ ಮೇ ಇನಾಮ ರ‍್ಹಯೋತೊ, ಯೋಸ್‌ ಜಾ಼ಖ್ಹತ್ ಪಂಡು ದಿಶೆ; ಕತೋಬಿ ತುಮೆ ಮನ ಮ್ಹೆಂದಿನ್ ಶಾತ್ಬಿ ಕರಾನ ಕೋ ಹುವಾನಿ.
6 ಕೋಣ್ ಮಾರಾಮ ಕೋ ರ‍್ಹೇಯ್ನಿಕಿ, ಯೋ ಭಾರ್ ಫೇಕೈಗಯೂತೆ ಡಾಳಿನಿತರ ಛಾ಼, ಯೋ ಡಾಳಿ ಖ್ಹುಕೈಜಾ಼ಸ್; ಯೋ ಡಾಳಿಯೇನ ಅದ್ಮಿ ಎಕ್ಟು ಕರೀನ್, ಆಗ್‌ಮ ಫೇಕಿನಾಖಸ್‌, ಹಿಜ್ಜಾ಼ ಯೋ ಬಳಿಜಾ಼ಸ್‌.
7 ತುಮೆ ಮಾರಾಮಬಿ ಮಾರಿ ವಚನ್ ತುಮಾರಾಮ ರ‍್ಹಯೀತೊ, ಶಾತ್ ಮಾಂಗಿಲಿದಾತೋಬಿ ಯೋ ತುಮೂನ ಮಳ್‌ಶೆ.
8 ತುಮೆ ಜಾ಼ಖ್ಹತ್ ಪಂಡು ದಿಶುತೆ ಇನೇಥಿಸ್ ಮಾರ ಬಾನ ಮಹಿಮೆ ಉಶೆ; ಅಜು಼ ಅಮ್ ತುಮೆ ಮಾರ ಶಿಷ್ಯರ್‌ಉಶು.
9 ಬಾನೆ ಮನ ಕಿಮ್ ಪ್ಯಾರ್ ಕರ‍್ಯೋಕಿ ಇಮ್ಮಸ್, ಮೇ ತುಮೂನ ಪ್ಯಾರ್ ಕರುಸ್; ತುಮೆ ಮಾರಿ ಲಾಡ್ಮ ಮಳಿರ‍್ಹವೊ.
10 ಮೇ ಮಾರ ಬಾನಿ ಹುಕುಮ್‌ನ ಪಾಡಿ ಚಾ಼ಲಿನ್, ಇನಿ ಲಾಡ್ಮ ಛೂ಼ತೆ ಇಮ್ಮಸ್, ತುಮೆ ಮಾರಿ ಹುಕುಮ್‌ನ ಪಾಡಿ ಚಾ಼ಲ್ಯಾತೊ, ಮಾರಿ ಲಾಡ್ಮ ಏಕ್ ಹುಯಿರ‍್ಹೀಶು.
11 ಮಾರಾಮ ಛಾ಼ತೆ ಖ್ಹುಶಿ ತುಮಾರಮಾಬಿ ರ‍್ಹೇಣು ಕರಿ, ಅಜು಼ ತುಮಾರಿ ಖ್ಹುಶಿ ಭರೈನ್ ಝ಼ಲಕ್‌ಣು ಕರಿ ಮೇ ಆ ಖ್ಹಾರು ತುಮೂನ ಬೋಲಿರಾಖ್ಯೊಸ್.
12 ಮೇ ತುಮೂನ ಪ್ಯಾರ್ ಕರ‍್ಯೊತೆ ಇಮ್ಮಸ್, ತುಮೇಬಿ ಏಕ್‌ಥಿ-ಏಕ್ ಪ್ಯಾರ್ ಕರ‍್ನು, ಕರಿ ಬೋಲಾನುಸ್ ಮಾರಿ ಹುಕುಮ್‌.
13 ಇನೊ ಜಾನ್ನಾಸ್ ದೋಸ್ತ್ ಖ್ಹಾರಾನಖ್ಹಾಜೆ ದೇಸ್ತೆ, ಲಾಡ್‌ಥಿ ಮಹಾನ್ ಪ್ಯಾರ್ ಬಿಜು಼ ಕೆಹುಸ್‌ ಕೊಯ್ನಿ.
14 ಮೇ ತುಮೂನ ದಿದೋತೆ ಹುಕುಮ್‌ನಿಘೋಣಿ ತುಮೆ ಚಾ಼ಲ್ಯಾತೊ, ತುಮೆ ಮಾರ ದೋಸ್ತ್.
15 ಬಿಜು಼ ಖ್ಹಾಮ್ಣೆ ಮೇ ತುಮೂನ ಆಳ್‌ ಕರಿ ಬುಲಾವ್ ಕೊಯ್ನಿ, ಶನಕತೊ ಯಜಮಾನ್ ಶಾತ್ ಕರುಕರಸ್ ಕರಿ ಇನ ಆಳ್‌ನ ಮಾಲುಮ್ ಕೋ ರ‍್ಹೇಯ್ನಿ. ಅನಬದಲ್ ಮೇ ತುಮೂನ ದೋಸ್ತ್ ಕರಿ ಬುಲಾವುಸ್‌, ಶನಕತೊ ಬಾಥಿ ಮೇ ಶಾತ್ ಖ್ಹಮ್‌ಜ್ಯೋಕಿ ಖ್ಹಾರಸ್ನ ತುಮೂನ ಬೋಲಿರಾಖ್ಯೊಸ್.
16 ತುಮೆ ಮನ ಚೂ಼ಣಿನ್ ಕಾಡಿರಾಖ್ಯಕೊಯ್ನಿ; ಮೇ ತುಮೂನ ಚೂ಼ಣಿನ್ ಕಾಡಿರಾಖ್ಯೊಸ್, ತುಮೆ ಜೈ಼ನ್‌, ಪಂಡು ದೇವ್ಣುಕರಿ ಅಜು಼ ಯೋ ಪಂಡು ಕೆದೇಬಿ ದ್ಯವಾನು ಹುಯಿರ‍್ಹೇಣು ಕರಿ, ಮೇ ತುಮೂನ ನೇಮ್‌ಶೈರಾಖ್ಯೋಸ್‌. ಅನಖ್ಹಾಜೆಸ್ ಮಾರ ನಾಮ್‍ಥಿ ತುಮೆ ಶಾತ್ ಮಾಂಗಿಲಿದಾತೋಬಿ ಬಾ ತುಮೂನ ಯೋ ದಿಶೆ.
17 ತುಮೆ ಏಕ್‌ಥಿ-ಏಕ್ ಪ್ಯಾರ್ ಕರ‍್ನು, ಕರಿ ಬೋಲಾನುಸ್ ಮಾರಿ ಹುಕುಮ್‌.
ಯೇಸುನೆ ಝೇತಾಯೊತೆ
18 “ಆ ಜಗತ್‌ ತುಮೂನ ವಹೇರ್‌ ಕರ‍್ಯೂತೊ, ಯೋ ಪಹಿಲೆ ಮನ ವಹೇರ್‌ ಕರ‍್ಯು ಕರಿ ತುಮೆ ಯಾದ್ ಕರಿಲೆವೊ.
19 ತುಮೆ ಆ ಜಗತ್‌ವಾಳ ಹುಯಿರ‍್ಹಾಹೋತ್ತೊ, ಆ ಜಗತ್‌ವಾಳು ತುಮೆ ಇವ್ಣ ಭಣಿವಾಳ ಕರಿ ಪ್ಯಾರ್ ಕರ‍್ಯುಹೊತ್. ಕತೋಬಿ ತುಮೆ ಜಗತ್‌ ಭಣಿವಾಳ ಕಾಹೆತೆ ಇನಖ್ಹಾಜೆ, ಅಜು಼ ಮೇ ತುಮೂನ ಜಗತ್‌ಮಾಥು ಚೂ಼ಣಿನ್ ಕಾಡಿರಾಖ್ಯೋಸ್ತೆ ಇನಖ್ಹಾಜೆ, ಆ ಜಗತ್‌ ತುಮಾರಪರ್ ವಹೇರ್‌ ಕರಾಸ್.
20 ಯಾದ್ ಕರಿಲೆವೊ ಆಳ್‌ ಯಜಮಾನ್‍ಥಿ ಮೋಟೊ ಕಾಹೆ’ ಕರಿ ಮೇ ಬೋಲ್ಯೋತೆ ವಾತೆ ಶಾತ್‍ಕತೊ ಇವ್ಣೆ ಮನ ಖ್ಹತಾಯೂತೊ, ತುಮೂನಾಬಿ ಖ್ಹತಾವ್‌ಶೆ; ಇವ್ಣೆ ಮಾರಿ ವಾತೇನ ಪಾಡಿ ಚಾ಼ಲ್ಯುತೊ, ತುಮಾರಿ ವಾತೆನಾಬಿ ಪಾಡಿ ಚಾ಼ಲ್‌ಷೆ.
21 ಕತೋಬಿ ಇವ್ಣೆ ಮನ ಮೋಕ್ಲಿರಾಖ್ಯೊತೆ ಇನ ಮಾಲುಮ್ ಕರ‍್ಯುಕೊಂತೆ ಇನಖ್ಹಾಜೆ ಆ ಖ್ಹಾರುಮಾರ ನಾಮ್‍ಥಿ ತುಮೂನ ಕರ್ಶೆ.
22 ಮೇ ಐನ್ ಆ ಜಗತ್ನಿ ಅದ್ಮಿವೊನಿ ಜೋ಼ಡೆ ವಾತೆ ನಾ ಬೋಲ್ಯೊಹೊತ್ತೊ, ಇವ್ಣುನ ಪಾಪಿ ದೋಷಿಕರಿ ಬೋಲಾಯುಹೊತ್‌ ಕೊಯ್ನಿ. ಕತೋಬಿ ಹಮ್ಕೆ ಮೇ ಐನ್ ವಾತೆ ಬೋಲಿರಾಖ್ಯೊಸ್ ಇನಖ್ಹಾಜೆ ಇವ್ಣ ಪಾಪ್ನ ಖಿವು ಭಾಣುಬಿ ಕೊಯ್ನಿ.
23 ಮಾರಪರ್ ವಹೇರ್‌ ಕರಾವಾಳು ಮಾರ ಬಾಪರ್‌ಬಿ ವಹೇರ್‌ ಕರಾವಾಳು ಹುಯಿರ‍್ಹುಸ್‍.
24 ಏಕ್ ವಖ್ಹತ್ ಖ್ಹಾರಕಾಮ್ನ ಮೇ ಇವ್ಣಾಮ ನಾಕರ‍್ಯೊಹೋತ್ತೊ, ಇವ್ಣಾಪರ್ ಪಾಪ್ ಕೋ ರ‍್ಹಯುಹೋತ್ನಿ, ಕತೋಬಿ ಹಮ್ಕೆ ಇವ್ಣೆ ದೇಖಿರಾಖ್ಯೂಸ್‌, ತೋಬಿ ಮಾರಪರ್‌ಬಿ ಮಾರ ಬಾಪರ್‌ಬಿ ವಹೇರ್‌ ಕರಾಸ್.
25 ‘ಇವ್ಣೆ ಮನ ನೀಕೊಯ್ನಿತೇಸ್‌ ವಹೇರ್‌ ಕರ‍್ಯು’ ಕರಿ ಇವ್ಣಿ ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ವಾತೆ ಪೂರಹುವಾನಖ್ಹಾಜೆ ಅಮ್ ಹುಯೂತೆ.
26 “ಬಾ ಕಂಥು ಆವ್‌ಶೇತೆ ಯೋ ಮದತ್‌ ಕರವಾಳೊ ಆತ್ಮ ಹುಯಿರ‍್ಹೋಸ್. ಯೊ ದೇವ್ನು ಖ್ಹಾಚ಼ನ ಬೋಲಸ್, ಯೋ ತುಮುನ ಮಾರಿ ಬಾರೇಮ ಸಾಕ್ಷಿ ಬೋಲ್‌ಶೆ.
27 ತುಮೆ ಶುರುವಾತ್‌ಥೂಸ್ ಮಾರ ಜೋ಼ಡೆ ಥಾತೆ ಇನಖ್ಹಾಜೆ, ತುಮೇಬಿ ಮನ ಸಾಕ್ಷಿ ಹುಯಿರಾಸ್.