13
ಯೇಸುನೆ ಇನ ಶಿಷ್ಯರ್‌ನ ಗೋಡ ಧೋಯೋತೆ
1 ಪಸ್ಕ ಪುಜಾ಼ನ ಅಗಾಡಿ ಯೇಸು ಆ ಜಗತ್ನ ಮ್ಹೇಲಿನ್, ಬಾಕನ ಜಾ಼ವಾನಿ ವಖ್ಹತ್ ಐಗೈ ಕರಿ ಮಾಲುಮ್ ಕರೀನ್, ಆ ಜಗತ್‌ಮ ಛಾ಼ತೆ ಇನು ಕರಿ ಥೂತೆ ಯೋ ಖ್ಹರಾನ ಹಮೇಶ ಪ್ಯಾರ್ ಕರ‍್ಯೊ ಅಜು಼ ಖರ್ತಿಲಗೂಬಿ ಪ್ಯಾರ್ ಕರ್ತೊಸ್ ಆಯೊ.
2 ಯೇಸು ಅಜು಼ ಇನ ಶಿಷ್ಯರ್‌ ಖಾಣನ ಬೆಠಾಥ. ಯೇಸುನ ದೋಕೇಥಿ ಧರಿದೇಣು ಕರಿ ಬೋಲಾನಿ ಸೋಚ್ನ, ಸೀಮೋನನೊ ಛಿಯ್ಯೊ ಇಸ್ಕರಿಯೋತ ಯೂದಾನ ಮನ್‌ಮ ಶೈತಾನ್ನೆ ಅಗಾಡಿಸ್ ಘಾಲಿದಿದೋಥೊ.
3 ಬಾನೆ ಖ್ಹಾರಿಸ್ ಅದಿಕಾರ್‌ನ ಇನ ಹಾತ್‌ಮ ದೀರಾಖ್ಯೊಸ್ ಕರಿ ಯೇಸುನ ಮಾಲುಮ್ ಥೂ; ಅತ್ರೇಸ್ ಕಾಹೆತೆ ಯೇಸುನ ದೇವ್‌ಕಂಥೊ ಐರ‍್ಹೋಸ್ ಅಜು಼ ಪಾಛೊ಼ ದೇವ್‌ಕನ ವಳ್ಯೊಜ಼ವುಸ್‌ ಕರೀಬಿ ಮಾಲುಮ್ ಥೂ.
4 ತದೆ ಯೇಸುನೆ ಖಾಣನ ಮ್ಹೆಂದಿನ್, ಉಪ್ಪರ್ ಉಠೀನ್, ಇನು ಉಪ್ಪರ್‌ಲ್ಯು ಝ಼ಗ್ಗಾನ ಕಾಡಿನಾಖಿನ್, ಪಿಛೋ಼ಡಿನ ಪಾಡೀನ್, ಕಂಬರ್‌ನ ಭಾಂದಿಲಿದೊ.
5 ಅಜು಼ ಏಕ್‌ ಕಟೋರಾಮ ಪಾಣಿ ಭರಿನ್, ಶಿಷ್ಯರ್‌ನ ಗೋಡ ಧೊವಾಲಗ್ಯೊ ಅಜು಼ ಇನೆ ಕಂಬರ್‌ನ ಭಾಂದಿರಾಖ್ಯೊಥೋತೆ ಪಿಛೋ಼ಡಿಥಿ ನುಛ್ಛಾ಼ಲಗ್ಯೊ.
6 ಯೊ ಸೀಮೋನ್ ಪೇತ್ರಕನ ಆವಾದಿನ್, ಇನೆ, “ಪ್ರಭು, ತೂ ಮಾರ ಗೋಡ ಧೊವಾಸ್ಕಿಶು?” ಕರಿ ಬೋಲ್ಯೊ.
7 ಯೇಸುನೆ ಇನ, “ಮೇ ಶಾತ್‌ ಕರುಕರುಸ್ತೆ ಕರಿ ಹಮ್ಕೆ ತುನ ಮಾಲುಮ್ ಕೋ ಪಡ್‌ಶೇನಿ, ಕತೋಬಿ ಬಾದ್‌ಮ ತುನ ಮಾಲುಮ್ ಪಡ್‌ಶೆ” ಕರಿ ಬೋಲ್ಯೊ.
8 ತದೆ ಪೇತ್ರನೆ, “ತೂ ಮಾರ ಗೋಡಾನ ಕದೇಸ್‌ ನಾ ಧೋವ್‌ಣು!” ಕರಿ ಬೋಲ್ಯೊ. ಯೇಸುನೆ ಇನ, “ಮೇ ತಾರ ಗೋಡ ನಾ ಧೋಯೋತೊ, ತೂ ಮಾರೊ ಶಿಷ್ಯ ಹುಯಿರ‍್ಹವಾನ ಕೋ ಹುವಾನಿ” ಕರಿ ಬೋಲ್ಯೊ.
9 ತದೆ ಸೀಮೋನ್ ಪೇತ್ರನೆ, “ಪ್ರಭು, ಖಲಿ ಮಾರ ಗೋಡಾಸ್‌ ಕಾಹೆತೆ, ಮಾರ ಹಾತ್‌ನಾಬಿ, ಮುಡ್‌ಕ್ಯನಾಬಿ ಧೊವ್‌!” ಕರಿ ಬೋಲ್ಯೊ.
10 ಯೇಸುನೆ ಇನ, “ಪಾಣಿ ನ್ಹೊಯಿರಾಖವಾಳನು ಆಂಗ್‌ತನ್‌ ಅಖ್ಖುಸ್ ಪಾಕ್‌ ರ‍್ಹೇಸ್, ಖಲಿ ಗೋಡ ಧೋಯೂತೊ ಬಶ್‌. ತುಮೆ ಖ್ಹಾರು ಪಾಕ್‌ ಹುಯಿರ‍್ಹಾಸ್‌, ಕತೋಬಿ ತುಮಾರಾಮ ಹರೇಕ್ ಜ಼ಣೊ ಪಾಕ್‌ ಕಾಹೆ” ಕರಿ ಬೋಲ್ಯೊ.
11 ಯೇಸುನ ಇನ ಧೋಕೇಥಿ ಧರಿ ದಿಶೇತೆ ಕೋಣ್ ಕರಿ ಮಾಲುಮ್ ಥೂತೆ ಇನಖ್ಹಾಜೆ, ಇನೆ, “ತುಮಾರಾಮ ಹರೇಕ್ ಜ಼ಣು ಪಾಕ್‌ ಕಾಹೆ” ಕರಿ ಬೋಲ್ಯೋತೆ.
12 ಯೇಸುನೆ ಇವ್ಣ ಗೋಡ ಧೊವಾನ ಬಾದ್‌ಮ, ಇನು ಉಪ್ಪರ್‌ಲ್ಯು ಝ಼ಗ್ಗಾನ ಪೇರ‍್ಹಿಲೀನ್‌, ಪಾಛು಼ ಹಿಜ಼್ಜಾ ಬೇಶಿನ್ ಇನೆ ಬೋಲ್ಯೊಕಿ, “ಮೇ ತುಮೂನ ಕರ‍್ಯೊತೆ ಶಾತ್‌ ಕರಿ ತುಮೂನ ಮಾಲುಮ್ ಪಡ್ಯುಕಿಶು?” ಕರಿ ಪುಛಾ಼ಯೊ.
13 “ತುಮೆ ಮನ ಗುರು, ಪ್ರಭು ಕರಿ ಬುಲಾವಸ್‌, ತುಮೆ ಇಮ್‌ ಬುಲಾವಸ್ತೆ ಬರಾಬರಸ್‌, ಶನಕತೊ ಮೇ ಇಮ್‌ನೋಸ್‌.
14 ತುಮಾರೊ ಪ್ರಭು ಅಜು಼ ಗುರು ಹುಯಿರ‍್ಹೋತೆ ಮೇ, ತುಮಾರ ಗೋಡಾನ ಧೋಯೋತೆ ಇಮ್ಮಸ್, ತುಮೇಬಿ ಬಿಜೇಕ್‍ನ ಗೋಡ ಧೋವ್‌ಣು.
15 ಮೇ ತುಮೂನ ಕರ‍್ಯೊತೆ ಇಮ್ಮಸ್ ತುಮೇಬಿ ಕರ‍್ನು, ಕರಿ ಮೇ ತುಮೂನ ಖ್ಹಂಜ಼್‌ಕಾರ್ ವತಾಳಿರಾಖ್ಯೋಸ್‌.
16 ಮೇ ತುಮೂನ ಖ್ಹಾಚ ಬೋಲುಕರುಸ್, ಆಳ್‌ ಯಜಮಾನ್‍ಥಿ ಮೋಟೊ ಕಾಹೆ, ಅಜು಼ ಖಬರ್‌ದ್ಯವಾಳೊ ಇನ ಮೋಕ್‌ಲ್ಯೊತೆ ಇನೇಥಿ ಮೋಟೊ ಕಾಹೆ.
17 ತುಮೆ ಅನ ಮಾಲುಮ್ ಕರಿಲೀನ್, ಅನೀನಿಘೋಣಿ ಚಾ಼ಲಿಲಿದಾತೊ ತುಮೆ ಧನ್ಯರ್ ಹುಯಿರ‍್ಹಾಸ್‌!
18 “ಮೇ ತುಮಾರ ಖ್ಹಾರಾನಿ ಬಾರೇಮ ಕೋ ಬೋಲುಕರುನಿ: ಮೇ ಚೂ಼ಣಿರಾಖ್ಯೋಸ್ತೆ ಇವ್ಣಿ ಬಾರೇಮ ಮನ ಮಾಲುಮ್, ಕತೋಬಿ ‘ಮಾರ ಜೋ಼ಡೆ ಖಾಣು ಖಾವಳೋಸ್‌ ಮನ ಧೋಕ ದಿದೊ’ ಕರಿ ಧರ್ಮಶಾಸ್ತ್ರಮ ಛಾ಼ತೆ ವಾತೆ ಚಾ಼ಲ್ನು.
19 ಯೋ ಚಾ಼ಲಾನಿ ವಖ್ಹತ್‌ಮ, ಮೇಸ್ ಕ್ರಿಸ್ತ ಕರಿ ತುಮೆ ನಂಬಾನಖ್ಹಾಜೆ, ಯೋ ಚಾ಼ಲಾನ ಬೋಲುಕರುಸ್.
20 ತುಮೂನ ಖ್ಹಾಚ ಬೋಲುಸ್, ಮೇ ಮೋಕ್ಲುಸ್ತೆ ಇವ್ಣುನ ಬುಲೈಲ್ಯವಾಳು, ಮನಾಬಿ ಬುಲೈಲ್ಯವಾಳು ಹುಯಿರ‍್ಹುಸ್‍. ಅಜು಼ ಮನ ಬುಲೈಲ್ಯವಾಳು ಮನ ಮೋಕ್‌ಲ್ಯೊತೆ ಇನಾಸ್ ಬುಲೈಲ್ಯವಾಳು” ಹುಯಿರ‍್ಹುಸ್‍.
ಯೇಸುನೆ ಇನ ಧೋಕೊ ದಿಶೇತೆ ಬಾರೇಮ ಬೋಲ್ಯೋತೆ
(ಮತ್ತಾಯ 26:20-25; ಮಾರ್ಕ 14:17-21; ಲೂಕ 22:21-23)
21 ಯೇಸು ಆ ಬೋಲಾನ ಬಾದ್‌ಮ, ಯೇಸುನ ಆತ್ಮಮ ಘಣು ದುಖ್ ಹುಯು, ಅಜು಼ ಇನೆ, “ಮೇ ತುಮೂನ ಖ್ಹಾಚ ಬೋಲುಸ್, ತುಮಾರಾಮ ಏಕ್‌ ಜ಼ಣೊ ಮನ ಧೋಕೇಥಿ ಧರಿದಿಶೆ” ಕರಿ ಸಾಕ್ಷಿ ಬೋಲ್ಯೊ.
22 ತದೆ ಇನ ಶಿಷ್ಯರ್‌ನೆ ಏಕ್‌ನ ಭಣಿ ಏಕ್‌ ದೇಖಿನ್, ಆ ಕಿನಿ ಬಾರೇಮ ಬೋಲುಕರಾಸ್ತೆ ಕರಿ ಗುಮಾನಿಕರ‍್ಯು.
23 ಶಿಷ್ಯರ್‌ಮ ಯೇಸುನೊ ಪ್ಯಾರ್‌ನೊ ಶಿಷ್ಯ ಏಕ್‌ ಥೊ, ಯೊ ಇನ ಚಿಕೈನ್‌ ಬೆಠೋಥೊ.
24 ತದೆ ಸೀಮೋನ್ ಪೇತ್ರನೆ ಯೋ ಶಿಷ್ಯನ, “ಯೋ ಕಿನಿ ಬಾರೇಮ ಬೋಲುಕರಾಸ್ತೆ ಕರಿ ಇನ ಪುಛಾ಼ವ್‌” ಕರಿ ಇಷಾರ್ಕೊ ಕರ‍್ಯೊ.
25 ಇನಖ್ಹಾಜೆ ಯೋ ಶಿಷ್ಯನೆ ಯೇಸು ಭಣಿ ಝು಼ಕಿನ್‌, “ಪ್ರಭು, ಯೋ ಕೋಣ್?” ಕರಿ ಪುಛಾ಼ಯೊ.
26 ಯೇಸುನೆ, “ಮೇ ಆ ರೋಟಾನ ಚೋ಼ಪ್‍ಡಿನ್, ಕಿನ ದೆವ್‍ಸ್ಕಿ, ಯೋಸ್‌ ಯೋ ಅದ್ಮಿ” ಕರಿ ಬೋಲಿನ್, ರೋಟಾನ ಟುಕ್ಡಾನ ಪಾಡೀನ್, ಕಟೋರಿಮ ಚೋ಼ಪ್‍ಡಿನ್, ಸೀಮೋನ್ ಇಸ್ಕರಿಯೋತನೊ ಛಿಯ್ಯೊ ಯೂದಾನ ದಿದೊ.
27 ಯೂದಾನೆ ಯೋ ರೋಟಾನ ಲೇತಾಸ್‌ನ, ಶೈತಾನ್ ಇನಾಮಹಿ ಪೇಶಿಗಯೊ. ತದೆ ಯೇಸುನೆ ಇನ, “ತೂ ಕರಾನ ವಳ್ಯೊಜಾ಼ಸ್ತೆ ಕಾಮ್ನ ಒಗ್ಗಿಸ್‌ಮ ಕರ್‌!” ಕರಿ ಬೋಲ್ಯೊ.
28 ಕತೋಬಿ ಯೇಸುನೆ ಇನ ಅಮ್ ಶನಖ್ಹಾಜೆ ಬೋಲ್ಯೊ ಕರಿ ಬೋಲಾನು ಖಾಣನ ಬೆಠುಥೂತೆ ಇವ್ಣಾಮ ಕಿನಾಬಿ ಮಾಲುಮ್ ಕೋ ಹುಯೂನಿ.
29 ಇವ್ಣಾಮ ಥೋಡಾನೆ, ಯೂದಾನ ಹಾತ್‌ಮ ಪೈಶಾನಿ ಚ಼ಂಚಿಥೀತೆ ಇನಖ್ಹಾಜೆ ಯೇಸು ಇನ ಪೂಜಾ಼ನ ಅಪ್ಣುನ ಹೋಣುತೆ ಅಖ್ಖು ಲೀಲೆವೊ ಕರೀಕಿ, ನತರ್‌ಕಿ ಗರೀಬ್‌ನ ಶಾತ್‌ತೋಬಿ ದೇ ಕರಿ ಶುಕಿ, ಯೇಸುನೆ ಬೋಲ್ಯೊ ಕರಿ ಲ್ಹಾಯು.
30 ಯೂದಾನೆ ಯೋ ರೋಟಾನ ಲೀನ್‌, ತದ್‌ನು-ತದ್ದೇಸ್ ಭಾರ್ ಚ಼ಲೆಗಯೊ. ತದೆ ರಾತ್ ಹುಯಿರ‍್ಹೀಥಿ.
ನವಿ ಹುಕುಮ್‌
31 ಯೂದ ಜಾ಼ವಾನ ಬಾದ್‌ಮ, ಯೇಸುನೆ, “ಹಮ್ಕೆ ಅದ್ಮಿನೊ ಛಿಯ್ಯಾನ ಮಹಿಮೆ ಹುಯು; ಅಜು಼ ಇನೇಥಿ ದೇವ್ನ ಮಹಿಮೆ ಪ್ರಕಟ್ ಹುಯು.
32 ಏಕ್‌ ವಖ್ಹತ್, ಅದ್ಮಿನೊ ಛಿಯ್ಯಾಥಿ ದೇವ್ನ ಮಹಿಮೆ ಹುಯು ಉಶೇತೊ, ಖ್ಹುದ್ ದೇವ್‌ಥೀಸ್‌ ಅದ್ಮಿನೊ ಛಿಯ್ಯಾನಾಬಿ ಮಹಿಮೆ ಉಶೆ,ಅಜು಼ ಇನ ಒಗ್ಗಿಸ್ ಮಹಿಮೆ ಕರ್ಶೆ.
33 ಮಾರ ಲಡ್ಕಾ, ಬಿಜು಼ ಥೋಡಿ ವಖ್ಹತ್ ಮೇ ತುಮಾರ ಜೋ಼ಡೆ ರ‍್ಹೀಶ್. “ಮನ ಢೂಂಡ್‌ಶು, ಕತೋಬಿ ಯೆಹೂದ್ಯರ್‌ನ ಬೋಲ್ಯೋತೆ ಇಮ್ಮಸ್, ಮೇ ಜ಼ವುಸ್ತೆ ಹಿಜ್ಜಾ಼ ತುಮೆ ಕೋ ಆವಾನ ಉಶೇನಿ” ಕರಿ ಮೇ ಹಮ್ಕೆ ತುಮೂನಾಬಿ ಬೋಲುಸ್.
34 ಹಮ್ಕೆ ಮೇ ತುಮೂನ ಏಕ್‌ ನವಿ ಹುಕುಮ್‌ ದೆವುಸ್ ತುಮೆ ಏಕ್‌ಥಿ-ಏಕ್‌ ಲಾಡ್‌ ಕರೊ. ಮೇ ತುಮೂನ ಲಾಡ್‌ ಕರ‍್ಯೊತೆ ತಿಮ್ಮಸ್, ತುಮೇಬಿ ಏಕ್‌ಥಿ-ಏಕ್‌ ಲಾಡ್‌ ಕರ್ನುಸ್‍ಕರ‍್ನು.
35 ತುಮೆ ಏಕ್‌ಥಿ-ಏಕ್‌ ಪ್ಯಾರ್ ಕರ‍್ಯಾತೊ, ತದೆ ತುಮೆ ಹರೇಕ್ ಜ಼ಣು ಮಾರ ಶಿಷ್ಯರ್‌ ಕರಿ ಮಾಲುಮ್ ಉಷೆ” ಕರಿ ಬೋಲ್ಯೊ.
ಪೇತ್ರ ಧೋಕೊ ದಿಶೇತೆ ಬಾರೇಮ ಯೇಸುನೆ ಪಹಿಲೇಸ್ ಬೋಲ್ಯೋತೆ
(ಮತ್ತಾಯ 26:31-35; ಮಾರ್ಕ 14:27-31; ಲೂಕ 22:31-34)
36 ಸೀಮೋನ್ ಪೇತ್ರನೆ ಯೇಸುನ, “ಪ್ರಭು, ತೂ ಕಿಜ಼್ಜಾ ವಳ್ಯೊಜಾ಼ಸ್‌?” ಕರಿ ಪುಛಾ಼ಯೊ.
ತದೆ ಯೇಸುನೆ, “ಮೇ ವಳ್ಯೊಜ಼ವುಸ್ತೆ ಹಿಜ್ಜಾ಼ ತೂ ಹಮ್ಕೆ ಆವಾನ ಕೋ ಉಶೇನಿ, ಕತೋಬಿ ಬಾದ್‌ಮ ತೂ ಮಾರ ಪೀಠೆ ಐಶ್‌” ಕರಿ ಬೋಲ್ಯೊ.
37 ಪೇತ್ರನೆ ಯೇಸುನ, “ಪ್ರಭು, ಮೇ ಶನ ಹಮ್ಕೆ ತಾರ ಪೀಠೆ ಆವಾನ ಕೋ ಉಶೇನಿ? ಮೇ ತಾರಖ್ಹಾಜೆ ಜಾನ್‌ ದೆವಾನಾಬಿ ತಯಾರ್ ಛು಼!” ಕರಿ ಬೋಲ್ಯೊ.
38 ಯೇಸುನೆ ಇನ ಪುಛಾ಼ಯೊ, “ತೂ ಖ್ಹಾಚಮಾಬಿ ಮಾರಖ್ಹಾಜೆ ಜಾನ್‌ ದ್ಯವಾನ ತಯಾರ್ ಛಾ಼ಕಿ ಶು? ಮೇ ತುನ ಖ್ಹಾಚ ಬೋಲುಸ್, ಮುರ್‌ಗೊ ಬಾಂಗ್‌ ದ್ಯವಾನ ಅಗಾಡಿ, ತೂ ಮಾರಿ ಬಾರೇಮ ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ತೀನ್‍ಹಲ್ಲ ಬೋಲಿಶ್” ಕರಿ ಬೋಲ್ಯೊ.